#البطل_المغمور"شمس الغروب"
#الجزء_الثامن_والعشرين"القسم الأول"
#الجمان_الفريد
وقد قال عن الصلاة...
انها احب الأعمال إلى الله في وقتها...
الرسول صلى الله عليه وسلم💓
الصلاة أولا🌷🌷🌷
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
💐..
في الطريق..
يسوق في سيارته وهو يشوف للشارع اللي ماشي فيه..
كان يدور في اليافطات المعلقه على اسم معين..
لعند مالقاه....
مكتب المحامي..
"إحسان توفيق الفيتوري"
توجه بسيارته للمبنى الموجود فيه المكتب...
درس السيارة قدامه...ونزل...
كان المبنى مكون من طابقين...الأولى عيادة اسنان..
والتاني مكتب المحامي...
خشله...وقف في مكانه وقعد يدور ع حد يدله ومن يركب لمكتب المحامي..
لين جو عيونه ع دروج جايين ع برا...
قدم بخطوات بطيئه بعض الشيء..
لين وصل للدروج وبدي يركب...
لما قرب يوصل شاف مراة نازله وقفها وهويقول:لوسمحتي..
المراة وقفت وقالت:تفضل..
هيثم:هني مكتب المحامي احسان؟
المراه:ايه وصلت...
هيثم:شكرا...وكمل طريقه..
والمراة ردت عليه..العفو...وحتى هي كملت طريقها..
....وصل هو قدام المكتب مباشرة...
لقاه مفتوح...وشاف واحد واقف ع الروشن وفي يده مق كبير يشرب منه...
قدم وطق ع الباب..
تكلم الشخص هدا وقال:وقت استراحه..
هيثم رفع حواجبه بعدين ولى خطوه للخلف ولف ومشي شاف حواليه لقي كرسي مشي قعمز عليه...
وقعد يستنى...
••••••°°°°°•••••°°°°°•••••
"حي عليك قصدي مشيتي غادي امس!؟"
هادي سجى تكلم في خالتها سماح هاتفيا..
سجى:انتي خلاص هبلتي رسمي معاش فيك عقل..
هالجمله سمعها رفيق وهو خاش للجناح...
وقف في مكانه وقعد يتصنت...
سجى :حي عليك غبارتك كان ماخليل كان ماشي لبوه امس وعرف انك غادي......................ايه خليل امس كان ماشي لبوه هدا علاش اول ماجي سأل عنك علاش ماتجي للحوش!
عقد رفيق حواجبه بإستغراب وهو يسمع فيها شن تقول..
سجى:بالهبال اللي ديري فيه تفضحي بروحك خليل تو بينبش ورا الموضوع واكيد حيعرف ياويلك ويل لو يعرف اللي كان بينك وبين بوه...
رفيق حس الدم في عروقه من صدمته في اللي سمعه....
خش لسجى طول...
هي لما شافاته انفجعت وسكرت طول...
هو جاها يقول:في من كنتي تكلمي...جبد منها التليفون وهي ترعش مع بعضها...
هو شاف للتليفون لقي المكالمه الاخيره من "خالتي سماح" زي مامسميتها سجى في الهاتف..
فتح عيونه ع وسعهم بصدمه...
بعدين شبح لسجى...اللي كانت ترعش زي المروحه...
رفيق بغضب شد شعرها وقال:شن اللي سمعته هدا ياكلبه!! شن اللي سمعته...تكلمي!؟
سجى وهي شاده يده وتتوجع:رفيق..بالشويه رفيق...ااه..
زاد جبدها منه وقال:تكلمي يازفته تكلمي...واطلق عليها لفظ نابي...وقال...خير مانعدمك ياحيوانه..
هي نزلوا دموعها من الالام اللي حست بيها في وقت واحد الم شد شعرها وألم مصدره ماتحمله في بطنها...
رفيق بصوت عالي مرعب:تكلمي..
سجى بخوف شديد:باهي باهي..والله لما نتكلم باهي...
......وبرا......
امه واخته واقفين حدا الجناح ويسمعوا في اصواتهم..
تهاني:خير بلاهم هادم؟
عفاف بقلق:ان شاء الله مش دايرة شي هالمصيبه والله لما يذبحها..
