#البطل_المغمور"شمس الغروب"
#الجزء_السابع_والعشرين"القسم الثاني"
#الجمان_الفريد
الصلاة أولا....قبل واهم من كل شي💓💓💓
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐...
يدور في الكوجينه ويفتش في الدواليب وهو يقول بصوت عالي:معليشي ناخدوا من كل حاجه شويه يارتاج..
....برا وهي واقفه مع امها واختها......
سدينه وهي تلبس في عبايتها شهقت وقالت:نهار احرش من هالراجل...
رتاج بضحكه:عادي عادي خودوا اللي تبوه..
دانيه بصوت منخفض:ماتعوديشي على هكي يارتاج تو تلقيه كل يوم عندك وفي قولة عطونا ونبوا.
رتاج:مش مشكله عادي...
سدينه:حاولي في راجلك يجيبك تقعدي عندنا المرة الجايه ايوه..
رتاج:ماتكبروش الموضوع...
رشيد:رتاج تعطيني فلوس نجيبلك رصيد نت خير ماتقعدي مكسده بروحك؟.
رتاج وهي تشوفله من فوق لتحت:لا حبيبي مش لازم تو لما يروح عادل يجيب معاه..وانت فوته هالنت الاحرف فوته والهى في قرايتك..اكبر غلطه دارها بوي انه خدالك نقال توا..
رشيد وهو متفاجئ:خيرها هادي!
ودانيه تشوف لرتاج ورشيد وحاسه ان كلامها قاصده من وراه شي...
سدينه:زيه زي نداده..
رتاج:شن تقولي يام! وهو ضروري اللي يديروه الناس نديروه حني! وياستي حتى خديتوله خلوا عيونكم عليه..
رشيد بعصبيه:تي خيرك انتي الزفت شن دخلك..
ومشي طلع من الحوش وهو معصب..
ع جية بوها...
مجيد:خيره يعيط هدا؟
رتاج شبحتله وقالت:بوي خلي عيونك عليه وردبالك منه خليه يلهى في قرايته ويلوح عنه هالشقفه..
سدينه تشبح لبنتها بإستغراب..
ودانيه زادو الخوف والقلق في قلبها..
مجيد بلامبالاة:ان شاء الله ان شاء الله...هي ماتبي شي..
وهو ماشي للباب بشكارة معبيه...
رتاج:سلامتك بالسلامه..
مجيد فتح الباب وطلع...
سدينه سلمت عليها وهي تقول:بالسلامه بنيتي ردي بالك ع روحك...
رتاج:حتى انتم يام بالسلامه...
ومشت سدينه وطلعت..
جت دانيه لرتاج وقعدت تسلم عليها وهي تقول:شايفه حاجه على رشيد؟
رتاج بضيق:تو نتصل بيك بعدين ونحكيلك..
دانيه بعدت عنها وهزت راسها بإيجاب وهي تقول:بالسلامه..
رتاج:بالسلامه...
ومشت دانيه طلعت ووراها رتاج...
وقفت في الباب وهي تشوفلهم كيف ركبوا السيارة وتسقدوا...
سكرت باب الحوش...ومشت خشت داخل بإتجاه دار النوم..
لما وصلت فيها سمعت تليفونها رن بنغمة رساله..
حست بخوف...
مشتله بتردد..خداته من ع الزيانه وفتحت الرساله...
(أنسوك ماليك ياحياتي)
رتاج بقلق وتوتر ودموعها عبوا عيونها:ياربي شن دير ياربي...حسبي الله ونعم الوكيل حسبي الله ونعم الوكيل...
•••••••°°°°°°••••••°°°°°••••••
"لأخر مرة نسألك انتي لو ماجاوبتيش بنمشي نسأله هو"
نسيبه بخوف:شن تسأله وعلى شني تسأله!؟ خوي قتلك مافي شي من اللي في بالك والله مافي..
هيثم:معناها نمشيله هو نسأله ونعرف شن قاعد يصير من وراي..وان شاء الله مايخيبش ظني لافيك ولافيه..
نسيبه بتوتر:كيف هيثم انت مكذبني! متوقعني ندير حاجه غلط من وراك ونخونك!
هيثم قام تليفونه وهو يقول:توا نتاكد...
سارة واقفه تشوف للموقف بقلق ومش قادره تتدخل فيه..
نسيبه:هيثم انتي هكي بتزعلني منك هلبه..
هيثم شبحلها برفعة حواجب بعدين غير عيونه عنها وقال:السلام عليكم خليل..
نسيبه قعدت تشبحله بخيبة امل...وسارة تشبحلها بحزن..
هيثم:فاضي توا...
"ايه مروح من الجامع شويه ونكون قدام الحوش"
هيثم:لالا اني نجيك في الورشه..
خليل:تمام...على راحتك......وعليكم السلام...
نزل التليفون وشبح قدامه شاف للورشه وقعد يسرع في خطواته وهو ماشي بإتجاهها...
شويه خطمت من جنبه سيارة شرطه...
قعد بعيونه معاها لين خشت الزنقه...
ع طلعة رفيق من الورشه وهو يتبع فيها وخش للزنقه وخليل وراه...
شافوا السيارة درست مباشرة قدام حوش هيثم...
رفيق:شن في؟!
خليل بقلق:مش عارف...
بعدين رفع راسه وقعد يشبح لحياش الجيران لقاهم طالعين يتفرجوا من الرواشن...
نزل راسه وشبح القدام وقال بغضب:تس..
......في حوش الكاتب.....
طلع هيثم وهو مستغرب...
ونسيبه وسارة يتفرجوا من الروشن...
ع جية البنات الصغار بعد مابدلوا حوايجهم وصلوا...
ريحان:هيا نبي غدي..
جنان:جيعانين..
ومافي حد رد عليهم الزوز كانوا يشبحوا للروشن وهو في قمة القلق والخوف..
....برا.....
هيثم:خير ان شاء الله..
الضابط:هني حوش نسيبه الكاتب..
خليل فتح عيونه ع وسعهم بصدمه...
ورفيق يشبحله..
هيثم عقد حواجبه وقال:علاش شن عندكم معاها؟!.
الضابط:جايه في حقها شكوى من وحده اسمها ملاك الزايدي قالت انها اعتدت عليها بالضرب..
خليل مسح بيده ع شعره للخلف بغضب..
ورفيق مبتسم بتهكم وهو يحرك في راسه يمين ويسار...
هيثم قعد واقف يشوفله وهو ساكت...بعدين غير عيونه لخليل وقال...امم استنى لحظه..
ولف ومشي خش داخل...
خليل بصوت منخفض:ورب العزة ملاك هادي ماضال الا مربيها..علا صوته وقال...اللي شكت فيها قاعده في المركز؟
الضابط بدون مايشبحله:اكيد..
خليل طول لف ومشي بسرعه..ورفيق معاه بعيونه لين ادرق من قدامهم..
.....داخل.....
لما خش هيثم شاف البنات الصغار..
شبح لنسيبه وقال:سارة خودي خواتك وبري انتي وياهم لداركم..
سارة طول نفدت بدون سؤال..
ريحان:جعانه..
سارة:باهي حبيبتي نخشوا الدار وتو نجيبلكم غداكم..
وخشوا للممر الديار..
هيثم بحده:من هي ملاك الزايدي؟
نسيبه حطت ايديها في نصها وقعدت ساكته وهي مغيره عيونها عن خوها..
هيثم:قاعد نسأل فيك...من هي ملاك وعلاش ضاربتيها؟
نسيبه نزلت ايديها وشبحتله وقالت:هادي وحده وقحه ناقصة ربايه تمشي وتدوي بينا في حياش في الجيران...
هيثم:تنوضي انتي تضربيها! بدال ماتتجاهليها وتخليها لوقاحتها وقلة ربايتها ع قولتك تنزلي لمستواها وتضربيها!!
غيرت عيونها عنه وهي مضايقه ومنحرجه...
هيثم رفع ايديه افقيا ونزلهم وخبط بيهم رجليه وهو يقول:امتى تكبري..امتى تحطي عقلك في راسك امتى تتصرفي بحكمه مش عارف..المشكله كبرتي ع اني ننصحك ونوريك ونعلمك..
شدت دموعها بقوة وهي تهز في رجليها بعصبيه..
هيثم:الحكايه مش ناقصه الوضع تشبحي فيه قدامك وبدل ماتعاونيني تزيدي في الهم ع الهم..
