#البطل_المغمور "شمس الغروب"
#الجزء_التاسع_والعشرين
#الجمان_الفريد
صلوا قبل...بعدين اقروا...
الصلاة اولا💓💓💓💓
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
الساعه الخامسة والنصف وخمس دقائق عصرا...
في مكان ما في مصحة الإدمان...
بعيد عن الأنظار...
كان واقف ومعاه بنته يستنوا فيه...
هي كانت ملهوفه تشوف خوها...
وهو كان متوتر..خايف من ردود افعال ولده وبنته تجاه بعض..
عيونه ع المكان اللي يراجي يجي منه ولده وحاس الثواني ولت دقايق...والدقايق ولت ساعات..
لعند ماشاف ظلال تتحرك جايه بإتجاههم...
سمع بنته لما قالت...
"بابا"...
هيثم وعيونه على نفس المكان:زي ماقتلك بابا..
سارة هزت راسها بإيجاب...
خدت نفس عميق وزفرت تحاول تخفف شويه من توترها...
لعند ماشافوا عيونها خوها اللي ليها اكثر من شهرين ماشافاته...
شكله متغير...ملامحه متغيره...حساته كبر عشرين سنه على عمره....يبان تعب الدنيا كلها فيه...
خوها صاحب الجسم الرياضي...الحيوي النشيط...صاحب المشية الواثقه والإبتسامه المغرورة...
تشوف فيه توا...هزيل...يدوب قادر يبدل خطاويه...ابتسامته مالهاش وجود...عيونه يشوفوا للأرض بنظرات كئيبه...
هو كان ماشي مع الدكتور...
ماكانش يعرف بوجود اخته وبوه...ع باله بيطلع لحديقة المصحه زي مادارو مع غيره من نزلاء المصحه..
الدكتور:زياد...شوف من جاك..
رفع عيونه بالسيف وشاف قدامه....
وقف....جمد في مكانه...
وعيونه الذبلانه انفتحوا ع وسعهم...
ودقات قلبه...تزيد...وتزيد...وتزيد...
هي اللي عيونها غرقوا بالدموع وفاضوا...
رسمت ع وجهها ابتسامه شوق...
خلت دموعه يعبوا عيونه...ع قد ماكان مشتاق لأخته ع قد ماكان متحشم منها...
نزل عيونه لوطا وهو مزال مصدوم...ودموعه بدوا يطيحوا وحده ورا التانيه...
سارة بنبرة مخنوقه:بنمشيله بابا..
هيثم وهو يشوفله بألم قال:بري...
مجرد ماسمعت سارة هالكلمه...مشت لخوها بسرعه وبدون اي مقدمات ارتمت في حضنه وحاوطاته بقوة وهي تقول ببكي: استاحشتك زيزو...استاحشتك موت يامعفن...استاحشتك هلبه..وقعدت تخبط فيه ع ظهره خبطات لاخفيفه ولاقوية..
وهو مازال مصدوم يسمع في صوتها ويحس بضرباتها وهو مش مصدق انها قدامه..
وخرت عنه وهي شاداته قعدت تشبحله وهي تقول:شن تشبحلي هكي زي العبيط نقولك استاحشتك ونضبط ونبكي ياعديم الشاعريه..
هو غلباته ضحكه لما سمع كلامها نفس الكلام اللي تقوله فيه زمان...
لما ضحك ضماته وقالت:الله ياربي قداش استاحشتك...استاحشتك موت...
هو حط يده ع راسها وقال بصوت مبحوح:حتى اني..
بعدت وقعدت تشبحله..
حطت يدها ع خده وقالت....خي كل شي من غيرك..خي..
هو شد يدها وقرب باس راسها ...
.....والدكتور وهيثم......
واقفين بعيد عنهم شوي ويشبحولهم..
الدكتور:كويس اللي درته..زي ماقتلك قبل الدعم الأسري مهم جدا لعلاج المدمن...لما يلقى روحه مازال محبوب ومدعوم من عيلته برغم الاخطاء اللي دارها تولي عنده اسباب زياده تدفعه انه يتعالج بش يشفى في أسرع وقت..
ونرجع نقولك يادكتور المرحلة هادي اهم مرحله في العلاج واصعب مرحله ممكن تصير فيها هلبه حاجات نبيك تكون مستعد ليها من توا...
هيثم وهو يشبح لزياد كان يفكر في كلام الدكتور بقلق وخوف خلاه يخاطب نفسه بش يهون عليها قائلا
"الله المستعان...ولاحول ولاقوة إلا بالله..."
•••••°°°°°°°••••••°°°°°°•••••••
في الحوازة...
كانوا رتاج ودانيه مع مجاهد مقعمزين في تركينه ويهدرزوا..
وقريب عليهم..
سدينه ادير العاله وحداه ماجده ومجيد يهدرزوا..
ورشيد كالعاده غارق في عالم هاتفه...
....عند مجاهد وخواته.....
رتاج:والله ماتخمم فيا وخيي ولاتخاف مرتاحه في حياتي والحمد لله..
هو تنهد وهز راسه بدون مايعلق..
ودانيه تشوفله بإبتسامه قالت:مش قتلك اني..
هو ابتسم وخدي من يدها حبة عنب من العنقود اللي تاكل منه وقال:باهي القرايه امورها تمام؟..وكلي العنبه..
رتاج:الحمد لله خاشين ع الامتحانات النهائيه توا لقطت المنهج اللي فاتني وشادتها قرايه..
مجاهد:ايوه هدا اهم شي قرايتك..الشهاده لازم تاخديها..
رتاج :إن شاء الله..
دانيه وهي تشبح لرشيد:اللي مسيب قرايته ومش مدورها بالمره هداكا..
شبحوا لرشيد..
رتاج:بالله وخيي الفترة هادي خلي عينك عليه وضعه مش عاجبني..
مجاهد وهو يشبح لرشيد بشك:حتى اني هكي داير...وياويله لو شفت عليه شي مايعجبنيش..
دانيه ورتاج شبحوا لبعض بضيق...
......ورشيد هايم في تليفونه.....
كانوا بوه ومرت بوه وامه يهدرزوا..
مجيد:لادوا عليه فروخ الحرام وهبعوا بيه
ماجده:ايه وفوقها نقولها بوه كان هامله لو كان وراه ويتابع فيه راهو ماوصلش لهني..
سدينه:الحزن اثر فيهم..الفقد واعر ياماجده..
ماجده:ايه ومجرباته هدا علاش اني لايمه ع هيثم...وبعدين الولد يبي بوه ديما يقعد وراه..
مجيد:لالا مش شرط ياماجده..اهو مجاهد تشوفي فيه قدامك الله يبارك عليه خلا روحه راجل بروحه..
ماجده:مجاهد الله يبارك عليه...لكن مش كلهم هكي في من يبي بوه يقعد وراه يراقب ويتابع ويرد باله..يبوا من يوقف فوق روسهم ويوجه مش يسيبوهم هكي..
مجيد :الربايه اللي هكي ماديرش راجل يعتمد على نفسه..
ماجده:ماقلنا اخنقه وحاصره حني..لكن خلي عينك عليه ماتخليشي سايب..
سدينه:صدقتي ياوخيتي..
مجيد بتهكم:صدقتي وخيتي...ايه ماهو رينا ربايتك في بناويتك..
سدينه انصدمت..
ماجده رفعت حواجبها وقالت:وخيرهم بناتها شن خاصهم..ريت البنات كلهم زيهم..حشمة وادب واخلاق.
مجيد ابتسم بتهكم وقال:تي تعرفي البنات هادم كان مش اني قاعد وراهم وممشيهم ع الصراط المستقيم راهم صاعوا..
سدينه قعدت تشوف في البراد المحطوط ع غاز الشاهي وهي مضايقه وشاده دموعها..
ماجده:كويس خليك معاهم كلهم هكي مش غير البنات..
مجيد:ماتخمميش انتي ياماجده نعرف شن ندير وكيف نتصرف..
ماجده حطت ايديها ع بعض وتنهدت بدون ماتقول كلمه..
ورشيد مرة مرة يشبح لماجده بحده..
ع جية البنات وخوهم...
مجاهد:حبيبتي..
شبحتله امه وابتسمت..
جاها كب ع راسها وقعمز جنبها...
وفتح الكيسه اللي كان جيبها وطلع منها جزء من العبايه وقال...ان شاء الله كل عام وانتي منورة حياتي ياحياتي..
ابتسمت سدينه من بين دموعها وقالت..والله ياولدي انت بروحك هديه من ربي مانبي معاك شي..
مجاهد بضحكه:ياعمري..وضمها ليه...وهي شداته وقعدت تبكي..
وماجده والبنات متأثرات..