تهاني بعدم فهم:شي زي شنو؟
عفاف بإنزعاج ممزوج بالقلق:وين نندري علي بلاها الأسود..
تهاني قعدت تشبح لتعابير وجه امها وحست ان في شي صاير تعرفه وخايفه منه...
......داخل.....
رفيق بصدمه وغضب شديدين:حي ع امها حي...حي امكم....شنو..كيف...!!! بوي.....بوي......
وسجى تشبحله كيف يبان عليه عقله ماتحملش للي سمعه..
تكمشت في بعضها لما شافاته بدي يكسر في الدار ويعيط ويقول...
"بوي...بوي...."
....برا....
تهاني بقلق:خيره بابا؟
وعفاف تفرك في ايديها وتبلع في ريقها من الخوف والتوتر..
فهاللحظه انفتح باب الحوش..
وخش خليل...
خليل:امي..
عفاف زاد خوفها وتوترها وهي تقول:ياربي سترك وعفوك ياربي..
تهاني وهي تسمع في صوت التكسير قالت:معاش طلع حسها حي كان دارلها حاجه قتلها!
عفاف بقلق شديد:سترك ياربي سترك..
"امي"
عفاف:هني هني ياخليل..
شويه وجاهم سمع صوت التكسير والضرب عقد حواجبه وقال:شني هدا.!؟رفيق...يارفيق..شبح لأمه واخته وقال..خيرهم؟..
تهاني بخوف:اشبح شن شدها دير؟.
توسعوا عيون خليل وهو يقول بصوت عالي:رفيق..
انفتح باب الجناح وطلع منه رفيق وهو داهش من الغضب واللي كان يدير فيه..
قعد مركز بعيونه على امه..
خليل:خيركم انت وياها شن في؟
غير رفيق عيونه على امه وجي لخليل وشده من ذراعه وقاله:تعالى معاي نبيك..
خليل وهو مستغرب مشي معاه...
اما عفاف وتهاني طول خشوا للجناح بش يشوفوا سجى...
.....لما خشوا....
شافوا اثار الدمار اللي خلفه اعصار رفيق...
وشافوها هي كيف متكمشه في بعضها وهي تبكي وترعش وتشبح لخالتها عفاف..
وعفاف من نظرتها شبه فهمت ان اللي خافت منه صار...
•••••°°°°°•••••••°°°°°°•••••
مقعمزة في الكوجينه..
حدا غداها المحطوط ع النار...
وقدامها الكتاب اللي خداته اليوم من صاحبتها..
تقرا فيع بإنسجام...
كان حلو هلبه...بمواضيعه ومفرداته والنصائح اللي قدمها الكاتب بطريقه فريده وعذبه تخش القلب وتأثر في اللي يقراها...
عجبتها جزئيه منه عاودت قرتها بالصوت...
"احيي قلبك بإكسير التفاؤل..واطعميه من خبز الامل...وارويه بحسن ظنك بالله دوما..فلك في الغيب اشياءصنعت على عين الله..لو علمتها مامر بك احباط ولايأس ابدا..لعن الله يأسا يتسلل إلى روحك الجميله...بالله..كيف تيأس الجميله؟"
ضحكت ضحكة حلوة وقلبها بقوة...وحست بشعور حلو يغمرها من تأثير جمال الكلمات عليها...ومن عقلها كل مايذكر الكتاب من مني جاها...
.....واللي جاها منه الكتاب....
كان واقف في بالكونه حوشهم يراجي في خوه امتى يروح وهو يشوف للطريق ..
شويه شاف سيارة مظلمه درست نزل منها خوه..
عقد حواجبه بإستغراب ولف ومشي بسرعه للباب..
لبس في رجليه وفتحه وطلع للدروج.....
وصل تحت شاف خوه خاش للعماره..
وقفه وقال:من روح بيك؟
رشيد وجهه ولى شاحب من الفجعه:واحد صاحبي روح بيه خوه روحت معاهم..
مجاهد: وعلاش عطلت ؟
رشيد:خوه وقف ع محلات و خدي حاجات لحوشهم..
مجاهد قعد يشبح لخوه شويه بعدين قاله:برا اركب..
رشيد وهو يحاول يخفي ارتباكه مشي ركب بسرعه..