نزلوا دموعها..
هيثم:تحركي...اطلعي قدامي..
مسحت دموعها وهي ترشف ومشت بسرعه..
وهو مشي وراها وطلعوا....
....والناس برا تتفرج...
وهما يشوفوا في هيثم كيف يحاول مع الضابط يخليه يركب مع اخته في سيارته...
وفي النهايه الضابط وافق بشرط يركب معاهم عنصر من الامن...
وطلعوا وطلعت وراهم سيارة الشرطه..
على مرئ ومسمع من الجيران....
ورفيق مشي للورشه وهو مضايق ع وضع اللي وصلوله عيلة الكاتب..
■في نفس الوقت..
وصل خليل للمركز وقعد يدور وهو في قمة الغضب على ملاك لين لقاها..
هي لما شافاته خافت بس اظاهرت بالعكس..
هو وصل عندها ووقف قدامها وقبل مايتكلم هي قالت..
ملاك:تي لو شن دير ماني ساحبه الشكوى متاعي لين نربيها المسترجله هادي
خليل رفع حاجبه وقال:تربيها!؟ امم...شبح يمينه ووزع نظره وهو يهز في راسه..بعدين شبحلها وقال...مالا بعد تربيها وتي روحك انتي وحناك وخوك بش نسفرك للمغرب..لبوك..
شبحتله بصدمه..
خليل:لو ماعندكش علم..بوك متواصل مع بوي وسأل عنك وقاله ابعتهم ولا اني نجيهم وناخدهم بروحي ولانك وقتها كنتي على ذمتي فات الموضوع ولتوا مايعرفش اني طلقتك يعني لو يعرف حيخليني نسفركم غادي واقعدي انتي عايشه تحت رحمته ورحمة مرته غادي...
وهي تشوفله بعيون جاحظه من الخوف وترعش بكل مافيها نزلت من عينها دمعه وقالت بصوت مبحوح:بالله عليك لا..
خليل وخر وجي جنبها واشرلها بيدها ع مكتب الضابط..
هي مسحت دموعها وبلعت ريقها..هزت راسها بإيجاب ومشت خشت للمكتب...
وخليل قعد واقف في الباب يستنى...
......في الطريق.....
كانت نسيبه تشبح للروشن وهي تبكي بصمت..
وهيثم يسوق ومرة مرة يشبحلها بحده...
فجأة..
سمعوا صوت من جهاز الارسال اللي مع الضابط..
"عريف انور"
العنصر قام الجهاز وقال:معاك العريف حول..
"المدعيه سحبت الشكوى متاعها توا بلغوني من المركز"
هيثم ونسيبه شبحوله..
العنصر شبح لهيثم وقال:تمام تمام...نزل الجهاز وقال...زي ماسمعت سحبوا الشكوى تقدر توقف وتنزلني...
هيثم هز راسه ووقف ع تركينه...
نزل العنصر من السيارة ومشي لسيارة الشرطه اللي وقفت وراهم...
وهيثم يشبح لنسيبه من المرايه..
هي شبحتله بخجل وفهمت عليه..
نزلت من السيارة ومشت ركبت جنبه..
هو راجى لين سيارة الشرطه فاتت من جنبه...
تحرك بالسيارة...لف ورجع تاني...
هيثم:البنت هادي ليها علاقه بحوش خالد..؟
نسيبه نزلت عيونها وقالت:كانت كنتهم..
رفع حواجبه وقال:اللي كان واخدها خليل يعني!
هي قعدت ساكته..
هيثم هز راسه وسكت...
نسيبه قامت راسها وشبحتله وقالت:اقسم بالله مافي حاجه والله مافي..
هو حط سبابته ع فمه...
هي لفت وجهها وشبحت للروشن بضيق ودموعها ينزلوا...
....بعد ماقطعوا مسافه....
وصلوا للحوش...
لقوا خليل قدامه يراجي فيهم..
هيثم وقف قدام الحوش وقال:انزلي..
هي نزلت...
ومشت ضربت الجرس..
وهيثم اشر لخليل يجي يركب..
خليل جاه بدون مايرفع عيونه في نسيبه ركب السيارة...
بعد ماخشت نسيبه للحوش..
تحرك هيثم...
والزوز الصمت السائد عليهم...
وخليل حاس ان اللي يبيه فيه هيثم مالاش علاقة بموضوع ولده زياد...
وصلوا للورشه...
خليل جي بينزل هيثم قاله:خليك..
شبحله خليل..
هيثم خدي نفس وقال:تعرف اني حاط فيك الثقه..وهالكلام قلته اكثر من مرة...شبحله وقال...خليك صادق معاي وقولي...عندك مشكله مع اختي؟
خليل شبح القدام وهو يبلع في ريقه ومش قادر يرد..
هيثم:خليل...جاوبني بصدق...مانبيش نخسرك..
شبك ايديه في بعض ونزل عيونه لوطا وعقد حواجبه وقال:ولااني نبي نخسرك...تنهد وكمل يقول...القصه ومافيها..ان..ابتسم ع جنب وقال..عيوني طموحهم عالي..شبحوا فوق...لأعلى من مستوى نظري بهلبه...تمنوا الصعب...ولا خل نقول المستحيل...اختك دكتور بنت ناس ماشاء الله عليها...متربيه محترمه قد روحها شخصيتها قويه ماتخلي حد يعفسلها على طرف..بنت بمية راجل زي مانقولوا..واي راجل يبي يدير عيله وياخد مراة تصونه وتاخد بيده وتغيره للأحسن مراة يقدر يعتمد عليها ويأمن فيها مراة بنت اصل...اللي يبي هدا كله...يختار وحده زي اختك..
هيثم قعد مركز عليه بالنظر وهو يتكلم..
خليل مسح ع لحيته ورفع عيونه وشبح القدام وكمل يقول...
اختك...احمم..بالنسبه ليا اني زي الحلم المستحيل..ومع هدا جريت في جرته وكنت نبيه يصير واقع...مشيتلها..كلمتها...
وردها عليا كان كف وقظني وردني للواقع...ذكرتني بنفسي ووضعي وبوي شن يكون...ورفضتني رفض قاتل...وابتسم ع جنب والدموع في عيونه...من بعدها معاش حاولت معاها..لكن ماقدرتش....ماقدرتش...حك حاجبه بعدين قعد يفرك في ايديه في بعض وهو يقول بتوتر...ماقدرتش نطلعها من عقلي...شبحله وقال...والله لو نحس ان اني مرغوب فيا..ومقبول...مستعد نخطبها منك اليوم....اليوم نبعت امي تخطبها...
هيثم غير عيونه وشبح القدام وقعد ساكت..
وخليل يشوفله تبدلت ملامح الحماس ع وجهه لملامح الضيق لما شاف ملامح وجه هيثم جامده...
غير عيونه القدام وقعد ساكت..
تنهد هيثم وقال:شكرا خليل...تقدر تنزل...
نبرة صوت هيثم كانت متغيرة هلبه حسست خليل بشعور فضيع من الخيبه والضيق...
فتح باب السيارة ونزل وهو يقول بصوت يدوب طالع:السلام عليكم..
هيثم بدون مايشبحله:وعليكم السلام..
سكر خليل الباب...وهيثم شغل السيارة وتحرك...
بعد مافات من قدامه مشي للورشه خشلها ..
وخوه رفيق يشبحله..
كان باين على وجهه ملامح الحزن مع ملامح غضب مكتوم ..
ماباش يسأله لأنه عارفه مش حيحصل منه رد..
وغالبا حيفش غله فيه...
••••••°°°°°°••••••°°°°°•••••
"نهار اسود! وصل لهني هو؟!"
رتاج بإستغراب:شن قصدك بوصل لهني!؟
دانيه بصدمه:اني قبل لاحظته ديما شاد تليفونه 24 ساعه مايطيحش من يده حتى قرايته مش مدورها...حطيت في راسي انه يكلم في بنت حاجه زي هادي لين فتشت تليفونه من وراه وخشيت ع اليوتيوب..لقيته يبحث ع بلاوي سودا..
رتاج بغضب:هالتليفون الأحرف هالتليفون!
دانيه بلعت ريقها وقالت:قصدي كان واصله بيه الحكايه لهني كارثه رتاج راهو كارثه..
