#البطل_المغمور"شمس الغروب"
#الجزء_الخامس_والعشرين"القسم الاول"
#الجمان_الفريد
🌹اذا جيتوا بتقروا الجزء في وقت صلاة صلوا الصلاة قبل بعدين اقروا...🌹
وتذكروا ان اخر وصايا الحبيب قبل موته🍃
الصلاة الصلاة...وماملكت ايمانكم...💓
🍁🍁🍁🍁🍁🍁🍁🍁🍁🍁🍁🍁🍁🍁🍁
💐..
خش هو واخته للحوش..
اخته مشت طول لدارها..وهو قعد يدور على امه لين لقاها مقعمزة في الصاله..التلفزيون مفتوح قدامها..وهي سرحانه..
خليل:امي..
مازال سرحانه..
خليل بصوت أعلى:يااام..
استاقظت وشبحتله..
خليل خشلها وهو يقول:وين كنتي!؟..وقعمز حداها..
عفاف شبحتله وقالت:قبل شويه طلعوا للحوش في اللي جنبنا..
خليل هز راسه وهو ساكت..
عفاف:خلاص بطلقها!؟
خليل هز راسه وقال:ورقتها غدوة بنبعتهالها
تنهدت امه وقالت:إن شاء الله خير..ربعت ايديها وقالت..شن حال عمك هيثم؟
خليل:الحمد لله..ماشي حاله..
عفاف بحزن:قداش واجعني وواجعتني عيلته انقلبت حياتهم قلب بعد موت أسيمه الله يرحمها..
خليل:الله يرحمها..
عفاف:والله الكلام اللي قاله جهاد عن زياد لتوا صادمني..
عقد حواجبه بتساؤل وشبحلها وهو يقول:كلام شني؟!
عفاف بإستغراب:ماقالكش!؟
خليل:تس..ماقالي شي! شن قالك؟!
عفاف بضيق:قال زياد متعرف ع شلة ماتنفعش..متاعين مخدرات وسكير...والولد مولي زيهم..
خليل بصدمه:كيف!!
عفاف:كيف ماسمعت ياولدي وشكله بوه عرف هدا علاش صار فيه هكي..
خليل مسح بيده ع شعره للخلف وهو يمرر في نظره قدامه بصدمه...
بعدين ناض ومشي من حدا امه..وهي تبع فيه بعيونها لين ادرق...تنهدت وقالت:لاحول ولاقوة الا بالله...
.......خليل.....
طلع من الحوش وع وذنه تليفونه يتصل بخوه جهاد..
قعد يمشي وهو يشوف جهة حوش هيثم..بعدين غير نظره وشبح قدامه..
لقي نسيبه جايه على رجليها هي والتوأم..
العيون تلاقت..بس فيسع هربت من بعضها..
هو نزل عيونه لريحان شاف شكلها متغير وهي قاصه شعرها وزايده جمال...ابتسملها..
وهي ابتسمتله..اما جنان حياته بحركة اليد..
وهو ردهالها..
نسيبه شبحتلهم..وارتسمت ع وجهها ابتسامه خفيفه...
لين فات من جنبهم خليل...
في اللحظه اللي وصلوا فيها هما فم باب الحوش..
قعدت نسيبه تشبحله وهو ماشي عاطي بالظهر..
ريحان:زعمة بابا روح عمتو؟
شبحتلها نسيبه بإبتسامه وقالت:شكله..
بعدين شبحت للباب وحطت المفتاح فيه..فتحاته.. وخشت هي والصغار...
....داخل....
سارة كانت في الكوجينه منهمكه في تحضير وجبة الغدي وفي وذانها السماعات...تسمع في القرآن وتردد ورا القارىء..
اما بوها...
فكان موجود في داره..
مقعمز ع السرير وفيده المصحف يقرا فيه..
▪▪▪▪
◇كنت نعبي في بنزينه....حسيت روحي تعبان وفاشل نفسيا وجسديا..ولو استسلمت ممكن نتعب اكثر من هكي..وتوا مش وقت استسلام..لازم نكون في اقوى حالاتي...ومافيش غير القرآن يمنحني القوة...القوة اللي تجيني من فوق...من القوي المتين..
راهو هدا مش مجرد كلام..ولانقول لحد جرب وتو تشوف..ربي مايجربه حد....هدا عن يقين..كنت لما نقرا بقلبي نحس بشي يسري في جسدي كله...بكل مافيه..
ريتوا القصص الخياليه..والرسوم المتحركه هادي..اللي فيها الابطال لازم ياكلوا حاجه معينه..ولايديروا حركه معينه بش يستمدوا منها القوة ويولوا ابطال خارقين....ضحك وكمل يقول...طبعا واقعيا هالشي يصير مع الناس لو خدوا مقوي او مشروب معين او مارسو رياضة معينه..بس هدا كله يقعد محصور في جانب واحد ..لكن اللي يديره القرآن...يخدم علي البنادم جسديا ونفسيا وروحيا...من جميع النواحي ومايخليكش الا وانت في حال احسن من اللي كنت عليه
اصلا هدا شي طبيعي...كل شي فينا يحن لصاحبه الأصلي ويقوى بيه...