ومجيد يشوفلهم ع جنب بعدم رضا...
دانيه جتها وقعمزت قدامها وهي تقول:ياسوسو شوفي شن خديتلك شوفي..
بعدت سدينه عن مجاهد وهي تمسح في دموعها بطرف المحرمه وتقول:شن جبتي!؟
مدتلها هديتها المغلفه وقالت:افتحيها..
خدتها سدينه وهي تضحك...حولت الغلاف...بانت عليها الهديه قعدت تقول بضحكه:عطيك الهني يادانيه..
دانيه بضحكه:معاش تهدرزيلي ع فناجين الشربه افتحي مواضيع جديده..
ضحكوا...ودانيه معاهم.. ومجيد يوزع في نظره ع المزرعه قدامه ومتجاهلهم..
رتاج بإبتسامه مدت لأمها كيسة محل مجوهرات وهي تقول:مش من قيمتك يما..
خدت سدينه الكيسه وهي تقول:تي غير علاش بس والله مالازم...
رتاج بضحكه:غير افتحيها وقولي شن رايك..
طلعت سدينه علبه صغيره فتحتها انذهلت وشبحت لبنتها:هلبه هكي يارتاج..
رتاج وهي مقعمزة مقابلتها قالت بإبتسامه:مش هلبه عليك حبيبتي...
ومجيد يشوفلهم...
مدت سدينه لماجده وقالت:شوفيه..
خداته ماجده وهي تقول:ماشاء الله ماشاء الله...مش خسارة في اميمتهم...
مجاهد طلع من جيب جاكته علبه مستطيله ومدها لماجده قال:ماعرفتش شن ناخدلك حق..مش حاجه كبيره هي ان شاء الله تعجبك..
ماجده وهي مندهشه:ياوخيتي سلمه...غير علاش بس..
وخدتها فتحتها لقت فيها حديده فضه شكلها حلو بالمره..ربي يعلي قدرك وليدي ويجبر بخاطرك..ربي يفرحك بيه ياسدينه..
سدينه وهي مبتسمه:آمين يارب..
ماجده وهي تضحك ودموعها فعيونها:والله ماعارفه شن نقول حاسه روحي بنبكي..وحطت يدها ع عيونها وقعدت تبكي..
دانيه:لاااا..
سدينه:ماجده..
مجاهد حط يده ع راسها وقربه ليه وباسه بعدين قال:ربي يحفظك خالتي ماجده....
ماجده وهي تمسح في دموعها:ويحفظك ويعليك ويجعل خاطرك ديما مجبور
مجيد:ياحسرة علينا..
كلهم توجهوا بأنظارهم ليه...ومجاهد قال بإبتسامه:راجي لشهر سته ياغالي ان شاء الله وتو نراضوك..
مجيد بتساؤل:ايش معنى شهر سته؟
مجاهد بضحكه:كيف ماتعرفش!؟ حتى انتم دارولكم يوم في شهر سته..
ضحكوا اللي حواليه وبوه قال..
مجيد:خلاص معناها اهو عطاكم العلم..نبوا حاجه مقومة يارتاج اها...ههههه..
رتاج بضحكة مجامله:ان شاء الله..ان شاء الله..
والباقي يتبادلوا في النظرات....
اما دانيه كانت تشوف للعاله وهي شادة ضحكتها....
•••••°°°°°•••••°°°°°•••••
في "مول" كبير فالعاصمه...
كانت تتدهور هي وبنات في المحلات...
طلعتهم تغير جوهم وفي نفس الوقت بتشيريلهم لبس ليوم الطفل اللي حيكون يوم السبت..
خشوا لواحد من محلات ملابس الاطفال..
ريحان:هدا عمتو هدا..
شافت نسيبه للقفطان المعلق نزلاته وحطاته ع جسم ريحان تشوف القياس..
لقاته قصير هلبه قالت...مش حلو عمتو قصير هلبه...
ريحان:لالا عمتو حلو..
نسيبه:انتي بنوته مؤدبه ولا؟
ريحان:ايه...
نسيبه:خلاص البنوتات المؤدبات مايلبسوش هكي..
جنان:اني مانبيش هكي عمتو..نبي قفطان البنوتات المؤدبات..
ضحكت نسيبه..
ريحان:حتى اني عمتو..
نسيبه:تمام...ردت القفطان في مكانه ...
وقعدوا يدوروا ع طلبهم في المحل مالقوش..
نسيبه:ماطرموش الشوارب مش مروحين قبل نشروا ان شاء الله..
ارتسمت ع وجوههم ابتسامة فرح..
هي ضحكت وقالت:هيا...
ومشوا مع بعض...
•••••°°°°°°••••••°°°°°••••••
يشوف لبوه وهو واقف ع الدكتور يتناقش هو وياه..
قال لأخته:شن دايرين معاه؟
اخته التفتت وشبحت لبوها لحظات بعدين شبحت لخوها وقالت:عندها الحق ماما في حبها ليه ودفاعها عنه
زياد شبحلها بحزن وقال:كيف قادرين تعيشوا من غيرها!؟كيف شكله الحوش وهي مش فيه!!
نزلت من عينه اليسار دمعه وهو يتكلم..
وهي تعبوا عيونها بالدموع وفاضوا ردت عليه تقول:الله يرحمها ويغفرلها...عشنا كيف ماربتنا وعلمتنا نعيشوا يازياد..اني وقفت ع رجليا وشديت حيلي بش نكمل حياتي ونولي كيف ماهي كانت تتمنى..ناجحه وسعيده وكل حلمت حلم بيه نحققه..عايشه وكأنها معاي وتشوف فيا..خليت امي في حياتي وقلبي بكل شي تعلمته منها..كل شي..
نزل عيونه ودموعه منهم ينزلوا..
هي حطت يدها على ذراعه وكملت تقول...وحتى انت...تعالج واشفى ع خاطرها..وكمل حياتك وخليك زي ماهي خلاتك..زي مااني عرفتك راجل..مؤمن...واثق ان ربي حياخد بيده ومش حيخليه..زي ماهي علمتنا..زي ماامي كانت تقول...استعن بالله ولاتعجز...
زياد وعيونه لوطا ودموعه تنزل:درت هلبه حاجات...تخلي غضبه يحل عليا مش عونه...ضيعت تعب امي سنين طويله ياسارة..حرك راسه يمين ويسار وقال...معاش يصير مني ياسارة...رفع عيونه فيها وقال...اللي كسرته مانقدرش نصلحه ..
ساره شدت ع ذراعه بقوة وقالت:هدا كله كلام فاضي..فكرة دخلها في عقلك الشيطان باليأس ويبيك تصدقها...مع ربي ديما في امل مافيش يأس بكل..ومدامك معترف انك غلطت ونادم ع اللي درته معناها رباية امي ثمرت فيك يازياد...شدت ع ذراعه اكثر وقالت...اني واثقه ومتأكده انك حتتعالج وتشفى وحتتخطى كل شي صاير معاك واليوم هذا خليه في عقلك..الكلام هذا احفظه حفظ بعد سنين ان شاء الله حنذكرك بيه ونقولك...تذكر يازياد...مش قتلك يازياد....
قام عيونه فيها وقعد يشبحلها...
هي ابتسمت من بين دموعها وقالت:صدقني حيجي اليوم هذا بإذن الله حيجي....
ضحك من بين دموعه بعدين عقد حواجبه وقال:ديما نقول فيها اصغر مني لكن عقلك اكبر من عقلي..
سارة:في هادي عندك حق مانقدرش نقول العكس.
ضحك وقرص خدها بعدين ضمها..
وهي لفت ايديها عليه وقعدت تضحك ودموعها ينزلوا...
...وبوهم واقف يشبحلهم وهو مبتسم....
وحس بشعور حلو خلا الامل والتفاؤل في داخله يكبروا برغم
ضيق الحال اللي يصعب ايجاد أي أمل معاه...
🍁🍁🍁🍁
تعنق صبعها الغنصر صبعه الغنصر وهي تقول:وعد زياد..وعد راهو..
زياد هز راسه وهو مبتسم قال:وعد...
سارة؛عارفاتك مش حتخذلني ولا؟
زياد غمض عيونه وفتحهم وهو مبتسم:مش حنخذل فيكم حد..وحتى انتم ماتخذلونيش..
سارة حركت راسها يمين ويسار وقالت:مستحيل كلنا معاك ووراك زيزو..
طلقها وحط يده ورا راسها وقربه ليه وباسه..
وهي وقفت ع روس صباعها وشدت راسه بإيديها وقرباته ليها وباست جبينه..
هو ضحك عليها..
نزلت وهي تضحك قالت ؛معاش تضحك..