رتاج بقلق:باهي شن الحل في نظرك شن نديروا؟
دانيه سكتت شويه بعدين قالت:مافيش غير انا نقولوا لمجاهد
رتاج:وكيف بنقولوله؟! مانقدرش ندوي معاه في حاجه زي هادي..
دانيه بضيق:حتى اني..
سكتوا هما الزوز وقعدوا يفكروا بعدين قالت دانيه:تو نلمحله..
حيفهم بروحه ان في شي غلط..
رتاج:باهي هو امتى مروح؟..
دانيه:ان شاء الله ياغدوة يابعده..
رتاج :باهي تمام...المهم دانيه ماتعطليش لازم نديروا حل قبل تصير مصيبة..
دانيه هزت راسها وقالت:ان شاء الله...
رتاج:دانيه بنصكر توا شكله عادل روح..نهدرزوا ع الماسنجر بعدين..
دانيه:تمام..سلام..
رتاج:سلام....
....سكرت رتاج وجت بتنوض بتطلع تستقبل راجلها فجأة جتها رساله ع الماسنجر..
فتحتها بخوف..
(يوم من الأيام بنحرقه الشيباني الخارب هدا بنقتله)
رتاج مسحت الرساله بسرعه وحطت الرقم في الحظر وهي تقول بخوف:ربي ياخدك ويفكني منك..
"رتاج"
حطت التليفون ع الزيانه وشافت شكلها في المرايه..
رسمت ع وجهها ابتسامه تخفي التوتر..
بعدين ناضت وطلعت لراجلها...
•••••°°°°°••••••°°°°°••••••
"هدا شي طبيعي وزي مابلغتك في البدايه المرحله هادي اصعب مرحله"
هيثم:باهي بعد درتوا تقييمكم للحاله قداش حياخد وقت بش يتعالج..
الدكتور:فترة الادمان عنده تجاوزت الشهرين والمده مش طويله..بس الجرعات اللي كان ياخد فيها قويه..واللي عرفناه انه كان يتعاطى اقراص مش حقن..يعني بشكل عام مده العلاج حتستمر لسته شهور..
هيثم هز راسه بإيجاب وقال:سته شهور...نزل عيونه لملف شاده فيده وحطه ع مكتب مدير المصحه وقال...زي ماتعرف اني توا عاطل عن العمل.....متمني نلقى فرصة عندكم..مستعد نكون طبيب صحة عامه وانتم محتاجين للاطباء في المصحه..
الدكتور شبح لملف هيثم وقال:دكتورانت ماعندكش خبرة في مجالنا ولاتعرف كيف تتعامل مع المرضى اللي هني..
هيثم:ولدي منهم يادكتور لازم نتعلم ونعرف كيف نتعامل معاهم..
الدكتور قعد يشبحله وهو ساكت...
هيثم برجاء:دكتور..نبي نقعد مع ولدي...قدر اللي اني فيه ارجوك..
الدكتور:وجودك هني باستمرار حيكون صعب عليك انت بالدرجة الأولى..
هيثم:مش حيكون اصعب من وجودي بعيد عنه يادكتور...
ارجوك قدر كوني اب..انت اب زيي وفاهم اللي نحس بيه..
غير الدكتور عيونه للملف شبحله شويه بعدين شبح لهيثم..
ابتسم وهز راسه بإيجاب..
وهيثم ابتسم بفرح وقالك:مشكور جدا...
▪▪▪▪
◇مانذكرش روحي كنت سعيد هكي فولا مرحله نجحت فيها دراسه كانت او عمل...كان كل همي وقتها اني نقعد جنب ولدي...في اصعب اوقاته...كنت نبيه يصدقني ويثق فيا...ماكنتش نبي نخذله ولو شويه بش مايخذلنيش...وكنت خايف..خايف عليه هلبه خايف نرجع نفقده مرة تانيه بعد لقيته....
▪▪▪▪
وعدت على هيثم ليلة تانيه في المستشفى...
ماقدرش يخش يشوف ولده وقتها لانه كان تعبان جدا من اعراض الأنسحاب...
كانت كل ماتجي لزياد النوبه...
هيثم ينعزل بروحه في ركن من اركان المصحه ويقعد يذكر في الله لين يسكن وقلبه يرتاح...
وكان حريص على انه يهتم بصحته ياخد دواه ياكل يشرب بش يقعد واقف ع رجليه وبقوة..
وسارة ماخلتش تليفونه يهدا وهي تتصل بيه تسأل عن حاله وحال خوها وهو يطمن فيها
🍁ونسيبه قعدت حابسه روحها في دارها مابتش تطلع منها..
واغلب وقتها تبكي حتى وهي تصلي...واجعها كلام هيثم ليها والموقف اللي انحطت فيه قدامه حست انها طاحت من عينه رغم انها مادارت شي...
واكثر شي معذبها هي محاولتها لنكران مشاعرها القويه اللي ينبض بيها قلبها اتجاه خليل..
🍁وخليل...
ليله كله قضاه وهو يفكر في هلبه حاجات واولهم هي...كل ماله قاعد يحس انها تبعد عنه اكثر واكثر...كل مايسأل ربي يعطيهاله يصير شي عكس دعائه...
وهالشي كان واجعه هلبه ومخلي قلبه مقبوض...
ويتسائل...هل ياترى هادي استجابه دعائي بأن ربي قاعد يصرف فيها ويبعد فيها عني...
يعني هي مش خيره ليك ياخليل ومش من نصيبك وربي مش رايدها ليك؟!
مش قادر يتقبل النتيجه اللي وصللها من حبه الشديد ليها..
رفع عيونه وهو يشوف للبدر اللي قاعد يكتمل يوم عن يوم وقال...يارب...هما امنيتين عندي مافيش اغلى منهم يارب..
اني نشوفك في الجنه زي ماقاعد نشوف في القمر توا قدامي...والتانيه نسيبه...نحبها ياالله نحبها هلبه...ياربي..انت قادر على كل شي ياربي...لو ماكانتش خيرتي فيها خلي خيرتي فيها واجعلها نصيبي يارب...يارب...
غمض عيونه وبدي يردد...
اللهم صل على محمد وعلى آل محمد...
🌹ولإنها كانت ليلة جمعه...
كانت سارة وهي مقعمزة عند روشن الصاله وهي تشوف للقمر تردد في الصلاة ع النبي وفي قلبها هلبه امنيات متأمله من الله انه يحققها كلها مهما كان تحقيقها صعب بالنسبه ليها..
لكنها كانت مؤمنة ايمان تام ..أن الله على كل شيء قدير..
▪▪▪▪▪
◇كنت نحب يوم الخميس والليله متاعه كنت مسميها ليلة السلام...سلام داخلي غير عادي نحس بيه هديكا الليله لانها مميزة بالمنحة الربانيه...اللي تجيب السعاده الراحه السكينه الوئام...والأمل..امل كبير....
نذكرالليله هديكا تحديدا...لساني وقلبي مابطلوش صلاةعلى النبي....وكنت بش نستشعر اللي نردد فيه..نقرا عنه هلبه...وين نقرا ونغوص في عالم وحياة هالشخصية المنقطعة النظير في العظمه...نلقى رساله تعنيني وكأنها موجهتلي من قصة حياته هو اصحابه والناس المحيطه بيه والمواقف اللي كانت تصيرله كنت نتعلم منه فعلا كيف نواجه اللي يصير معاي في حياتي....
نستغرب استغراب شديد في هلبه دعاة وطلبه علم وعلماء ومشايخ...كيف مايوصلوش من الدين غير العبادات كصلاة وصوم وزكاة وطهارة البدن بأنواعها وماإلى ذلك من العبادات اللي طبعا هي مهمه جدا...بس ماتكفيش بش تخلي الانسان مؤمن ومسلم حقيقي...السيرة والقصص اللي كانت تصير مع الرسول والصحابه والتابعين ومن بعدهم كانت دروس في الحياة..دروس تعلمنا كيف نعيشوا صح وكيف نكونوا مسلمين صح..اغلبها كانت دروس اخلاقيه متكامله...
تهذب وتأدب وتقرب العبد من ربه اكثر واكثر...
