البطل المغمور

تابع

#البطل_المغمور"شمس الغروب"
#الجزء_الحادي_عشر"القسم الثاني"
#Goman_Fared💕
💐..
"الكاتب خاش بقوة واندفاع"
:مالا شنو ماداروش التعديل الوزاري من فراغ قالوا كلهم اللي جابوهم جدد قنط من اول وتغييرات..تي الداخليه قريب كلها تغيرت..
:الحمد لله اللي حني موظفين صغار لا لينا ولاعلينا كانهدا رحنا فيها..
الحوار هدا كان يدور بين زوز من الموظفين في وزارة الصحه..
فالوقت اللي فيه كان هيثم قدام الوزارة طالع لمجموعه من المحتجين من مرضى الاورام..والمعاقين..ومرضى الكلي اللي يعانوا يوميا..
مريض كلى:والله يادكتور هيثم قريب نخنب بش ندفع حق الغسيل فالمصحات الخاصه..
والد مريض سرطان:مالا شن نقولوا حني اللي قريب نبيعوا ارواحنا بش نجيبوا حق الكيماوي يادكتور..
احد المقعدين:علاج طبيعي زي ناس مافيش فهالبلاد وكان بنمشي للخاص ع كل جلسه ندفع هداكا الحساب واني علاجي يبي سنتين وفوق..وانتم عارفين الحال ماعندنا منين وين نجيبوا حق علاجنا هني يابال نسافروا برا..
هيثم هز راسه بأسف وقال:اني مانبيش نبيعلكم اوهام ولانعطيكم وعود كذابه..اني بس نبي نقوللكم اني حندير كل اللي نقدر عليه بش نخفف عنكم بعون الله..بعون الله حندير كل اللي يطلع بيدي بش انت تغسل كلاويك مجانا في مستشفيات الدوله..وانت تعالج في بلادك وترجع توقف على رجليك..وانت تجيب ولد ياخد الجرعه متاعه من غير ماتفكر في اي تكاليف..كل من موجود هني نعاهدكم قدام ربي اني ندير واجبي اتجاهم...
.......
ماشي في الممر متجه لمكتبه..
هيثم:لجين من اليوم انتي حتكوني وين مانمشي..
لجين:حاضر دكتور.
هيثم وقف قدام مكتبه وقال:نبي اجتماع سريع وعاجل بالموظفين الجدد..الوكيل والمعاون موجودين ولا؟
لجين:اكيد..
هيثم:تمام..وخش للمكتب..
ولجين مشت بسرعه تنفد الاوامر..
••••••°°°°°°•••••••°°°°°°••••••
ع الغدي..
اسيمه:معاش بدينا نشوفوا فيه بكل الا في الليل..
سدينه:حتى هو وزير ياوخيتي مش حاجه عاديه ربي يكون في عونه..
ماجده:ايام كان يخدم دكتور عادي كان زي هلال العيد وتوا بيولي زي الكسوف..
ضحكوا ماعدا نسيبه اللي كانت تشبح في الفراغ وسرحانه..
دانيه:سارة انتي العام الجاي ان شاء الله بتخشي ثانوي ولا؟
سارة:ايه ان شاء الله..
دانيه:تعالي لمدرستنا مش بعيده عليكم..
اسيمه بإبتسامه:بإذن الله حنسجلوها غادي..
فرحت رتاج..
وسارة كذلك...
شبحت بعدين اسيمه لرتاج وقالت..الحلوة هادي شن تخصصها..
شبحت رتاج لأسيمه وابتسمت بخجل وقالت:اقتصاد..
اسيمه:ماشاء الله..
دانيه:اني ان شاء الله ناويه طب..
سارة:الله!..حتى اني..
دانيه بضحكه طقت فيد ساره وسارة طقت في يدها وهي تضحك..
والكل يشوفولهم بإبتسامه..
ماعدا نسيبه اللي كانت تنقش تنقيش ودموعها في عيونها وخالتها مركزة عليها..
في المربوعه..
زياد:ان شاء الله العام الجاي جامعه..
مجاهد:حددت شن تبي؟.
زياد:لتوا لا..مازلت محتار..