زياد هز راسه وهو يضحك..
سارة بضحكه:مبردك..
هيثم قربلهم وهو مبتسم قال:هيا بابا...
زياد خفت ضحكته وهو يشوفله..
سارة شبحت لبوها وابتسمت بحزن بعدين شبحت لخوها وقالت:ردبالك على روحك..
زياد:حتى انتم..
سارة:استودعك الله الذي لاتضيع ودائعه..
زياد ابتسم ودموعه في عيونه...
الدكتور:هيا زياد..
زياد مرر نظره ع اخته وبوه بعدين لف ومشي للدكتور ومشي معاه...
وهيثم وسارة واقفين يشبحوله وهو يبعد..
لما وصل لأخر الممر التفت شبح لسارة..
هي ضحكت وحياته بحركة اليد..
هو ابتسم ابتسامه خفيفه...واختفي من قدام عيونها...
تلاشت ضحكتها اول مادرق...
وجت لحضن بوها ارتمت فيه وبدت تبكي بصمت وألم..
وبوها يطبطب ع ظهرها وع وجهه ملامح الحزن...
🍁طلع هيثم بسارة من المصحه..
وتوجه هو وياها لوحده من الجمعيات الخيريه المعنيه بمساعدة الناس اللي خشت السجن بسبب ديون...
قدرة هيثم الماليه خلاته يدفع عن مراة وثلاثه رجال صدقه عن زوجته اسيمه...
ماكانش في خير من هالهديه يصلوها لأسيمه بعد ماانقطع وجودها وعملها في الدنيا...
كانت سارة تراقب في اللي داره بوها...وكل ماله يزيد يكبر في عيونها وحبه يملا قلبها اكثر من قبل...واعجابها يزيد بحب بوها لأمها...وتتمنى لو ربي عطاها اللي في بالها وكان نصيبها انه يحبها زي مابوها حب أمها...
🍁🍁🍁🍁
بعد ماطلعوا من غادي...
توجهوا للمول الموجودات فيه البنات وعمتهم..
شربوا قهوة مع حاجه حلوة وهيثم بسبب سارة ماقدرش يشرب غير الميه...
وبعدين توكلوا لحوشهم....
••••••°°°°°°°•••••••°°°°°°°••••••••
....فالوقت اللي فيه عيلة خالد كانوا مروحين في الطريق لحوشهم.....
كانوا يهدرزوا ويضحكوا في السيارة وجوهم حلو..
ليهم فترة طويله ماعاشوش هالجو العائلي الدافي...
بس هي الحياة هكي فيها الحلو والمر..
والسعاده لحظه والوجع ساعات....
....وصلوا للحوش قبل المغرب بربع ساعه.....
نزلوا من السيارات..
فتح خليل باب الحوش وخش هو الأول...
وهما خشوا وراه...
جهاد:بنتعشى برا وبنعطل يام بش يكون عندك علم..
عفاف:باهي باهي..
خليل وهو ماشي بإتجاه الباب؛وين ياطيب..!
جهاد:بنسهروا في حوش واحد من جماعه...
خليل شبح للباب وقال:من....وسكت..ووقف في مكانه..
عفاف شافت للباب وقالت:الباب مفتوح!!
تهاني:الروشن مكسر!!
خليل وهو عاقد حواجبه:النساوين مايخشوش..
ومشي خش طول وخوته خشوا بعده..
عفاف حطت ايديها ع خدودها وقالت:ياحليلي هيييه...
وتهاني تشوف للحوش وانفاسه تتسارع من الخوف..
سجى بقلق:هادم مش حيخلونا في حالنا لين يقتلوا حد فينا..
عفاف بخوف:اعوذ بالله من الشيطان الرجيم...رفعت عيونها ونزلتهم وهي تقول..يارب سترك وعفوك ولطفك بينا ياربي...
......داخل.....
الولاد يدوروا في الحوش ويشوفوا في حجم الخراب اللي فيه...
ماعدا خليل اللي قعد في داره..
واقف ع الزيانه يشوف للصورة والرصاصه اللي فوقها بعيون تقدح شرار الغضب ومعبيه بالدموع...
فجأة سمع صوت نغمة رساله...
طلع التليفون..
وفتح الرساله ...
(المرة الجايه بالدم)
غمض عيونه بغضب شديد رفع يده وخبطها ع الزيانه بقوة وقال بصوت ياعالي:ياكلاب...
خوته سمعوه وجوه يجروا خشوا عليه الدار..
رفيق بغضب:شفت الحيوانات شن دايرين في الحوش!
جهاد:المرة هادي كبيرة هلبه ياخليل كبيرة..
هو شبحلهم وقال:خودوا النساوين وارفعوهم لحوش خوالك..
جهاد:اما خوال هادوا!؟
خليل بإنزعاج:مش وقته ياجهاد توا اني نبيهم يقعدوا في مكان لحد تاني مش لينا حني..
رفيق بتهكم:يعني مايقدروا يديروا شي هكي..
خليل بعصبيه:انتم اسمعوا الكلام اني نعرف شن ندير..
رفيق:تمام..لكن حوش خوالك لا...
خليل زفر بغضب بعدين قال:لاإله إلا الله!
جهاد:عنده حق..مرته تعرفها انت بتقول اللي شافاته واول حاجه يديروها خوالك لما يعرفوا يلزوهم طول...فوتهم ياخليل..
خليل قعد واقف يشبح لخوته بحيره ومش عارف شن يدير..
هو يبي يدبر كيف يحمي عيلته وبعدين يدور ع طريقه يتفاهم بيها مع شياطين الإنس اللي مايبوش يخلوه في حاله..
■فهالوقت...
خشوا سيارات هيثم ونسيبه للزنقه...
لما وصلوا لقدام الحوش...
شافوا لحوش خالد...
لقوا عفاف وكنتها وبنتها طالعين منه ومعاهم جهاد ووضعهم يبان مش طبيعي..
سارة ركزت ع صاحبتها تهاني لقتها تبكي قالت:تهاني تبكي وكأنه امها حتى هي تبكي..
هيثم :إن شاء الله خير!..
فتح الباب ونزل وسكره ومشي جيهتهم..
ونسيبه تشبحلهم بقلق...
....وصل فيهم هيثم وهو يشبح لوضعهم المربك وقال...
هيثم:السلام عليكم...
كلهم ردوا عليه السلام...ع طلعة رفيق .
هيثم:خير ان شاء الله! صايره حاجه؟
عفاف عيونها لوطا وهي حاطه يدها تحت خدها ودموعها تنزل...
وتهاني وسجى يشبحوله والخوف باين ع وجوههم..
رفيق بضيق:مافي شي دكتور..
هيثم مرر نظره عليهم وقال:خليل قاعد؟
ع طلعة خليل لما شاف هيثم قدامه تفاجئ..
هيثم:خليل كان في حاجه صايره قول بالك نقدر نساعد..
قعد ساكت وهو يشبحله معاش عرف شن يرد...
هيثم عقد حواجبه وقال:شن دارو تاني؟!
شبحوله وهما متفاجئين..
جهاد:من هما!؟
هيثم:نفسهم اللي حرقوا الورشه...في بينكم وبينهم مشاكل تصفية حسابات حاجه زي هكي؟
كلهم ساكتين وعفاف تمرر في نظرها عليه وعلى ولادها..
بعدين ثبتت نظرها على خليل وهي مصدومه لما سمعاته يقول...
"دكتور فيها كيف نخلي العيله عندك الليله!؟"
كلهم وجهوا انظارهم ليه بصدمه..
هيثم شبحله شويه بعدين قال:تفضلوا..
عفاف شبحتله وقالت بإحراج:لادكتور بارك الله فيك تو نمشوا لحوش اهلي نقعدوا غادي لين يفرج ربي..
هيثم بدون مايشبحلها:مافيش احراج اختي وبعدين حتى حني اهلكم...ولاانتم شايفين شي تاني؟
خليل:يام الليله بس مش اكثر من الليله..
هيثم يشوفلهم وهو ساكت..
جهاد تنهد وقال:خلاص يام خل هالليله تعدي بس..
عفاف هزت راسها بقلة حيله وقالت:خلاص...لكن الليله بس..
خليل:خلاص يام عطيتك كلمه اني..
هيثم:اتفقتوا؟.
خليل هز راسه بإيجاب وقال:سامحنا دكتور..
هيثم رفع يده ونزلها "بمعنى اسكت خير" ولف ومشي...
ضحك خليل ضحكة خفيفه وهو يشوفله كيف يأشر بيده لنسيبه تنزل..
خفتت ضحكته وهو يشوف نازله وجايه لخوها..
وقفت عليه تكلموا شويه...
