ما كنتِ شايفه إهتمامو بيك ولا ما كنتِ فاهمه تلميحاتو ولا ما كنتِ عارفاهو بحبك ؟
في اللحظه دي أنا و وليد في نفس اللحظه عيونا وقعت في بعض ...
مها لسه كانت بتجوط فيني و أنا بس عيوني على وليد العاين لي مره وحده بس بعدها لف وشو مني ،، وجدان إتدخلت و بقت تحاول تهدي مها في الآخر ساقتها و طلعتها برا المستشفى ، وقفت مسافه بعدها مسحت دموعي و مشيت على وليد ،، قلت ليهو جيب رفيف خليني أشيلها شويه ،، قال لي لا خليها نازل بيها تحت ، هم نزلوا و أنا قعدت براي ببكي ساي ،، بعد مسافه مها و وجدان جوا راجعين ، نظراتها لي براها خلت قلبي يوجعني ، قعدت معاهم ساعه كدا بعدها وليد جا و قال لي نمشي بعد دا ، قال ليهم لو احتجتوا حاجه إتصلوا علي ، المهم مشيت معاهو البيت ، طول الطريق كان ساكت ساي و انا بس بعاين ليهو و ما عارفه اقول شنو ، عايزاهو بس يفتح معاي الموضوع و أشرح ليهو ، لمن وصلنا البيت شال مني رفيف و مشى رقدها فوق ، لمن جا طالع من الغرفه وقفت ليهو جنب الباب ، من دون ما يعاين لي زحاني عن طريقو و مشى ، بعد مسافه لمن مشيت غرفتو ما لقيتو ، اتصلت عليهو بس ما رد علي ، بقيت منتظراه لحدي الساعه 12 حتى جا داخل ، مشيت ليهو في غرفتو و قلت ليهو مشيت وين إنت و ليه ما بترد علي؟ قال لي ببرود طلعت ،، زعلت شديد من برودو دا ، يعني يزعل مني بسبب كلام قالتو مها! هو لو بالجد زعلان للدرجه دي و الموضوع ماكل معاهو جنبه ليه ما سألني عن حاجه! لأنو عارف انو مها قالت انو طارق بحبني بس ما قالت إني بحبو و دا الما خلاهو يلومني بس خلاهو يزعل مني ، خليت ليهو الغرفه و مشيت رقدت جنب رفيف و أنا عايزا أطرشق من الزعل ،، بقيت اتقلب في السرير و النوم طار من عيوني ، متأكده لو وليد كان مكاني ما حيخليني أنوم و انا زعلانه منو ، متأكده كان حـ يجي يراضيني فـ مفروض انا كمان اتنازل و أمشي اشرح ليهو و افهمو احسن ما كل واحد يزعل من التاني من دون ما يوضح ليهو ، شلت رجليني و مشيت ليهو في غرفتو ، لقيتو صاحي و ماسك تلفونو ، عاين لي و رجع عاين لتلفونو تاني! مشيت قعدت جنبو و من دون ما أتردد بوستو على خدو و ختيت راسي على كتفو و قلت ليهو اقسم بالله انا ما عندي حاجه لطارق ، صح كنت ساكنه معاهو بس تعاملي معاهو كان في حدود و عمري ما فكرت فيهو......رفعت راسي و عاينت ليهو لقيتو لسه مركز مع تلفونو و ما شغال بي ،، قلت ليهو وليييد انا بتكلم معاك! ......لمن ما رد علي زعلت شديد و وقفت على حيلي و كنت حـ أمشي بس هو جراني من يدو و قعدني جنبو ، خت تلفونو على جنب و قال لي لكن طارق بحبك و انا الحاجه دي مضايقاني شديد لأنو ما بحب زول يشاركني في حاجه بتخصني ، قلت ليهو هو البحبني ما أنا فـ ليه تزعل مني أنا! 🥺 قال لي طبيعي يحبك ما إنتِ كنتِ قدامو 4 سنوات! عشان كدا زي ما انا متضايق منو و ما طايق اسمع اسمو متضايقك منك برضو ،، قلت ليهو طيب آسفه و حقك علي ،، باسني على جبيني و قال لي رغم إنو الموضوع مضايقني شديد بس ما بقدر ازعل منك فتره أطول ، قلت ليهو قول لي كنت وين؟ قال لي في المستشفى ، قلت ليهو بخلعه شنو؟ حاصل معاك حاجه يعني ، انت كـ......قاطعني و قال لي روقي شويه ، أنا كويس ، قلت ليهو طيب مشيت المستشفى ليه؟ قال لي مشيت أشوف الحاصل شنو مع طارق و أخواتو و اشوف اذا ناقصهم حاجه ، هم ما عندهم ام ، أب أو أهل؟ لأنو لمن مشيت ليهم للمره التانيه ما لقيت زول غير صحبتك ديك و أخت طارق و وحده منهم مشت ، قلت ليهو المشت دي وجدان صحبتي و صحبتهم هم ذاتهم ،، أبو طارق و أمو متوفين من زمان ، عندهم عم و عمه بس كل واحد مشغول مع نفسو و أسرتو و عمتهم قبل سنه سنتين كدا سافرت برا السودان مع راجلها و استقرت هناك ،، سكت ساي و بقى يفكر ، تاني بوستو على خدو و قلت ليهو يا حليلك حنين شديد ، والله ما كنت متوقعه إنك تمشي ليهم في المستشفى و تطمن عليهم ، قال لي قايله قلبي دا حجر!؟
ما رديت لمن لقيتو بعاين لي جوه عيوني ، إتوترت و جسمي كلو بقى بارد و قلبي اشتغل دق دق ، قرب علي أكتر و قال لي ما جاوبتي ، مفتكره انو قلبي حجر!؟
قلت ليهو و أنا بتمتم ، ر ر رفيـ ف بتكون صحت و قمت على حيلي بحركه سريعه بس هو مسكني من يدي ، قلت ليهو وليد رفيف بتكون صحت و يمكن تقع من السرير و ....باسني و ما خلاني أكمل كلامي ،، المهم حدث ما حدث.......