مجاهد:خش الحاجه اللي تحبها..
زياد ابتسم..
مجيد:هي تغدوا تغدوا وبعدين هدرزوا..
ضحكوا زياد ومجاهد وقعدوا ياكلوا..
ورشيد معاهم ياكل وهو ساكت..
••••••°°°°°°°•••••••°°°°°°°••••••
"تس استغفر الله العظيم"
جهاد:حتى هو يام مش بعقله مالقاش الا هادي.
عفاف:وهلبه فيه..هو يحصل ربعها..
رفيق:عاجباتك هلبه يام..
عفاف:بنيه قدعه وطيبه ماشاء الله عليها علاش ماتعجبنيش..
رفيق:اكبر منه .
عفاف:مش هداكا الفرق..المهم اخلاقها واصلها..بعدين تنهدت وقالت...لكن كيف بيوصل فيها وحده زي هادي!..بقولي هكي خيرله..
هما الزوز اضايقوا وقعدوا ساكتين..
ع خشة تهاني..
مشت بتشرب ميه..
رفيق:صبيلي معاك..
تهاني شربت بعدين قالت:صب بروحك..
وكيف جت بتطلع شدها خوها من ذراعها وقال: خير عمك انتي!!
عفاف:رفيق!
تهاني:حول يده خيرلك..
هو شد عليها اكثر وقال:مش محولها هي شن بديري..
تهاني بعياط:قتلك حول..
ناضلها جهاد وقال:نقصي صوتك ياحيوانه..
جت امهم بيناهم وقالت:خلو اختكم..حول يدك..
طلقها رفيق بالسيف..
هي شبحتلهم بحقد بعدين لفت بتطلع انخبطت في بوها..
خالد:خيركم!!؟.
تهاني:انت وولادك تعرفوا خيرنا..
ومشت فاتت من حداه..
جهاد:كان تطلقوني عليها بس..
خالد بغضب:قسما بالله تجي جنبها نعدمك..
عفاف مشت طلعت من حداهم بدون ماتقول كلمه..
قدملهم خالد وقال؛تهاني اللي مازال يفنص فيها يطلع من الحوش..
الزوز نزلوا عيونهم وقعدوا ساكتين وهما مضايقين.
اما خالد بعد مرر نظراته الحاده عليهم لف وطلع من حداهم ومشي للمربوعه..
•••••°°°°°°•••••°°°°••••••
الساعه 11:00ليلا..
خش لفراشه وقال..بنمشي للشرق وبعدين بنولي لمصراته وبعدها الجنوب..نبي نوقف ع كل شي بروحي..
اسيمه:عندك حق هادي امانه انت مسؤول عليها مفروض كل شي توقف عليه بروحك..
هيثم تنهد وقال:اسف جدا اسيمه عارف روحي مقصر وزدت قصرت لكن مش بيدي وانتي ادرى..
اسيمه بإبتسامه؛ولايهمك كلنا مقدرين ياهيثم..لكن..راك تنسى وعدك..
هيثم بضحكه:لالا مش ناسيه ماتخافيش..
ابتسمت اسيمه بإرتياح..
•••••°°°°°°••••••°°°°°°•••••
مقعمزة تكتب في مذكرتها وابتسامتها ع وجهها..
"منذ ان ارتديت الحجاب وانا اشعر ان الكثير من الزهور في بستان قلبي قد تفتحت وونشرت اريجها في ربوع قلبي..القلب عندما يقترب من الله اكثر يحيا اكثر..يبتهج..يشرح..يصبح قلبا جميلا حقا..ولااظن بأن الله سبحانه سيضع في هكذا قلب حب أي خبيث..وانت يوما عن يوم تصبح امنية غاليه قلبي يتوق للحصول عليها..ليست مجرد مشاعر عبثيه بسبب فوضى الهرمونات..بل هي مشاعر طاهرة ونظيفه..لهذا اصبحت اطلبك من الله...اسأل ان يهبني اياك...احتفظ بك هاهنا في جانبي الأيسر..الى ان يأتي ذلك اليوم المنتظر.."
تنهدت وصكرت المذكره..ورفعت عيونها فوق بعدين غمضتهم وقالت...يارب...