للأسف حاليا هلبه من العلماء والمشايخ..خلو الاسلام يشبه غيره من الديانات اللي تهتم بس بالطقوس اللي تقعد محصورة في المعابد والهيئة والشكل الخارجي ..خلوه بعيد كل البعد عن الحياة والعلم والتطور الايجابي...وبالنتيجه خلوا هلبه ناس تنفر منه.....وتشوف ان الإسلام والحياة نقضين ومستحيل يجتمعوا...
▪▪▪▪▪
(ايام ثقال ياامي...شدتها قد طالت...وقسوتها قد نالت منا مانالت...ولازلنا بحبل الرحيم معتصمين...ظانين بيه كل خير وموقنين ان مع العسر يسرا وعده وهو لايخلف الميعاد..
اعدك ياأمي ألا اجعل صعب الحياة يهزمني او يزعزع ايماني للحظه...واعدك بأنني سأبقى قويه ثابته على مبادئي التي علمتني اياها تحت ضغط كل الظروف...
وسأكون لأبي وأخوتي نهر حنان دافئ مصدره انتي حبيبتي..
اشتقت اليك كثيرا...كثيرا....
نلتقي في الجنه......)
حطت البيرو ومسحت دموعها وسكرت المذكرة..
خدت نفس عميق وناضت...
مشت طلعت من دارها....وتوجهت لدار خواتها خشتلها...
شقرت عليهم وقعدت تتلمس في جباههم وتشوف كان حرارتهم طبيعيه ولالا..
وبعد مالقت كل شي على مايرام..
طلعت من حداهم...شافت للدروج...
تنهدت ومشت ركبت فوق...
وصلت في دار عمتها فتحت الباب بهدوء...
وخشت...
لقتها عمتها راقدة وغامه روحها بالبطانيه..
ابتسمت...بعدين ولت طلعت وسكرت الباب...
نزلت تحت وولت لدارها...
خشتلها ومشت لتليفونها...
خداته من ع الطاوله ودارت اتصال....
..........
اللهم صل على محمد وعلى آل محمد كماصليت على ابراهيم وعلى آل آبراهيم....
رن تليفونه...فتح عيونه وشبحله....
تنهد وفتح الخط وقال:بابا..
سارة:قاعد فايق!.
هيثم:رقدت ساعتين ماليش عشرة دقايق فايق نراجي في الفجر..وانتي؟
سارة:ماقدرتش مشغول بالي عليكم
هيثم:بابا سارة مايجيش هكي بنتي...مش باهي للي فعمرك السهر وقلة النوم..وبعدين حني هني امورنا تمام ماتخمميش علينا
سارة:باهي امتى مروح؟
هيثم:بعد صلاة الفجر بابا..
سارة:باهي...رد بالك ع روحك بابا انتبه لنفسك..
هيثم:حتى انتي بعد تصلي ارقدي ماتراجنيش لين نروح ارقدي بابا..
سارة:حاضر..
هيثم:ايه..شن دايرة عمتك؟.
سارة :شي..حابسة روحها في الدار من لما روحت..
هيثم تنهد وقال:تمام...زي ماقتلك صلي وارقدي..
سارة ابتسمت وقالت:حاضر بابا...
هيثم:هي سلام توا بابا..
سارة:سلام..في وديعة الله..
هيثم:في امان الله ...سكر وهو يقول بإبتسامه...امها امها....اتكى براسه ع الكرسي وغمض عيونه ورجع يردد في الذكر.....
•••••°°°°°••••••°°°°°••••••
اليوم التالي...
الساعه الرابعه عصرا....
"افتحوا الباب لخوكم"
طلع رشيد من داره ومشي بإتجاه الباب...وفتحه...
"رشيد باشا"..
رشيد بإبتسامه:اووو مجاهد...
وسلموا ع بعض..
مجاهد:شن جو..
رشيد:مليح...
مجاهد سكر الباب وبدي يحول في كندرته وهو يقول :وينهم؟.
رشيد:امي ادير في العاله ومعاها هديكا ماجده..
عقد حواجبه وقال:خيرك تدوي هكي!؟
رشيد مط شواربه ع جنب بإنزعاج وقعد ساكت..
مجاهد:صايرة حاجه؟!
"مجاهد"...
ابتسم ومشي خش الصاله بروحه ورشيد ولى لداره...
....في الصاله....
حط مجاهد شنطته وهو يقول:السلام عليكم...
وجي لأمه...
الزوز ردوا عليه وهما مبتسمات...وعليكم السلام...
سلم مجاهد ع امه وباس ع راسها...
وجي لمرت بوه حتى هي باس على راسها...
ماجده:تكب ع الكعبه وليدي...حمد لله ع سلامتك..
مشي مجاهد قعمز حدا امه وقال:الله يسلمك خالتي..
سدينه شدت يده وقالت:خيرك ضاعف؟
مجاهد بضحكه:تي وين ضاعف تي قولي زايد 20 كيلو...
....وفي مكان تاني من الحوش....
تحديدا دار دانيه...
كانت مقعمزة تتكلم بالتليفون...
دانيه:ولايهمك ولاتعدلي على حد ياسارة ع اساس كلهم مستقمين وعايشين بما يرضي الله والمدسوس ربي بس اللي يعرفه وساتره ..
سارة ابتسمت وقالت:بصراحه دنون اتصلت بيك ويدي ع قلبي خفتي حتى انتي تتهربي مني وتقطعي علاقتك بيا..
دانيه:تي بري ياهبله..مانعرفكمش اني توا! وبعدين كلنا معرضين ياسارة ماحد يسلم من المصايب مرات اليوم عندكم وغدوة عندنا...
سارة:ربي يبعد عنكم كل شر...
دانيه:ويفرج عليكم ويجعل كل الخير في اللي قاعد يصير معاكم...
سارة بإبتسامه:آمين...ايه قوليلي تقري للمسابقه؟
دانيه:ايه كل مرة نشد حاجه...
سارة:بالتوفيق إن شاء الله...
دانيه:يارب..وهالمرة نجيبوا الأول....
شبحت للباب لما سمعت صوت دق عليه..وبعده جاها صوت خوها يقول"بطه"
ضحكت وقالت:خش خش...
انفتح الباب وخش مجاهد وهو يقول:شن جو يابطه خيرك ماجيتيشي سلمتي..
سارة سمعت شن قال ابتسمت وقلبها بدي بقوة وقالت:مالا نخليك توا دنون نتلاقوا غدوة ان شاء الله..
دانيه ناضت وهي تضحك وقالت:تمام سارة...سلام...
مجاهد وقف وحط ايديه في جيوبه وهو يشوف لأخته..
سكرت دانيه ومدت يدها وهي تقول:حمد لله على سلامتك..
صافحها مجاهد وسلم عليها بالخد وهو يقول:الله يسلمك شن جو..
دانيه:تمام الحمد لله..بعدت وهي تقول...شن جوك انت شن اخبارك...مررت نظرها عليه وهي تقول..سامن ماشاء الله..
مجاهد بضحكه:وامي تقول ضاعف..
دانيه بضحكه:لا امي ديما تقول هكي..
مجاهد ضحك بعدين شبح لتليفون اخته وقال:كنت تكلمي في بنت الدكتور هيثم؟
دانيه ابتسمت وهزت راسها بإيجاب..
مجاهد حك حاجبه وقال:وشن حالهم؟
دانيه تنهدت وقالت:حال يوجع...انت تخيل وضع حد كانوا الناس يقدروا ويحترموا فيه ويشوفوا فيه حاجه كبيره وفجأة يصير معاه شي يقلب حاله قلب ويخلي الناس تبدا تتجنبه وتقطع علاقتها بيه ونظرتهم ليه تولي خي.."مش حلوة"
مجاهد عقد حواجبه بضيق وقال:لاحول ولاقوة الا بالله..
دانيه:بس مع هكي عندهم قوة ايمان ينحسدوا عليها..توا سارة كانت تقولي ربي دار هالأختبار مش لينا حني وبس حتى للناس اللي حوالينا بش نعرفوا الناس من بعضها..
ابتسم مجاهد وقال:حلو..
ابتسمت دانيه..
هو شبك ايديه في بعض وقال:بعدين نبي نهدرز عليك شويه تمام..
دانيه هزت راسها بإيجاب وهي مبتسمه..
هو دارلها حركه بأنفه وابتسملها بعدين قال:خل نوتي روحي لصلاة العصر..
ولف ومشي للباب طلع وسكره وراه..
