جذبني فمك البني

3- البارت الثالث

يابعد الكل يا واحد لاغي دور الكل 💫

ياحنين اهلي وحنيني ...

ــــــــــــــــــــــــــــــــــــــــــــــ

اندكت الباب ، طلعت فتحته ولد مترب من فوك ليجوه مبين يشتغل عمالة ، واكف ونفسه سريع خال ايده على صدره وظهره منحني يلتقط انفاسه بصعوبة...

سيلين : تفضل المن رايد.

_ بيت حجي وضاح..

سيلين : أي

_ وين عمامكم ..

سيلين : بغير محافظة ليش؟

_ صيحيلي واحد جبير اريد احجي وياه بسرعه..

رديت الباب وفتت صحت ماما..

سيلين : ماما ولد يريدج بالباب..

تمارة : منو هذا ماعرفتي؟

سيلين : لا ..

ذبت الاستكان من ايدها وكامت لفت شال على راسها وطلعت حاجته ، دقيقة مطول حديثهم وماما كامت تلطم وتصيح يمه وضاح سوده عليه وتملخ بشعرها ، اني واكفه مثل الصنم اريد اتحرك ماكدر ، على صوت ماما اجتي عمه ياسة وعيالها دخلو للبيت فهمو السالفه والباب انفتح كامت الجوارين تطب مشهد حزين بشكل

هنا صرت بمفترق طرق افكر اذا الخبر صحيح يعني احنه ضعنه وإذا كذب وبابا ما ميت بس متكسر هم ضعنه منو يصرف علينه منو يسدد الإيجار منو يجيب تكلفة علاج اختي ابوي منو يداريه ثنينهن صعبات وما ينحملن بالخبرين كسر ظهور ...

ما مستوعبه اللي صار كمت ابجي بخنيك ماعرف اعيط واصيح مثلهم اني من النوع دمعتي بسكوت تنزل ماكدر ابجي كدام احد اجتي حماة عمه ياسه تحجي ويايه وتهز بيه ..

_ شبيج حبيبتي ليش صافنه ابجي عيطي موزين هيج ...

تحجي وتبجي ...

اني عيوني مفتوحه وصافنه على ماما حتى ما رمشت

بين البجي والعويل والاهات جابو بابا سوده عليه ، اللي عرفته دايخ و واكع من فوك جان واكف على العماره يناوش الخلفه طابوك و دايخ ممتوازن وراح وراحت حنيته وطيبته راح كلشي حلو وياه ، صح حياتنه جانت مره ومتعبه بس مو بمراره الفقد واي فقد ؟ فقد السند فقد العز ،،

الاب عز البنيه اذا راح ضاعت وانذلت ، صارت الفاتحة واجوي عمامي ثاني يوم لان همه بالشمال واحنه بأحد المحافظات الجنوبيه ، خلصت الفاتحة وكعدو عمامي ويه ماما ...

عمو صلاح الجبير وعمو فرات الوسطاني و عمو محمود أصغر من بابا الباقين ما اجوي...

صلاح : هسه شلون ام هاجر تجين ويانه تبقين هنا..