بعدين هي ولت لسيارتها وهو ركب سيارته....
خشوا للحوش...
ولحظات وطلعت نسيبه ومشت ناحيتهم..
وصلت فيهم وقالت:السلام عليكم...وجهها مكتسي باللون الأحمر..
خليل غير عيونه عنها ورد معاهم عليها السلام..
نسيبه:هي تعالوا معاي ابله عفاف...تفضلوا الحوش حوشكم..
عفاف ابتسمت وقالت:تسلمي بنتي..
ومشوا معاها....
وخليل بعد مشوا قعد يشبحلهم...
جهاد:كان رفعت مرتك لحوش اماليها خير يارفيق..
خليل:تس...اني مانبيش اللي صار يطلع..كلمها ونبه عليها ماتقول لحد من العيله شي...
رفيق :باهي..لكن انت قولي شن بدير؟
خليل سكر الباب متاع الحوش وهو يقول:تو تعرف بعدين...المهم انتم اطلعوا منها..
حط المفتاح في جيبه ومشي وهو يقول:ماتخشوا في شي..مادخلكم بشي...
وخوته الزوز يشبحوله...
جهاد:مش متريح..خايف يديروا لبوي شي كان قعد مسكر راسه..
رفيق"ياريت":يستر الله...المهم توا...برا بات في الحوازة انت اني بنقعد هني..
جهاد رفع حاجبه وقال:وين هني!؟ اشرله بحواجبه وهويقول ..هني..ولاغادي؟
ضربه رفيق ع كتفه وقال:لوح عليك التفكير المسوس وبرا وين ماقتلك..
ابتسم جهاد ع جنب بعدين مشي..
ورفيق معاه بعيونه...بعدين قعد يشبح لحوش هيثم...
ارتسمت ع وجهه ملامح الهيام وابتسم بحب...
.....في حوش هيثم.....
هيثم طلع من الحوش للمربوعه الخارجيه قعد يجهز فيها...
والنساوين داخل قعمزوهم في الصاله..
ماعدا تهاني اللي مشت مع سارة لدارها...
عفاف: وجهي متقشر منكم..
نسيبه:تي غير علاش بس..رانا جيران ابله عفاف لو كان حني مكانكم مش حديري معانا هكي؟! حديري هكي واكثر..
عفاف تنهدت بألم وقالت:مانيش عارفه لأمتى هالحال...لامتى بيقعد الهم ملاحقنا...وقعدت تبكي..
شدت نسيبه يدها وقالت:اذكري الله ابله عفاف...
يفرجها من عنده يارب..
رشفت عفاف وهي تقول بنبرة باكيه:يارب عن قريب يارب والله تعبت..
قعدت تمسح نسيبه ع يدها وهي تشوفلها بحزن...
مش عارفه شن تقوللها ولاكيف تواسيها هي اصلا تبي من يواسيها...
🍁وهادي الدنيا دار الإبتلاء...عمرها ماحتكون دار راحه...🍁
......في دار سارة.....
تهاني ببكي:خايفه خليل يرجع زي قبل..خايفه خوتي يولوا لموالهم الاول ياسارة..
سارة بضيق:ان شاء الله لا ياتهاني معاش تقولي هكي..
تهاني وهي تبكي:شفتي بالله شفتي ياسارة الشقا اللي حني فيه...احمدي ربك ع اللي صاير معاكم..راهو حالكم ارحم من حالنا بوين..
وسارة تشوف لتهاني بألم وحتى هي رصيد المواساة عندها صفر...صرفاته كله في زيارتها لخوها اللي كانت تحاول تقويه وهي من داخلها منهاره...وتوا معاش عندها ماتواسي بيه صاحبتها غير انها تحضنها وبس...
وهدا اللي داراته...وتهاني انهارت في حضنها بالبكي..
وسارة اطبطب ع ظهرها وتقول والدموع من عيونها ينزلوا:كله يفوت...كله يعدي....
🍁🍁🍁🍁
وهو يسمع في نداء الحق مناديا لصلاة المغرب...
خش للجامع....
توضا وعقله مابطلش تفكير..
كيف يدير وكيف يتصرف...
هادم حاطينه في روسهم ومش حيخلوه لاهو ولاعيلته في حالهم...
خايف عليهم...خايف ع ارواحهم..وخايف ع عرضه وشرفه..وخايف...واشد مايخاف عليه حاليا...
توبته...
توبتك....ومن قال توبتك انقبلت اصلا...
لو انقبلت توبتك راهو ساعدك ربي عليها وثبتك..
لكن واضح ياخليل ربي ماقبلهاش...اللي درته مش شويه هو بس اللي يعرف مستقبل قداش شاب دمرت
وقداش عيلة شتت..
وقداش روح ازهقت بسبب السم اللي كنت تاجر فيه وتسهل في بيعه وشرائه..
بعد هدا كله تبي ربي يقبل توبة واحد زيك انت!؟
ايه صح...اللي درته مش شويه واحد زيي اني ربي مااظنيش مازال ربي يقبله..
خليل..ركز...لو مش قابلك ماخلاكش اتوب من اصله..
ماخلاكش توقف بين ايديه وتصلي بعد سنين مقاطعه..
ماخلاكش تنوض من عز نومك بش تقيم الليل وتصلي الفجر
وتقرا كتابه..
ماساعدكش ادير حاجات هو يحبها بش يرضى عنك..
لوح عليك الوسواس ياخليل..
لكن..نبي نعرف...علاش قاعده تتعسر هكي واضيق علاش بس...
....وهو غارق في دوامه افكاره....
سمع إقامة الصلاة..
تنهد بتعب ..وخش لداخل المسجد...ومشي وقف في اول صف...
واكتمل صفه وصف بعد لحق عليه هيثم...
وبدت الصلاة بكلمه...
كانوا محتاجين يسمعوا هيثم وخليل بقلوبكم قبل مسامعهم..
"الله أكبر"...
••••••°°°°°°°••••••°°°°°°°•••••••
في سيارة الأجرة..
كان يجري في اتصال بخوه...
نادى مرتين وبعدين انفتح الخط...
خليل:شن جو..
"تمام لتوا"
خليل:وينكم؟.
"في حوش الدكتور هيثم"
خليل:تمام..بعد نروح نبيكم تمشوا تقعدوا في الحوازة انتم الزوز..
سكت رفيق وماردش..
خليل:رفيق...
"تمام تمام"..
خليل وهو يشبح من روشن السيارة:سلام...
وسكر..بعدين قال...هني خوي هني..
درس سواق الأجرة قدام "سوبر ماركت" كبير...
عطاه خليل اجرة الطريق ونزل...
قعد يمشي وهو يوزع في نظره ع المكان...
لين خش داخل..
كان يشوف لحركة البيع فيه والزباين اللي دايرين زحمه..
قعد يمشي ويدور لين جو عيونه ع راجل في اواخر الاربعينات...شاد في يده سبحه يتكلم بيها ويوجه في العامل اللي عنده..
مشاله ...
ولما وقف عليه...
خليل:السلام عليكم..
هو لما شاف خليل نزل يده وابتسم برفعة حواجب وقال:اوو شارون...اهلااا اهلا اهلا...وجاه مد يده..
خليل وهويشبحله بإمتعاض ..مد يده وبالغصب صافحه..
:باهي اللي تفكرتنا وخليتنا نشوفوك ياسي..
جبد خليل يده..وحط ايديه الزوز في جيوب سرواله وهو يوزع في نظره ع المكان..
الراجل ابتسم ابتسامه جانبيه وقال للعامل اللي عنده:توكل شوف شغلك ودير زي ماقتلك..بعدين شبح لخليل وقال..هي تفضل يازعامة..
خليل مشي بدون مايشبحله وهو مشي معاه ...
لعند ماوصلوا لدروج...
نزلوا الزوز لوطا...
وصلوا في باب فتح الراجل وقال لخليل:تفضل ياباشا..
خش خليل وهو يقول:معاش تناديني الا بإسمي..
ضحك الراجل وقال:ياحسرة ايام كنت تنفش ريشك لما نادوك شارون..
وقف خليل وشبحله وهو يقول:شن مازال يبوا..
الراجل وع وجهه نفس الابتسامه المستفزة:يبوك ياغالي..
خليل:والكلمة اللي عطوها لبوي..!
الراجل:الكلمة اللي يعطوها إكسبايرد...وانت تعرف كويس ان كلامهم عنده مده صلاحية..مش طويل الأجل..
خليل قعد يشبحله وفي داخله غضب كبير يحاول يكبته..
الراجل قربله وقال:نصيحه وخودها بلاش..مش مخليينك لا انت ولا اي حد يعز عليك لين ادير مايبوا هدا علاش بنقولك اشري خيرهم وبيع شرهم...خود بنصيحة واحد يعزك..