تلاشت ابتسامه دانيه وهي تقول:ياربي كيف ندير...كيف بنلمحله بس...اففف..استغفر الله...
•••••°°°°°•••••°°°°°°•••••°°°°°•••••
"تفضل سيادتك...من هني معاليك.......هو هدا مكتبه"
طق باب غرفة المكتب..
جاه اذن الدخول...
فتح الباب وخش وهو يقول:السلام عليكم..
رفع عيونه وشاف اللي خش عليه ناض من مكانه وقدمله وهو يقول:وعليكم السلام..اهلا وسهلا اهلا معاليك..
صافحه وهو يقول:كيف الحال..
رد عليه وهو يقول:الحمد لله على كل حال..تفضل ..
شبح للكرسي وقعمز...
شبح لمدير المصحه وهو يقول:تفضل دكتور..
المدير:مشكور دكتور هيثم وراي شغل..وجه كلامه لوزير الداخليه وهو يقول..شرفتنا معاليك..
رضوان ابتسم وقال:اني اللي تشرفت..
المدير:تسلم..عن اذنكم..
هيثم:اذنك معاك دكتور...
المدير لف ومشي طلع من المكتب وسكر الباب..
هيثم مشي قعمز في الكرسي المقابل لرضوان وقال:صراحة فاجئتني زيارتك..
رضوان رد بإبتسامه جانبيه وبعدين قال:هدا واجب دكتور...ماتتفاجئش منه...جيتك مش بش نواسيك لا..جيتك نحييك ع احساسك بالمسؤوليه كنت ولازلت مسؤول مخلص اي كان منصب اللي انت فيه..الأبوه مش حاجه ساهله بل تكاد تكون اصعب مهمه يستلمها الرجل في الدنيا..
هيثم شبح ايديه في بعض وشبحلهم وهو مبتسم بأسف ..
رضوان:تمنيت لو كان والدي عند ربع احساسك بالمسؤوليه كان مصير خوي الله يرحمه زي مصير ولدك توا..
شبحله هيثم شاف في عيونه لمعة دمعه وعلى وجهه ابتسامة ألم...
كمل رضوان وهو يقول:رد بالك تقول ان مستقبل ولدك ضاع او انتهي امره...بالعكس هو توا ولت عنده فرصه هلبه غيره ماحصلوهاش..عندي خلفيه عن القضيه المدان فيها وحتى هي ماانتهاش أمره فيها...
هيثم:هدا اللي مخوفني بقوة..خايف القضيه هادي تأثر على علاجه...
رضوان هز راسه وقال:مفهوم...اني نبي نخدمك في هالموضوع خدمة بسيطه..
عقد حواجبه هيثم بإستغراب..
رضوان:في محامي نعرفه...محامي ممتاز جدا..القضايا هادي لعبته زي مايقولوا...حط يده في جيب الفرمله وطلع منه كرت ومده لهيثم وقال...هذا رقمه وعنوان المكتب متاعه..
هيثم خدي الكرت وقال:شكرا..جزاك الله خيرا..
ابتسم رضوان وقال:العفو...عندي ليك سؤال..
هيثم :تفضل..
رضوان:قاعد تتعامل مع عايلة خالد؟
هيثم هز راسه بإيجاب وقال:ونعم الناس والجيران..وقفوا معاي هما في الوقت اللي فيه اقارب واصدقاء ماكلفهمش خاطرهم يديروا اتصال..
رضوان ضحك ضحكه خفيفه وقال:اممم..يعني خليل هو اللي دلك ع مكان وجود ولدك...
هيثم:اي شي تبوا تعرفوه عن خليل بروا اسألوه هو مباشرة..
رضوان ضحك تاني وقال:مانبيش نعرف منك اي معلومه..بس نبي من خلال ملاحظه لوضع خليل..هل التغيير اللي صارله حقيقي ولاتمويه..
هيثم رفع حواجبه وقال:اني بشر..ليا الظاهر زيي زيكم واللي في قلبه مايعرفه حد غير الله سبحانه وتعالى..اما اللي اني نحس بيه وشايفه وهدا رأيي من زمان وتوا...الشاب هدا كويس جدا...جدا...
هز رضوان راسه وقال:تمام...ناض وقف وهيثم وقف معاه..
مد يده وقال:ربي يعاونك ويشفي زياد ويفرج عليكم..
صافحه هيثم وقال:آمين..مشكور جدا على زيارتك معاليك..
رضوان:لاشكر على واجب..
طلق يد هيثم...ومشي ناحيه الباب وهيثم معاه...
فتح الباب وطلع وهو يقول:السلام عليكم..
هيثم:وعليكم السلام..
مشي رضوان والمرافقه معاه...
وهيثم يشبحله بعد ماادرق عنه..سكر الباب...
وقام الكرت وشافه وهو يقول...
"إحسان الفيتوري"...
•••••°°°°°••••••°°°°°•••••
الساعه السادسه مساءا...
"مني اللي جايه زيارة ؟!"
موظف السجن قعد يدور في السجل ع جهاز الحاسب اللي قدامه قال:وحده اسمها سماح *****
رفع خليل حواجبه وهو متفاجئ...
الموظف:الاسبوع الجاي ان شاء الله..
خليل شبح للموظف وعقد حواجبه...بعدين خبط بيده ع المكتب خبطه خفيفه ولف ومشي...
......في مكان الزيارة....
خالد بغضب مكتوم:اقسم بربي لولا اني مانبيش نحط ذنب جديد في رقبتي كنت ذبحتك هني..
سماح ببكي:حرام عليك خالد والله حرام مش عارفه امتى تحس بيا وتفهمني بس..
خالد:اخر من يدوي ع الحرام انتي يا.....وسكت وبلعها بعدين ناض وقال...مازال تجي هني مرة تانيه ورب العزة ماضال مطلع اللي هناك لخوتك وماني مدور شي خل يذبحوك ذبح وينظفوا وسخهم...
وشبح للضابط ومشي..
جاه وطلعه....
وسماح قعدت تبكي بحرقه....
.......برا......
كان خليل واقف بسيارته حدا باب السجن ويراقب...
لحظات وطلعت وحده لابسه اسود في اسود ومغطيه وجهها بالخمار...حسها هي...
جت للطريق وقفت تاكسي وركبت..
تحركت السيارة وهو تحرك وراها....
وقعد يلحق فيها لين وصلت في مول...نزلت منه وخشت والتاكسي مشت..
هو قعد واقف في مكانه يراجيها تطلع...
وبعد حوالي سته دقايق طلعت وهي لابسه لبس عادي ووجهها مكشوف...خالته سماح...
وقفت ع الطريق ووقفت تاكسي وركبتها ومشت...
....هو قعد واقف في مكانه ويفكر....
شن قصة سماح مع بوه!!! شن هو الشي اللي مايعرفاش عنهم هما الزوز؟
معقوله تكون امه باعتتها!!؟ وعلاش بتبعتها!؟ شن مازال تبي فيه بعد طلقها.!؟
طلاق!...
طلاق بوه وامه...هو كان ماشي لبوه بش يسأله عن السبب...
معقوله تكون اجابة سؤاله..........
حرك راسه يمين ويسار بسرعه وهو مغمض عيونه...
بعدين فتحهم وخدي نفس عميق...وتحرك طول....
وتحركت بعده بمسافه سيارة تانيه....
••••••°°°°°°••••••°°°°°°••••••
مقعمزة تقرا في الصالون...
وهو حداها يشوف في وراق حسابات تخص شغله..
قام عيونه شبحلها...
لقاها غارقه في الشيتات اللي قدامها وتبان منقطعه معاهم عن العالم..
وهو قعد يتأمل فيها وفي جمال صورتها ويقول لنفسه..
شن اللي يخلي بنت بهالمواصفات ترضى تكون زوجته؟.
ولامرة نفرت منه ولابينتله انها متحسفه ع نفسها معاه..
تتعامل معاه بطيبه ولين ولسان حلو وتخدم فيه وماقصرتش في حقه نهائي...
حتى لو كانت هي في الأصل بنت طيبه وهاديه ومسالمه ومغلوبه على امرها...
الا مايبان عليها شي ولو في ملامح وجهها بعدم الرضا زواجه من راجل في عمر بوها..
هو ممكن يكون الأمر عادي عند البعض...
بس هو مش قادر يحول من راسه الشك...حاس ان في شي تاني خلاها راضيه بزواجها منه رضا تام...
