لمن إتلفت وراي لقيتا هنادي طوالي لويت ليها خشمي ، قالت لي إزيك يا سكره و جات باستني و سلمت على وليد ، قالت ليهو ممكن اقعد معاكم؟
هز ليها راسو بس ، قعدت و قالت ليهو وليد ما ملاحظ اننا بقينا نتصرف زي الأطفال! يعني مره انا ازعل منك و مره انت تزعل مني و نلف و ندور في نفس الموضوع! حنستمر كدا لمتين!؟
قال ليها السؤال دا اسأليهو لنفسك ما لي أنا ، واضح انك ما ملاحظه انو زعلك كتر في الفتره الأخيره دي ....عارفه ليه بقيتي بتزعلي على أتفهه الحاجات؟
لأنك عارفه اني حـ أجي أراضيك ، لأنك متيقنه انو زعلك ما بهون علي و ما بقدر استحمل فكرة إنو في خلاف بيناتنا ، عارفاني ما بطيق الخصام و ما بحب نكون متزاعلين من بعض عشان كدا كنت بقول ليك خلينا نستعجل و نعمل العرس دا بأقصى سرعه و نحل مشاكلنا في بيتنا لأنو الوضع دا ما عاجبني .....
قالت ليهو لو ختيت نفسك مكاني كنت حتزعل و تعمل نفس العملتو ، متذكر لمن زميلي في الشغل وصلني البيت و لمن كلمتك عملت شنو؟ زعلت مني و قفلت تلفونك بس انا ما عاتبتك ولا لمتك بالعكس إنبسطت ، غيرتك علي بتفرحني و عمري ما حسيت انك بتشك فيني ، هسي مفروض إنت تتفهمني ما تلومني و تزعل مني لأني غرت عليك ، ايوه هي شافعه بس دا ما بمحي حقيقة انها مرتك ، الكلمه دي بتضايقني شديد و بتخنقني......
في سري قلت الغبيانه دي قايلاني ما فاهمه كلامها عشان كدا ماخده راحتها و بتتكلم قدامي ؟!!، غيتو انا سعيت بغنم كتار و اتعاملت معاهم لكن النصيحه غنمايه زي دي نهاي ما لاقتني😑
وليد قال ليها انا تعبت بالجد يا هنادي! كل مره نفس المشكله و نفس الكلام بس من دون فايده! متأكد حترجعي تاني و تزعلي من نفس الموضوع!
قالت ليهو زعلي الأخير دا ما كان بسبب زواجك كان بسبب انك صدقت الشافعه دي لمن قالت انو أنا و أمك ضربناها! معقوله يا وليد انا أمد يدي على شافعه؟
قلت ليها ايي مديتيها ، قالت لي يا عمري ليش الكذب؟ عيب الكلام دا منك ، رجعت عاينت لـ وليد و قالت ليهو بالجد يا وليد انا ما رفعت يدي عليها! .....لمن وليد عاين لي قلت ليها إنتِ بس ما متذكره لكن ما مشكله انا ذاتي ما زعلانه منك 😅
وليد قال ليها حصل خير يا هنادي ، قالت ليهو صافيه؟ قال ليها صافيه؟
قلت ليهم قصدكم صافيه بت بخيته؟
الإتنين قعدوا يضحكوا لكن ضحكة هنادي كانت بشماته كدا لمن غاطتني ....هم بقوا يتكلموا مع بعض عادي و انا بشيل بقه من الشاي و بقعد أعاين ليهم بغيظ ، قلت لـ هنادي يا هنايه اسكيرتيك دا مشروط ، قالت لي ما مشروط أصلو كدا و دي اسمها خطوه ، قلت ليها لكن كراعك كلها برا ، ما ردت علي إتلفتت على وليد و واصلت ونستها معاهو ، بعد ما خلصوا قال ليها لو السواق ما معاك خليني أوصلك ، قالت ليهو ايوه ما معاي وصلني و مشى ، من هم وقفوا كدا أنا جريييت لـ عربية وليد ، حاولت افتح الباب القدام بس ما إنفتح لي ، بقيت اجر فيهو و اصارعو لحد ما وليد جا و فتحو لي قال لي اصبري مستعجله كدا مالك؟