خليل بغضب:الله يلعن النصايح والمعزة اللي هكي...قوللهم اني راجل تايب توبت خلاص..خبط كفوفه ببعض وهو يقول..خلاص..مش مولي لو يقصولي رقبتك..
الراجل:لاياغالي رقبتك اغلى من الألماس عندهم ..الرقاب اللي تنقص رقاب تانيه ماتساوي عندهم شي..
زاد غضب خليل لدرجة انه شد ياقة قميص الراجل وهو يقول من ورا سنونه وعيونه مليانات دموع:تي نقولك توبت توبت ياكلاب ياشياطين توبت..
راجل بنفس الابتسامه البارده المستفزة قال..ياغالي
الدنيا هادي لازم يكون فيها توازن..ناس باهيه وناس كية ناس تبع ربي وناس تبع الشيطان..هي هكي..مش لازم كلنا نولوا زي بعضنا...
خليل قعد يفكر في كلامه وكل ماله غضبه يزيد..
الراجل نزل يد خليل بهدوء وقال...في اللي مقدر عليهم الشقا وفي اللي مقدر عليهم الصلاح ياغالي..هي هكي واللي يقولك غير هكي يكذب عليك..
نزلوا دموع خليل وهو يشوفله بنفس نظرات الغضب..
الراجل:حط عقلك في راسك وعيش كيف مامقدرلك تعيش ماتعبش روحك اللي زينا اني وياك مختوم عليهم خلاص هدا طريقهم وهادي حياتهم..
خليل لما حس روحه متخبط وتفكيره تشوش تماما وصل لذروة الغضب..
خبط راسه في عمود وقف جنبه وصاح بألم وغضب..
الراجل حرك راسه يمين ويسار بعدين مشي وهو يقول...خليك هني شويه قعمز مع روحك وراجعها وفكر في كلامي ...
ومشي طلع وسكر الباب...
وخلا خليل اللي كان واقف ع العمود وجبهته تنزل يبكي بعجز وحرقه وقهر...
•••••••••°°°°°°°••••••••°°°°°°°°••••••••
الساعه العاشرة ليلا...
ماشي وجاي في الجنان يراجي...
وهي واقفه في الروشن مدرقه ورا الستار وتراجي وهي في قمة القلق..
زي امه اللي مقعمزة حداها وهي تدعي في سرها بتوسل...
فجأة سمعوا صوت الباب يطق...
ناضت امه ووقفت ع الروشن...
شافوا هي وياها هيثم يفتح في الباب وشويه وخش خليل..
نسيبه بخوف:خيره راسه؟!
عفاف بقلق:ياكبدي هييه..شن داروله...
......برا......
هيثم وهو يشوف لراس خليل:لو دخلت الشرطه خير..
خليل:مش مستحقه يادكتور..عطيتهم اللي يبوه وتمت..
هيثم عقد حواجبه وهو يشوفله قال:كيف يعني!؟
خليل تنهد وقال:ماتشغلش بالك دكتور..حساب بيناتنا صفيناه وتمت...
هيثم وهو يشوفله بتضييقة عيون ريبة:يعني خلاص معاش يدوروكم!؟
خليل:ايه...قاعد رفيق ؟
هيثم:طلع قبل شويه قال خليل جاي...تفضل خش..
خليل هز راسه وهو يقول:يزيد فضلك وسامحنا دكتور..
هيثم ربت ع ظهره وقال:برا برا..
مشي هو وياه وخشوا للمربوعه..
وهيثم كلم اخته يوتوا عشي لخليل...
.....في الكوجينه....
عفاف:غير قعمزي بنتي بالله عليك اني تو نوتيه..
نسيبه وهي مشغوله في تجهيز العشي:خلاص بري قعمزي يامراة ماترقيهاليش..
ضحكت عفاف ومشت قعمزي...
ونسيبه وهي تضحك قالت:يحب المشروب ولاالعصير..
عفاف بضحكه:سوا سوا..
نسيبه وهي ماشيه للثلاجه:نديرله هريسه؟.
عفاف؛وكثري..
نسيبه وهي ادور في الثلاجه:باك مش باهيه ليه في الليل ت تو نحطله شويه ونصبله عصير..
عفاف بإبتسامه:ديري اللي يعجبك..
نسيبه طلعت اللي تبيه من الثلاجه وسكرتها..
عفاف قعدت تتفرج عليها كيف توتي في الصفرة من قلبها..
وبعد كملت اتصلت بخوها...
وشويه وطلعتله بيها...لحظات...ورجعت خشت للكوجينه وقعدت اضم فيها..
عفاف وهي تشوفلها قالت:نسيبه..
نسيبه وهي تمسح فالرخامه:نعم؟.
عفاف:نبيك لولدي...
جمدت في مكانها....
عفاف:عارفاتك خايفه...وعندك حق..لكن صدقيني يابنتي مافي حد يصلح بيك غيره ولافي وحده تصلح بيه غيرك..انتي وياه لبعض من عند غادي..
نسيبه شبحتلها بعيون مليانه دموع..
عفاف:خليل يبي مراة زيك يبي وحده قدعه وقويه ترد عن الغلط وتسقمله حياته وتوريه الطريق الصح...اللي زيك انتي يربوا رجاله..ودير اللي ماقدرتش اديره الأم..
نسيبه قعدت تشبح في الفراغ وتفكر في كلامها ودموعها ينزلوا...
عفاف ناضت وجتها حطت يدها ع ظهرها وقالت:وانتي والله ماك لاقيه راجل يحبك فالدنيا هادي زي ولدي لو تبي روحه نحلف يعطيها من غير مايفكر..
نسيبه رشفت وولت تشبح للرخامه وقعدت تمسح فيها..
عفاف:فكري في كلامي بنتي واعطيه فرصه بالله عليك...تصبحي على خير..
ومشت طلعت من حداها...
بعد ماطلعت نسيبه قعدت تبكي...
حطت اللي فيدها ومشت قعمزت ع الكرسي وهي تبكي بألمم وقلبها موجوع...
🍁اما هو...
بعد تعشى بإجبار هيثم..
خليل:ديما عامر ان شاء الله...
هيثم بإبتسامه:صحة صحة..
ناض خليل وقال:سلمك وبارك الله فيك..وتوا نبيك تعطيني الإذن..
ناض هيثم وهو يقول:وين وين!؟
خليل:بنبات في الحوش..
هيثم:خليك الليله بات هني وغدوة إن شاء الله تمشي غادي..
خليل:لا نبي نبات فيه مانبيشي يقعد بروحه..
هيثم :خليل فاهم عليك تبي تقعد بروحك لكن مش ديما الوحده باهيه ولدي..
خليل شبحله شويه بعدين قال:الحق اني نقعد فيه نبي بش نضم الحوسه اللي صارت ...
هيثم رفع حواجبه وابتسم وقال:تبي من يعاونك على هكي..
خليل ضحك وقال:لالا مش لازم ..
هيثم:لا لازم...ولف مشي خدي كبوطه من ع الكنبه وبدي يلبس فيه وهو يقول...هيا تحرك قدامي..
خليل:والله يادكتور مالازم بالله..
هيثم جاه وربت ع ظهره وقال:هيا هيا..هيا..
ابتسم خليل بإحراج وهز راسه ومشي وهيثم مشي معاه....
▪▪▪▪▪
◇هداكا الوقت ماكنتش عارف شن صاير معاه بالزبط بس لاحظته لما كان يتعشى اغلب الوقت سرحان وساكت..مش عارف كيف حسيت انه غارق في الحيرة...
يعني لو قعد بروحه حتستفرد بيه نفسه والشيطان والافكار السودا....حيتمكنوا منه ويخلوه ياخد قرارات غلط..خصوصاو انه حديث عهد بالتوبه..برغم اني مش عارف شن كان صاير معاه وقتها بس احساسي بالمسؤولية اتجاهه خلاني هكي نتصرف...نعترف..اني كنت نحس بمشاعر تشبه المشاعر اللي نحس بيها اتجاه صغاري مع خليل...الأبوة...
▪▪▪▪▪
🍁🍁
ومشوا مع بعض الزوز للحوش..
هيثم قعد واقف في الجنان ماباش يخش لين خليل يأذنله..
قعد يشوف وهو واقف برا اللي صاير للحوش وهو يفكر ..
في خالد اللي وصل عيلته لهالمواصيل...
خلاهم عايشين في خوف دايم ...
مشتاقين شعور الأمان..
مشتاقين يعيشوا حياة طبيعيه...
لما شاف خليل طالع بصرة كبيره قعد يتأمل فيه بأسف..