بعد اسبوع كدا أبو وليد جانا في البيت طبعاً لمن استغربت. ، كنت ياداب جات راجعه من المستشفى مع وليد بس هو وصلني البيت و رجع شغلو ،، المهم سلم علي ببشاشه كدا و بقى يعاين لي بحيره لأنو ما مصدق إنو انا نفسها الشافعه المشاغبه ديك 😂 فضلتو لـ جوه و ضيفتو ، قال لي والله ما سمعت برجعتك دي إلا قبل أسبوعين و للأسف كنت برا السودان ، قلت ليهو ولا يهمك ،، عاين لـ رفيف و قال لي دي بت وليد؟
قلت ليهو أيوه ، ضماها عليهو و قال لي سبحان الله بتشبهو شديد ،، المهم قعد اتونس معاي ولامني شديد على العملتو زمان و و و ، غيتو ابو وليد دا راجل كويس و محترم شديد و بالجد أم وليد ما تستاهل راجل زي دا ، بعد مسافه قال لي انا حـ أمشي بعد دا ، قلت ليهو عليك الله اقعد وليد ذاتو حـ يجي بعد شويه ،، كان مُصر يمشي بس أنا كنت مُصره أكتر منو ،، خليت رفيف معاهو و مشيت المطبخ و اتصلت على وليد و كلمتو إنو أبوهو معانا من قبيل و طلبت منو يجي بعد دا قبل ما أبوهو يمشي ، قال لي ما راجع هسي مشغول ، طبعاً عارفاهو كذاب و في شوية حساسيه بينو و بين أبوهو لأنو عرس في أمهم و بالدس كمان ، قلت ليهو لو ما جيت يا وليد تاني خالص ما حـ أتكلم معاك و قفلت الخط في وشو و بديت اطبخ ،، بعد صلاة المغرب وليد جا داخل ،، سلم على أبوهو و قعد و هو بعاين لي كأنو بقول لي كدا مرتاحه؟!
أبوهو كان عكسو تماماً بدا يسألو عن شغلو و احوالو و الحاصل عليهو و و و ...حسيت وليد دا لمن خجل من بشاشة أبوهو و سؤالو عن احوالو رغم إنو وليد ما أظن قاعد يتصل على أبوهو ، المهم مشيت جهزت الأكل و قعدنا أكلنا كلنا و طبعاً ابو وليد مبسوط شديد بـ رفيف و هي عاد فصاحه زي الفصاحه ،، لمن قام ماشي أداها قروش و قال ليها المره الجايه بجيب ليك معاي حلويات ، قالت ليهو: "تما جبتا ما تجي " ضحكتنا ضحك ،، المهم بعد ما مشى قلت ليهو شفت أبوك راجل طيب و كويس كيف و انت ساي مقاطعو؟
قال لي انا ما مقاطعو و بيناتنا تلفونات حتى لو كانت شحيحه ، قلت ليهو ليه؟ عشان عرس في أمك؟ دي حاجه بترجع ليهو يا وليد! هو ما لقى الراحه مع أمك فـ مشى عرس غيرها! وريني بس الغلط في دا شنو! وليد ما تزعل مني لكن كلنا عارفين أمك و طبعها ،، اتنهد و قال لي طيب خلينا نقفل السيره دي! قلت ليها طيب أوعدني إنك ترجع تتعامل مع أبوك زي الأول ، قال لي تمام ، قلت ليهو ما تمشيني! قال لي ما بمشيك والله ،، قلت ليهو بالمناسبه ما وريتك أمبارح أمي إتصلت علي و اتكلمت معاها هي و أخواتي و حبوبه ،، ما قادره أوصف ليك كمية السعاده الحسيت بيها! مع إني قلت ما حـ افقدهم بس ما عارفه حسيتهم اتغيروا أو يمكن كسروا قوانين أبوي و اتكلموا معاي ،، قال لي شوفي ماف ماف أهل بكرهوا أولادهم قد تكون طريقة التعامل مختلفه على حسب البيئه البتربى فيها الشخص بس بأكد ليك ماف كراهيه جوه قلب أي أم أو أب تجاه أولادهم ، قلت ليهو أمي ممكن لكن أبوي لا دا مستعد يكتلنا عديل من دون ما يتردد ،، قال لي لو حصلت و كتل وحده منكم حـ يندم طول عمرو و عذاب الضمير ما حـ يخليهو ،، أبوك متمسك و متعصب شديد بـ مفاهيم كلها غلط ،، قلت ليهو المحيرني كيف أبوي خلاهم يتكلموا معاي و ما شال منهم التلفون! لأني لمن كنت بتكلم مع أمي سمعت صوتو و كان قريب منهم و ما حسيت في أي خوف أو توتر في أصوات أمي و أخواتي و هم بتكلموا معاي! قال لي يمكن ربنا هداهو! ....قلت ليهو منو أبوي ئهه! !