تنهدت ورفعت شعرها فوق وقالت:عادل تشرب قهوة؟
ابتسم وقعد ساكت..
شبحتله وقالت:بندير قهوة تشرب معاي؟
عادل:تحبيني؟
ملامح وجهها جمدوا ..قعدت تشبحله ومش قادرة ترمش من كثر مافاجئها السؤال...بل صدمها..
عادل:صعب السؤال لهالدرجه؟ ولااجابته صعبه..
هي غيرت عيونها عنه وحكت خدها بعدين حطت خصله من شعرها ورا وذانها وقالت:مش هكي..بس..شبحتله وقالت..مازال وقته السؤال هدا..
رفع حواجبه وهو يشوفلها يراجي تفسر اكثر..
رتاج:قصدي ان حني توا قاعدين نتعرفوا على بعض زي مايقولوا قاعده نتعرف عليك وعلى طباعك وحتى انت..
عادل:بس اني حبيتك من اول مرة ريتك فيها..
ضحكت وقالت:هدا اعجاب مش حب..
عادل:لاحب اني نحس فيه حب..
رتاج ابتسمت بإرتباك وقالت:احمم..مرات...
عادل:يعني من الاخير انتي ماتحبنيش..
رتاج بلعت ريقها وقالت:اني نعزك ونقدرك..
عادل ابتسم ورجع شاف للوراق اللي قدامه وقال:احسبيني معاك في القهوة..
هي ناضت وعيونها عليه وقالت:وسط ولا؟
عادل بدون مايشوفلها:ديري زي ماتحبيها انتي..
رتاج:قهوتي حلوة مش باهيه ليك..
شبحلها وقال: واني معنديش السكر ولاالضغط ومانشكي من شي..
رتاج بتلقائيه:عارفه بس اللي في عمرك معرضين اكثر من غيرهم...
سكتت لما استاقظت لروحها شن قالت..
هو ابتسم ورجع شاف للوراق وقال:ديرها مرة..
هي عضت ع شاربها بإحراج ومشت للكوجينه...
وهو تنهد وغير عيونه ع الوراق وقعد يفكر في نفس الشي اللي ملازمه ليه فترة وشكه كل ماله يكبر...
....في الكوجينه....
رتاج وهي ادير في القهوة كانت تتكلم مع روحها وتقول:شن خطر عليه يسأل هالسؤال توا..استغفر الله وخلاص..
فجأة رن تليفونها بنغمة رساله..
هي طلعاته من جيب توته وفتحت الرساله..
(كان تعرفي شن درتي خليتي يومي كله ليك مش قادر نتحرك من حدا حوشك)
رتاج بهمس وخوف:ياربي شن ندير في عمري ياربي شن ندير..
"رتاج"..
من الفزع انتفضت و طاح من يدها التليفون...
طبست خداته وهي ترعش وتقول:نعم عادل؟.
عادل وهو مضيق عيونه بشك:بنقولك..شن رايك اخر الأسبوع هدا نعزموا ماليك ع الحوازة..
رتاج:علاش!؟.
عادل وعيونه ع التليفون:شن علاش اهل زوجتي وبنعزمهم لمزرعتي ضروري بمناسبه يعني!؟
رتاج تنهدت بتوتر وقالت:لاعادي..تو نقوللهم تمام..
عادل هز راسه وجي بيطلع..
رتاج:ايه عادل..
وقف وشبحلها..
رتاج:يوم اللي بتمشي لصغارك..نبيك ترفعني نقعد في حوش اماليا امي قالت مانقدروش نجوا ديما مرة تقعدي عندنا ومرة حني نجوك..
هو شبح للتليفون بعدين شبحلها شويه وقال:باهي...مافيش مشكله..
ابتسمت براحه وقالت:شويه وتجيك القهوة..
عادل هز راسه وطلع..
وهي غمضت وزفرت براحه...بعدين فتحهم والتفتت لبكرج القهوة...
••••••°°°°°°••••••°°°°°••••••
مفرشه هي وياه في البالكونه ومقعمزين يشربوا في القهوة ويهدرزوا فيها..
دانيه:مدللها ومحترمها وشن ماتبي يكون حاضر قدامها وحتى لقرايتها ردها ومساعدها هلبه...هي تقولي راجل طيب ومحترم وراقي ولامرة ريت منه حاجه ضايقتني ولاوجعتني...
مجاهد:مهما كان كويس..الفرق بينها وبينه حتحسه توا ولابعدين..الفلوس مش كل شي يادانيه..
تنهدت دانيه وشربت من فنجانها وهي ساكته...
مجاهد شبحلها وقال:وانتي؟.
هي شبحتله بإرتباك وقالت:اني شني؟!
مجاهد:قصدي شن دايره بشكل عام ..ورشف من فنجان القهوة..
دانيه:اهو ماشي الحال الحمد لله..باديه نتعود ع هلبه حاجات..نشرب قهوة مرة..معاش ناكل حلو الا فواكه بس..الميه زي ماتشوف فيها ديما معاي ماتفارقنيش ولازم كل شي ناكل حاجه...ولازم نتعود نتغاضى ونتجاهل بش ماننفعلش ويرقى سكري او ينزل وهلبه حاجات تانيه...باديه نتعود عليها..
تنهد مجاهد وماباش يتكلم عن الموضوع هدا غيره وقال:قرايتك ؟.
دانيه بضحكه:اي اختاروني للمسابقه المنهجيه العام هدا...
مجاهد بإبتسامه:حلو...
دانيه ابتسمت بضيق وقالت:لكن خسارة سارة مااختاروهاش..
خفت ابتسامته وقال:مستواها في القرايه نزل؟.
دانيه:بالعكس رغم ظروفهم مستواها مازال زي ماهو ممتاز...لكن ع خاطر اللي صاير معاهم الفترة الأخيره..
مجاهد شبح لفنجان القهوة وقعد ساكت وهو يسمع في أخته..
دانيه:قالتلي مشت امس المدرسه حست روحها منبوذة يتحاشوا فيها ويتجنبوا ياخدوا ويعطوا معاها قالت حتى الأبلات معاملتهم ليا تغيرت...تصدق كلمتني هبه صاحبتني قالتلي سمعت بودانها المديره تقول لوحده من الأبلات لو فيها كيف طلعتها من المدرسه خوها مدمن ومتحرش وهارب...هدا قبل مايشدوه طبعا..
مجاهد شبحلها وقال:هما هكي الناس حكمهم ديما ظالم ومجحف..باهي هي شن تقولك يعني شن الشي هدا اثر عليها هلبه؟
دانيه:ايه..كانت تبكي وهي تحكيلي..لكن قالتلي حنواجه مش حندس روحي ولانخليهم يكسروني...
ابتسم مجاهد وقال:شويه وجاي..حط فنجان القهوة وناض ومشي خش داخل ودانيه معاه بعيونها وهي مبتسمه...
لحظات...
وطلعلها وفيده كتاب قعمز في مكانه مده لأخته وقال:خودي..
خداته دانيه وشبحتله وقالت:حبي وحزني وكبريائي...
مجاهد:عطيه لسارة..
قامت عيونها وشبحت لخوها..
مجاهد شبح لفنجان القهوة وهو عاقد حواجبه وقال:ينفعها..
ودانيه تشبحله بإبتسامه قالت:نقوللها من خوي..
شبحلها وقال وهو مرتبك:لا ردي بالك..
دانيه قعدت تشبحله بإبتسامه وهي ساكته..
هو بإستحياء غير عيونه عن اخته وقال:خل نكون معاك صريح...عاجبتني..وحطيت فراسي نراجي لين تتخرج من الثانوي بش نمشي نخطبها من بوها..
دانيه:هي تبي تقرا طب ومن قبل هدرزنا في
الموضوع هدا وقالت انها ماتبيش تتزوج لابعد ماتكمل قرايتها في الجامعه..
هو شبح لدانيه وقال بإبتسامه:حلو...معناها هي ماعندهاش في جو بنات الوقت هدا..
دانيه بضحكه:ايه زي وخيتك قرايتها وبس..
قرص انف دانيه وهو يضحك بعدين قال:المهم ماتلمحيلها بشي مانبيش تفكيرها يتشتت او تاخد عني فكره مش كويسه..