شاب فيه كل المواصفات اللي تخليه انسان ناجح ومحبوب ومحترم بين الناس...
بسبب بوه قاعد يعاني ويعيش عمر ماشي في طريق اختارها اجبارا....
وحتى لما جي يسيب هالطريق لقي ايادي شر تجبد فيه بقوة بش ترده للي كان عليه...
في طريق اللي يمشي مايرجعش...
ابتسم وقال:هاه شني ماتبيش تخدمني!؟
خليل حط الصرة وهو مبتسم بإحراج وقال:كبير قدر يا دكتور..
هيثم حول كبوطه وقال:هيا هيا قولي شن تبيني ندير..
ضحك خليل وقال:تفضل..
مشي هيثم وخش للحوش وخليل وراه وهو يضحك..
.....وشمر هيثم عن ايديه.....
طلع مع خليل الاثات من الحوش...
وكنسوه الزوز مع بعض...وسيقوه..
وخلال هذا كله كانوا يهدرزوا طول الوقت ماسكتوش..
ولأول مرة يهدرز هيثم عن حياته الخاصه مع حد..
هدرز عن اول شبابه...وعلاقته ببوه...ودراسته...وحياته في كندا...والمواقف اللي صارتله غادي...
وخليل كان مستمتع وهو يسمع فيه...وبدي حتى هو يحكي عن طفولته ومراهقته واحلامه اللي فاجئت هيثم...
هيثم:طب جراحة مخ واعصاب!؟
خليل وهو شاد السياقه قال بإبتسامه اسف:ايه..لكن هدا قدري والمكتوب..
هيثم قعد يشبحله وهو يفكر..
وخليل يقول:تعرف حلمي هدا نسيته وكأنه ماكانش...لعند ماجيت انت وسكنت هني بعيلتك...
قالوا جارنا الجديد جراح كبير جي من برا بش يخدم في البلاد...قلت في عقلي وين عقله هدا!؟ يسيب اوروبا ويولي يعيش ويخدم هني!؟...
ابتسم هيثم ع جنب..
وخليل تابع يقول:من بين جيرانا والناس اللي عايشين في المنطقه كلها انت بالذات حركت جيهتك فضولي...قعدوا عيوني عليك وين تجي وتمشي..كنت نشوف فيك بهيبتك بين الناس كلهم يحبوك ويحترموك..وكنت نشوف فيك تتجنب تخالطنا او تحتك بينا ولا تسلم علينا حتى السلام..
بيني وبين نفسي كنت عاطيك عذرك..قلت لروحك لو كنت مكانك ناس مانتعاملش معاهم غير هكي...وقلت ..ياخليل لو كملت قرايتك ووليت دكتور زيه ماعنداش بشن يشوف روحه عليا...ضحك وقال...هكي كنت نفكر لما نشوفك..وياقداش كنت نكره شوفتك لسبب واحد...لأن شوفتك تخلي فيا نتحسر...وننقهر...ونكره روحي وعيشتي وحظي...
حط يده ع فمه وتنحنح...كان يحاول يشد روحه بش مايبكيش..
وهيثم حس بيه وقال:ماروحتش لأني نبي نروح ونخدم في البلاد هادي...زوجتي المرحومه هي اللي كانت تبي تروح ع خاطر الصغار قالت تبيهم يتربوا في بلادهم...وبالنسبه لحب الناس واحترامهم اللي تحكي عنه كان كله مؤقت مرتبط بمكانه ووضع اجتماعي مجرد خسرتهم...راح معاهم الحب والاحترام اللي تحكي عنه...واكتشفت اني لازم ندور مكاني عند الناس لما نطيح مش واني واقف...
خليل قعد يسمعله وهو متفاجئ في بعض كلامه..
هيثم:اني من كلامك اللي قلته توا حاجه وحده بس همتني..ان حلمك في داخلك ماماتش..مازال خاطرك فيه مازال تبيه يتحقق...ومادامه قاعد عايش فيك وانت في اول شبابك تقدر تحققه..
انتابت خليل نوبه ضحك..
خلت هيثم يشوفله بنظرة اسف ممزوجه بالحزن...
لحظات وهدا ضحك شويه شويه...لين سكت وهو يضم في شواربه لداخل...ابتسم بحسرة...وبدوا دموعه ينزلوا وقال: اول شبابي زي اخره..راحت عليا خلاص...
وهيثم يشوفله بحزن وقلبه يعتصر ألم ع حاله..
▪▪▪▪
◇ كان في قمة اليأس والإحباط..كان متحطم بكل معنى الكلمه...وهالشي خلاني وقتها...نخاف عليه....زي خوفي على زياد بالزبط...
مذكر ليلتها...روحت بيه معاي للحوش غصب عنه... وطول الليل كان يظاهر انه راقد واني متأكد انه ماغفاش حتى حتى خمسة دقايق....ضحك وقال...وحتى اني...
▪▪▪▪
تاني يوم...
من الصبح....
كلمت عفاف خليل انها حنقعد في الحوش اللي فيه صالحه وهو ماقدرش يرفض..
لهذا بعد الفطور مشوا غادي برغم اصرار هيثم ونسيبه على استضافتهم في الحوش لكن اصرار عفاف في الطلعه كان اكبر من اصرارهم...
استقبلوهم صالحه وملاك ...
وهالمرة ملاك كانت متغيره هاديه...وفي حالها وكانت متجنبه تخالطهم شاده دارها وتقرا وخلاص...
🍁وخليل وخوته انشغلوا بحوشهم...
جابوا من يركب بيبان جدد ورواشن...
وفرش الحوش كله ماحلوا منه شي اللي ينباع بيبعوه واللي يتلوح لوحوه....
خوته كان يديروا مايقوللهم وماقدروش يعرفوا منه شن صار معاه ولاعلى شن ناوي...مسلمين ليه دفة القياده وهما واثقين فيه وعارفين انه مش حيدير شي يرجع عليهم بالضرر...
••••••°°°°°•••••••°°°°°°••••••
"سعيده لأني مقعمزة معاكم وبندردش معاكم...اول شي خل نعرفكم بنفسي...ثريا محمود..عمري خمسة واربعين سنه وسته شهور مش حنتحشم نقول عمري عادي جدا برغم انه مش باين عليا ولا؟"..
ارتسمت ع وجوههم البائسة ضحكات خفيفه...
ثريا بإبتسامه:ربي يديم هالضحكه ع الوجوه لين تولي جزء من ملامحها..
ارتسمت على وجوههم ابتسامات منها مجامله ومنها متهكمه..ومنها تعبر عن الألم..
هي مررت نظرها عليهم وقالت...نبي نعرف...شن السبب اللي خلاني نتلاقى اني وياكم هني؟...
شبحولها وقعدوا ساكتين...ماعدا زياد اللي سرح اول ماسمع سؤالها..
واحد منهم قال...صاحبي..
شبحتله بإنتباه..
وهو كمل يقول:صاحب كنت نشوف فيه خوي اللي ماجاباته امي...كيف بدي معايا بيه..كيف عودني عليه مش عارف لتوا لكن اللي نعرفه اني لما عرفت روحي وليت مدمن هو اللي قعد يجيبلي فيه....صحاب عمر رانا من لما كنا صغار..توقعت الغدر يجيني من خوي ولد امي وبوي ولايجي منه هو...
ثريا:علاش دار فيك هكي؟
واحد منهم قال:اكيد ع خاطر بنت..
ضحكوا..
رد الشاب يقول:لا...ع خاطر بوه..
شبحله زياد...
الشاب كمل يقول:اني كنت زي مايقولوا مثالي...متربي صح...ذكي..ناجح...موهوب...اما هو كان زيي متربي صح..لكن ماكانش ذكي ..وماكانش عنده ولاموهبه..ومع هذا كان يحاول يشد في القرايه ويتميز...والله يسامحه بوه بش يشجعه يتفوق كان يقارن فيه بيا اني في كل شي..من وحتي صغار لين كبرنا...
كان يقوله مش عارف كيف انت وياه صحاب وماجبتش منه حتى شويه..مش يقولوا قول لي من تصاحب اقول لك من انت...قاله الكلام هدا قدامي..وكان يتعمد يحرجه يحساب هكي بيتحفز ويخدم على روحه بش يولي زيي واحسن..
ثريا:ماكانش يعرف بوك ان في طريقتين للتفوق...
اما انه الواحد يخدم ع روحه بجهد اكبر ويجتهد اكثر بش يوصل ويتفوق ع اقرانه...او انه يخدم ع افشالهم وتدميرهم وهكي مايقعد في حد ينافسه وبالتالي يتفوق..
الشاب:وهدا اللي صار...