المهم بعد يومين من الكلام دا لمن طلعت من الإمتحان لمحت وجدان واقفه مع كم نفر كدا من الدفعه و كانوا بتكلموا عن الإمتحان و بتأكدوا من إجاباتهم ، وجدان لمن شافتني طوالي إتحركت من جنبهم ، أصلاً ليها حكاية اسبوع كدا بقت ما بتتكلم معاي و اول ما تطلع من القاعه بتمشي المستشفى طوالي لطارق من دون ما تكلمني و لمن أتصل عليها ما بترد ، قلت حركات زي دي ما بتنفع معاي بطبعي ما بحب اقطع علاقتي بالناس مالم اعرف السبب ، مشيت عليها و ناديتها بس ما ردت علي ،، استعجلت و وقفت قدامها و قلت ليها ممكن تفهميني الحاصل شنو؟ مالك يا بت الناس عملت ليك شنو أنا لمن اتغيرتي علي؟!سكتت ما ردت و كانت حتمشي ، مسكتها من يدها و قلت ليها لو شفتي مني حاجه زعلتي ما تحاربيني ، تعالي شاكليني ، لوميني و لو بريحك أضربيني بس ما تقاطعيني من دون ما تفهميني حاجه .....كانت ساكته ساي بس لمن ضغطت عليها و أصريت إنها تقول لي مالها ، إنفجرت فيني و قالت لي طارق بحبك ،، بحبك و ما شايف وحده غيرك و لحد اللحظه دي بسأل عنك ،، بقيت أعاين ليها بإستغراب! ! قلت ليها برضو ما فهمت مقاطعاني ليه؟؟
قالت لي لو كنتِ بتفهمي كنتِ فهمتي من زمان ،، كلكم اغبياء و ما عندكم أمخاخ حتى طارق ،، قالت كلامها دا بضيق شديد و انا لسه بعاين ليها بنفس نظرة الإستغراب دي لحدي ما فجأه كدا بقيت بضحك و بقول ليها ااااياداب فهمت يا عاشقه يا ولهانه! معقوله انتِ بتحبي طارق و أنا ما عارفه!؟ يا بت يا هبله طارق دا أنا بعتبرو زي أخوي و بحترمو شديد لأنو وقف معاي وقفه جد ،، قلت ليها تعالي مسكتها من يدها و مشينا قعدنا في البينشات و بقيت اتكلم معاها و افهمها انو طارق في الآخر مصيرو يشيلني من بالو لأني ما شايفه زول غير وليد و مبسوطه شديد معاهو و لو اضطريت حـ اتكلم مع طارق في الموضوع دا ،، المهم بعد ما خلصنا كلامنا قالت لي اليوم حـ يخرجوا طارق من المستشفى ،، المهم مشينا ليهم في المستشفى و من هناك مشينا معاهم البيت و طارق دا نهاي ما أديتو وش و تعاملي معاهو كان رسمي شديد حتى رفيف ما خليتها معاهو فتره طويله ،، طبعاً عمهم و عمتهم جوا لمن سمعوا إنو عمل حادث ، عمتهم شاماني شمعه اصلاً هي من زمان قبل ما تسافر ما بتطيقني عشان طارق جابني و قعدني في بيتو قالت ليهو دا غريبه ما تقعدها في بيتك و و و للسبب دا زعلت من طارق فتره ،، المهم قعدنا معاهم مسافه و طلعنا مشينا ،، لمن وليد جا من شغلو قعدت أحكي ليهو تفاصيل اليوم و إنو في الآخر وجدان طلعت بتحب طارق ، قال لي أخيراً لقينا وحده تلهيهو عنك ،، ضحكت و قلت ليهو يا حلااااة غيرتك ،، المهم في فترة الإمتحانات دي وليد مسك رفيف و شغل البيت كلو لحد ما خلصت من إمتحانات السمستر التاني ، كنت من يوم للتاني بمشي أشوف طارق مره مع رفيف و مره مع وليد و كنت قاصده انو وليد يمشي معاي أكتر من مره عشان طارق يفهم انو وليد لي و أنا لـ وليد و فوقها عندنا بت ، يوم لمن مشينا ليهم مها جرتني على جنب و قالت لي جايه تزيدي وجع أخوي و تغيظيهو بـ راجلك دا صح؟