ومجاهد وراه وعقله بدي يودي في الأفكار ويجيب...
••••••°°°°°°°°••••••
"هاكي الشيت صحيتي رنا"
خدت زميلتها منها الشيت وشدت يدها وهي تقول:ساعتك فضيعه..
رتاج بإبتسامه:تفضلي..
ابتسمت زميلتها وقالت:تسلمي حبيبتي تبيديها بالهني..
رتاج:تسلمي رنوش...نستأذن تواسلام...
ومشت..
والبنات يشبحولها وهما يردوا في السلام ووحده منهم قالت..
=ولت معاش تشبح في حد..
=هالجربه نست روحها كيف كانت تشحت في الفطور..
=وتوا شبعت بعد جوع حبيبتي..
ضحكوا ومشوا كملوا طريقهم وهما يجودوا على رتاج بحسناتهم...
اما هي مشت وقفت في مكان تراجي في السواقه اللي دارهالها عادل تجي...
شافت جهاد مدرس بسيارته يتفرج عليها..
حاولت تتجاهل وجوده ومن داخلها مرعوبه...
هو فتح باب السيارة ونزللها...
هي شافاته نزل قلبها قريب وقف من الخوف..
قعد يقربلها...وهي قعدت ادور في مكانها وتتصل بالسواقه تستعجل فيها...
لين شافتها خاشه...مشت طول تجري للسيارة..
وهو وقف في مكانه يشبحلها لين وصلت للسيارة وركبت..
لما ركبت شبحتله بتشوفه بيجي وراهم ولا لا..
جو عيونها فعيونه..غمزلها بعينه..
غيرت طول عيونها عنه وقالت للسواقه:بسرعه بالله عليك نبي نلحق ع الغدي..
السواقه:حاضر...
وتحركت طول...
اما هو لف ومشي للسيارة بيلحقهم...
•••••°°°°°°°•••••
في الورشه المسكرة عليهم هما الزوز....
"نبي نكذبها لكن مش قادر سمعت دوتها من وراها ياخليل وهي ماتندريش عليا..."
خليل واقف زي التمثال وهو يسمع في خوه شن يقول وتجي بين عيونه خالته سماح وهي طالعه من الحبس مرة يالخمار وهي طالعه من المول بدون خمار..
رفيق بصدمه وغضب:بوي..بوي...هو اللي مش...خبط بيده ع جبهته وقال...بوي طلع.....سكت بعدين قال...مش قادر نطلعها من فمي مش قادر نقولها..
شبحله خليل وقال:رفيق..
شبحله...
خليل خدي نفس وقال وهو يأشر عليه بسبابته:اسمع..ماتتصرفش من راسك مادير شي...وكأنك ماعرفت شي..
رفيق:مانقدرش..
خليل:لاتقدر..
رفيق:قتلك مانقدرش..
خليل شده من ياقة تيشرته وقال بعصبيه:واني قلت تقدر...تقدر...مش ناقصين عار وفضايح تسمع فيا...
رفيق قعد يشبح لخوه وارتسمت ع وجهه ملامح البكاء وقال:بوي...بوي..طلع.....وقعد يبكي..
ضمه خليل وقعد يسمح ع راسه...ورفيق يبكي بحرقه وقهر....
•••••°°°°°•••••°°°°°•••••
كمل استراحته..
ومشي لكرسيه وقعمز ورا مكتبه وحط المق ع الطاوله..
رن تليفونه خداه من ع الطاوله فتح الخط ورد..
"ايوه"
"بالله ياإحسان ياولدي روح لولدك من الصبح ماباش يطلع من داره وماباش يحط شي في فمه واني تعبت معاه ماعرفتش نتصرف"..
احسان مسح بيده ع وجهه وتنهد بعدين قال:حاضر حاضر..جاي حالا...السلام عليكم..
وسكر وناض وقف...خدي شنطته والمق متاعه ومشي للباب وطلع وسكره وراه..
هيثم سمع صوت الباب ناض وقف وهو مستغرب وجاه وهويقول:استاذ احسان!
احسان بدون مايشبحله وهو ماشي اشرله بيده اللي شاد في المق بحركه دائريه معناها "يجي غدوة"..
ومشي نزل من الدروج..