فإنا..لله..وإنا...إليه...راجعون
▪▪▪▪▪
"ياهلا ياهلا شن هالجمال والحلاوة!"
وريحان وهي تحرك في راسها وشعرها يتحرك معاه قالت بضحكه:حلوة؟..
سارة شبحت لريحان وع وجهها ابتسامه تخفي بيها ألم كبير...
♦️قبل سنوات....
"نحب الشعر القنين يقعد طويل مايهونش عليا نقصه"
سارة:بس في الصيف ماما يتعب نو هلبه..
اسيمه وهي تلملها في شعرها فوق قالت بضحكه:نلموه هكي...ونشدوه كويس..معاش يتعبنا بكل...
سارة بعدت عنها وقالت:نبي نقصه شويه بس..
اسيمه:ويهونوا شعراتك الحلوات نقصوهم ونلوحوهم!؟
سارة سكتت شويه وهي تفكر..بعدين حركت راسها بالنفي..
اسيمه ضحكت بعدين قربت منها وباستها من خدها...
♦️الوقت الحاضر...
سارة بضحكه وعيونها تلمع بالدموع:عسل..
ضحكت ريحان..
جنان:اني حففته بس..
نسيبه:ع قد مادرت فيها شي..اني نحب شعري مانبيش نقصه..ولما شافت شعر ريحان ملوح قريب بكت..
ضحكت سارة..
ع جية هيثم...
وقف في بدايه الممر وهو يشوفلهم ويسمع في كلامهم..
▪▪▪▪
◇تربية البنت والولد تختلف عن بعضها..كل جنس لازم يتعامل معاه الوالدين باللغه اللي يفهمها...ويحاولوا يدوروا ع الحاجات اللي محتاجه تتشبع فيهم.....
الوالدين الزوز مع بعض..مافي حد فيهم يلقي بمسؤوليته ع التاني..مش كان الام بس هي الموجوده مع الصغار اغلب وقتهم يعني هي المسؤولة الوحيده عن تربيه الصغار..الصغار محتاجين لوجود الزوز في كل تفصيل من تفاصيل حياتهم..
يعني الاب ع قد مايقدر لازم يكون موجود في تفاصيل حياة صغاره..تفاصيل حياتهم هاه...التفاصيل...
والبنت محتاجه لبوها اكثر من امها...لأن بوها هو اللي حيشبع الجانب العاطفي عند بنته لين تتخطى مراحل البناء في حياتها...وهالجانب يتعزز بعد تنضج البنت...وتعرف تفرق بين الصح والغلط..وتبدا مستعده لإشباع جزء من الجانب العاطفي بالطريقه الصح..."الزواج"
طبعا اني نتكلم هكي توا عن خبره...اما فهداكا الوقت كنت مبتدئ...مانعرفش الا شي بسيط...وخليت التجربه تزيد تعلمني...
▪▪▪▪▪
"تي مني هادي...من البنية الحلوة..لمن البنوته هادي قولولي"
جنان وريحان بفرحه:بابا!..
وجوه يجروا...
هو ضحك وقدملهم لين وصلوا فيها....طبسلهم وضمهم وهما حضنوه بقوة..
وسارة ونسيبه يشبحولهم بإبتسامه..والعيون غارقه بدموعها..
طبع هيثم قبله على جبين كل وحده فيهم..
بعدين قعمز ع رووس صوابعه وقعد يمسح ع شعر ريحان:خلاص توا انتي ريحان...وشبح لجنان ومسح ع شعرها وقال..وهادي جنان...
ريحان:حلو بابا؟.
هيثم:حلو ياريحانة داري..
نسيبه:اووو ريحانة الدار..
ضحكت ريحان بفرحه..
جنان بزعل:واني!؟
هيثم بضحكه:انتي جنان قلبي..
نسيبه بضحكه:ياعيني ياعيني...
سارة بغيرة:احمم..حممم..
نسيبه ضحكت..
هيثم شبحلها ووقف ع حيله وقال:مازال مش لاقيلك اسم يستاهلك..
ابتسمت سارة..
نسيبه بانفعال مصطنع:لاالا معليشي..سوري...اكسكيوزمي يعني...مانقعدش هكي اني..راني اختك الصغيرونه هيثم اعتبرني بنتك..نبي زيهم حتى اني..
ضحكوا البنات..
هيثم بضحكه:لا عاد انتي قداش ليك معتمديلك اسم مرة صدفه سمعته من زياد..ضيق عيونه وشبح لسارة وقال..اندر..تيكر تقريبا
انطمست نسيبه
العيون فنصوا والوجه ولى احمر..
والبنات يضحكوا عليها..
هيثم:الا شن معناه الاسم ماعرفتش؟!
نسيبه بزعل وعصبيه:مش لازم تعرف وخيي..والحمد لله ع سلامتك على فكره..
ومشت من حداهم..
وهما يضحكوا عليها...
بعدين هيثم شبح لسارة وقال:شن غدانا؟
سارة:مفاجأة!...
هيثم عقد حواجبه وهو يقول:مفاجأة؟!