قلت ليها لا ، جايه أفهم طارق إنو نحنا ما بننفع مع بعض و أنا بعتبرو زي أخوي و افضالو علي لحدي ما أموت ما بنساها ليهو لا إنتِ لا هو ، إنتوا الإتنين ما قصرتوا معاي أنا و بتي و يمكن أبسط حاجه ممكن أقدمها لطارق إني أخلصو من الحب المسموم دا لأنو يا مها انا معرسه و عندي بتي يعني اخلي أسرتي الصغيره دي عشان طارق بحبني! ماف حب بجي بالغصب انا بقدر اقدم ليهو أي حاجه إلا إني أحبو بس في غيري بتقدر تقدم ليهو الحب دا ، فكيت يدي منها و قلت ليها ما عارفه اذا لاحظتي للحاجه دي ولا لا بس وجدان بتحب طارق و دا الخلاها تكون 24 ساعه معاهو في المستشفى و عيونها مليانه دموع ،، خليتها واقفه و مشيت دخلت لـ طارق في غرفتو ،، قلت ليهو بقيت كيف؟ قال لي بضيق كويس! طبعاً هو زعلان عشان وليد جا معاي اصلاً في كل مره بشوف فيها وليد بتضايق ، قعدت بعيد عنو شويه ، اتنهدت و قلت ليهو أكتر حاجه مميته الحب البكون من طرف واحد صح؟
عاين لي بإستغراب كدا ، قلت ليهو طارق أنا عارفه إنك بتحبني و من زمان كمان بس ما قدرت أبادلك المشاعر دي لأنو ماف زول في قلبي غير وليد ،، عارفه كلامي حيزعلك بس لازم نخت النقاط على الحروف عشان ما تتعشم فيني ساي و تنتظر وحده معرسه و مبسوطه مع راجلها ، افضالك علي و وقفتك معاي عمري ما حـ أنساها ليك و لو مرت مية سنه حتفضلك طارق الوفي و السند الدعمني و وقف معاي مكانة الأخوه الجواي ليك حتفضل زي ما هي و من دون كذب أنا بفضلك على أخواني و بعتبرك فرد من أسرتي ،، القدمتو لي ما شويه و انا عشان مصلحتك بتهمني جايه اقول ليك الكلام دا ،، فتح عيونك كويس و حتلقى الأفضل مني ،، في ناس بتحبك بس انت ما شايفها و ما مركز معاها لكن خاتي بالك معاي و أنا والله يا طارق ما شايفه غير وليد فـ معليش شديد والله ، كنت حـ اكمل كلامي بس لمن شفتو دمع سكته و وقفت على حيلي و لمن وصلت الباب إتلفت عليهو و قلت ليهو وجدان بتحبك يا طارق و زي ما انا في البدايه جربت إحساس الحب من طرف واحد و انت جربتو معاي فما تخلي وجدان تجربو ، عارفه طلبي أناني شديد بس ماف غير وجدان حـ تقدر تسعدك ، قلت كلامي دا و طلعت ليهم في الهول و قلت لـ وليد خلينا نمشي بعد دا ، المهم استأذنا منهم و مشينا ، لمن دور العربيه قال لي مشيتي وين إنتِ؟
قلت ليهو مشيت اتكلم مع طارق و أخت ليهو النقاط على الحروف ،، عارفه كلامي حيزعلو و يجروحو شديد بس كدا أحسن ،، قال لي فعلاً ،، المهم بعد يومين كدا اتصلت على ناس أمي و اتكلمت معاها مسافه بعدها قلت ليها أديني حبوبه ، أدتني ليها و بقينا نتونس سوا لحدي ما جبنا سيرة أبوي و قلت ليها انا مستغربه ليه فجأه سمح ليكم تتكلموا معاي و أمي تشيل تلفون! قالت لي ها أبوك دا راجلاً طماع ساي ، خاف قايلاهو بقى هدي و رضي! يا بتي أكما عارفه النحدثك ،، راجلك جاب ليهو مواشي مقابل انو يخلينا نتكلم معاك و ما يشيل مننا التلفون ،، غيتو ولدي دا طماع طمع لكن نعمل شنو ماف زول بقدر يناقشو ،،، بعد قفلت منها مشيت لـ وليد و قلت ليهو ليه تشتري مواشي و تديها لأبوي مقابل إنو يسمح لناس أمي يتكلموا معاي!! قال لي مواشي يا زوله انا ذاتي مفلس عيني طالعه ،، قلت ليهو وليييد ما تكذب علي ،، قال لي يا ستي ما حصلت كارثه يعني شنو لو أشتريت ليهو المواشي دي! اعتبريها هديه مني لأبوك ،، قلت ليهو لا ما......قاطعني و قال لي جعاااان أنا ألحقيني بالأكل ،، قلت ليهو وليد! قال لي قلت ليك جعان و رفيف ذاتا صحت شكلها جعانه ألحقينا يا ماما يا عسل ،، قلت ليهو غيااااظ!