وهيثم واقف يشبحله وهو رافع حواجبه...
مرر نظره ع المكان بعدين خدي نفس وقال:الله المستعان..
ومشي للدروج ونزل...
•••••°°°°°••••••°°°°°••••••
في المدرسة الابتدائيه..
وقت الإستراحه...
طلعت للساحه دور بعيونها ع بنات خوها..
لقتهم مقعمزات مع بعض يفطروا ويتفرجوا ع زميلات ليهم وهما يلعبوا..
قلبها وجعها عليهم....
مشتلهم طول....
ولما وصلت فيهم قالت:قطوساتي..
شبحولها الزوز بنظرة فيها مسحة حزن..
هي رسمت ع وجهها ابتسامه وقالت:جيتكم بنلعب معاكم لعبه قديمه زمان كنا نلعبوا فيها..
شبحولها بفضول..
هي قالت:شوفوا...
وبعدت عنهم شويه...وبدت ترسم بالطباشير اللي فيده ع الأرضيه..
هما الزوز ناضوا وجوها وقعدوا يشبحولها شن دير..
مش هما بس معظم الطلاب اللي فالساحه..
هي يعد كملت...حطت الطباشير ع تركينه ومشت خدت حصوة من الأرض وقالت:ركزوا معاي كويس وشوفوا اللعبه هادي كيف يلعبوا فيها...اول شي اسم اللعبه.."نقيزة"..
🌷وبدت تعلم فيهم عمتهم الطريقه..
والطالبات التموا عليهم وهما يتفرجوا..
وشويه وبدوا البنات يلعبوا مع عمتهم وهما مستمعات ع الآخر..
وزميلاتهم تسهفوا يلعبوا معاهم...
شبحتلهم نسيبه وقالت:تبوا تلعبوا؟
هما هزوا روسهم بإيجاب..
نسيبه:ومش قلتوا ماتبوش تلعبوا مع جنان وريحان ومعاش تبوا تكلموهم؟
شبحوا البنات لجنان وريحان بعدين نزلوا عيونهم لوطا..
اشفقت قلب جنان الصغيرون عليهم وقالت:عادي عمتو خليهم يلعبوا معانا سامحناهم حني..
شبحتلهم نسيبه بإبتسامه..
ريحان:تعالوا العبوا..
البنات فرحوا وجو للتوأم وبدوا يلعبوا معاهم...
ونسيبه واقفه وحاطه ايديها في نصها وهي تتفرج عليهم..
بعدين مررت نظرها ع الساحه...جو عيونها فعيون عرفه اخ ملاك..
نظرته ليه كانت حاده..
هي عقدت حواجبها وغيرت عيونها عنه وشبحت للبنات وهما يلعبوا...
•••••°°°°°•••••°°°°°•••••
"عمري ماكليته يابابا"
سارة حطت قدامه طاسة الشاهي وقالت:تتعود عليه بابا البرغل فوايده مش عاديه ومناسب لمرضى السكر خير من الرز والنشويات اللي مافيش منهم فايده بكل..
خدي هيثم طاسه الشاهي بعد تنهد وقعد يشرب..
سارة:بابا..
هيثم:امم..
سارة بحزن:خاطري..نشوف زياد..
حط هيثم طاسة الشاهي ع الطاوله بعدين تنهد وقال:حتشوفيه بإذن الله بابا لكن مش توا ..
سارة هزت راسها وقعدت ساكته وع وجهها ملامح الحزن..
هيثم اختار يغير الموضوع وقاللها:شن جو المدرسه؟
شبحتله وقالت:ماشي الحال الحمد لله..
هيثم:مافي شي مضايقك فيها؟
سارة ابتسمت وحركت راسها بالنفي..
هيثم:الامتحانات قريب..
سارة:ايه وقاعده نستعد .
هيثم:هو هدا الصح بابا شدي في قرايتك ماتخلي شي يأثر عليها..
سارة بإبتسامه:ان شاء الله..بابا..
هيثم:نعم بابا..
سارة:نبي نستشيرك في حاجه..
هيثم بإنتباه:اللي هي؟
سارة تنهدت وقالت:تقرا معاي بنيه..هي ماشاء الله متفوقه..ومحترمه..لكن عندها مشكله ممكن تأثر عليها هلبه بعدين..
