كنت قاعدة مرة فـ مسجد الجامعة، وبدّي درس عن اسم الله (الغفور)
الدرس تقريباً أخد نص ساعة، خلص الدرس، والبنات بدأت تمشي، معدش حد في الحلقة غيري، لقيت بنت جاية عليا بتقولي :انا سمعت كل كلامك، حبيتك اوي، كلميني اكتر عن ربنا !
ابتسمت ومسكت اديها وقولتلها "وهو الذي يقبل التوبة عن عباده ويعفو عن السيئات"!
يراكِ بتبتعدي وبتنغمسي في دوامة الحياة وبتعصيه، فيبعتلك مليون رسالة تحسسك بالذنب عشان ترجعي، عشان تتوبي، عشان بيحبك، عشان يقبلك!
لقيت دموعها نزلت وبتقولي: ادعيلي ربنا يتوب عليا
قولتلها وليه متدعيش انتي ؟ ربنا عز وچل بيحب سماع صوتك، ارفعي ايدك وقوليلُه يارب انا عاوزة أتوب، فـ تُب عليا ...
قالتلي : ادعيلي انتي ،هو بيحبك وهيستجيبلك ..
قولت: سبحان الله، ما هو بيحبك انتي كمان ، بل وبيحبك جداً !!
بصتلي وتعبيرات وشها كلها تعجب، قالت باستنكار : بيحبني انا؟!! انا !! انا كُلي ذنوب ومعاصي! انا مفيش حاجة إلا وعملتها ! عشان كدا بقولك ادعيلي،لإنك احسن مني بكتير، انا وحشة .. وحشة اوي!
ضحكت وقولتلها: كلنا أهل ذنوب ومعاصي، كلنا غرقانين، انتي شايفة ستر ربنا عليا،لكن متعرفيش شيء عن حقيقتي، عارفة بيحبك بدليل ايه ؟
بدليل انه جابني لحد هنا مسافة سفر ساعة ونص عشان بس آجي في المكان اللي انتي فيه واقول الكلمتين دول فتسمعيهم وتيجي تكلميني عشان اقولك انه بيحبك ويريد لكِ الخير والتوبة !
عرفتي بيحبك بدليل ايه؟
بكت أكتر،وحطت اديها ع وشها وقالت بس انا غلطت غلطات كتيرة، استحالة ربنا يتوب عليا انا بعيييد
قولتلها "قُل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعاً"
بصتلي ومن بين دموعها قالت : بس ...
قاطعتها بابتسامة : "إن الله يغفر الذنوب جميعاً".. رددتها كتير وهي بتبكي اكتر
فحضنتني ،وبكت اكتر
طبطبت عليها وقولتلها روحيلُه واستحالة يرُدِّك ..
قالتلي : متسبينيش .. انا ما صدقت لقيتك.. خودي بإيدي لربنا
مسكت اديها وقولتلها : ان شاءالله مش هسيبك ،ونتي كمان خودي بإيدي للجنة ! وعد؟
قالتلي : وعد
أخدت رقمها ، وبقينا بنتكلم كتير، لاحظت فيها اللهم بارك عندها فضول حسَن تجاه الدين، بتحب العلم وبتحفظ المعلومة من اول مرة
فـ يوم كلمتني وقالتلي : عاوزة ألبِس نقاب زيك!
فرحت طبعا وحضنتها وشجعتها على الفكرة ، قالتلي انها هتاخد الخطوة بس تشوف رأي أهلها الأول
بالليل اتصلت بيها اشوف وصلت معاهم لـ ايه
قالتلي إن اهلها شدوا معاها وعملوا مشكلة كبيرة، ومنعوها من النزول للجامعة، تخيلت للحظة انها هتضعف، دي واحدة لسه في البداية ممكن كُتر الضغط عليها يخليها تبعد عن الطرق، كنت خايفة جداً جداً تنتكس وترجع أسوأ من الأول، كل التفكير دا بيدور فـ بالي وفاجئني ردها "لكن انا مش هتراجع، انا هثبت على موقفي واللي يحصل يحصل، انا ما صدقت لقيت نفسي، انا بحب ربنا ومش هعصيه أبداً، مش هضحّي بالجنة عشان متاع زائل"
اتفاجئت، وفرحت، واتصدمت، وعاوزة أبكي ! كل دي مشاعر مختلطة مش عارفة أرد، بس انا مش مستوعبة !
