جالي سؤال من بنت بتحكي عن نفسها .. إنَّها عملت ذنوب مبتتغفرش زِنا وسرقه ! عُقوق ماشي، تبرچ ماشي !
فكرتني بـ حاجه كنت سمعتها فـ المسجد قبل كده ..
كان في بنت حياتها إتخبطت تخبيط مش طبيعي .. خارجه من بيت أب وأم ملتزمين وكل الناس بتشهد بـ أخلاقهم بس دي طلعت كدا لوحدها .. كانت تكلم الولد دا تسيبه وترجع تكلم دا وتسيبه والكلام مكانش مجرد كلام دا كان بيوصل لـ تصرفات خارجه ولك أن تتخيل..
رغم كلام أهلها ليها إلا إنّها كانت مكمله فـ سكتها .. لحد ما فـ مره والدها من تصرفاتها جاله ذبحه صدريه وبرده مهمهاش..!
كانت بتقول على الرغم من حياة المجون إلا إنَّها كان فـ قلبها وجع دايم .. بتقول مكنتش بعرف أقعد من غير راجل فـ حياتي، لازم يبقى موجود راجل .
بتقول مشتغلتش فـ مكان إلا أما سرقته !
وبتقول فـ مره كنت كلمت واحد وسابني وإبتديت أدوّر على راجل تاني !
بس قولت لـ نفسي ليه مجربش أعمل زى الناس اللي بتلجأ لـ ربنا ..
و هوب هوب إنعزلت عن كل الناس وإبتدت تصلي وتستغفر وتداوم على ورد القرآن وإبتدت تغيَّر فـ نفسها كتير .. واحده واحده إبتدا فضولها يقتلها تنزل حلقات علم وأول ما قالت لـ والدتها إتصدمت و تنَّحِت بس لَبَّتلَها رغبتها وكأنَّها ما صدقت .. وبتقول أول ما دخلت المسجد سمعت الشيخ بيقول :
{ وَالَّذِينَ إِذَا فَعَلُواْ فَاحِشَةً أَوْ ظَلَمُواْ أَنْفُسَهُمْ ذَكَرُواْ اللّهَ فَاسْتَغْفَرُواْ لِذُنُوبِهِمْ وَمَن يَغْفِرُ الذُّنُوبَ إِلاَّ اللّهُ وَلَمْ يُصِرُّواْ عَلَى مَا فَعَلُواْ وَهُمْ يَعْلَمُونَ } .
راحت قالت فـ نفسها : إزاي أقرب من ربنا وأنا بالوحاشه دي !
لقِت الشيخ بيقول الحديث دا كأنّه بيرد عليها :
" إذا تقرّب العبد إلىَّ شبرًا تقرّبت إليه ذراعًا، وإذا تقرّب إلىَّ ذراعًا تقرّبت منه باعًا، وإذا أتاني يمشي أتيته هروله " .
فضلت تبكي وتقول أنا جتلك أهو يارب نقيني ..
البنت فضلت تداوم وحفظت كتاب اللَّه كامل .. وبقِت تدرس علم شرعي وإزدادت حلى بعد النقاب وكأنها كـ البدر ..
وإتقدملها شاب كان نِعم الزوج وكانت دايمًا ترفض علشان كانت بتقول إنَّها مش كويسه وهتظلم اللي هتاخده ! بس الشاب ده تمسك بيها و بالفعل وافقت وتزوجوا وقبل الزواج قالها مش مهم كنتِ إزاي المهم بقيتي إيه .. ربنا بيغفر الذنوب كلها، أنا يا عبد يا حقير مش هغفر !
البنت دي ربنا إبتلاها بـ المرض الخبيث وكان دايمًا على لسانها إن اللَّه إذا أحبّ عبدًا إبتلاه 💔
قبل وفاتها كتبت لـ زوجها ورقه بـ اللي ليهم مظلمه .. فضل يحلف إنّه مرحش لـ حد إلا أما يقولّه : مسامحها ويدعيلها بـ الرحمه ويتنازل عن مظلمته !
زوجها قال اتشاهدت 7 مرات ..
وكنت لما أبكي تبصلي وتضحك وتمشي إيديها عليا وتقولي أنا شايفه مكاني، أنا عايزه أقابله دلوقتي.. !!
والدها وهو على فِراش المَوت كان قايلها أنا راضي عنّك أكتر من أى مخلوق تاني فـ الدنيا..💛
المُغسله قالت دي شهيده ( ماتت مبطونه )
حكت إنّه أسهل غُسل غسلته فـ حياتها .. وكأنَّها عروس من الحور العين ..
وشها اللي كان تعبان رجع كأنّها صبيه فـ عمر الزهور ..
اللَّهُم ارزُقنا حُسن الخاتِمة..💛
في حديث لـ النبى ﷺ بيقول قال اللَّه تعالىٰ :
" يا ابن آدم إنّك ما دعوتني ورجوْتَني غفرت لك علىٰ ما كان فيك ولا أبالي، يا ابن آدم لو بلغت ذنوبك عنان السماء ثم إستغفرتني غفرت لك ولا أُبالي، يا ابن آدم إنَّك لو أتيتني بـ تراب الأرض خطايا ثُمَّ لقيتني لا تُشرِك بي شيئًا لأتيتك بقرُابِها مغفِره "
قال اللَّه -تعالىٰ- :
{ قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعاً إِنَّهُ هُوَ الْغَفُورُ الرَّحِيمُ }💛.
- مقتبس