سارة حركت حواجبها تاكيدا لكلامها ومشت خشت للكوجينه..
هيثم ضحك ونزل راسه وشبح للبنات وقال:بروا وتوا رواحكم للمدرسه...
ريحان:لالا خدينا اذن بش نقعدوا معاك..
هيثم رفع حواجبه وقال:اليوم وغدوة عطله هلبه هكي..
جنان:عادي بابا يوم واحد وخلاص..
مسح بيده ع شعره وقال بإبتسامه:باهي..لكن معاش يتكرر..بروا بدلوا حوايجكم..
الزوز قالوا:حاضر..ومشوا من حداه...
وهو بعد مشوا تنهد ومشي للصاله...خشلها..
ووقف فيها لما عيونه جو ع اللوحه...
قعد يشبحلها...وهو يفكر بخوف ع صاحبها....
•••••°°°°°°••••••°°°°°•••••
"الريقا!!!"
جهاد:ايه..
خليل بصدمه؛شن طيحه فيه؟..وين شافه كيف عرفه!
جهاد:يقول صدفه..تصادفوا..
خليل شد ع قبضة يده بقوة وهو يفكر في الكارثه اللي عرفها..بعدين شبح لخوه بحده وقال:وينه توا؟
جهاد تنهد وقال:كان في حوازته تعرفها انت....ولما وليلته مرة تانيه مالقيتاش فيها...العامل اللي يخدم غادي قالي طلع منها في نفس الليله اللي شفت فيها زياد عنده
خليل عقد حواجبه وهز راسه بإيجاب وهو يقول:تو نلقاه...وانت...ردبالك اطلع كلمه..رد بالك تقول لحد...
جهاد:ماقلت لحد غير امي وانت عرفت منها..راهو حتى اني وجعني حاله وتبي الحق مارضيتلاش الوضع اللي شفته فيه
خليل بتهكم:وع روحك قاعد راضي؟!
جهاد مط شورابه بإنزعاج وقال:ماتبي شي ؟!
خليل ابتسم بتهكم ورفع حواجبه بعدين نزلهم...
بمعني "لا"...
جهاد هز راسه ولبس نظاراته ولف ومشي...
خليل:كان عرفت حاجه دير الو..
جهاد هز راسه بإيجاب ورفع يده تحية لخوه...بعدين نزلها لما وصل في سيارته ركبها ومشي...
وخليل لف ومشي للورشه وهو يفكر بقلق في زياد وحاله...
•••••°°°°°••••••°°°°°•••••
"اللي حطيناهم يراقبو في خليل قالوا انه ولى بعيد كل البعد عن نشاطه السابق..وقالوا انه يتحرك في يومه لتلاته اماكن فقط...الورشه..الحوش...الجامع"
العقيد:الجامع...غريب جدا التغيير المفاجئ اللي صار لخليل هدا؟
راجح:قصدك تقول انه مجرد تمويه؟
العقيد:وارد..
راجح:مااعتقدش..اني راقبت خليل قبل..وان قلنا ان التغيير اللي صارله غريب ومثير للشك..لكن مش لغرض التمويه..في سبب تاني يخصه..
العقيد:تعرف شي اني مانعرفاش؟
راجح ضحك وقال:ببساطه..يبي وحده..والباين ناوي يتغير ع خاطرها..
رفع العقيد حواجبه..
راجح بضحكه:هادي هي الحقيقة..
العقيد مط شواربه للأسفل بعدين قال:حتى هدا وارد..
راجح مسح ع لحيته:بس في معلومه جديده عرفتها...ممكن نقطعوا بيها الشك باليقين..
العقيد:اللي هي؟
راجح:عن بنت تقرا في مدرسة ثانويه للبنات شافوها واقفه قدام المدرسة مع جهاد خالد...البنت هادي كيف مافهمت انها محل شك..
العقيد:تبي تقول انها ممكن تكون مروجه في المدرسه؟
راجح:وارد..
العقيد وهو يفكر قال:امم..ممكن لو حطينا البنت هادي تحت المراقبة نوصلوا لشي..
راجح:وهدا اللي قصدته من البداية سيدي...بس نبي المراقبه ماتكونش رسميه..يعني خليهالي اني..
العقيد:تمام...وحندير نفس الشي مع ولاد خالد...لكن قولي شن صار في موضوع ولد الكاتب؟!
راجح:مع الأسف للأن مافيش عليه اي معلومه..وزي ماتعرف انت الريقا..فالح في التخفي الاختفاء
العقيد:هادي كلها خطوط صغيره ع الطريق تورينا الوجهه للمكان اللي نبوه...راجح..الجماعه هادي لازم اطيح في اقرب وقت ياراجح راجح عقد حواجبه وهو يشبح للعقيد وقال:بإذن الله حيطيحوا كلهم من صغيرهم لكبيرهم....
••••°°°°°°••••••°°°°°•••••
الساعه الرابعه عصرا...
"ماجده اني طلعت"..
ماجده من الحمام:باهي باهي شويه ولاحقاتك....بعدين قالت بصوت منخفض...ديما مستعجل...
