شربت نص الكبايه و رجعتها مكانها و قلت ليهو خلصنا ياخ عايز تقول شنو؟
خت كبايتو و قال لي , اتنهد و قال ما كنت عايز أصل معاك للنقطه دي ، لكن إنتِ ما خليتي لي مجال عشان أحاول أصلح الإنخرب و نعيش عيشه طبيعيه زي أي زوجين ، عارف المريتي بيهو ما ساهل و عارف إني غلطت في حقك لمن ما صدقتك بس أنا ما كذبتك من فراغ! براك عارفه نفسك كنتِ كذابه كيف و بتحبي تأليفي قصص و دايماً كنتِ بتعملي عكس البقولو ليك و لحدي الآن إنتِ بتعملي كدا ، قلت ليهو اختصر لأنو ما عندي ليك زمن ، عاين لي جوه عيوني و قال لي بما إنو آخر نقاش فـ لازم يكون طويل ، هنا بلعت ريقي و سكته ، واصل كلامو و قال لي متذكره قصة المطبخ ديك! لمن قلتي انو أمي قافله منك المطبخه و حامياك من الأكل و طلعت من البيت !؟أنا في نفس اللحظه إتصلت عليها و إتكلمت معاها مكالمة فيديو ، كانت بملابس البيت و قاعده في البيت ، تاني حاجه لمن لقيتك بتتكلمي مع واحد بالتلفون و حاكيه ليهو قصة حياتك كلها و طبعاً الواحد دا كان طارق ، ياداب اتذكرت و فهمت إنو دا هو نفسو الكنتِ بتتواصلي معاهو يا أستاذه ، تالت حاجه لمن بالصدفه مشيت بتلفونك الشغل و اكتشفت كميه مع المحادثات بينك و بين كذا واحد و الكلام الفي المحادثات بيني و بين نفسي ما بقدر اقولو و و و ، بعد دا كلو متوقعه مني شنو؟ في راجل بسكت على حاجه زي دي! ، نططت عيوني و قلت ليهو شنو شنو!؟ لقيت محادثات بيني و بين كذا شاب! أنا ! ، سكت شويه كدا و تاني قلت ليهو مفروض ما أستغرب معلوم بالنسبه لي العمل كدا منو ، تصدق أو لا التلفون كان مع أمك و هي العملت دا كلو عشان تطلعني غلطانه و ما كويسه قدامك عشان تطفشني في البيت و فعلاً دا الحصل و أمك عملت الفي بالها لمن خلتك تصدقها و......قال لي أنا حالياً ما مصدقها ، الـ 4 سنوات دي كانت كافيه جداً و زياده عشان أفكر كويس و أعرف مين بكذب و مين لا ، فتحت ليك السيره دي عشان أفهمك الحصل شنو و خلاني آخد موقف منك و أشوفك غلطانه ، فعلاً كنت مصدقك الإنقال ، ما لأنو قالتو أمي بس لأنو كل الأدله بتشير ضدك ، و حالياً لمن بحاول اصلح البينا إنتِ بتعاندي و بتزيدي السوء سوء ، قلت ليهو تصلح البينا!؟ئهه بينا في شنو نحنا عشان تصلحو! قول بس إنك عايز رفيف تكون قريبه منك بس نهاي ما تكذب و تقول لي عايز أصلح البيناتنا و بتاع ، قال لي شفتي!؟ رغم كلامك المستفز و الغياظ بحاول اتبارد و ما أتجادل معاك و أزعلك بس اقول ليك حاجه ، يا ريتك ما كبرتي ، ياريتك ما إتغيرتي ، قلت ليهو اي اي ما إنت عايز دهبايه القديمه الهبله و العبيطه ديك الما عندها سيره غيرك ! قال لي بالجد ياريتك ما إتغيرتي 💔
قلت ليهو من الآخر كدا عايز شنو؟ قال لي وريتك قبل كدا عايز شنو أنا ، بقدر أغصبك تقعدي هنا لكن ما بقدر اغصبك تحبيني أو تتقبلي وجودي في حياتك ، كنت مفتكر إنو لو جبتك و قعدتك هنا بغض نظر عن الطريقه الجبتك بيها مع الأيام الأوضاع بيناتنا حـ تتصلح و حـ نشرح و نبرر لبعض الحصل بس حصل العكس لأني ما عايز شي يربطك بي أو زي ما قلتي بتكرهيني ، ما حـ اقول اني بكرهك لأنو مستحيل أكرهك و ما حـ اقول إني اتنازلت عنك لأني لحد اللحظه دي متمسك بيك بس كل الحصل إني قدمت مصلحتك على مصلحتي ، اذا شايفه راحتك برا البيت دا فـ دا الحيحصل و حـ أطلقك ....