دانيه وهي تتحسس في انفها قالت بضحكه:تمام لكن كان سألتني ليك الكتاب بنقوللها لخوي واني خديته منه من قبل سألتني كان عندي كتب قتلها لا..
ضحك مجاهد وقال:باهي مافيش مشكله..
قعدوا يضحكوا شويه بعدين سكتوا...
هو خدي فنجانه وقعد يرشف في القهوة..
ودانيه كذلك وهي تشبحله..بعدين حطت فنجانها وقالت:مجاهد..
شبحلها وقال:اممم؟
دانيه بجديه:اقرص رشيد من وذانه خليه يشد في قرايته مولي مهمل هلبه و24 ساعه التليفون فيده مش عارفه شن عنده فيه مولي مدمن عليه يامجاهد..
مجاهد وهو عاقد حواجبه :وبوي وين عنه؟
دانيه:عارف بوي يامجاهد انت لاهي بصحابه والعزايم والزرادي ماعليه في شي..
هز مجاهد راسه وقال:تو نتفاهم معاه..
دانيه:ركز ع حكاية التليفون بالذات..
شبحلها وهو يفكر بعدين قال:تو نشوف...
رجعت دانيه شربت من القهوة ومن داخلها كانت خايفه من ردة فعل مجاهد لو عرف اللي هما عرفوه...
•••••°°°°°••••••°°°°°••••••
"خلاص غدوة ان شاء الله في الاستراحه نوضحلك اللي في الملخص تمام"
هادي سارة وهي تكلم في رهف ع الهاتف..
"صحيتي سارة"
سارة بإبتسامه:سلمك حبيبتي..
"رهف...انتي يافرخه..نوضي واطلقي هالخارب واقري قرايتك"
عقدت سارة حواجبها بضيق..
وجاها صوت رهف المرتعش وهي تقول..
"باي سارة باي"...
وسكرت..
نزلت سارة التليفون وهي تقول:الله المستعان..
خطت تليفونها في جيبها وقعدت تقص في الكيكه الإنجليزيه..
بعد ماقصصتها حطت طرفين لخواتها وصبتلهم من مشروب شوكلا ساخن وطلعت بالصفرة للصاله وهي تقول:واهي جت الكيكه..
ريحان:ومشروب الشكلاطه!
سارة بضحكه:حتى هو..
حطت الصفره قدامهم وقالت:بعد تكملوا بنولوا للقرايه وبنسمع عليكم النشيد..
الزوز قالوا:باهي...وهجموا ع السفره..
هي ضحكت ومشت ولت للكوجينه..
قصيت طرفين تانيات ليها ولعمتها وصبت فنجانين قهوه وخدت السفره ومشت بتركب بيها فوق...
.....فوق.....
كانت نسيبه مقعمزة ع السرير وهي تدعي كانت اخر ساعه من نهار يوم الجمعه..
سمعت دق الباب نزلت ايديها وشبحتله وقالت:خشي..
انفتح الباب وخشت ساره بالسفره وهي تقول:ادللي نوسه هانم اليوم درتلك "روم سيرفس"..
نسيبه ابتسمت ابتسامه باهته..
حطت سارة السفره ع السرير وقالت:خلاص عمتو حاولي تتناسي شويه..
نسيبه تنهدت وخدت فنجان القهوة...
سارة:عارفتيني مانحبش نشوفك هكي..
نسيبه بحزن:ولا اني نبيكم تشوفوني هكي..بس كل بنادم عنده طاقه معينه..واني خلاص طاقتي تمت..
سارة:لاماتمتش.انتي مشكلتك كلها في المضغه المستقرة يسار صدرك..
نسيبه ابتسمت وقالت:بتبدا الفلسفه...
ضحكت سارة وقالت:ع العموم اني مانبيش ندوي في الموضوع هدا هلبه..
حطت نسيبه الفنجان وقربت منها شدت وذنها وقالت:اي موضوع ترا؟ومضغه مامضغه ويسار ويمين.!؟
ساره بضحكه وهي شاده يد عمتها:نبصر نبصر ...
نسيبه:تبصري ياشفشه تبصري..ضمتها وقالت بضحكه..امتى كبرتي يابنت قولي..
وسارة تضحك وبس..
زادت ضمتها نسيبه وقالت:نوضي جيبي طاجين الكيكه عارفه طرف واحد بيسدني اني..
سارة بعدت عنها وهي تضحك وقالت:باهي..
وناضت ومشت طلعت من الدار..
بعد طلعت تلاشت ضحكة نسيبه وتنهدت بحزن..
■في نفس الوقت..
خش هيثم للحوش...
جي للصاله لقي البنات ياكلوا ويتفرجوا ع التلفزيون بإنسجام..
خشلهم...
هيثم:حلواتي..
التفتوله وقالوا:بابا..
هو طبس ع رووسهم وطبع قبل ع كل واحد فيهم وقال:تاكلوا في كيكه..
ريحان:انقلش كيك..
ضحك وباسها من خدها...بعدين ناض ومشي للكوجينه وهو يقول:كتبتوا واجباتكم؟
جنان؛ايه حني وسارة..
هيثم وهو في الكوجينه :كويس كويس..
وجي للطاجين عيونه لمعوا لما شاف الكيكه وتسهف عليها..
قص طرف وجي بياكل..
ع خشة سارة لما شافاته قالت بعيطه:بااابا!..
هو انخلع والتفتلها قال:خيرك!..
جاته تجري خدتها منك وقالت:كيكه حلوة هادي حلوة..
وخدت الطاجين وقالت...تو ندريلك غيرها..
هيثم:باهي عطيني منها الربع..
ساره حركت راسها يمين ويسار بالرفض..
هيثم تنهد وقال:باهي ديري وحده تانيه بعد نروح من صلاة المغرب نلقاها واتيه..ومشي بإتجاه الباب وهو يقول..بناخدها معاي واني مولي للعمل..
سارة:عمل!..
هو وقف والتفتلها وقال وحواجبها مرفوعات:اه ايه ماقتلكش..وليت نخدم في المصحه اللي فيها زياد..
تعبوا عيون سارة دموع وهي تشوف لبوها..
هيثم:مروح في الليل ان شاء الله...ولف بيطلع..
سارة:بابا..
وقف وشبحلها..
جاته وخدت يده وباستها..
هو ضحك وطبس باس راسها بعدين قال:هي سقدي بالكيكه معاش في وقت..
سارة بضحكه من بين دموعها:حاضر..
ومشت تجري توتي فيها ودموعها ينزلوا وهي تمسح فيهم..
وهو مشي طلع من حداها وتوجه لداره...
🍁🍁🍁🍁وفي حوش جيرانهم🍁🍁🍁🍁
كانوا عفاف وتهاني مقعمزات ع روس صباعهم في
الجنان وسجى واقفه بحداهم ..
التلاته يتفرجوا ع نوسه القطوسه هي ومواليدها قطاطيس صغار منظرهم غاية في اللطف زي ماقالت تهاني..
تهاني بإبتسامه:كيوتين يهبلوا..
عفاف بضحكه:بنديرلها عصيده وجغوم..
ضحكت تهاني..
سجى:مش عارفه كيف كانوا هادم كلهم في بطنها..
ضحكوا تهاني وعفاف..
شويه وانفتح باب الحوش وخش خليل..
استغرب فيهم وقال:السلام عليكم...خيركم!؟
امه التفتت وقالت بضحكه:نوسه جابت..
هو انطمس للحظات وقال:من نوسه!
تهاني شدت ضحكتها..
وسجى حتى هي..
عفاف بضحكه:نوسه القطوسه..
هو عقد حواجبه مع الضحكه اللي طلعت منه وقال:نسيتها بكل...
عفاف بضحكه:تعالى شوفهم تعالى..
هو ابتسم وقدملهم وقف حداهم وطبس قعد يشوفلهم...
تهاني:يهبلوا ولا؟
خليل هز راسه وهويقول:اممم..اممم..بعدين وقف ع حيله وقال...قولي يام..
عفاف:شنو..
خليل؛معاش جاتك خالتي سماح..
سجى فنصت وهي تشبح لخليل...وتهاني شبحت لأمها اللي اختفت ضحكتها اول ماسمعت اسم اختها بس تمالكت نفسها وخلت روحها عاديه وقالت:لا ليها مده..
خليل:علاش؟
سجى:تعاركت هي خالتي..
عفاف وتهاني شبحوا لسجى...