••••••°°°°°°••••••
اما عمتها فهديكا الليله كانت في حال عكس حالتها..
كانت تصلي وتدعي لربي انه مايخليش قلبها يتعلق بخليل لأنها مش حتشوف معاه الا العذاب وبس..
نسيبه الفرفوشة اللي كانت مصدر بهجه وضحكه للي حواليها..بدت ديما مهمومه ودموعها مايفارقوش عيونها...وتوا هي راقده ع سجادة الصلاة ودموعها تتزل من الألم اللي تحس بيه..
💎وفي شارعهم..
كان ماشي بروحه ويغني..
أنا مش عارف اتغير..
كل ماأقول هتغير..
تحصل حاجه ترجعني عن كل اللي انا ناويه..
كل ماأقول انا حبدأ..
اعيش حياتي بمبدأ.
ارجع اضعف تاني لا مش بس انا باضعف قوي..
ايوه بفوق لما بروق واحاسب نفسي بكم سؤال..
وارجع اقول مافيش مخلوق مابيغلطش ده شي محال..
وارجع تاني اغلط تاني كأني بكلم واحد تاني..
انا زعلان من نفسي حقيقي..
انا غلطان وضعيف واناني...
تنهد من اعماق قلبه..
وخش الزنقه..
بس وقف في بعد ماخشلها..
ولف ورجع ومشي للورشه..
فتحها وخش داخل وصكر وراه الباب..
فتح الضي..ومشي طول بإتجاه المرايه..لقي الساعه قاعده في مكانها بس قطع المرايه محوله..
خداها وقامها..
وقعد يشوفلها..لقاهي واجهتها تهشمت..بس مازال تخدم..
تخدم!؟
هي هديكا الليله كانت الساعه واقفه!..
ارتسمت ع وجهه ملامح الحزن ..ومشي قعمز ع الكرسي بهده...ودموعه بدوا ينزلوا..
خليل بنبرة باكيه:زدتي عذبتيني اكثر واكثر..ياريتك قعدتي كارهتيني..والله ارحم..ارحم من اني نعرف ان في قلبك ناحيتي زي مافي قلبي ناحيتك..والله لولا اللي اني فيه ماترددت لحظه ومشيت خطبتك طول..لكن..اللي زي مايعطوشي وحده زيك..مايعطوشي..
وحط ايديه ع وجهه وانهار بالبكي...
🥀ياما منهم اللي زي خليل غرقوا في الوحل ويبوا يطلعوا منه لكن مش عارفين كيف..وحتى لو قدروا يطلعوا حيقعدوا متلطخين بيه لأخر العمر...طبعا في نظر البشر بس...لكن ربهم لا...وللآن خليل يبرة البوصله متاعه مازالت تايهه وماحددش الأتجاه الصح اللي تخليه فعلا يقدر يتغير تغيير جذري🥀
••••••°°°°°°°••••••°°°°°°•••••••
تاني يوم..
في المدرسه الثانويه للبنات..
"تعالي دانيه"
خشت الأبله لحجرة المدرسات ووراها دانيه..
الأبله:قيمي معاي الكراسات..
قامت دانيه الكراسات..
ابلة الكيمياء:عاد دانيه اليوم بتوتي الزرده..
دانيه بتساؤل:علاش ياابله؟!
الأبله:اليوم صحايف ...
دانيه بضحكه:واخيرا قريب اتم السنه فقدنا الأمل اصلا..
ضحكوا الأبلات..
ماعدا جيهان اللي كانت تشوف لدانيه من فوق لتحت وهي حاسه من الغيره..ماتحبش تشوف بنت خير منها ولاتفوتها في الجمال ولاتحب حد يشكروه غيرها..
الأبله التانيه:هيا دنون ياصاحبة الترتيب الاول..
دانيه بضحكه:زعمه ياأبله..
الأبله:من غير كلام..
ضحكت دانيه وطلعوا مع بعض..
جيهان:ليبيه؟!
الأبله:ايه ابا عن جد لكن مش باين عليها تبارك الرحمن..
جيهان رفعت حاجبها وشبحت للكراسات اللي قدامها..