لمن قال كدا حسيت لساني بقى تقيل و قربت أبكي لكن إتماسكت ، قلت ليهو أحسن حل ، قال لي ايوه عارف إنو بالنسبه ليك أحسن حل بس بالنسبه لي اسوأ حل مع ذلك حيحصل العايزاه ، حـ أطلقك بشرط إنك ما تمشي تشتغلي تشتغلي شغل زي دا تاني ، لو عايزا تشتغلي اتخرجي أول و اشتغلي بشهادتك ما عندي مانع ، لحد ما تخلصي جامعه حـ أصرف عليك أنا و أول ما تتخرجي و اتأكد إنك قادره تتحملي مسؤولية نفسك حـ أرفع يدي منك و طبعاً رفيف بعيده عن الكلام دا لأني على كل الأحوال حـ أصرف عليها لحد ما أموت ، ملخص كلامي دا كلو إني في الآخر اكتشفت إنك بريئه و انو أهلي هم العملو دا كلو و بعتذر ليك شديد عن البدر مني صح إني ما اعتذرت ليك من البدايه لأني كنت عايز اعتذاري دا يكون افعال ما كلام خشم ساي لكن يبدو إنك ما فارق معاك لو اعتذرت أو لا المهم يا ستي حيحصل العايزاهو و رفيف هي الشي الوحيد الحيكون مشترك بيناتنا ، هسي قولي لي عندك إعتراض على الشرط دا؟
سكته و ما قدرت اتكلم لأنو لو فتحت خشمي دموعي حتنزل قدامو ، أبداً ما كنت عايزا انهار أو اظهر ليهو إني ضعيفه بس والله ما قدرت أمسك دموعي ، قلت ليهو عايز تطلعني غلطانه بأي طريقه و تخت الحق علي ، ليه محسسني إني ظالماك و غلطانه في حقك! زي ما أنا قلت بكرهك إنت كمان بتكرهني! و اصلاً ما عندك لي حاجه و الحقيقه أنا كذلك بس بطل نفاق و ما تقعد تعمل نفسك مسكين و تطلعني كعبه ، بس كويس الفتحت لي سيرة الطلاق ، ما كان في داعي للدرامات العملتها دي كلها لو من البدايه طلقتني كان احسن ، قال لي هسي ما فات شي ، عايزاني أطلقك متين؟
بالجد هنا قلبي وجعني و قلت بان على حقيقتو ، اصلاً هو ما بحبني و ما عندو لي حاجه براي فسرت تصرافتو اللطيفه ديك غلط و جبتها على هواي ، هسي هو بعد ما اتأكد انو رفيف بتو عايزين يطلقني ، معناها عشان كدا من البدايه دخل حياتي و جابني معاهو بيتو بالغصب و كلو عشان يعمل تحليل الـ DNA و يتأكد اذا رفيف بتو ولا لا ، وقفت على حيلي و قلت ليهو على راحتك و هسي لو طلقتني ما عندي مانع ، قال لي طيب بتبكي ليه؟ قلت ليهو ما يخصك ، مسكني من يدي و قعدني ، قال لي ما عايز يكون لسه في خلافات بيناتنا أو حساسيات زي ما أنا وضحت ليك الحصل و اعتذرت منك انتِ كمان وضحي لي يعني هسي بتبكي ليه!؟ لو في حاجه مضايقاك مني قوليها لي يمكن فاهمه غلط! ايوه صح نحنا حـ نطلق بس ما ضروري نكره بعض بعد الطلاق ، متى ما إحتجتيني حتلقيني قدامك مع إني متأكد إنك ما محتاجه وجودي ، فكيت يدي منو و شلت رفيف معاي و مشيت فوق و كملت البكى كلو ، انا في نفسي ما عارفه انا عايزا شنو! من جهه متضايقه من وليد و حركاتو بتزعلني بس مع ذلك بجيني احساس اني ما عايزا أكون بعيده عنو ، تاني يوم لمن مشيت الجامعه اول شي حكيت لـ وجدان عن أميمه بت خالتها و الحصل و قلت ليها بصراحه كدا يا وجدان إنتِ كنتِ عارفه انها حتطلع مني اتصور مع راجل ولا لا!؟ قالت لي عارفه انو دا شغلها و كذا بت اتصورو صور زي دي بس انا قلت ليها دي صحبتي و ما حترضى تتصور مع راجل لأنو الحاجه دي بتجيب ليها مشاكل ، قالت لي لا انا اصلاً عايزاها تعرض لي تياب و بس ، قلت ليها بسبب الموضوع دا حصل كدا و كدا ، قالت لي طيب ليه زعلانه مفروض تتكوني مبسوطه ، أخيراً حتتخارجي منو! سكته ساي ، قالت لي مش قلت ليك لسه بتحبيه؟ و هو ذاتو بحبك والله ياخ ما شفتي لمن رفيف ضاعت و هو مشى جابها و لمن جا و سأل عنك و عرف إنك مشيتي تفتشيها خاف عليك شديد و قلق ولا انتظر زول مننا طوالي مشى ليك و أنا لمن اطمنت على رفيف طوالي مشيت البيت عشان الوقت اتأخر و عشان حسيت الجو متوتر و راجلك كان معصب شديد ، قلت ليها ئهه! ! انا ذاتي كنت واهمه نفسي زيك كدا لحدي ما صدمتني الحقيقه ، قالت لي إنتِ ليه ما قادره تقبلي فكرة إنو بحبك! للدرجه دي ما واثقه في نفسك؟ قلت ليها هو فعلاً ما بحبني و لو عمل حاجه عشاني فـ دا لأني أم رفيف و مرتو ما لأنو بحبني ، هو بحب هنادي و بس ، قالت لي طيب هسي هنادي دي وين؟ مالو ما جاب سيرتها و ما ظهرت ليك؟ قلت ليها ما عارفه و ما بهمني أعرف ، حريقه تحرقهم هم الإتنين ، ضحكت و قالت لي ما شفتي ملامح وشك بتبقى كيف لمن تغيري ، قلت ليها أغير شنو إنتِ وحده ما عندك موضوع ساي ،، المهم مر أسبوع و هو تاني ما فاتحني في موضوع الطلاق ، منتظرني أجي و اقول ليهو طلقني ، يوم كنت طالعه من الجامعه و انا شايله رفيف ، قبل ما أطلع جاني صوت طارق ، إتلفت عليهو و قلت ليهو طارق! كيفك؟ جا علي و سلم و شال مني رفيف و قعد يبوسها و هي مبسوطه شديد ، بتريدو ريده ما عاديه ، قال لي تعالوا نقعد في البينشات ديك ، أول ما قعدنا قال لي دهبايه انا بالجد آسف على الكلام القالتو ليك مها والله اليوم حتى عرفت منها انها شاكلتك و جاطت فيك ، دا اليوم اللقيتك فيهو بتبكي جنب بيتنا صح؟ مع ذلك ما رضيتي تقولي لي أنو مها شاكلتني ، سكته ساي و كنت بقول في نفسي ان شاء الله مها ما تكون لمحت ليهو أو قالت ليهو إنها ورتني إنو هو بحبني حتدخلني معاهو في حتات ضيقه ، هو كأنو قرا أفكاري ، قال لي أي حاجه قالتها لي دي استنتاجات منها ساي ما تشغلي بالك بيها ، عملت نفسي رايحه و حبيت أغير السيره ، قلت ليهو عادي ما حصل شي و هي ليها حق تزعل مني لأنها مفتكراني خليتكم و مشيت مع وليد لكن أنا ما زعلانه منها ، المهم انتوا كيف عاملين؟ قال لي تمامين إنتِ كيفك و داك بتعامل معاك كيف؟ قلت ليهو اصلاً ما قاعدين نتعامل مع بعض ، عاين لي جوه عيني و قال لي أحكي لي الحاصل شنو؟
طوالي عيوني دموعو! قال لي ضربك! مد يدو عليك! قولي حاجه ياخ! ....اقسم بالله ما أخليهو و....
_ قال حـ يطلقني