ثريا:وشن صار بش جيت هني؟
تنهد وقال:عيلتي جابوني وحطوني هني..واني نبي..نبي نتعالج ونكمل حياتي عارف ان وضعي حيكون صعب بعدين لكن حنتحمل ونواجه ونعيش..
ثريا بإبتسامه:حلو هلبه...مررت نظرها عليهم وقالت..فيكم حد تاني زيه يبي يكمل حياته ويواجه ويعيش..
زياد رفع يده..
ابتسمت ثريا وقالت:علاش؟!
زياد نزل يده وقال:على خاطر امي..
ثريا:باهي شن اللي جابك هني ؟
زياد ضحك بتهكم بعدين قال:امي..
استغربت ثريا...
زياد:امي...بالنسبه ليا كانت الحياة كلها...كنت نحس في روحي عايش ع خاطر هي موجوده...وبعد...بصوت مخنوق قال...ماتت...حسيت ان معاش في شي يستاهل نعيش ع خاطره...
ثريا:يعني فقد الأم هو اللي خلاك تتوجه للإدمان..
زياد:احمم..فقدها خلاني نضيع وهالضياع وصلني لهني..
ثريا:باهي كيف تبي تتعالج على خاطر امك؟
زياد ابتسم بألم:امي...احسن مراة دارت عيله وربت صغار ربتنا ع كل شي صح فالدنيا...واللي اني فيه توا عكس كل ربتني عليه...مانبيش نتفارق اني وياها يوم غدوة نبي نكون معاها...لإني متأكد بإذن الله امي حتكون من أهل الجنه واني نبي نكون معاها غادي...غادي لافي موت ولافراق..
ثريا ومبتسمه بألم:رد بالك تفرط فهالأمنيه رد بالك...
زياد رشف ومسح دموعه وهو يقول:إن شاء الله...
رفع واحد يده..
شبحتله تريا وقالت :تفضل..
ضحك وقاللها:عندك علم التقعميزه قعمزت زيها مرات ومرات قبل هكي في مصحتين قبل..
عقدت ثريا حواجبها بضيق..
كمل يقول...اني اللي خلاني نولي مدمن كثرة فلوس...ايه كثرة الفلوس...والفراغ.....والكسل...بس اهم شي كثرة الفلوس... كانوا الفلوس يجروا في ايديا درت بيهم كل شي..سافرت العالم كله...شريت كل شي نبيه درت اللي فخاطري كله..كل شي يجيني بلاتعب...عمري مااعتمدت ع نفسي في حاجه...عشت حياة كلها رفاهيه وحريه لأبعد الحدود...لابوي مدورني ولاامي تسألني وينك وشن درت وشن بدير...ولاخوت معدلين عليا كل حد لاهي بهمه...
من الفراغ طق في بالي نجرب المخدرات...جربت...حاجه ورا حاجه لين وليت مخروم بإمتياز...
شدني بوي بنخنب من الخزنه متاعه بش نشري...وقتها بس زبطتي وليت مدمن..وكلهم عرفوا بعد بوي كشفني...
تعرفي شن دار.!!؟ بالسر طيرني برا البلاد وحطني في مصحه كبيرة تعالجت...وروحت...ولقيت ان حياتي قاعده زي ماهي ماتغير شي...حاولت ننتحر ماصارش..وليت للمخدرات..
عرفوني وليت للأدمان..طيروني برا مرة تانيه تعالجت وروحت وحاولت ننتحر وماصارش...ضحك وقال...وليت للمخدرات...وفكرت ننتحر بيهم...بعد خديت الجرعة دخت ومعاش نندري على شي لين لقيت روحي فالمستشفى...قالولي واحد لقاك في طايح في الشارع..كلم الاسعاف..ولما ردوني للدنيا غادي عاد حللوا دمي وعرفوني مدمن جابوني هني...ضحك ودموعه تنزل وهويقول...اني بي نبي نعرف حاجه وحده...الموت خيره معاي علاش مايبيش يجيني حتى هو لهالدرجة اني واحد عافن..! ولا مكتوب علبا نعيش هالعذاب وخلاص !!! هز راسه وقال...لكن في الجديد تو نغير الخطه..
ثريا:اي خطه..
ضحك وقال:مادوريش مش مهم...
ثريا:يعني هالمرة ناوي تشفى ..
ضحك وقال:اها...ايه ايه ناوي هكي..
هي ضيقت عيونها وهي تشبحله بريبه..
وزياد حتى هو كان يشبحله بنفس النظرة....
•••••°°°°°°•••••°°°°°°••••••
الساعه الثامنه مساءا...
ع طاولة الاكل في الكوجينه..
هيثم:طمني الأستاذة ثريا...
سارة بإبتسامه:عطاني وعد هو مايوليش فيه..
نسيبه:نبي نزوره هيثم..
هيثم ابتسم وقال:ان شاء الله الأيام الجايه..
نسيبه:ان شاء الله..
هيثم:ايه ماكلمتيش ام خليل شفتي بالك يبوا حاجه..
سارة:اني كلمت تهاني امورهم تمام بابا..بس نبي نعرف المشكله اللي صايره بين خوتها والناس اللي دارو فيهم هكي انحلت..
هيثم هز راسه بإيجاب وهو ياكل..بعدين قال:خليل قالي حساب بيناتنا وصفيناه..
سارة:باهي الحمد لله...
هيثم سرق نظره لنسيبه لقاها تشبح لصونيه عشاها وسرحانه وع وجهها ملامح الحزن...
غير عيونه وقال:بجديات خليل هدا راجل بمعنى الكلمه..وكل مرة يأكدلي ان نظرتي فيه مش خايبه..
هي انتبهت لكلام خوها بدون ماتشبحله..
ونبضات قلبها تسارعت...
هيثم: تصدقوا! كان من الأوائل ع مستوى طرابلس لما خديا الشهاده الثانويه..وكان يبي يخش طب..تحديدا طب جراحة المخ والأعصاب...لكن مع الأسف استسلم وسلم في حلمه..
سارة باسف:ايه قالتلي تهاني..
هيثم:اخ بس لو نقدر نخليه يكمل من وين ماوقف...لما طرحت عليه الفكره رفضها وهو مأيس تماما...ذكرني قبل لما كنت خاش ع امتحان الزماله وماكنتش واثق من روحي وقتها اني حننجح فيه لولا امك الله يرحمها..
سارة بحزن:الله يرحمها..
والبنات الصغيرات ارتسمت ع وجوههم ملامح الحزن..
هيثم تابع يقول:قعدت وراي تشجع فيا وتكبر في حلمي بكلامها خلتني نشوف روحي في مكان تاني...وسبحان الله وصلت لمكانات بعيده من بعد فضل الله بسببها...سبحان من عطي المراة سعة احتواء يخليها تحتوي الراجل بكل حالاته حتى احلامه وطموحه لا ومش هكي بس..في نساوين خدوا رجاله بلا احلام ولااهداف ولاأي شي..من لاشيء خلوهم حاجه كبيرة...سبحان الله..
ورجع ياكل..
سارة:زي مايقولوا ورا كل رجل عظيم امرأة...
هيثم:واني نقول وراه وجنبه وقدامه...امه واخته ومرته..وبنته...وقرصها من خدها...
ابتسمت سارة...
ريحان :وحني بابا..
هيثم:اها....وقرصهم من خدودهم وهويقول...هاه هكي كويس..
ضحكوا...
ونسيبه طول الوقت كانت تشوف لخوها ومش عارفه علاش كانت حاسه ان خوها يوصللها في رساله...
••••••°°°°°••••••°°°°°°•••••••
"جو مش عادي والله تمنيتك معانا"
عادل وهو متكي ع السرير ويشوف لرتاج كيف تمشط في شعرها قال:ان شاء الله الخميس الجاي في حوازتنا..
رتاج بإبتسامه:ان شاء الله..
فجأة رن تليفونها ..
خداته من ع الزيانه لقاته رقم غريب ولت ترعش من الخوف حطاته الزيانه وكملت مشط شعرها..
عادل وهو يشوف للتليفون:خيرك ماترديش؟.
رتاج وهي تحاول تخفي توترها:هادي وحده تقرا معاي دوتها هلبه وماعنديش ليها راس..
عادل:ردي عليها بالك تبي تقولك حاجه على قرايتك..
رتاج:لالا ماعندها ماتقول..وخدت تليفونها وسكراته وهي تقول..خل نسكره مرة وحده ونريح راسي..
وعادل يشبحلها بشك ولما يجوا عيونه في عيونها في المرايه كان يرسم في ابتسامة مزيفه وهي ترد عليه بوحده زيها...
🍁🍁🍁🍁
ويعدي هاليوم...ويجي اللي بعده...