••••••°°°°°•••••°°°°°°•••••
في حمامات الكليه..
كانت قدام المرايه واقفه تحط في الزينه..
بعد ماكلمت..
طلعت منه وهي محولة الخمار وقاعده بالملايه..
كل من يشوفها ينصدم فيها..
هي من داخل مش راضيه ع اللي دير فيه بس حقدها ع شكل الحياة اللي عايشنها مخليها تتصرف بضياع..
وين وصلت في الساحه..
وقفت في مكانها لما شافاته واقف..
هو انصدم..وقعد يشبحلها ومش مصدق..
قدملها طول وقال:صباح الخير..
هي بإبتسامه:صباح النور..
جهاد بإبتسامة استغراب:كيف صار!؟
رتاج:تغيير..
جهاد رفع حواجبه..
رتاج:مش حلو!؟
جهاد:لا بالعكس حلو هلبه..ابتسم وكمل يقول..نقدر نعزمك ع حاجه نشربوها..
رتاج بإبتسامه:اكيد..
جهاد؛حلو..بري قعمزي غادي وجايك..
رتاج:باهي..ومشت طول قعمزت وين ماقاللها...
وهو مشي للكافتيريا...
•••••°°°°°°•••••••°°°°°°°°••••••
"معقوله هكي تاهو اني متمسكه بصحبتنا واني متخليه عني'"
تهاني بحزن:والله ماقصدي..لكن خفت تخليني حتى انتي..
سارة:مشيتي ياهبله انتي خلتيني..
ضحكت تهاني..
سارة:تاهو حبيبتي اني نعرفك كويس ونعرف اخلاقك انتي تشرفي اي بنت تصاحبيها وكانك ع كلام خوي الغبي تفتفيت زايد ماتعدليش عليه..
تهاني بغضب:خوك هدا بالذات معاش تجيبلي سيرته بكل..
سارة:ههههه..باهي..خلينا منه..وخل نهدرزلك ع اخر الاخبار..
تهاني بحماس:اخبار شني!؟
تنهدت سارة من قلبها وبدت تحكي..
•••••°°°°°••••••
"سلم وليدي طلعنا والله انخنقنا"
مجاهد بضحكه:حاضر ياخالتي غير وين تبوا تمشوا انتم بس..
ماجده:وين خاطرك بتمشي ياسدينه؟!
سدينه بضحكه:خاطري في زردة..
ماجده:الله حتى اني خاطري في زرده..
مجاهد:خلاص نشوفوا يوم مناسب نطلعوا فيه زرده..
سدينه:مافيش غير الجمعه .
ماجده:ايه صح كلهم عطلتهم الجمعه..
مجاهد:خلاص الجمعه ان شاء الله..احلا زردة لحرم عبدالمجيد المجذوب..
ماجده ضحكت وضربت كتف سدينه وسدينه تضحك وتحرك في راسها يمين ويسار..
ومجاهد يشوفلهم بابتسامه وقلبه مرتاح..
كان خايف طول فترة سفره انه يروح يلقى وضع امه النفسي تعبان..لكن اللي لقاه فاجئه وفرحه هلبه..لقي امه نفسيتها حلوة..ومزيانه..ومتغيره عن قبل..
وقال في نفسه..
"وعسى ان تكرهوا شيئا ويجعل الله فيه خيرا كثيرا"..
••••••°°°°°°°•••••••°°°°°°••••••
في الحصة الأخيره..
وزعوا الصحايف ع الطالبات...
ودانيه كانت الأولى..
وطبعا قلبتها احتفالات..
"وحياة قلبي وافراحوا...وهناه في مساه وصباحو..
مالقيت فرحان في الدنيا..زي الفرحان بنجاحو"
واصواتهم واصله للوطا..
جمعه بإنزعاج:قلبوها عرس هادم..
زميله؛معليشي فرحانات عندهم حق..
جمعه:مش هكي ياأستاذ..
زميله بضحكه:معليشي معليشي..
شويه وبدوا الطالبات ينزلوا من الدروج بش يروحوا..
ودانيه نازله هي وصاحباتها تهدرز وتضحك وبطير من الفرحه..