دهنت وجهها بكريم واقي الشمس...
بعدين رداته لمكانه..ومشت للروشن بتفتحه...
فتحاته وشبحت برا...بنظرة عابرة...بس هالنظرة تغيرت لما شافت شي غريب...
روشن الحمام كان يفتح ع عمارتين جايات جنب بعض..
شافت بيناتهم..رشيد ولد راجلها ومعاه واحد مش في سنه..
ماجده وهي عاقدة حواجبها قالت:هدا شنو؟!
ولما ركزت بالنظر فتحت عيونها ع وسعهم وخبطت بيدها ع وجهها..
بعدين شافتهم مشوا الزوز وادرقوا...
صكرت الروشن بقوة وقعدت شاده بإيديها الزوز مقبض الروشن وهي مصدومه...لين وجهها شحب لونه...
وهي تردد...
"نهار اسود..نهار اسود...نهار اسود"...
🍁🍁🍁🍁
وطول الطريق ماجده كانت في عالم تاني من اللي شافاته
مرةمرة تسمع في هدرزة مجيد..وتشوفله كيف يهدرز ع زراديه هو وصحابه وعزايمهم وجمعاتهم كل مرة في حوش واحد
وهدا عطي بناويته كلهم وتريح..وهداكا بنته اطلقت ربي يكون في عونه على مابلاه..وغيرهم عنده سبعه بنات قاعدات يخمم فيهم كيف بيعطيهم وشن بيكملهومله...
ويختمها بعبارة"اللي يجيب البنات مايرتاحش بكل"
ماجده في نفسها"اللي مايعرفش يربي هو اللي مايرتاحش بكل سوا عنده بنات ولا ولاد..وكان تخمم في رشيد كيف ماتخمم في خواته وادور وراه كيف مادور وراهم راك عرفت ان العار والفضيحه وحده..سوا اللي دارهم بنت ولا ولد...وااك ياربي شن بينسيني اللي شفته بس...لطفك يالطيف ياربي..لطفك..."
•••••°°°°°•••••••°°°°••••••
"خلاص جهدي طاح"
قالت صالحه هالكلام وهي تقعمز ع مندار في الصالة بتعب بعد دارت دورة ع حوشهم الجديده وفرشاته بمساعدة عرفه..
وملاك حابسه روحها في الدار من اول ماجوا...
ضامه ركابها وهي تبكي وعقلها مابطلش تفكير في طريقه تنتقم بيها من خليل ونسيبه مع بعض...
وبعد طول تفكير الشيطان عطاها فيه بعض من اقتراحاته..
وصلت لطريقة ما
فكت ركابها وناضت ومشت لشنطتها قعمزت وخدتها وطلعت منها النقال...وبدت ادور فيه ع رقم معين لين لقاته..
واتصلت بيه..
حطت التليفون ع وذنها وهي تراجي في الرد..
شويه وقالت:ايوه..قصي...............ضحكت وهي تمسح في دموعها وقالت...ايه ملاك.........الشيتا ياسيدي...شن جوك............وانت اكثر .........
••••••°°°°°°••••••°°°°°••••••
"درتله دشيشة"
ماجده:وكلاها؟.
نسيبه بضحكه:بالسيف..يبلع فيها بالسيف..
سارة:علاش مايحبهاش ؟
ماجده: ايه ماياكلش فيها..
سارة سكتت شويه بعدين قال:معليشي تو يتعود ع خاطر صحته.
نسيبه:عاد مش ديما هكي مرة مرة ياكل وجبة زي اللي ناكلوا فيها حني..
سارة:لاعمتي لازم يتعود على نظام غذائي معين بش يقعد السكر متاعه معدل..
ماجده:تمام كلامك مزبوط..لكن سارونه لازم تعرفي ان الممنوع مرغوب راه...لو حرمتيه مرة وحده يقعد يتسهف ع الحاجه وياكلها من وراك بشراهه..
سارة خافت من اللي قالاته ماجده وقال:بابا دكتور خويله..هو حيحافظ ع صحته اكثر من غيره..
ماجده بضحكه:ان شاء الله..
نسيبه بإبتسامه:باهي شن صار في الشاهي الأخضر قريب يروح من الجامع..
ناضت ساره وقالت:ايه صح..ماشيه نشوفه..
ومشت للكوجينه وهما الزوز يشبحولها بعدين قالت ماجده بصوت منخفض:معاش في اخبار عن زياد؟.
نسيبه حركت راسها بالنفي وع وجهها ملامح القلق..
ماجده بقلق:ياربي الولد وين مشي وشن صار فيه! الوقت هدا يرعش ياكبدي..ربي يحفظه بحفظه ويبعد عنه كل من فيه شر..
نسيبه بحزن:آمين...صدري مغموم وقلبي مقبوض...معاش قادرة نعيش حياة طبيعيه زي قبل..
ماجده:معاش في شي يرجع زي قبل يانوسه..
شبحتلها نسيبه بقلق..وحطت يدها ع قلبها وشبحت للروشن وهي تفكر...
ماجده:ايه حقه.. واني جاية في الطريق ريت خليل خاش الجامع...
