- ضوابط الخطوبه الشرعيه..♥
"الخطبه ما هي إلا وعد بالزواج"💍
_يعنى اي بقى..؟
يعنى خطيبك دا مش حلالك هو لسـه واحد غريب عنك إللي زاد إنه وعد بالزواج و الوعد هنا مش أكيد لأن ممكن ميحصلـش نصيب..
_مينفعش يلمسك أبدا حتى عشان الدبلة مامته او أخته تلبسهالك او انتى تلبسيها مينفعش يلمسك ابدا لانه مش حلالك
_طيب إزاي بقى أتعامل مع خطيبي..؟
"الكلام في التليفون" ودا بقى فيه علماء قالوا مينفعش تتكلموا فى التليفون لأنه لسه غريب عنك ، ورأي تاني بيقول ينفع بس بـشروط مفيش كلام حب ، أنا جيبتهالك من الآخر لو هتكلميه فى التليفون كلام ميخليكيش تجري تقفلي على نفسك أوضتك ، لا انتي أغلى وأعف من كدا..🤗
واي كلام يتقال يقدر يقولهولكـ قدام والدك ودا لأنكم عارفين إن اللّٰه رقيب..🌺
- ينفع نخرج سوا..؟
لا ماينفعش تخرجي معاه لوحدكم لازم محرم ، ولو هتقولي اي الخنقة ده مش هينفع ، يبقي استكفي بزيارته ليكي ببيتك..😁
_حدود الكلام..؟
طبعاً لازم يكون فى حدود فى الكلام وزي ما عرفنا إن هو لسه غريب عنك و انتِ غريبة عليه ، يبقى فيه كلام مش من حقه يسمعه ولا من حقكـ تسمعيه زي "حبيبى ، وحشتيني ، الخ الخ الخ "..😒
اصبري عشان تحسي بمتعة الحلال ولما تكتبوا الكتاب قولوا إللي إنتوا عايزينه..
_هو ينفع يزورنا في البيت..؟
اه ينفع يزورك ويجيبلك هدية كمان 😁 بس طبعاً بدون خلوة هتقولي "إزاي"؟
يعني حد يكون موجود فى البيت و يكونوا شايفنكم ومش لازم يسمعوكوا ، والكلام هيكون زي ما قولنا فى الأول بحدود..
"على قد صبرك ربنا هيديكي"..🥰
بعتبر فترة الخطوبة دي اختبار صعب وخاصة للملتزمين ، فيه ناس بتقدر تصبر لأنها مش عايزة إلا الحلال ، وناس للأسف ملتزمين بس بتيجي فترة الخطوبة و ينسوا أو يتناسوا..🧐
فأنتِ من أولها عايزة تعيشي حياة زوجية سعيدة فاتقي اللّٰه في خطوبتك ، لأن والله كل المشاكل والفتور والأهمال والخيانه والملل سبب ذنوب الخطوبة اللي محت بركة الزواج ، وسبحان من يقلب القلوب ، فانتبهي !
_الخطوبة هي فترة صيام طالت أو قصرت صوميها صح استني أذان المغرب وكلك يقين باللّٰه وصدقيني كل ما ترضي ربنا في خطوبتك أكتر كل ما أذان المغرب يبقى بدري بدري ، وكل ما ترضي خطيبك على حساب ربنا كل ما هتزيد العقوبات..💔
- يعني في النهايه لازم تتقوا اللّٰه في بعض وتعاملكم علشان ربنا يبارك لكم في زواجكم ومافيش حاجه إسمها ده خطيبي أو خطيبتي فنتعامل براحتنا ، فيه حاجه إسمها إنه لسه أجنبي عنك وهي اجنبيه عنك لحد ماتكتبوا الكتاب وتتزوجوا..💜
_طب إحنا عملنا تجاوزات اي الحل؟
الحل إنك تتوبي وتبدئي تمنعي التجاوزات دي وتعرفيه إن ده حرام ولا يجوز ويتوب هوا كمان..
_طب أنا اتجوزت وكنت بعمل التجاوزات دي..؟
يبقي برضوا تتوبي وتستغفري..
رزقكم اللَّه جميعاً الزوج الصالح التقي النقي العفيف وجميع المسلمين..🌻💜