قبل ما أركب هنادي مسكت الباب و قالت لي ممكن تقعدي ورا يا حلوه ، قلت ليها لاااا انا بدور اركب قدام ، دا مكاني ، هي طوالي عاينت لـ وليد عشان يقول حاجه ، ابتسم و قال لي اسمعي الكلام ، قلت ليهو أبيت و ربعت ليهم يديني ، عاين لـ هنادي و عمل ليها حركه بمعنى خليها و أركبي ورا ، طبعاً زعلت زعله و وشها بقى أحمر ، ركبت ورا و قفلت الباب بقوه ، وليد ركب و دور العربيه بس طول الطريق كان بعاين ليها بالمرآيه ، عاينت وراي و قلت ليها زعلتي؟
قالت لي أزعل من شنو!؟
وليد ضيق لي عيونو و قال لي بصوت خافض إنتِ خليك ساكته ، قلت ليهو ابييييت ، المهم مشينا وصلنا بيتهم ، نزلت من دون ما تقول حاجه ، وليد طوالي نزل و بقى يتكلم معاها ، البت بكت عديل و هو شغال يحنسها ، خلاص لمن اتكلموا مع بعض و راضاها و جا ركب انا بقيت أضحك بصوت عالي و انا بعاين لـ هنادي ، لمن هي سمعتني و إتلفتت ، طلعت راسي بالشباك و قلت ليها لمن تمشي اسكيرتيك ببقى أقصر و الشرطه الفيهو بتتشعلق فوق ، خلي أمك تخيطو ليك و تااااااني فكيت الضحكه ، صرة لي وشها و عاينت لـ وليد مساااافه و زعلت تاني و مشت دخلت بيتهم ، وليد قال لي عيب العملتيهو دا مالك معاها ياخ! ؟
قلت ليهو البنيه ديا غياظه و مايعه ما ريدتها نهاي ، قال لي هسي هنادي دي عيبها شنو؟
قلت ليهو كلها عيوب ، كريهه و حيـ.....قاطعني و قال لي بحده : دهبايه!
لويت خشمي و سكته ، قال لي بالمناسبه انا فهمت انك كذبتي علي لمن قلتي لي انو أمو و هنادي ضربوك! ما قادر استوعب انو الحصل داك كلو كان تمثيليه منك! ما قادر استوعب انو شافعه و بالعمر دا تعمل دا كلو عشان تخليني اشاكل أمي و البت الحتكون مرتي!؟ بالجد انا مصدوم فيك!
قلت ليهو هيي ما تصدق كلام البنيه المايعه ديا ، آني ما كضبت عليك و......تاني قاطعني و قال لي بهرشه قفلي ياخ! ! ما عايز اسمع منك أي كذبه تانيه! انا مصدوم فيك والله! معقوله الشافعه دي تطلع إنسانه كذابه و بتاعة حركات! معقوله كلامك و تصرفاتك و ملامحك الطفوليه دي كلها تطلع كذب! معقوله كلها تطلع قناع؟
قلت ليهو منووو دي؟ انا كضابه؟ برررري بري ما حصل كضبت ، آني......قال لي بزهج لا أمي لا هنادي ماف وحده فيهم مدت يدها عليك ، قلت ليهو وحاة اسم الله أمك لبعتني و......قال لي بنهره أسكتي ياخ! بلعت لساني و سكته و بقيت أعاين بالشباك للناس و الأماكن ....
