ماما إنتِ لسه بتفكري و ما ناويه تشيلي الفكره دي من بالك؟
= افهم من كلامك دا انك عايزاني اتقبل المتخلفه الأميه دي هي و الكائن الحـ تجيبو لينا دا!!؟
_ ماما كلنا ما بنطيقها و انا لو علي تمشي من بيتنا اليوم قبل بكرا بس البتفكري تعمليهو دا حاجه خطيره و صدقيني وليد اذا عرف حـ يضبحنا التلاته
= بسبب وليد دا أنا لحد اللحظه متردده و ما عملت حاجه ، بس دا ما معناهو اني حـ اسكت و انتظرها لحدي ما تولدو لينا نحنا هي ما طايقنها و ما قادرين نتحملها كمان مفروض نتحمل الشي الحـ تولدو؟!!
_ ما عارفه نعمل شنو بس فكرة انك تخليها تعمل عملية إجهاض أو تشربيها حاجه تجهض ليها ما في صالحنا لأنو لو حصلت ليها حاجه نحنا حنروح فيها خاصة و إنها في العمر دا
=…………كويس انو هي ما عارفه نفسها حامل و وليد كمان ما حـ يعرف بس أنا الزاعجبني و المحيرني كيف هو نفسو سمحت ليهو يقرب من البت القذره دي و الما بتشبهنا دي! هسي عليك الله البت الأميه دي فيها حاجه بتغري ليها راجل و تخليهو يقرب منها ؟
= معليش يا ماما اصلاً الرجال ذوقهم بيئه كدا زي البغل المعرساهو ، لمن جا يخوني مشى خاني مع عاهره على الأقل كان يخوني مع وحده من مستواي تقدر تنافسني و اقارن نفسي بيها و ما واحده ارخص من ملابس القوقو!
_ هو الخسران ما إنتِ ، بكرا بطلقك منو و بعرس ليك أحسن واحد ، يقيمك و يختك في راسو
= اوكي هسي خلينا ننزل تحت لأنو وليد حـ يصل بعد شويه
_ أوكي
=اممممم ماما
_ ايوه
= هسي يمكن الطفل الهي حامل بيهو دا ما من وليد
_ اسكتي ياخ دي الخدم ذاتهم ما حـ يفكروا يقربوا منها ماف غير أخوك الغبي البقرب منها
= ممكن بدل ما نجهض الطفل نلصق فيها تهمه و نوهم وليد انو هي حامل من واحد تاني ، ساعتها وليد حـ يكرهها و يرجعها لـ أهلها لأنو ماف راجل بقبل الحاجه دي
= مفتكره انو فكره زي دي ما خطرت على بالي!؟ وليد أكيد حـ يسأل دا حصل كيف و متين و مع منو ، نحنا ممكن نجيب واحد من الخدم و نتفق معاهو و نوهم وليد انو هي من لمن جات البيت دا كذا مره شفناها مع الخادم الفلاني لكن ما حـ نستفيد شي لأنو وليد حتى لو اقتنع انو هي حامل من شخص تاني حـ يتحمل مسؤوليتها هي و طفلها، ايوه حـ يتضايق و يغضب و يتزهج لكن ولدي و بعرفو ضميرو ما حـ يسمح ليهو يأذي زول و لو عرف انها حامل بغض النظر عن هي حامل من منو حـ يتحمل مسؤولية الطفل فـ الأفضل ما نجيب ليهو سيرة الموضوع دا ، المهم نضفتوا القرويه ديك؟
_ علا معاها بتكون نضفتها
______________________
بعد رحلة استمرت أسبوع رجعنا الخرطوم ، كان معاي أيمن فقلت ليهو بما انو ناس بيتكم مشوا مناسبه ارح معاي البيت و فعلاً مشى معاي ، لمن وصلنا خت يدو على كتفي و قال لي خليك هادي و ما تديها أهميه و ما تضايق نفسك بسبب البت دي ...
كيف ما اتضايق و أنا كل يوم بكتشف فيها حاجه اسوأ من القبليها؟
مشكلتي اني غبي و هي عارفه كدا عشان كدا خدعتني بكلمتين تلاته كدا و تنزل دمعه دمعتين بس أنا المره دي ما حـ أديها وش ، كفايه جداً العملتو! !
بالجد البت دي محيراني و ما قادر افهم تركيبة مخها! بتغلط نفس الغلط مية مره و أي حاجه بحذرها منها بتمشي تعملها!! مشكلتها لسه مصره تعمل مشاكل و تخليني اتناقش مع أمي! ....ما ناسي لمن اتصلت علي و قالت انها جعانه و انو المطبخين مقفولات و أمي طلعن عشان توصل لي فكرة انو أمي حارماها من الأكل! بس لمن اتصلت على أمي قالت انها في البيت و عشان ما احسسها بحاجه قلت ليها مشتاق ليك و عايز اتكلم معاك مكالمة فيديو ، قالت لي جداً و فعلاً اتكلمت معاها و اتأكدت انها في البيت ، سألتها عن دهبايه و بطريقه غير مباشره سألتها اذا أكلت ولا لا ، قالت لي حالياً بتاكل في غرفتها ، لمن حست علي قالت لي في شنو؟ قلت ليها ماف شي ، بعد ما قفلت منها لقيتها مرسله لي صورة دهبايه و هي بتاكل قالت لي دا طبعاً اذا إنت ما مصدقني ، قايلنا حـ نجوع طفله؟!! انت ما ولدي وليد لأنو وليد عمري ما شك في أمو ، زعلت مني شديد بسبب الموضوع دا يومين و انا بحاول أراضيها حتى رضت و بقت تتكلم معاي عادي ، أما دهبايه نفسي قفلت منها عشان كدا ما رديت على اتصالاتها ما كنت قادر اسمع صوت المنافقه دي و أخليها تستغباني تاني!