وجمعه يشبحلها..لما قربت منهم قال:ياطالبه..
وقفوا البنات وشبحوله..
اشر  ع دانيه..وقاللها بالإشارة تجيه..
هي ارتبكت هلبه ومشتله..
جمعه:ترا طلعي صحفيتك ..
هي فتحت الشنطه وطلعتها ومدتهاله..
خداها وقعد يشوف فيها..وهي تشوفله بخوف..
رفع حواجبه وقال:بمجهودك هدا!؟.
انصدمت دانيه من السؤال..
الأستاذ:دانيه طالبه متفوقه يااستاذ..
مدلها الصحيفه وقال:باهي..مادامك هكي حافظي ع مستواك وماتشغليش روحك بالدوة الفاضيه..
هي خدت الصحيفه ومافهمتش قصده وقالت..حاضر..
جمعه:بري..
مشت دانيه لصاحباتها وطول مشوا مع بعض..
زميله:خيرك معاها؟!
جمعه:ماخيرني شي..نبيها تولي جديه شويه وتعقل..
بعدين شبح جهة الدروج لقي جيهان واقفه في اخرهم وتشبحله بنظرة حاده..
هو اشرلها بعيونه تطلع..
هي هزت راسها ومشت طلعت..
جمعه:هي السلام عليكم..
زميله:وعليكم السلام...
طلعوا برا..
مشت جيهان ركبت سيارتها وتحركت وهو تحرك وراها بسيارته بش يوصلها..
•••••°°°°°°•••••••°°°°°°°•••••••
الساعه الرابعه عصرا..
في دارهم..
دانيه:مش عارفه علاش هكي يعامل فيا كارهني هلبه..
رتاج؛شكله حاصل في روحه.
دانيه:ايه شكله هكي..والله بديت وين نشوفه نخاف..
رتاج؛تجنبيه وخلاص..خلينا منه توا..نبي نحكيلك شن صار معاي اليوم..
دانيه:شن صار !؟
رتاج بضحكه:هدرزنا اني وجهاد..
دانيه تعركت ابتسامتها..
رتاج؛خيرك!
دانيه؛مش عارفه خفت...رتاج ردي بالك والله لو بوك يشم حاجه يذبحك..ومجاهد راهو حاط فينا الثقه لونخونوها حنخسروه للأبد..
رتاج؛شن صار!! شن غيرك توا مش قبل عندك عادي!؟
دانيه؛ولامرة شجعتك ديري علاقه..اني نبيه يجيك من الباب ويفكك من هدا حسام..مش علاقة يارتاج..
رتاج:اكيد حيجي ويخطب من غير كلام هادي..وكان بوك قال لا..لما نهرب معاه..
دانيه بصدمه:رتاج!..
رتاج :مالا تبيني ناخد حسام ونندفن بالحي!!
دانيه سكتت وهي تشبحلها بخوف..
اما رتاج قالت:والله لوانتي ترضي لروحك اني مانرضاش نكمل عمري مقهورة..
وخشت فراشها وتغطت..
ودانيه ساكته ولاكلمه من صدمتها ومن خوفها...
💙في مكان تاني..
في راس الشارع..
جهاد:وتيتلكم الجو في الإستراحه..
صاحبه:اوووو...عودة للملاعب..والله قبل نحسابك تبت..
جهاد ابتسم بتهكم وقال:قبل نحساب في بنت تستاهل نتوب ع خاطرها طلعوا كلهم زي بعض ياصاحبي..
صاحبه:صدقت...
🥀مادامك تبي اتوب ع خاطر بنت مش حطيح الا في الخبيثة واختها..برغم ان رتاج مش خبيثه بس ضايعه من نفسها 🥀
•••••°°°°°°•••••••°°°°°°•••••
وتمر الأيام..
ورتاج تتلاقى فيهم مع جهاد ومش مهتمه لشي تهدرز معاه وتتمشى هي وياه وياكلوا مع بعض عادي...
ودانيه اختها كانت خايفه عليها هلبه وتخمم فيها ومش قادرة تمنعها..
وفي نفس الوقت كانت خايفه من جمعه في حصته تقعد عاقله حتى تتجنب تشبحله الا لو شاركت معاه في الحصه المهم ماتحصلش معاه في مشاكل..