هيثم :شن هي؟
سارة:ماعندهاش ثقة في نفسها ومنطويه ولو حد غلط فيها او اهانها اواحرجها ترتبك هلبه يعني مرات نحسها بتبكي برغم انها تقعد تضحك من الارتباك..ماتقدرش تتكلم في مجمع وماعندهاش مشاركه في الفصل برغم انها في التحريري ممتازة...وتوا هي خاشه لمسابقة منهجيه ع مستوى المدارس فكرت تتخلا عن المشاركه لكن اني ماخليتهاش حسيتها فرصه ليها بش تقدر تواجه الجمهور ومعاش تخاف..
هيثم:امم...يعني هي صديقتك..
سارة:ولينا اصحاب..
هيثم:امم ومن تقرب من التاني انتي ولاهي؟
سارة:هي الصراحه..
هيثم:تمام..البنت شكلها تتعامل بأريحيه مع الناس اللي ترتاح معاهم وهدا شي طبيعي هلبه ناس هكي...لكن الحاجات التانيه اللي قلتي عنها..ممكن يكون سببه...حد في حوشهم مثلا امها اوبوها يتعاملوا معاها بأسلوب قمعي يعني ديما يهاجموا فيها ويقللوا منها ويحسسوا فيها بالفشل وبالتالي هي حتكون مهزوزة وماتحبش تواجه وماعندهاش شجاعه..
سارة:صح...بوها..
هيثم رفع حواجبه..
سارة:شفناه مرة يتعامل معاها بطريقه مش كويسه..هزايب وضرب في السيارة والدنيا كلها تتفرج..
هيثم عقد حواجبه وقال:تس تس تس...مسكينه هو ولد وغلط يتعامل مع هكي يابال البنت اللي هي بطيبعتها حساسه زي المرشه فيسع تتصدع وتنكسر..
سارة بضيق:خاطري نديرلها شي بابا نبيها اقل حاجه في المسابقه تحقق نجاح يخلي ثقتها بنفسها تقوى..
هيثم سكت وهو يفكر...
وسارة تشبحله..
شبحلها وقال بتفكير:اممم..حاولي...حاولي ديما تبينيلها قدراتها وامكانياتها...مش قلتي هي ممتازة في التحريري حاول تخشيلها من الباب هدا..يعني زي انك تقوليلها اللي كتبتيه في ورقة الاختبار تقدري تقوليه شفهي...اه ايه...ديري في المدرسه..عندكم في الفصل..زي المسابقه هكي في حصة فاضيه او الاستراحه..وخلوها تتعود تتكلم وتجاوب قدامكم وشجعوها...بش تتعود وتولي الحكايه ساهله عليها في المسابقه المنهجيه بعدين..
ابتسمت سارة وهي تقول:حلو..
هيثم:طبعا بابا الموضوع يبيله ارشاد نفسي..يعني زي الاخصائية الاجتماعيه لو دخلتيها في الموضوع نقدر تساعدها..
ضحكت سارة تهكما وقالت:اخصائية شني يابابا بس خليني ساكته..
هيثم عقد حواجبه وهو مبتسم بإستغراب:علاش!؟
سارة:الاخصائيات في مدارسنا يابابا ماقروش علم نفس ولاعندهم خبرة في الحاجات هادي..وظيفة الاخصائيه في مدرستنا تشد اللي تخالف الزي وتهزبها وتنعتها بأشبع الصفات وتفتش ع التليفونات و وتاخد الاكسسوارات من البنات لو لقوهم لابسينهم وطبعا بعد زفة هزايب...مش في من يوجه توجيه صحيح ولايعرفنا الصح من الغلط بالعقل لا...تلقى كان الاسلوب البايخ اللي يخلي البنات يزيدوا يتمردوا ويحبوا يديروا الممنوع..
هيثم قعد يشبحلها وهو يفكر في كلامها بعدين قال:برغم ان كلامك يوجع القلب...لكن فرحني في نفس الوقت لأن عندي بنت واعيه واداركها واسع هلبه رغم صغر سنها..
ابتسمت سارة وقالت:كله من ماما الله يرحمها..هي هكي خلتني..