لمن وصلنا البيت أول ما دخلنا جانا صوت أمو العامل زي الرعده دا ، في سري قلت أعوذ بالله من دا صوت ، وليد دخل بإستعجال و انا وراهو ، لمن وصلناها لقينا معاها علا و لين و مره كدا ما بعرفها بحاولوا يهدوا فيها ، كانت بتقول ليهم No No ما قادره أصدق ، يعرس يعرس فيني انا؟
وليد قال ليهم خير يا جماعه في شنو؟
أمو جات عليهو و هي بتبكي ، مسكتو من يدو و قالت ليهو اتخيل يا وليد أبوك طلع معرس فيني و كان بكذب علينا لمن قال انو برا السودان في حين انو كان موجود هنا في السودان و تحديداً في كافوري مع مرتو و أولادو ، وليد عاين ليها بإستغراب و قال ليها شنو؟ أبوي معرس! من وين جبتي الكلام دا؟
قالت ليهو دي الحقيقه و أساساً كنت شاكه فيهو ، كلمت صحباتي بقوا يفتشوا وراهو ، و وين ما يلقوهو بتصلوا علي و بكلموني ، بس كيييف كيف ما قدرت اكتشف انو عرس فيني من زمان! ناقصني شنو انا عشان يمشي يجيب مره فوقي؟ انا مستحيل ارضى بالحاجه دي ، ما حـ أسكت ليهو والله ما حـ اسكت ليهو و حـ أوريهو منو هي ناديه
المهم جاطت قدرتها و وليد قدر ما حاول يهديها ما قدر ، قال لي إنتِ أمشي فوق ، مشيت و انا مبسوطه شديد و بحاكي فيها و بقول في سري تستاهل عشان تشوف الضره دي حاره كيف ، كانت عايزا وليد يعرس هنادي فوقي و في الآخر طلع راجلها معرس فيها ، ئهههههئيييي عجبني ليها والله ، دخلت غرفتي و طوالي نمت ، المهم بعد يومين وليد قال لي قبيل حبوبه اتصلت و سألت عنك ، قلت ليهو تلفوني ما فيهو رصيد اضرب ليها إنت ، قال لي تمام ، ضرب ليها و خلاني اتكلم معاها ، عاد ما خليت ليها شمار ما قلتو ليها ، قالت لي ناديه دي لو كانت هديه و رضيه و مهتمه بـ ولدي ما كان عرس فيها ، الوحده لو بتريح راجلها و بتهتم بأكلو و شرابو و بتسألو عن أحوالو و بتقيف معاهو و بتشيلو في راسها مستحيل يفكر يعرس فيها........
المهم كلام حبوبه دا بقى يذن لي في راسي ، بعد ما رجعت التلفون لـ وليد قلت ليهو إنت أكلت؟ قال لي لا لسه لأني جيت قبل شويه ، طوالي جريييت و جبت ليهو الأكل و بعد ما خلص عملت ليهو ليهو عصير و بعد ما شربو جبت ليهو شاي ، قال لي إنتِ الليله حاسه بشنو؟ قلت ليهو قبيل كنت حاسه بـ صداع بس هسي خلاني ، ضحك شديد و قال لي والله إنتِ! قلت ليهو مالي؟ هسي آني قلت شنو غلط؟ قال لي لا لا ما قلتي شي غلط ، قلت ليهو سمح بتضحك مالك؟ قال لي ساي بس ، سكت مسافه و سرح بعيد ، قلت ليهو بتفكر في أبوك مش؟ عاين لي و سكت ، قلت ليهو غيتو آني ما شايفاهو غلط خلي اليعرس ساي ، الراجل محل ما يلقى راحتو بمشي و المره الما بتهتم براجلها و بتقيف معاهو بمشي و بعرس فيها عاين لي بضيق و قال لي إنتِ بتجيبي الكلام دا من وين؟
قلت ليهو ما عارف؟ من لسااااانييي هسي إنت مش بتتكلم بلسانك؟
ما رد علي ، طلع طوالي ....
طبعاً وليد دايماً بستغرب فيني لمن اقول كلام أكبر مني ، هو دايماً بشوفني طفله فـ بالتالي بتوقع انو كلامي يكون زي الأطفال ، يمكن حجمي القليل هو المخليهم يفتكروا إني صغيره حتى انا بسببهم بقيت أصدق إني صغيره 😂 البشوفني بقول عمري 11 ، 12 كدا بسبب حجمي و في الحقيقه انا عارفه نفسي ما طفله و أصلاً عندنا البنات القدري بكونوا معرسات و بـ شفعهم فما كنت فاهمه وليد ليه بقول علي شافعه بس بيني و بينكم كلمة يا شافعه دي بتعجبني لأنو وليد بسبب انو شايفني شافعه بهتم بي شديد و ما برضى يزعلني عشان كدا اتمنيت انو اكون أصغر من كدا أو اثبت على حالتي دي و ما أكبر عشان اهتمام وليد بي ما يقل