المشاكل..
اللي كان خليل يبي يبعد نسيبه عنها..بدي يتجاهل فيها تماما..
وهي كذلك..بس مارجعتش زي قبل..لاعاد احتكت بيهم ولااهتمت لوجودهم نهائيا..
وهدا كله كان تحت عين راجح اللي تأكد فعلا ان نسيبه مالهاش علاقه بيهم..لكن هو بدي غصب عنه لازم يراقبها
حس انه منجذب ليها فعلا ولشخصيتها القويه..
وعقله بدي يفكر فيها بجديه...
ع صعيد اخر..
كان هيثم غارق في خدمته في الوزارة..كانت المهمه ثقيله جدا ومعاها مش لاقي وقت يحك راسه...
وبدي وجوده في حياة عيلته زي عدمه فعلا...
لين جي يوم الجمعه...
🌸طلع من داره وهو لابس كاجوال..
هيثم:هيا ياعيله..
نسيبه طلعت من الكوجينه وهي شاده الدربوكه:هيا هانا طالعين..
هيثم ضيق عيونه وقال:هدا شنو!؟
دربكت نسيبه وقالت بضحكه:دربوكه ياوزوز..
هيثم بضحكه:وشن بديري بيها!؟
نسيبه:بنهيجوا بيها..
هيثم؛اركبي حطيها فوق..تحركي..
نسيبه:هيثومه انسى انك دكتور ووزير اليوم بالله عليك..
هيثم:تي اسمعي الكلام..
ع جية اسيمه والصغار قالت:خيركم.!!
نسيبه:ترا شوفيلنا راجلك يامراة انتي يبينا نطلعوا للزردة نكوديين..
هيثم:وهي الزرده ضروري بالدرابيك..عرس هي!؟.
ريحان؛ايه بابا ايه خليها دربوكه ارجوك بابا ارجوووك..
وتضخفتله بعيونها..
هي قلب عيونه وتنهد بتذمر وقال:باهي..هيااااا..ومشي طلع..
ضحكوا كلهم..
ونسيبه طبست ع ريحانه وباستها من خدها بقوة وقالت:نجيها ياربي..
🌸🌸🌸🌸🌸
"ياسواق اجري ع الميه ماتخافش ع البتاريه"
كانت الأغنيه هادي بأصوات نسيبه واسيمه وريحان وجنان..
اما سارة وزياد كانوا يضحكوا بس..
وهيثم متمالك اعصابه بالسيف ويساير وخلاص..
فاتت السيارة من قدام محل مواد الغذائيه..
كان وقتها خليل طالع منه..شاف نسيبه ادربك وتغني تلقائيا ابتسم...
بعدين تنهد بألم ومشي بطريقه لحوشهم...
🌸🌸🌸🌸🌸
في مكان تاني..
كانوا كيف واصلين عيت مجيد..
بدوا يفرشوا ويوتوا في بضاعة الفطور والغدي...اللي كلها كانت من مجاهد..طبعا كان مش هكي راهو مجيد عفسلهم في المشيه..
اكثر من كان فرحان بهالطلعه البنات لأنهم قليل النادر مايطلعوا ويغيروا جوهم..
🌺اما صغار هيثم..
فكانوا قليل النادر يطلعوا طلعات زي هادي مع بوهم غالبا كانوا يطلعوا مع امهم بس...
طبعا هيثم في الطلعه كان مقعمز وشاد الأيباد ويتابع في عمله منه..
للأسف هدا هيثم...
اسيمه كانت تشبحله طول الوقت وهي مضايقه مابتش تكلمه تقول في نفسها باهي اللي رضي يمشي معانا...
بعدين شبحت لصغارها لقتهم يلعبوا مع عمتهم في كرة المضرب..
اما ريحان وجنان بدوا يوتوا في وراقي الرسم بش يبدوا يرسموا..
بعد نص ساعه بالزبط..
رن تليفون هيثم..
شبحوله كلهم حتى اللي يلعبوا..
طلعه من جيبه..
وناض ومشي بعيد شويه ورد...