ابتسم هيثم بألم وقال:الله يرحمها ويجعل مئواها الفردوس الأعلى..
سارة ودموعها في عيونها قالت:آمين..
ضيق هيثم عيونه وهو يشبح لسارة وحب يغير الموضوع لما قال:وانتي بابا مشاركه في المسابقه ولا؟
سارة بلعت ريقها وقالت بثبات مصطنع وهي تحاول تخفي ارتباكها:لالا مانبيش..نبي نتفرغ لقرايتي مانبيش ننشغل عنها..
هيثم:لكن انتي قلتي انها مسابقه منهجيه يعني تخص قرايتكم بس ولا؟.
سارة بلعت ريقها وهي تشبح لبوها ومش عارفه شن ترد عليه لقت روحها غصب عنها...مجبورة تكذب بش ماتزيدش تكدره..
وهو من ملامح الارتباك اللي بانت على وجهها وماقدرتش تخفيها فهم القصه وحس انها حتكذب عليه..
وفي اللحظه اللي جت فيها هي بتتكلم..سبقها وقال..
هيثم:على راحتك بابا على راحتك اللي تشوفيه مناسب ديريه...وناض وقف وهو يقول..حل نمشي نجهز نفسي للصلاة..ومشي وهو يقول...بنروح في نفس الموعد بابا..
وخش لممر الديار...
وسارة خدت نفس عميق وزفرت براحه...بعدين خدت طاسة الشاهي وناضت للكوجينه...
🍁🍁🍁🍁🍁
وتمر باقي ساعات النهار...
وهيثم في المصحه ماكانش مستقر في مكتبه ويراجي تجيه الحالات..
بل كان يدور في المصحة واقسامها ويشوف في وضع الحالات اللي فيها وكان يسأل ويستفسر ويجمع في اكبر قدر من المعلومات..
ومااكتفاش بجمع المعلومات عمليا بل حتى نظريا..
كان يبحت عن الادمان ويقرا في مقالات مختلفه عنه...
عن الاسباب...والعلاج..والانتكاسه واحتماليه الرجوع..والشفاء التام ...
□□□□□
☆فترة العلاج الاولى مرحلة ازالة السم وتنظيف دمي منه كانت صعبه هلبه كانوا الدكاترة والممرضين هما بس الوجوه اللي تعودت نشوفها في هديكا الأيام.....مذكر كان في ممرض يوصلي في سلام بوي ليا يوميا وبعدين عرفت منه ان ولى يخدم في المصحه..طبيب عام...بوي جراح القلب الكبير المشهور ع صعيد عالمي مش بس محلي...ولى يخدم ع خاطر ولده في مصحة ادمان طبيب عام!.....
تنهد وبعدين قال...احمم...الحاجه هادي...التضحيه هادي...كانت اكبر محفز عليا اقوى مشجع ليا اني نكمل...ومانخذلاش...
□□□□□
🍁الخذلان...
هو الشعور اللي تملك خليل ورفيق تجاه بوهم...
على عيوبه اللي عرفوها عنه وتربوا عليها وكبروا معاها وتعايشوا معاها...كانوا يحبوه بشده...عارفينه كله على بعضه غلط في غلط..بس ماطاحش من عينهم لأنهم شافوا فيه اخلاق حسنه حبوها وحنان واحترام خلاهم كبير في عيونهم رغم كل شي...
بس اليوم...ولأول مرة يطيح فيها من عيونهم..وطيح قيمته...وولى معاش يسوا شي في عيونهم...
وهالشعور تسببلهم في ألم كبير كل واحد منهم تعامل معاه بطريقة شكل..
في الحوازة...
رفيق...ترافق هو شيش الخمر اللي كان يشرب فيهم بشراهه راجي منها تنسيه اللي هو فيه تنسيه الحقيقة المرة اللي عرفها...
...مسكين....زاد ع همومه هموم بدون مايحس...
....وفي مكان تاني....
المسجد....
هرب خليل من الواقع المر لمن بيده كل الأمر..
يحكيله ويشكيله ويناجيه...ويطلب منه يهون عليه ويقويه ويساعده بش يتحمل...ويثبت قلبه بش مايزيغش ويرجع لما كان عليه...