تسارعت نبضات قلب نسيبه وعيونها مازالوا ع الروشن..
ماجده؛مافيش جديد؟.
نسيبه حطت غرتها ورا وذنها وقالت:جديد شنو يعني...
ع جية سارة:جديد منو خويله اللي تسألي عنه..
شبحتلها ماجده وقالت:على حوش جاركم خالد..
سارة قعمزت وقالت:ايه حقه..تهاني اليوم قالتلي خوها خليل طلق مرته..
شبحت نسيبه لسارة وهي متفاجئة..
ماجده مررت نظرها بين سارة ونسيبه وهي تقول:طلقها!؟ علاش اللطف اني نحسابهم يبوا بعض؟!
سارة:لالا..هو خداها ع خاطر بوه هو اللي قاله خودها..قالت حوشهم انحرق وماعندهمش وين يقعدوا جابهم خليل لحوشهم..وبش ماتطلعش دوة ع قعدتها في حوش فيه شباب قاله تزوجها..وهو عقد عليها لااكثر...وبعد دبرلهم مكان سكن جنبهم...طلقها..
نسيبه حطت ايديها على بعض وقعدت تشبحلهم ووجهها مكتسي باللون الأحمر..والقلب يتراقص من فرحته..
ماجده:اها....
سارة شبحت لعمتها وقالت:قالتلي سارة يبي بنيه تانيه هو...
نسيبه تنهدت لاإراديا..وماجده شبحتلها..
فجأة...
انفتح باب الحوش..
هي قامت راسه بخلعه وقالت:هيثم روح..روح..
واشرت ع فم الصاله..
وهما يشبحوا لحالتها..
لين بان عليهم..
لما شاف خالته قال:السلااام عليكم..نورتي..
ناضت ماجده وهي مبتسمه قالت:حمد لله على سلامتك..
جاها وسلم عليها بالخد وهو يقول:الله يسلمك..
بعدوا عن بعض وقعمز جنبها وهو يقول:كيف الحال..
هي قعمزت وقالت:الحمد لله...انت كيف حالك.
هيثم:الحمد لله على كل حال..
ناضت سارة وهي تقول: خل نجيبلكم شاهي..
هز راسه بإيجاب..
مشت سارة...وهيثم قال:وين التوأم..
نسيبه:بكري جت بنت جيرانا تقرا معاهم ورتهم الواجبات اللي خدوهم..صلوا العصر معانا بعدين قعمزوا عليهم..
ابتسم وقال:كويس..بعدين شبح لخالته وقال...ايه شن حال مجيد..
ماجده تنهدت وقالت:مابيشي...
•••••°°°°°••••••°°°°°••••••
درست سيارة فخمة قدام العمارة..
انفتحوا البيبان ونزلوا منهم هما الزوز...
هي كانت لابسه عباية غاليه ملفته للنظر...
وشاده في يدها شنطه غاليه من ماركة معروفه..واليد مزينه بخاتم وحديده ذهب ..
التفتت لراجلها وهي تشوفله من ورا النظارات السود اللي مايقلوش قيمه عن كل ماتلبس وقالت بإبتسامه:بتركب معاي..
عادل:لا مستعجل بعدين لما نجي نروح بيك تو نركب..
رتاج:تمام...
لفت ومشت خشت للعماره..ووراها عامله اثيوبية الجنسيه شاده في ايديها اكياس هدايا...
....في حوش اهلها....
تحديدا الكوجينه...
عبدالمجيد:جبتلك بطاطا وطماطم وسفناري"جزر" ولفت وفلفل.. ودجاجتين...ساعدوا ع الحاجه ساعدوا راهو الدنيا شايطه فيها النار..غير جهاز القياس متاع بنتك دفعت فيه دم قلبي..
سدينه تنهدت وقالت:الله غالب هدا ماقدر علينا ربي اللهم لااعتراض..
هو تجاهل ماقالت وقال:بنتعشا برا اني ماديريش عشي..
فجأة..
سمعوا جرس الحوش يرن..
سدينه استغربت وقالت:مني؟
هو مشي طلع متوجه للباب...
لما وصل فيه قال:منو..
"رتاج"..
هو عقد حواجبه بإستغراب وفتح الباب...
شاف بنته واقفه قدامه..باينه فيها النعمه من شكلها المتغير تماما ومن العامله اللي واقفه وراها حامله ومحمله..
رسم ع وجه ابتسامه فرح منافقه وقال:رتاج بنتي...مرحبتين مرحبتين..خشي خشي..
خشت رتاج وهي تشبحله وخشت وراها الخدامه...
سكر الباب وجاها ضمها وهو يقول:حمد لله ع سلامتك..
رتاج وهي مبتسمه بتهكم:الله يسلمك..
بعدها وقال:وين عادل؟
رتاج:قال عنده مشوار ضروري بعدين يجي..
مجيد وهو يشوف للكياس:مش مشكله مش مشكله..علا صوته وقال...سدينه...سدينه...
طلعت سدينه من الكوجينه..ورتاج طول قدمتلها..
سدينه بفرحه:رتوجه!