جنان بحزن:بابا بيمشي ماما؟!
اسيمه وهي تشوف لهيثم:لالا ماما..
وريحان تشوف لبوها بزعل..
شويه وجاهم بسرعه..
هيثم:اسيمه..ولوحلها المفتاح..
خداته وهي تشوفله بخوف..
هيثم:اسف جدا مضطر نمشي في وفد جي اليوم ضروري نجتمع بيهم اليوم..اسف اسف جدا..
ولف ومشي من حداهم..
وخلاهم كلهم يشبحوله بنظرات بين خيبة الأمل..والحزن..
التفتت اسيمه لبناتها وقعدت تشوف للدموع بتنزل من عيونهم البريئة..
اسيمه؛قصدكم ماتبوش ترسموني!؟
نسيبه جتهم وقالت:واني!!
سارة:واني!!
وزياد جي منبطح قدامهم وقال:واني..
نسيبه بخلعه؛يالطيف!
كلهم:ههههههه..
🌸وفعلا قدرواا يغيروا جو البنات الصغيرات وخلوهم بدوا يرسموا لوحتهم...اللي حتما حتكون ناقصه..عنصر اساسي غيابه حيكون واضح هلبه...
•••••••°°°°°°°•••••••••°°°°°°°°•••••••••
الساعه الثانية عشر ليلا...
طالع من داره متوجه للكوجينه بيشرب..
وقف في نص الطريق لما سمع اصوات نقاش طالعه من دار بوه وامه..
هيثم:ياأسيمه انتي مفروض ااكثر وحده تعذرني..
اسيمه:اني عاذراتك..لكن ياهيثم مانبيكش تنسى ان حوشك وصغارك هما مسؤوليتك الأولى..
هيثم:صغاري مافيهم شي..عايشين مستريحين ماناقصهم شي..
اسيمه ابتسمت بأسف وقالت؛لاخلاص اني مش حناقشك اكثر من هكي في الموضوع..ولاعاد بنقولك دير وماديرش ياهيثم..لاني مليت واني نكرر في نفس الدوة..
هيثم ماباش يزيد يناقشها خش فراشه وعطاها بالظهر وتغطا..
اسيمه قعمز ع السرير وقالت بحزن:واني اللي املت نفسي وقلت انك حتكون موجود في المسابقه متاع زياد غدوة..
هيثم بسخريه:ايوه..نسيب مسؤولياتي وشغلي واللي وراي مرة ع خاطر خرابيش جنان وريحان..وتوا زياد..
اني املت نفسي هلبه وتوقعت تكون واعيه اكثر اللي فيه زوجك توا لكن مع الأسف طلعت غالط هلبه..
اسيمه نزلوا دموعها وقالت وهي تبلع في ريقها:اسفه..سامحني..
ورقدت وعطاته بالظهر حتى هي وقعدت تبكي بكتمان..
اماهو اللي كان مضايق وتعبان ماصمدش هلبه قدام النوم فيسع خداه ورقد...
اما زياد..
اللي سمع كل شي...ابتسم بتهكم وقال بهمس:احسنله انه مايجيش..
ولف ومشي لداره....
••••••°°°°°°
وكان صباح اليوم التالي..
باهت بالنسبه لأسيمه وهيثم..
ولأول مرة يطلع هيثم من الحوش قبل ليصبح عليها ويشرب معاها القهوة ويفطر هو وياها..
هي كانت تحاول تبان عاديه قدام الكل بالذات زياد لأن هاليوم مهم جدا ليه..
وهو اللي كان عارف كل شي..كان حاس بيها ويدير في روحه عادي قدامها...
نسيبه؛تعالوا غادي الساعه 11...
اسيمه:ان شاء الله..ناخد لسارة والبنات اذن ونجوكم..
جي زياد لأمه باس ع راسها..
بعدين مشي طلع..
نسيبه:سلام..
اسيمه:سلام..
ومشت طلعت..
اسيمه تنهدت بعدين قالت لبناتها؛هي بروا البسوا..
ريحان وجنان:حااااضر...ومشوا يجروا لدارهم..
هي ابتسمت بحزن..بعدين مشت لدار النوم بتوتي روحها...