سجى ارتبكت وقالت:عركه عاديه يعني ..
خليل شبح لسجى شويه بعدين هز راسه وقال:خل نمشي نجيب حاجه نحط فيها نوسه وصغارها...
ومشي من حداهم..
وسجى هربت طول بعد مامشي خليل وخشت داخل..
عفاف تنهدت وقالت:بري حطي ميه ع النار بش بندير عصيده..
تهاني بضحكه:بديرلها حق؟!
عفاف هزت راسها بإبتسامه..
تهاني:استني نصورهم قبل ونبعت لسارة..
عفاف قعدت تشبح لبنتها وهي تصور وعقلها مع خليل وسؤاله اللي حست انه مقصود...
••••••••°°°°°°°•••••••
"شن تحسابوا بوكم..راهو يحبكم لدرجة عقلكم مايتصورهاش"
سارة ودموعها ينزلوا:قلبي يوجع فيا كل مانذكر معاملتي ليه زمان نكره روحي..
نسيبه:انسيه زمان فكري فتوا وبس..
سارة مسحت دموعها وقعدت ساكته..
فجأة سمعت نغمة رسالة ماسنجر من تليفونها..
طلعاته من جيبها وفتحت الرساله شافت الصورة وقالت بضحكه:نوسة جابت..
نسيبه فنصت عيونها وحطت يدها ع بطنها وقالت:من نوسه!
سارة بضحكه:نوسه قطوسة حوش جارنا خالد...
نسيبه ارتسمت ع وجهها ملامح الإمتعاض..
وسارة تضحك بكتمان...
......تحت.....
هيثم بعد بدل حوايجه وطلع من الدار توجه للصاله وهو يشم في ريحة الكيكه..
ابتسم وكمل طريقه للصاله..
خشلها لقاها فاضيه..
قعمز وخدي جهاز التلفزيون وحط ع القنوات المحليه بيشوف كان في كلام عليه وولده....
قعد يقلب مالقي شي غير خبر عاجل..
عن تعيين وزيرة جديده للصحه في مكانه هو...لما شاف اسمها ماعرفهاش لكن دعي من وسط قلبه..
"ربي يجعل فيها الخيره للبلاد والعباد"...
•••••••°°°°°°°•••••••°°°°°°•••••••
اليوم التالي...
الساعه الحادية عشر صباحا..
فتحت الباب وقالت:تفضلي معاليك...
خشت الوزيرة وهي تتفحص بنظرها في المكتب ولجين تراقب في نظراتها..
لما وصلت في الطاوله قالت:اللي قبلي ماغير في المكتب شي؟.
لجين:لا...
شبحتلها وقالت:مش حنداوم فيه قبل ليتغير كله...
لجين شبحتلها شويه بعدين قالت:حاضر...
............
"متأسفه جدا الفترة اللي فاتت كنت مشغوله لكن تواصلت مع نسيبه اكيد قالتلك".
هيثم وهو مقعمز ورا مكتبه قال:ايه..مشكورة جدا..
لجين:هدا واجبي دكتور..انت بالنسبه ليا اخ كبير وقدوة ومعلم..تعلمت منك هلبه حاجات..
هيثم:اني تعلمت منك اكثر يالجين وع راس ماتعلمت منك الوطنيه..
لجين ابتسمت بخجل وهي تقول:العفو دكتور منك نتعلموا..
ابتسم وقال:شن حال خوك؟
لجين:الحمد لله..يسلم عليك...ديما يقولي اللي صار مع الدكتور من حب الله ليه..
هيثم:ياريت يكون هكي..ان شاء الله يكون هكي..
لجين بإبتسامه:ان شاء الله..شن حاله زياد توا؟.
هيثم هز راسه وقال:الحمد لله على كل حال...هو توا في مرحلة ازاله السموم والانسحاب...
لجين :مرحلة صعبه..
هيثم:منعوني نشوفه الفترة هادي قالوا الافضل تكون بعيد...
لجين:عندهم حق حتكون صعبه عليك حتى انت..
هيثم تنهد بحزن وقعد ساكت..
لجين شبحتله بحزن وقالت:ازمه وتمر..
هيثم:بإذن الله..قوليلي شن اخبار الوزارة ومن تكون الوزيرة الجديده مانعرفهاش..
لجين ابتسمت بتهكم؛نوريه عياد...اول قرار خداته لما خشت لمكتبها تغيير ديكور المكتب..
هيثم رفع حواجبه متفاجئ..
لجين ضحكت وقالت:مش حداوم في الوزاره لين يغيروا المكتب هكي قالت..
هيثم غمض عيونه بأسف وحرك راسه يمين ويسار..
ولجين ابتسمت بتهكم....
••••••°°°°°°•••••••°°°°°°•••••••
قدام المدرسة الثانويه..
نهاية الدوام..
سارة:اي حاجه مش فاهمتيها كلميني..
رهف:تمام...باي..
سارة :وعليكم السلام..
ضحكت رهف ومشت تجري..
وسارة ودانيه يشوفولها بإبتسامه لين ركبت سيارة بوها وهالمرة دون مشاكل...
دانيه:طيوبه هلبه..
سارة:ايه..
دانيه:سروره..
سارة شبحتلها وقالت:نعم؟.
دانيه مدتها الكتاب وقال:خودي..
خداته سارة وقالت:الله قداش ليا ندور عليه!
دانيه:امم..شفته عند خوي مجاهد خديته..
احمروا خدود سارة حياءا وهي تقول:من وراه؟
دانيه بضحكه:من قدامه...
سارة ابتسمت بحياء وقالت:شكرا دنون..
دانيه بإبتسامه:العفو..
"جي الباص دانيه"
دانيه شبحت جهة هبه لما كلمتها لقت صاحب الموطو كيف درس شبحت لسارة وقال بخوف:وواك ياربي..
سارة:قولي لخوك دانيه..
دانيه"شن بنقوله لنقوله ناقص هم هو":ان شاء الله..سلام عليكم سارة ومشت لباصها تجري وهي تشبح لوطا..
وسارة تشوف لصاحب الموطو...كيف تحرك ورا الباص طول وقالت:اللهم اني استودعك دانيه..
....وكذلك عيون جمعه معاه وهو طالع مع جيهان ودمه يغلي ويفور وسط عروقه....
🍁🍁🍁🍁
وصل الباص بدانيه لأول الشارع..
نزلت وقعدت تمشي بسرعه وهي تردد في نفس الدعاء وتسمع في صوت الموطو ماشي وراها بمسافه..
لين وصلت مدخل العمارة...عترت من التوتر وكانت حطيح بس شدت روحها...والتفتت شبحتله..
لقاته حول الخوذه من ع راسه وهو يشبحلها بقلق..
لما شافاته بدون خوذه حست بشعور غريب ومش مفهوم بالنسبه ليها وقتها لين اختلطت بمشاعر الخوف فيها..
وفيسع غيرت عيونها عنه وخشت للعمارة تجري..
هو ابتسم ولبس الخوذه بعدين تحرك...
....حسام من قدام المحل ....
كعادته يقيد في الأحوال بعد مشي راجح ابتسم بتهكم ومشي خش للمحل....
•••••°°°°°°•••••°°°°°••••••
من فوق جسر للسيارات في المدينه..
ع الرصيف كانوا في زوز واقفين يهدرزوا..
اشكالهم طبيعيه وعاديه جدا..ومظهرهم مايدل على يثير الشك...
لكن حديثهم..
=شارون يبوه يولي بأي شكل...
=لكن الطريقه هادي ماتمشيش معاه..الحق الحق..مش هاين عليا نديروا فيه هكي..
=حني علينا نفدوا وبس رأيينا هدا نقعوه ونشربوا ميته...
تنهد بضيق وقال...
=ع قولتك....
=المهم توا التنفيد يتم الليله...الرساله لازم توصل الليله..
=باهي حالة وصلنا الرساله وهو استكردها ولا مافهمهاش..
=وقتها يبعتوله وحده بالبريد مستعجل...
ارتسمت ع وجهه ملامح الضيق وهو يقول
=تس...والله ماهاين عليا بالله..
=ماتنفخليش قلبي هما هكي يبوا وانت عارف لو نفكروا نعارضوا شن يصير فينا..
هز راسه بأسف وقال:عارف...عارف....
=الليله راهو...
=خلاص الليله.....
يتبع°°°••