في يوم جمعه كدا ، بعد ما وليد مشى الصلاة ، مشيت لـ وحده جنبنا بترسم خليتها ترسم لي و تحنني بالبيقن ،، و قعدت معاها لحد ما البيقن جف ، لمن شلت رفيف و رجعت البيت إفتكرت إني حـ ألقى وليد جا من الصلاة بس كان لسه ما جا قلت عادي مرات بدخل مع جارنا سامي بيتهم ، أمي سامي بتعمل عصيده كاربه كل جمعه و بتصر على وليد انو يجي يفطر معاهم و بتخلي سامي يجيبو معاهو ، المهم جهزت نفسي و رفيف ،، لمن وليد جا لقانا قاشرين قشره جد ،، قال لي شيالة حلاوه و انكشحت ،، جا باس رفيف و باسني و قال لي الحلوين ديل ماشين وين؟
قلت ليهو انت ذاتك حتمشي معانا ،، قال لي أكيد بعد الحلاوه دي ما حـ أخليكم تمشوا براكم ، قلت ليهو اطلع بس و انا بوصف ليك ،، المهم ركبنا و دور العربيه ، قال لي نمشي على وين! قلت ليهو الرياض ،، قال لي ليه؟
قلت ليهو خلينا نمشي بس و انا بوصف ليك ، المهم بقيت اوصف ليهو لحد ما وصلنا المنطقه الساكنين فيها ناس أمو ،، وقف العربيه و إتلفت علي و قال لي إنتِ ماشه لناس أمي؟
قلت ليهو ايييوه ،، قال لي ليه؟ قلت ليهو أجي! كيف يعني ليه! ماشه بيت نسابتي أنا مشتاقه ليهم 😌💅
قال لي دهبايه انتِ عارفه نفسك بتقولي في شنو؟ قلت ليهو ايوه عارفه صدقني المشاكل و النقاشات دي كلها ما منها فايده و الخصام غير يخرب حياتك ما بعمل ليك شي ، نحنا نعمل العلينا و نمشي نراضي أمك و حتى لو ما استقبلتني و قبلت بي انا ضميري و بالي حيكونوا مرتاحين انا قررت أنضف قلبي من كل زعل و عتاب من زول ،، ما عايزا اكمل باقي حياتي و في زول في محيطي شايل في قلبو مني أو العكس ، احسن نصفي النيه و نعفي عن كل زول غلط في حقنا عشان نعيش مرتاحين ،، إبتسم و قال لي ليه إنتِ كدا! صدقيني إنتِ الحاجه الوحيده العمرو ما حـ أندم عليها 🥀💜 ضحكت و قلت ليهو خلاص كمل طريقك ، فعلاً واصل ،، أول ما وصلنا بيت أمو بعترف اني إتوترت ، لمن نزلنا شال رفيف و مسكني من يدي لحدي ما دخلنا جوه ،، أول ما جينا داخلين جا شافع جاري و بقى يقول خالو جا خالو جا! ....بقيت أعاين لـ وليد بإستغراب ، شويه كدا جانا صوت علا و هي بتقول أحمد يا أحمد وين إنت! لمن نزلت و شافتني حسيتها شويه كدا و حتجري من قدامنا ، عاينت لـ وليد و تاني شالت عينها عنو و نزلت راسها و هو كان بعاين ليها بنظرات حاده ،، الشافع قال ليها ماما خالو جا ،، طوالي فهمت إنو دا ولدها الجابتو بطريقه غير شرعيه ،، غيتو الجو إتوترت و ماف زول فتح خشمو ،، علا رجعت بدربها و نحنا قعدنا في الصاله ،، بقيت أعاين في البيت و اتذكر ذكرياتي فيهو من أول يوم جيت فيهو هنا لحد آخر لحظه لي فيهو ،، شويه كدا جات الشغاله ضيفتنا ،، وليد قال ليها أمي موجوده؟ قالت ليهو اي قاعده فوق ،، قال لي أرح ليها ، شال رفيف و مشى قدامي و انا وراهو لحد ما وصلنا غرفتها ،، ضرب الباب و لمن قالت إتفضل دخل و أنا وراهو ، أمو اول ما شافتني صرة وشها و قالت ليهو خير ، اتذكرتنا من وين ، نزل رفيف و مشى عليها و باسها في راسها و قال ليها أعفي لي يا أمي ، قالت ليهو ما بعفي ليك إلا تطلق دي و أشرت علي ،، اتنهد و قال ليها دي نفسها الغلطتي في حقها و طلعتيها كذابه و خليتيني اشك فيها و نفسها الكانت مصره تجي لحد عندك و تطلب عفوك رغم إنها ما غلطانه بس برضو ما عايزاك تكوني شايله في قلبك منها أو مني ،، سقت رفيف و مشيت بيها عليها ،، وقفت جنبها و قلت ليها عارفه انو في نقاشات و مشاكل كتيره حصلت بيناتنا و ماف وحده قصرت من التانيه بس المشاكل دي كلها نحنا ما إستفدنا منها حاجه و ما سببت لينا إلا وجع القلب ، عني نفسي ما شايله في قلبي منك و مستعده أنسى الحصل كلو و نبدا صفحه