بسرعه جتها رتاج وضمتها بقوة..
سدينه بفرحة:حمدلله على سلامتك بنيتي..
رتاج ودموعها ينزلوا:الله يسلمك امي..
ع طلعة دانيه من دارها بعد سمعت الدوشه..
لما شافت رتاج حطت يدها ع قلبها من قوة الفرحه وهي تقول:رتاج!..
بعدت رتاج عن امها وجت لدانيه..وحضنوا بعض..
دانيه:استاحشتك استاحشتك يامعفنه..
رتاج بضحكه:اني اكثر..
بعدتها دانيه وشدت يدها وهي تمرر في نظرها عليها تقول:اشي اشي اشي...شن هدا!
ضحكت رتاج...
وامها تشوفلها بإبتسامه..ومجيد يتفحص في لبس بنته ...
شافت دانيه للعامله وقالت:يارتوجه ياأوبها ايه العظمة دي كلها..
ضحكت رتاج وقالت:جايبتلك عرم هدايا..
دانيه بضحكه:ياسلام...
جي مجيد لرتاج وقال:خشي قعمزي تريحي بنتي خشي..
دانيه قعدت تشبحله بدهشه..
اما سدينه تنهدت بملل وجت لرتاج حاوطتها من وسطها وقالت:تعالي بنتي..
وخشوا للصاله...
ووراهم دانيه ومجيد والعامله تلحق فيهم بالأكياس اللي شادتهم...
•••••°°°°°••••••°°°°°••••••
طلعت من دارها بعد ماكملت قراية..
ومشت طول للصاله خشتلها لقتها فاضيه والتلفزيون مفتوح..
تهاني:الله كان حتى هديكا تقعد في حوش ماليها ومعاش تروح..
خدت الريموت من فوق التليفزيون ومشت قعمزت..
وبدت تغير....
لين وصلت في وحده من القنوات المحليه..
شافت برنامج مشهور محليا يطرق لكل الاخبار والحوادث المحليه القويه اللي تصير في البلاد...
خلاته وعلت الصوت...
مقدم البرنامج:معنا على الهاتف عميد كلية الطب الدكتور عبد الباسط احنيش..السلام عليكم دكتور احنيش...
"وعليكم السلام"
المقدم:دكتور عبدالباسط هل اعضاء هيئة التدريس في كلية الطب اصبحوا في غير مأمن الآن؟!
تهاني:شن صاير..
فجأة انقسمت الشاشه في القناه لقسمين..
قسم يبان فيه مقدم البرنامج وقسم فيه مقطع فيديو...
قعدت تهاني تتفرج...
كان يبان اشتباك بالأيدي بين زوز..بعدين واحد دفع التاني بقوة...اندفع للخلف وطاح ع سياج حديد....
بعد طاح وروا اللي ضربه قربله وطبس يشوف فيه...بعدين هرب..
تهاني:يالطيف ياربي!...
ع خشة عفاف..
ضيقت عيونها وهي تشوف للتلفزيون قالت:شن في!؟.
تهاني وهي مصدومه:شوفي شوفي ماما..
قربت عفاف من الشاشه وقعدت تتفرج...
عفاف:تس تس..وين هدا؟.
تهاني:في كلية الطب..استاذ غادي قالوا..
عفاف:تس تس..خلا دمه يبخ......ريتيه ريتيه هرب..شكله مات..
تهاني:مش عارفه..
سكتوا وهما يسمعوا في البرنامج..
كان عميد الكليه يتكلم ع الحادثه..
"والله حادثه زي هادي عمرها ماصارت..وكويس اللي كنا مركبين كاميرات بش عرفنا اللي دار هكي"
المقدم:هل فعلا من قام بهذا الجرم..يكون..ابن وزير الصحه السابق اللي استقال من ايام..هيثم الكاتب..ابنه زياد الكاتب؟.
تهاني جت واقفه وهي تقول بصدمه:شنو؟!
عفاف حطت يدها ع خدها وهي عاضة ع شاربها بقوة..
رد عميد الكليه وقال..
"مع الأسف ايه هو زياد هيثم الكاتب..وفي الحقيقه الطالب هدا من لما خش الكليه هدا العام ماجاش الا 3مرات فقط...وزملائه قالوا انه شاب مش سوي للأسف "
المقدم مط شواربه لداخل بأسف بعدين قال:للأسف...
■فهالوقت...
في حوش هيثم..
كانوا مقعمزين يهدرزوا وهما يشربوا في الشاهي...
فجأة...
رن تليفون نسيبه...طلعاته من جيب التوته...
لما شافت المتصل قالت:لجين..
ماجده شبحت لهيثم..
وهيثم يشرب في الشاهي وهو سرحان...
وسارة تشبح لعمتها اللي ردت على لجين..
نسيبه:اهلا لجين..
لجين بتوتر:نسيبه..شن داير الدكتور..
نسيبه عقدت حواجبها وقالت:حاله باهي الحمد لله..
لجين:نسيبه...ماتندروش شكلكم..
ناضت نسيبه وقلبها يرف من الخوف ومشت من حداهم للكوجينه..