▪▪▪▪▪
◇طول الوقت..واني في الوزارة عقلي كان معاهم.
مع اسيمه..وزياد..مش عارف وقتها علاش خطرتلي قصة اخ رضوان بوكراع...حسيت نفسي للحظه اني بوه..وان زياد ولدي خوه...قلبي قبضني...وصدري ضاق هلبه لدرجة اني ماقدرتش نركز في عملي كويس...
▪▪▪▪▪▪
الساعه الثانية عشر بعد الظهر..
في احدي الفنادق اللي حجزت وزارة الثقافه صالتها لإقامة المسابقه..
كانت وكيلة الوزارة واقفه بش تكشف اللثام عن اللوحه اللي فازت في المسابقه..
طبعا المشتركين بعتوا رسومهم مصورة بدون تأثيرات لموقع الوزارة ولجنة التحكيم صوتت عليها ع الموقع..
وكانوا المشتركين المتأهلين عشرة اعلنوا عن اسمائهم بدون مايطلعوا لوحاتهم..
وتوا هي قدام العشرة لوحات المغطيه اللي حيكشوفوهم بعد الإعلان عن الفائز..
وكيلة الوزارة:اللوحه اللي فازت كانت بالنسبه لينا حني ولجنة التحكيم..غريبه وعميقه جدا وليها مغزى..ماقدرناش نحددوه..يعني المعنى منها مفتوح...كل حد يفهمها ع حسب مايحس..وهدا فن صعب جدا..مش اي يقدره..واني مذهوله اللي قدر طالب شهاده ثانويه يرتقي بفنه ويوصل لهالدرجه..
ابتسمت وقالت..مش حنشوقكم اكثر من هادي..
اللوحه الفائزة هي..ومشي ناحيتها..
وقفت قدامها..شدت الشرشاف المغطي بيها وقالت:مبارك فوز  صاحب لوحه....
"الرجل المغمور"
وكشفت اللوحه...
كلهم شبحولها بذهول...
اللوحه كلها كانت سودا تماما تتوسطها ملامح نص وجه مرسومه باللون الأبيض...عينه كانت مصكره..وفمه كان مفتوح وكأنه يتكلم..
اللي يشوف اللوحه يحس بشعور غريب جدا...يحس روحه وكان فوسط اللوحه...
وكلهم يبوا يعرفوا الراجل هدا من يكون..
ماعدا اسيمه ونسيبه وسارة..
التلاته كانوا عارفينه كويس...
اسيمه التفتت لزياد..لقاته يشبح للوحه ويتأمل فيها ماكأناش هو اللي راسمها..
فجأة..
بدوا الحضور يصفقوا...
وكيلة الوزارة:كلكم عشتوا نفس اللحظه اللي عشناها لما شفناها..اللوحة الرائعه هادي للطالب...
"زياد عبدالحكيم الكاتب...." تفضل يازياد تعالى..
مشي زياد بإتجاهها...لين وصل فيها ووقف جنبها..
جابولها الجائزة وهي بدورها سلمتهاله...
وهو خداها وسط التصفيق الحار من قبل الحضور...
سارة كانت تصفق بفرح..
لكن اسيمه ونسيبه كانوا يصفقوا وهما مازال مصدومات...
زياد كان يمرر في نظره ع الحاضرين وهو مبتسم...
بس فجأة...
بدت تتلاشى ابتسامته وتحل محلها ملامح الصدمه لما جو عيونه من بعيد ع بطل اللوحه متاعه..
كان واقف في اخر القاعه...
كان يشبحله بنظرة مايشوفش فيها زياد كويس بس مش عارف كيف حسها وقتها...وكانت صعبه جدا عليه..
اما بطل الصورة مجرد ماشبحله ولده..
وخر خطوه...ولف ومشي....
▪▪▪▪▪
◇ااااه...اسف..ماعندي شي نقوله ونعبر بيه...اللي حسيته وقتها اكبر من انه ينقال بكلام...اااه...كل اللي نقدر نقوله ان شعوري يومها لعند هاللحظه مازلت قاعد نحس بيه وين نشوف ولدي زياد..شعور مؤلم جدا...
    يتبع••°°