التوبه...لازم تمر بمرحلة اختبار ..اختبار للتائب بش ينعرف صدق توبته من عدمه...
والتائب...الشيطان مش حيخليه في حاله...بالعكس حيقعد يخططله ويجهزله في هجمة مرتده قمه فالشراسه....
شياطين الجن والإنس طبعا...
••••••••°°°°°°°°•••••••
الساعه الحادية عشر ليلا...
مروح في سيارته بطريقه للحوش..
اول ماخش شارعهم شاف واحد يمشي في مشية مترنحه..
لما قرب يوصل فيه شاف وجه وقال..
هيثم:رفيق! بعدين شبح القدام وهو مستغرب...
بان عليه ضي قوي وكأنه في تجمع لناس..
هيثم بقلق:ياستار..ان شاء الله خير!..
وين قريب يوصل فيهم...شاف نار تاكل في مكان ما..
زاد ركز عرفه وقال بصدمه:ورشة خالد!
شد الفرامل ووقف السيارة ونزل بسرعه سكر الباب..
ومشي يجري للناس وهو يقول بهلع:فيها حد الورشه فيها حد!؟
رد عليه واحد وقال:مش معروف..
هيثم قعد واقف في مكانه وهو يشوف للمكان بصدمه بعدين قال:كلمتوا الاطفائيه؟
ردوا عليه بأصوات متقطعه:ايه..قالوا جايين في الطريق....
"شن في شن صاير!!"
التفتوا وهيثم معاهم شافوا رفيق جاي يجري مفجوع وجاي بيخش الورشه..
لولا الرجاله اللي لحقوا عليه وشدوه ومنهم هيثم..
رفيق وهو يعيط بصوت عالي:الورشه....خوتي...خوتي..
هيثم وهو يشد فيه:اهدا رفيق ان شاء الله مافيها حد ان شاء الله...
ع جية سيارات الإطفاء..
بعدوا عم الناس عن طريقها..
ورجال الاطفاء نزلوا منها وبدوا يطفوا فالنار..
وكلهم يشوفوا للورشه وايديهم ع قلوبهم ويتمنوا من الله تكون فاضيه....
ع جية واحد يجري وهويقول:الورشه..خليل!..
التفتوا وشبحوله بصدمه..
الشاب قعد يشبح للورش بصدمه وهو يقول:خليل..خليل بعتني نجيبله قهوة...خليل...
جاه رفيق وجبده من حوايجه وقال بغضب ودموعه تنزل:خليل داخل!....
الشاب وهو يشوف للورشه بصدمه هز راسه بإيجاب..
هيثم غمض عيونه بشده من الأسف...
اما رفيق عقله مااستوعبش اللي سمعه طلق الشاب ومشي يجري للورشه..
شدوه بقوة...
وهو يعيط ويقول:خلوني...حولوا...خلوني...خوي داخل خوي..خوي داخل...
هيثم وهو يشد فيه قال بألم:رفيق رفيق ولدي...شد حيلك..
رفيق بعياط:خوي...خوي....خوي وبوي في يوم واحد ياربي هلبه ياربي هكي هلبه..
هيثم والناس اللي حواليه وهما يسمعوا في كلمات
الاعتراض ع اقدار الله اللي طلعت من رفيق...
وقفوا عند كلمة بوي وخوي في يوم واحد وظنوا ان خالد صارتله حاجه في الحبس حتى هو...
■فهالأثناء..
في حوش الكاتب...
كانت نسيبه تستعد للنوم...
كيف جت بتخش فراشها سمعت صوت عياط نساوين..
عقدت حواجبها وهي تحاول تتاكد من اللي سمعاته..
زاد العياط..
شبحت جهة حوش خالد..
قلبها بدي يدق بقوة من الخوف...بسرعه مشت خدت ملايتها ولبستها وفتحت الروشن وهي تسمع في العياط..كان جاي من حوش خالد والجيران طالعين من حياشهم ماشيينله..
هي طول مشت لباب دارها فتحاته ومشت تجري نزلت من الدروج..
وين وصلت لوطا شافت سارة لابسه ملايتها وهي تبكي جايه بتركبلها..
نسيبه بخوف:شن في!
سارة وهي تبكي:ورشة عمي خالد حرقوها..