هما تبعوها بعيونهم..ماعدا هيثم اللي مازال سرحان...
....في الكوجينه....
نسيبه:شن في يالجين..
لجين بتوتر:مصيبه كبيره يانسيبه...
........
هيثم استاقظ وقال:وين مشت نسيبه...
ماجده:تكلم في لجين..
هيثم حط طاسة الشاهي وقال لسارة:افتحيلنا التلفزيون ليا وقت ماشفتش اخبار..
ساره ناضت ومشت للتلفزيون فتحاته...
وخدت الريموت وولت لكرسيها....
انفتح التليفزيون ع نفس القناه...
وكان المقدم يقول...
"وشن وضعه حاليا؟!"
"والله يااستاذي حاليا في العناية المركزة يعني وضعه خطير جدا"
المقدم:اممم....تنهد وقال...دكتور باسط شاكرين ليك وجودك معانا واعطائنا المعلومات الوافيه عن هده الجريمه اللي صارت في الحرم الجامعي..
ماجده:يالطيف جريمه في الجامعه!
هيثم ضيق عيونه وهو يشوف للمقطع المصور..
سارة وهي تتفرج عليه...توسعوا عيونها ع الآخر..
هيثم زاد ضيق عيونه وقال:ترا علي صوت..
سارة قامت يدها اللي فيها الريموت وهي ترعش وعلت الصوت...
المقدم:هادي جريمه صارت في وضح النهار..مرتكبها طالب مفروض يكون قدوة حسنة لزملائه..مفروض يشبح اقل حاجه لوالده..الراجل اللي خلا ليبيا كلها تزعل لأنه استقال من منصبه في عز نجاحه..
سارة طاح منها الريموت...
وماجده شبحت لهيثم بصدمه...
ع طلعة نسيبه من الكوجينه جايه للصاله وهي تشوف لخوها بعيون تدمع حزن وتشبح بصدمه...
هيثم غمض عيونه وفتحهم...بعدين ناض وقف...
وقعد يمشي بإتجاه التلفزيون...
وكلهم بأنظارهم يتبعوا فيه...والخوف معبيها..
هو وقف قدام الشاشه مباشرة وقعد يتفرج ع المقطع ويسمع في كلام مقدم البرنامج اللي كان زي السيوف تخترق في أحشائه وتقطع فيها تقطيع...
.....الكلام اللي يسمعوا فيه اغلب اهل البلاد....
من اللي يتابعوا في الخبر على التلفزيون..
وفي من يتابع في الخبر عبر مواقع التواصل الاجتماعي وابرزها الفيس بوك..اللي انتشر فيه الخبر..في كل القروبات والصفحات المشهورة..والفيديو انتشر انتشار النار في الهشيم..
وصورة هيثم مرافقة لكل الأخبار....والتعليقات اقسى من الخبر بحد ذاته...
الخبر اللي شافه كل من يعرف هيثم وعيلته وهما متأسفين جدا...
زي وزير الداخليه رضوان بوكراع اللي يتابع في الخبر عن طريق الهاتف وهو مقعمز في مكتب احد مدراء السجون...
وراجح..
في مكان عمله كان يتابع في الخبر عن طريق التلفزيون هو ومجموعه من زملائه...وهو متأسف جدا للحال اللي وصله زياد...ويفكر في حالة هيثم حاليا...
زي ماقاعد يفكر فيها خليل وهو يتفرج ع الفيديو في الورشة متاعه..وخوته الزوز مع واحد من الزباين بحداه يتكلموا في نفس الموضوع...
الزبون:ديما صغار مسؤولين مدلعين وربايتهم ماتنفعش...
خليل قام عيونه وشبحله..
رفيق:ماتقولش هكي ياراجل حني نعرفوا العيله كويس ناس كويسه ع الاخر..
الزبون:وخيره ولدهم طلع هكي! في ناس تعرفه قالوا الولد مش مزبوط وباين عليه مدمن..
خليل ناض وقف وهو يقول:خوي..تقدر تمشي توا وتولي بعد ساعتين تاخد سيارتك..
الزبون:ماعندي وين نمشي في هالساعتين خل نقعد هني نستنى وخلاص..
خليل:تمام اقعد استنى هني لكن ماتلهي حد عن الخدمه بدوة فاضيه..
رفع الراجل حواجبه وهو يشوفله..
جهاد:تفضل قعمز شويه ونجيبلك شاهي...
الراجل شبح لجهاد..بعدين هز راسه ومشي قعمز ع الكرسي بعدين شبح لخليل..
خليل حط هاتفه في جيبه القامجو ومشي لوحده من السيارة وطبس عليه وبدي يشوف فيها وهو مضايق ومعصب في نفس الوقت..
جهاد جي للراجل عطاه طاسة شاهي...خداها وبدي يشرب فيها ومرة مرة يشبح لخليل...
🍁🍁🍁🍁
"بابا!"
نادت سارة بعد ماشافت بوها بيمشي من قدام التلفزيون ..
رفع يده بإتجاهها بش يمنعها انها تجيه..
ومشي طول للممر الديار..
سارة وقفت وهي تشوفله اتذكرت هديكا الليله واللي صار لبوها فيها...