🌷زي كل صبح...
تعودت فيه دانيه تشوف فيه المجهول اللي يلاحق فيها..قاعد يستنى فيها...
لين وصلها مجاهد للباص وولى وهي ركبت وهو لحقها..
وفهاليوم بالذات تبدل شعور الخوف عندها بشعور تاني حلو...
لما وصل الباص للمدرسه ونزلت منه..
التفتت شبحتله لقاته حول الخوذة ويشوفلها بإبتسامه..
غيرت عيونها عنه وهربت وهي مبتسمه ووجهها بلون حبات الرمان وقلبها بدي يدق في دقات زياده...
وهالدقات الزياده..
بدي يدق فيهم قلب جمعه وين يشوفها....
وبدي يحس اتجاهها احساس خايف يجرفه ليها جرف....
وخطيبته كل مالها تحطها في راسها وتزيد تحقد عليها اكثر من قبل...
🍁اما سارة...فكانت من اول اليوم وهي تدعم في رهف اللي اليوم كان اول يوم ليها في المسابقة...
وقبل تمشي شجعتها وهي تقول..
"خليك واثقة في اللي عندك رهف"
ورهف ودعتها بإبتسامه واثقه وهي طالعه مع زميلتها...
🌷يعيش شعور حلو الواحد لما يحب الخير لغيره زي مايحبه لنفسه...شعور ماتعرفاش القلوب الأنانيه المريضه بداء الحسد🌷
•••••••°°°°°°°••••••••
الساعه الثانية عشر قبل الظهر..
مقعمز يتصفح ع النت في كتاب ويقرا فيه بإنسجام...
ع جية ريحان وهي تقول:بابا..
رفع عيونه وشبحلها..
جاته بالزمالطو"طلاء الأظافر" وهي تقول:زملطلي بابا..
هيثم عقد حواجبه بضحكه وقال:شني!؟
مدتله الزمالطوا وقالت:زملطلي...
هيثم بضحكه:وعمتك وين؟
ريحان؛عمتو ادير في شعر جنان هي بابا ارجوك الوقت رايح راهو..
ضحك وقال:هدا ماتقدريش تصلي بيه..
ريحان؛لا بابا عمتو شرتلنا اللي يتحول مايقعدش ديما..
هيثم خدي منه وقال:باهي..تو نحاول..
وقف وجاها طبها وحطها ع الكنبه..
وجبد الطاوله وقعمز عليها...فتح الزمالطو وقال..ترا مدي يدك...
مدت يدها...وبدي هيثم بكل دقه يدهن في ظوافرها الصغيره..
كان دقيق وكأنه يفك في قنبله..
ونسيبه وهي طالعه من الدار ماشيه للكوجينه بتجيب حاجه..
لما خشتله وشافت منها للصاله...لقت هالمنظر..
شدت ضحكتها وهي متفاجئة وقعدت تتفرج عليهم...
بعدين طلعت التليفون من جيبها وخدتلهم صورة بدون مايحسوا...
ريحان:ماتطلعش من الظفر بابا..
هيثم شبحلها وهو عاقد حواجبه وقال:حاضر..امرك..
ورجع كمل شغله...
🌸🌸🌸🌸
طلعت من الدار وجاته وهي جاهزة ..
حطت شنطتها على كتفها وقالت...شويه ويطلعوا البنات..
ماردش عليها..
رفعت حواجبها وهي تقول:هيثم...
شبحلها وقال:نعم؟
نسيبه؛قتلك البنات قريب يطلعوا..
ناض وقف وحول نظاراته طبيه وهو يقول:اها..تمام تمام..
نسيبه بقلق:خيرك؟
هيثم حرك راسه يمين ويسار وهو يقول:شي مافي شي..
نسيبه شبحتله شويه بعدين قالت؛شن في المحامي؟
شبحلها وقال؛لقيت غيره وان شاء الله خير..
نسيبه وهي تشوف لخوها بضيق قالت:ان شاء الله...هي بس لو تطلع البنت لو يلقوها..
هيثم تنهد بقهر وقعد ساكت...
ع جية بناته الزوز..
لما شافهم كل المشاعر السيئة اللي كان يحس بيها تبددت...
كان يتأمل فيهم كيف طالعات بفساتينهم الورديه اللي بأكمام طويله ومنفوخه من الاكتاف ..طوله لتحت الركبه بشويه..
مزين الخصر حزام ابيض مربوط من الخلف ربطه انيقة وحلوة...
وفي رجليهم اللي كانوا مغطيات يجوارب بيض لحميه حذاء لونه ابيض حلو...
وفاليد اليمين لكل وحده فيهم خاتم اكسسوار ع هيئة حبة لولو وكأنها حقيقيه...
الأختلاف الوحيد بيناتهم كان في تسريحة الشعر..
جنان شعرها مظفور بطريقة حلوة ع طوله ومغطي جبهتها غرة حلوة...
اما ريحان فكانت طالقه شعرها القصير المشدود ع جنب بتوكه لونها وردي...
والزوز طالعات قمة في الجمال ببراءة ابتسامتهم ونظراتهم لبوهم..
هيثم:ربي يحبني اللي عطاني اميرات كل وحده فيهم احلى من الثانيه...
ابتسمت نسيبه..
ريحان:حلو شعري بابا..
هيثم:عسل..
جنان:واني بابا..
هيثم:سكر..
ريحان:وقفطاني بابا..
هيثم:يهبل..
جنان:واني بابا..
هيثم؛مش عاادي..
حط ايديه ع روسهم وقال...احلا بنات بناويتي اني..
وحط ايديه ع روسهم وبدي يرقي فيهم..
ونسيبه تتأمل فيهم بإبتسامه..
بعد كمل طبس ع روسهم باس كل وحده فيهم بعدين وقف ه حيله وقال:هي توا نبي نطلب منكم طلب صغير...
شبحوله التلاته بتساؤل عن طلبه..
وهو مرر نظره عليهم بإبتسامه...
•••••°°°°••••••°°°°°•••••
طلعوا بالسيارة من الزنقه..
وهما خاطمين حدا الورشه لقو فيها عمال..
وخليل واقف يتكلم بالتليفون..
كلكسله هيثم..
انتبهله خليل جو عيونه فعيون نسيبه..
فيسع غيروهم عن بعض..وهو حيا هيثم بحركة اليد..
وهيثم رد عليه ..
والبنات شبحوله وهما يحيوا فيه بإيديهم..
وهو ضحك ورد عليهم..
هيثم :ربي يجعل له من كل ضيق مخرجا...
نسيبه قعدت متحفظه بصمتها برغم الضجيج اللي صاير داخلها..
قعد الصامت سائد لعند ماهيثم تكلم فجأة وقال...
"لايوجد كنز في الحياة اثمن من وجود انثى مباركه في بجانب رجل تحبه جدا...لأن الرجل طبعه اليأس..كلما انغلق امامه باب استسلم سريعا ..لكن الأنثى لاتيأس...الأنثى التب تحبه جدا تخلق له من العدم طريقا للفرح...لان في روحها سر المعجزات..لايوجد كنز اثمن من وجود انثى حظها الجميل يقتحم كل مستحيل...ويحضر لك امنياتك التي لم تكن تحلم بها"
نسيبه وهي تسمع فيه شن يقول حست بقلبها بيطلع من مكانه..خوها قاعد يوصللها في رسايل واضحه وتأكدت بعد ماقال..
هيثم:حفظت الاقتباس هدا من كتاب كانت تقرا فيه المرحومه..اللي كتبه راجل عارف قيمة المراة حق...عارف شن معنى حديث الرسول اللي قال فيه:خير متاع الدنيا المرأة الصالحه"...
درس قدام المدرسه وقال:هي انزلوا..
ريحان:بتروح بينا انت؟.
هيثم:ايه حبيبتي...
نزلت نسيبه وسكرت الباب وهي تشوف لخوها ..
بعد نزلوا البنات تحرك بدون مايشوفلها...
وهي خدتهم من ايديهم وخشت معاهم وهي تفكر في كلام خوها امس واليوم اللي كان واضح انه مقدمات لموضوع حيفتحه معاها عن قريب...
•••••°°°°°••••••°°°°°•••••••
وصل للمصحه وخشلها...
شاف الوضع فيها مرتبك وملخبط...قلبه انقبض بخوف وسأل الممرضات اللي جو قدامه..
هيثم:خير ان شاء الله شن في؟.
وحده منهم قالت:واحد من النزلاء حاول ينتحر..
مجرد ماسمع شن قالت بدون مايفكر مشي من حداهم يجري وهو يدعي من قلبه ويقول بصوت منخفض..
"يارب مش هو يارب يارب"
يتبع …