جديده ،، لوت خشمها و قالت لي ما عايزا معاك أي كلام و ما عايزا شي يجمعني بيك و ياريت تطلعوا من الغرفه دي ، وليد حاول يتكلم معاها لكن ما أدتنا فرصه ، المهم نزلنا تحت و وليد كان متضايق شديد بس فهمتو إني ما زعلانه و كدا مرتاحه و أمو إلا ما يجي يوم تتقبلني فيهو ،، لمن نزلنا تحت ولد علا جانا تاني ،، وليد شالو و بقى يشاغل فيهو ، طبعاً رفيف دقت جرس و زعلت شديد ، فـ بقى شايلهم الإتنين و بلعب فيهم ، فجأه لمحت علا فوق في السلم بتعاين لينا ساي لمن شافتني عاينت ليها دخلت جوه ، قلت لـ وليد هسي بجي ،، مشيت ليها جوه غرفتها ، لمن شافتني لفت وشها مني ، اول مره اشوفها ضعيفه كدا و لسانها مقطوع ، قعدت جنبها و إتلاطفت معاها مع إنها معظم الوقت كانت ساكته و لو ردت بترد بكلمه أو كلمتين ، المهم قعدت معاها مسافه و نزلت تحت لـ وليد و طلعنا من بيتهم ، قلت ليهو ما لقينا اختك لين ، قال لي في بيت راجلها! قلت ليهو رجعت ليهو يعني ولا عرست واحد تاني؟ قال لي رجعتها ليهو اصلاً هي كانت بتسمع كلام أمي و عشان هو ما عاجب أمي كانت بتحاول تكرها فيهو ، هسي الحمدلله عايشين تمام و حياتهم كويسه و عندهم أولاد ،، قلت ليهو الحمدلله ربنا يسعدهم ،، المهم في اليوم دا كنت حاسه بطاقه ما عاديه لدرجة اني بعد ما رجعت البيت اتصلت على أمي و حكيت ليها و قلت ليها أديني أبوي بس ما تقولي ليهو دا انا ختي التلفون في أذنو و بس فعلاً عملت كدا و هو شغال ليها دا منو؟
قلت ليهو اعفي لي يا أبوي ، ما تقفل التلفون و اسمعني للنهايه ،، عارفاك شاميني و عارفه نفسي غلطت كتيير أو انت شايف كدا ، الحصل حصل في الماضي و أنا هسي غير عفوك و رضاك ما عايزا حاجه في الدنيا دي ،، الله يخليك اعفي عني يا أبوي ، قال لي يا بت هوي العباطه دي ما بتنفع معاي و طوالي أدى التلفون لأمي و هي بقت تواسي فيني و تقول لي اصلاً ابوك طبعو كدا ،، بس انا خالص ما زعلت و ما اتضايقت بالعكس كنت مبسوطه لأني اعتذرت لكل الناس الحوليني و خليتهم يفهموا اني ما زعلانه منهم و ما عايزا شي غير رضاهم ،، الراحه النفسيه الحسيت بيها بعد العملتو دا ما بقدر أوصفها ، احساس كدا حلو شديد لمن قلبك يكون خالي من الزعل و الحقد و الكراهيه ، ياخ وصلت لدرجة من التسامح قربت فيها افتش رقم هنادي و اتصل عليها 😂هييي بمزح والله كمان ما للدرجه دي 😹
بعد 3 أيام كنت بتكلم مع وجدان و بسألها اذا في تطوير حصل بينها و بين طارق ،، قالت غيتو كل مره بمشي ليهم و هو كـ عادتو بتعامل معاي برسمه شديده ، مرات بزعل و بقول تاني ما بجيهم بس بلقى رجليني ودوني بيتو أصلي ما عندي كرامه ،، قلت ليها ماف كرامه في الحب ، ما تيأسي متأكده حيجي يوم و هو يتقبل حبك دا و يحس بنفس إحساسك إنتِ بس خليك جنبو لحد ما يتعود عليك و مع الزمن حـ يلقى نفسو إتعلق فيك ،، قالت لي إن شاء الله و بعدها بقينا نتكلم في مواضيع هايفه ،، بعد قفلت منها إتذكرت مها ،، قلت إتصل عليها و اعتذر منها تاني قلت لا لا أحسن أمشي ليهم عديل ، المهم كلمت وليد و هو وصلني ليهم و مشى شغلو و ساق رفيف معاهو ،، لمن مها فتحت لي الباب من دون ما أتردد حضنتها و قلت ليها انا فاقداك شديد يا صحبتي ،، ما أبدت أي ردة فعل بس انا عارفه قدر شنو هي بتحبني و بتحب رفيف ،، قلت ليها شكلك ما فاقداني عشان كدا ما عايزا تفضليني ،، ما مشكله يا زوله بدخل براي ،، دخلت جوه و قعدت في الهول ، شويه جات هي و كانت ماشه على المطبخ قلت ليها مها ما تجيبي لي حاجه انا جايه اتونس معاك و أنهي الخلافات البيناتنا لأنو الدنيا دي بالجد ما بتستاهل يا أختي و انتِ فعلاً أختي و أعز و انا بحبك شاااااديد ،، مشيت عليها و المره دي بالجد حضنتها شديد لأني حقيقة كنت مشتاقه ليها و لأيامنا مع بعض ،، هي المره دي ما قدرت تمسك دموعها فـ بكت طوالي و بقت تعتذر مني و أنا اعتذر منها لحد ما جانا صوت طارق و هو بقول حتفضلوا تعتذروا من بعض كدا ولا حتعملوا لينا حاجه ناكلها؟ الإتنين ضحكنا و حضنا بعض ،، طارق جا نازل بصعوبه لأنو عندو كسر في الرجل و لسه في جروح ما طابت ، جا سلم علي و هو عيونو مليانه خذلان ،، بقيت اسألو عن صحتو و كدا بعدها مشيت المطبخ مع مها و عملنا الفطور و جينا قعدنا التلاته و بدينا نتذكر في أيام زمان و نضحك رغم التوتر البيني و بين طارق ،، ايوه صح بنتكلم مع بعض و بنضحك بس أول ما يعاين لي بحسسني بالذنب و اول ما اخت عيني في عينو بشوف الإنكسار الفيهو ، اتناسيني و كل واحد عمل نفسو لا سمع لا عرف حاجه ،، انا لمن طلعت منهم حسيت نفسي مرتاحه نفسياً لدرجة اني اتمنيت يكون عندي جناحين عشان أجسد المعنى الحرفي لـ جملة "طرت من الفرح " لمن إجتمعت مع وليد في صفره وحده بديت أحكي ليهو و انا عيوني بتلمع من الفرح و احساس الراحه الحاسه بيهو في وسط ثرثرتي دي كلها قال لي أنا بحبك!
هنا بلعت لساني و فصلت و نسيت الكلام الكنت بقول فيهو ،، ضحك علي و قال لي فصلتك سمحه 😂😹
خجلت شديد و غطيت وشي بـ يديني فـ بقى يغني لي:
"يا جميل يا حلو الدم الشربات مكملو ، نحنا بنحبك من سنين ما حد عاجبك يا حلو "
زحيت يديني عن وشي و قلت ليهو لا في حد عاجبني ، قال لي منو سعيد الحظ دا؟
قلت ليهو : كل الحاجات فيهو إتلموا ، أدبو و ذوقو و خفة دمو 🙈
قال لي برضو ما عرفتو!
قلت ليهو جذاب و عندو لحيه ، فاهم و واعي و شخصيه و عندو كاريزما و أهم شي إنو بحبني و بحب رفيف "
قال لي برضو ما عرفتو قولي لي إسمو ،، طبعاً هو غيااااظ عشان كدا قلت ليهو اسمو .....طارق
لمن قلت ليهو كدا صر لي وشو ،، ضحكت و قلت ليهو عشان تاني تستهبل ، امممم اسمو وليد والله و أحلى و اجمل وليد 🥀💜
إبتسم و قال لي رايك شنو نوثق اللحظه دي بالصور و الفيديوهات !
قلت ليهو رايك شنو تعترف انك بتحبني اثناء ما نحنا بنصور في الفيديوهات!؟
قال لي ما عندي مانع لو عايزاني عادي ممكن اطلع الشارع و امسك الناس ديل نفر نفر و اقول ليهم انا بحبها يا ناس أنا ما شايف غيرها ،، ضحكت و قلت ليهو كمان ما للدرجه دي!
جبت رفيف و بدينا نتصور و نتعاور و هو في كل فيديو يعترف انو بحبني شويه كدا نزل التلفون و قال لي إنتِ ما ناويه تعترفي لي ولا شنو؟
قلت ليهو هو انت محتاج اعتراف! ما من يومك عارف و كل الناس عارفه قدر شنو دهبايه بتحب وليد و متعلقه فيهو لأي درجه ، انت عالق في قلبي لا السنين ولا النقاشات حتنزعك من روحي ،، عاين لي شديد جوه عيوني و قال لي و هو عيونو مليانه دموع انا تاني ما عايز شي من الدنيا دي ،، أهم اتنين موجودين جنبي و ربنا يقدرني أسعدكم ،، ضمانا أنا و رفيف عليهو و صورنا آخر صوره ، قلت ليهو اعملهم في ألبوم ،، قال لي حاضر من عيوني و حـ أسمي الألبوم دا #الدهبايه 💜🥀
أنا و وليد ما وقفنا من أهلو و كل مره بنعمل العلينا و بنمشي نزور أمو و نحنا رضيانين كل الرضى و متحملين كلامها بصدر واسع ، سبحان الله علا الما إتوقعتها تتعامل معاي خالص بقت لمن نجيهم بتنزل تسلم علينا و بتمشي طوالي لأنها بعد العملتو ما بتقدر تقعد جنب وليد و هو عشاني بحاول يمسك نفسو منها و ما يسمعها فارغ أو يقسى عليها في رأيي الحصل حصل و لو في شي مفروض يتعمل كان يتعمل قبل ما هي تغلط الغلطه دي بس بعد ما عملتها و جابت الطفل دا و الأب الما معروف طفش وين تاني حـ يستفيد شنو لو اتعامل معاها بقساوه و سمعها فارغه في الطالعه و النازله!