لما قرب يخش ممر الديار جت بتلحقه شدتها عمتها..
نسيبه وهي تشوفله قالت بهمس:خليه توا..
سارة نزلوا دموعها وهي تشوفله كيف خش لين ادرق من قدام عيونه
جبدت ذراعها من يد عمتها وولت قعمزت في مكانها بهده وهي تقول بصدمه:مش مصدقه..مش مصدقه الحال اللي وصله زياد مش مصدقه ماجده رشفت وهي تمسح دموعها وقالت:قلتها وقت يخوف معاش فيه أمان..زياد الوليد الملتزم الباهي المتربي خلوه يولي هكي!
نسيبه حطت ايديها في نصها وهي تبكي قالت:اني الغالطه اني..قعدت في جرته لين طفشته...مفروض تفهمت حالته مفروض تعاملت معاه بهدوء...لكن اني...خبطت بيدها ع جبهتها وقالت..حمارة..حمارة...
سارة حطت ايديها ع وجهها وانهارت بالبكي..
وماجده ونسيبه قعدوا يبكوا معاها..
ع جية البنات الصغار لما شافوهم هكي خافوا..
ريحان:وين بابا!..
نسيبه التفتتلهم ومسحت دموعها وجتهم وهي تقول:في داره حبيباتي..هي تعالوا معاي وروني شن درتوا في الواجب..
وخدتهم من ايديهم ومشت هي وياهم وهما يشبحوا لسارة كيف تبكي...
...فاتوا هما ونسيبه من قدام دار هيثم....
نسيبه شافت للدار بقلق..بعدين شبحت القدام وكملت طريقها مع البنات للدار وخشت هي وياهم....
....وهيثم....
كان مقعمز ع السرير في الدار وهو يشبح في الفراغ...
سرحان...يفكر في كل شي...كل شي...من البداية لعند هاللحظه...
▪▪▪▪▪
◇غالبا الواحد لما تجيه المصايب ورا بعضها...اول سؤال يخطر على باله...علاش ياربي يصير فيا هكي شن درت بش ديريلي هكي!؟...هادي طبيعه اغلب البشر لازم يدوروا ع سبب للي قاعد يصير معاهم...في اللي يتسخط على القدر لأنه يشوف انه مادار شي يستحق هدا كله...ومنهم من يقول هادي عين...هدا حسد...وهلبه اسباب الكل فيها متهم ماعدا اللي نزلت عليه المصيبه يشوف انه مايستحقش اللي صار فيه...
سابقا...كنت حنقول ان زياد ولدي...هو اللي ماينفعش..هو عملي الغير صالح...وكنت حنقول جمله يرددوا فيها هلبه آباء وامهات..."الولد ولدي والفعل مش فعلي"....
لأني كنت زيهم..نشوف في روحي ديما صح ع طول الخط ومافي شي ندير فيه غلط..صغاري هما اللي ماينفعوش...
بس في هداك اليوم تحديدا...
وممكن لأن هلبه غشاوات طاحت عن بصيرة قلبي وبصر عقلي...مالقيتش في حد مذنب غيري اني...
وزي ماقالت سارة بنتي مرة..."انت اللي خليته يهرب منك"
ايه اني المسؤول الاول والاخير عن كل غلط يرتكبه ولدي لاني ماعرفتش نتعامل معاه...ماعرفتش نكون في حياته زي مامفروض يكون وجود الأب في حياة ولده...
ولدي مالاش ذنب...اني المذنب الوحيد..
▪▪▪▪▪
استاقظ من سرحانه وطلع تليفونه من جيب جاكيته..
وشافه...لقي فيه مكالمات فائته بعدد كبير..
حطه صامت ونساه..
فتح وشاف المكالمات من مني...
اغلبها كانت من زملاء في العمل....ووحده كانت من راجح..ووحده من وزير الداخليه...
غمض عيونه بتعب..وحدف تليفون جنبه ع السرير..
وحط راسه بين ايديه اللي غطا بيهم عيونه...
وبدي يبكي...
يبكي من عجزه...وصدمته...وقلة حيلته....وخوفه....
على ولده...ومستقبل الولد اللي يعتبر ضاع خلاص...
من الناس اللي همهم هم...كيف بيواجههم ...كيف بيتعامل معاهم..!؟ومع نظرتهم ليه اللي اكيد حتتغير 180 درجه..
كيف بيرد ع الكلام اللي حيسمعه من هدا وهداكا...وبشن حيدافع على ولده لو سمع عنه كلام مؤذي مايقدرش يقبله حتى لو كان ولده راكبه الغلط من ساسه لراسه...يقعد ولده ومش حيتحمل فيه شي...!
وضع يرثى له...انقلاب حال مفجع...
تغير الحال من الجيد للسيء وللأسوء أصعب شي ممكن يتعرضله الإنسان في حياته...
الضربات اللي تعرضلها هيثم قسمت ظهره....
وخلاته حاليا يحس انه محشور في زاويه مظلمه شديدة الظلمه في الحياة...مش عارف ولاقادر يطلع منها....
يتبع°°••