توسعوا عيون نسيبه بصدمه والدموع عبوهم وفاضوا وهي تقول:كانوا فيها؟
سارة وهي تشوف لعمتها بألم قالت:تهاني قالت خليل كان فيها...
وقلب نسيبه قعد يدق بعنف شديد من الصدمه كانت حطيح بس انسندت بيدها ع الحيط وحاطه يدها التانيه ع قلبها والدموع تنهمر انهمار...
"اااه ياربي اااه..ولدي ياربي ولدي ولدي"
سمعوا صوت عفاف وهي تنوح ع ولدها..
شدت نسيبه روحها ومشت وسارة مشت وراها...
لين طلعوا هما الزوز من الحوش ...
لقوا الناس ملتمين قدام حوش خالد ...
تخطوهم وخشوا داخل...
شافوا عفاف واقفه تخبط ع رجليها وتعيط..
لما جو عيونها ع نسيبه جتها تجري وضمتها وهي تقول بحرقه:اااه يانوسه اااه...كان يحبك ويبيك يابنيتي خليتيه يموت مكسور الخاطر يابنتي...محروق ومسكور يابنتي..
الناس يتفرجوا عليهم ويبكوا..ومن بينهم صالحه وحفيدتها ملاك اللي كانت تبكي بحرقه وهي تشوف لنسيبه كيف تبكي بالعبرة وهي حاضنه عفاف...
وتفاجئت لما شافت طاحت من طول وهي ضامه عفاف مغمى عليها...
زادت فجعت عفاف ...وبنت خوها ساره...والنساوين اللي جوها يجروا...
••••••°°°°°°•••••••°°°°°•••••
مدرس قدام حوشها اللي كان يراقب فيه يوميا..
فيده تليفونه كان يكتبلها في رساله ويبعتها...
بس قطع عليه اتصال واحد من اقاربهم من طرف امه مش متعود بيه يتصل بيه الا عند الفواجع والمصايب...
فتح الخط ورد طول..
جهاد بقلق:ايوه..
"وينك ياجهاد"
جهاد بخوف:قاعد خيرك شن في!؟
"تعالى ياراجل ورشتكم انحرقت وخوك خليل فوسطها"
لوح جهاد التليفون لوطا...وشغل السيارة وهو يرعش ودموعه بدوا ينزلوا...
وتحرك طول وهو يحرق في العجل...
•••••°°°°°•••••°°°°°•••••
"يا..ياحنينه الدنيا بيك مزينه..
يا..ياحنينه الدنيا بيك مزينه..
في وجودك ربي حلاها...ماما..
من غيرك تفقد معناها..
في وجودك ربي حلاها...ماما..
من غيرك تفقد معناها...
انت قمرنا وضينا انتي قمرنا وضينا..
يا..ياحنينه"
هاه شن رايك...
:تهبل تهبل...نبيك تحفظهالي كلها..
نيار بضحكه:ماعنده شي يديره في حياته غير يقعمزلك يحفظك اغنيه.!! هو عطهالك انتي بري بيها للأبله وقوليلها نغنوا هادي ياابله في يوم الطفل وتمت الحكايه..
:اني نكلم في عمو خليل مش انت..
نيار ؛قليلة ادب بنت خوي اكبر قليلة ادب..
خليل بضحكه:عيب اساور هدا عمك حبيبتي..
اساور:ايه ايه عارفه..المهم قولي بتحفظني..
خليل:والله ياعزيزتي ماني فاضي الايام هادي لكن ديري زي ماقالك عمك..
اساور بإبتسامه:حاضر..
نيار:باهي بري قوليلهم يسقدوا بالعشي..
اساور:باهي...ولفت ومشت طلعت من حداهم وهي تجري..
نيار:والله احسن حاجه درتها...
خليل بإبتسامه:وجت ع قيس النيه العشي مقطع خالتي مهيبه فهالصقع..
نيار بضحكه:شكلك شميته..
خليل ضحك بعدين قال:نبي نبات هني الليله..
نيار:ياسلام ماعندكش مشكله ياغالي مش ليله وحده بات ليالي..
خليل وهو يضحك ارتمي ع الفراش وجبد مخدة وحطها تحت راسه...
يتبع°°••