أبو وليد برضو ما قصر مننا و بقى يزورنا على طول و نحنا مرتين مشينا زرناهو في البيت ، طبعاً مرتو طيبه شديد و بشوشه والله اتعاملت معانا احسن معامله و استقبلتنا أحسن استقبال حتى أولادها أخوان وليد من أبوهو حلوين و ظريفين زي أبوهم و أمهم ،، وجدان لسه مستمره في محاولاتها مع طارق و لسه بتحاول تثبت ليهو إنها جديره بالحب دا و إنو هي الوحيده الحتقدر تسعدو لأنها بالجد بتحبو و من زمان كمان ،، أما مها فـ بعد فتره اتصلت علي و كلمتني إنو في واحد جاي يتقدم ليها ، فرحت ليها شديد و قلت ليها من هسي حـ أقع فيك ماسكات و مرطبات و و و ، ضحكت و قالت لي عارفاك ما بتقصري ،، في اليوم التاني طوالي نتيجتي طلعت و الحمدلله pass كدا فرحتي اكتملت و بالجد وصلت مراحله بعيده من السعاده ، وليد جاب لي كميه من الهدايا بمناسبة النجاح دا لا و كمان طلعنا إحتفلنا برا ،، المهم مرت الأيام و الراجل جا و اتقدم لـ مها و طلبها من عمها و أخوها و بعد ما فتشوا عنو كويس وافقوا و عملوا خطبه و حددوا موعد العرس بعد شهرين ،، يعني بعد رمضان تاني جمعه في عيد الفطر ،، بقيت معظم الوقت بقضيهو معاها ،، انا وجدان بقى ما عندنا شغله غيرها و 24 ساعه في السوق ،، و رمضان دا كل يوم انا خامه عدتي و ماشه افطر معاها لدرجة إنو وليد قال لي إنتِ لو رحلتي معاهم هناك كلميني 😂 قلت ليهو لسه ما رحلت لكن لمن اقرر ارحل حـ أكلمك عاين لي بغيظ و قال لي جادي انا نفسي نقعد نحنا التلاته سوا ، قلت ليهو حاضر ما طلبت شي و فعلاً اسبوع قضيتو في البيت و باقي الأيام وزعنها مره على بيت أمو و مره على بيت أبوهو و يوم مشينا لأيمن و ما شاء الله مرتو سمحه و ظريفه ، أما آخر أيام في رمضان قلت لـ وليد بعد دا لازم أكون معاها لأنو عرسها قرب ، قال لي أمري لله ،، المهم عدت الأيام و جا اليوم الميمون ،، ما حـ اقدر اصف اليوم دا و قدر شنو كلنا بكينا مع مها و طارق في ساعة العقد خاصة انهم فقدوا أهلهم شديد يعني لا معاهم أم لا اب بالجد قلبي وجعني عليهم و ما قدرت أمسك نفسي ،، وسط الدموع دي كلها تم العرس و عملنا ليهم الجرتق ،، قبل ما يمشوا قلت ليهم لازم لازم كلنا نتصور صوره جماعيه للذكرى ،، وقفنا العرسان في الناس و جزو وقف شمالهم و جزو يمينهم ، و إتصورنا أحلى صور في أخلى مناسبه لأجمل عريس و عروسه 🥀
وليد كان واقف جنبي و شايل رفيف قال لي التوب يحردوهو ليك ،، قلت ليهو ياداب شفتو؟ قال لي لا بس من قبيل كنت بتأمل فيك و فقدت المنطق ،" جمالك يذهب بالعقل" و هسي ياداب عقلي رجع لي ،، قلت ليهو آي آي طلس كويس ، قال لي والله ما طلس ما واثقه في نفسك ولا شنو؟
قلت ليهو واثقه لكن إنت كمان طلاااااس! قال لي أسمعيني رايك شنو نعرس تاني؟
في اللحظه دي إتلفت عليهو و قعدت أضحك شديد و انا خاته يدي على كتفو و في نفس اللحظه المصور صورنا و نحنا بالوضعيه دي و ياااا حلاوة الصوره و جمالها 💜🥀
"لا يلتقي الرائعون في بداية العمر أبدًا ..
يلتقي الرائعون الا بعد رحلة طويلة من التعب.. ولا يحدث الحب الحقيقي الا متأخرًا.. يحدث بين قلبين عاشا في حياة مختلفة وكان مستحيلًا ان يلتقيا.. لهذا لا شيء يصف فرحة كل شخص عثر على نصفه الآخر 💜
لكاتبه
النهايه 🥀