يوم اتصلت على أمي و اثناء ما انا بتكلم معاها قالت لي عايزا اقول ليك حاجه ، قلت ليها قولي! قالت لي خلاص بعد ترجع ، قلت ليها لا قولي في شنو؟
بعد مسافه قالت لي بقيت كل مره لمن أطلع من البيت و أجي راجعه بلقى ولد أو اتنين جنب بيتنا ما عارفاهم عايزين شنو ما أنا بس حتى علا و لين شافوهم كذا مره ، يوم مشيت عليهم و قلت ليهم عايزين شنو ، لمن قالوا لي إنتِ ساكنه في البيت دا الصراحه خفت و قلت ليهم لا بس قلت انكم رايحين و حبيت اساعدكم ، واحد منها قال لي دا بيت ناس دهبايه! صراحه اتفاجأت لمن قال اسمها ، المشكله انو واضح عليهم انهم أولاد مدينه و لو ما كدا كنت افتكرت إنو هم أهلها و لا كدا! كذبت و قلت ليهم لا ما دا بيتهم ، قالوا لي لكن حسب الوصف هي ساكنه هنا ، قلت ليهو إنت الوصف ليك منو؟ ما ردوا علي طوالي مشوا و من اليوم داك ما شفتهم تاني! اتحيرت شديد و قلت كدي اسأل البت احتمال ديل اهلها و هي كانت متواصله معاهم بتلفونها ، مشيت و سألته......هنا أمي سكتت و واضح انها انتهبت على نفسها يعني زي الما كان عايزا تجيب لي السيره دي و تتكلم عن الحصل ، قلت ليها واصلي لمن سألتيها قالت شنو؟
قالت لي أنسى هسي إنت كيف و جاي متين ، قلت ليها أمي!! دهبايه قالت ليك شنو لمن سألتيها؟
اتنهدت و قالت لي عارف أسلوبها و لسانها الطويل قالت لي ما عندك شغله بي ، عشان كدا يا وليد بقول ليك البت دي ما شبهنا ، الكلام البتقولو لينا في غيابك لو سمعتو دقيقه وحده ما بتخليها معانا لكن إنت ما بتسمع من زول و البت دي انا دا طرفي منها عارفني ما بحب زول يعلي صوتو علي و يتكلم معاي بطريقه ما كويسه و البت دي اتجرأت و عملتها ، زي ما قلت ليك دا طرفي منها بعد دا إنت اتصرف معاها و لو عايز سكنها في بيت تاني لأنو انا و أخواتك تعبنا من حراق الروح و لئامة البت دي و و و .....
جداً يعني بعد كلام أمي دا عنها وصلت حد الضيق لأني بقيت عارفها كويس و ما بقدر اقول انو دهبايه ما بتكذب و ما بتتلائم مع زول ، يعني لو الكلام دا انقال لي عنها قبل شهر كدا ما كنت صدقت أو كنت حـ اقول لأمي اكيد ما قاصده و دي شافعه و و و بس هسي بعد ما إكتشفت انها مستعده تمثل و تكذب عشان تعمل مشاكل بقيت ما بستبعد أي شي و متوقع منها أي شي ، بعد قفلت من أمي اتصلت عليها و كنت حـ اطق من الإنزعاج ، تلفونها كان خاشي بس ما ردت علي ، حاولت مره و اتنين بس من دون فايده ، خليتها و اتصلت اليوم البعديهو برضو ما ردت في الآخر رسلت لي رساله محتواها: " وليييد ما تزعجني ياخ " قريت الرساله و رجعت اتصلت عليها بس ما ردت ، رسلت ليها رساله محتواها ردي على التلفون دا " قرتها و تاني لا رسلت لا ردت على مكالماتي ، ما فهمت هي عملت كدا ليه أو فهمها شنو!! و الغريبه لمن سألت أمي قالت لي انها ماسكه التلفون 24 ساعه و ما معروف بتتكلم مع منو أمي بالحرف قالت لي انا تاني ما بدخل في حاجه بتخص البت دي خليها ان شاء الله تتكلم معاهم ميه ما عندها بيها شغله إنت بعدين لمن تجي شوف شغل معاها و لو عاجبك البتعملو خليها على راحتها لكن انا ما بقدر اتحمل قلة أدبها دي عشان كدا لو عايزها سكنها في بيت تاني لأنو إنت مستحيل تطلقها فلمن تشوف ليها بيت تاني كدا شبه حليت مشكلتنا لأنك عارف انو صعب علينا نتقبلها و مع ذلك نحنا متحملنها عشانك "
