بنت العميد

البارت الاول

نور:
سمحتُ لِنفسي أن تهوى من تُريد ..
ان تفعلَ ما تريد ،
ان لا يكون هُنالك "لا" في طريقها،
وبعدها رأيت الخسارة الواضحة ...
شيئا ف شيء .

مصطفى:
إعلمي يا عزيزتي، أن الرجل سيظل يتودد لك بكل الطرق وبأغرب الأساليب وبكافة الوسائل المتاحه حتى يضمن قلبك بعدها تبدأ مرحلة أخرى هي مرحلة الاهمال والانشغال بأمور أخرى ( المال مثلا ) لا تستغربي من رجل كان يتذلل لينال رضاك اليوم،  أن يهملك غدا بعد أن سلمتي له قلبك وجسدك، هذا صحيح الرجال يحبون المتكبرات ولا يسئ الرجل إلا لمن يضمن بقائها.

نبتدء قصتنه بسم الله تعالى
مرحبا
اني نور
بنت الضابط العميد صلاح
وامي الدكتوره سهى
اختصاص نسائيه جراحه في احدى مستشفيات بغداد وبلاضافه عيادتها الخاصه
عندي
اخ واحد اسمه. ايسر  مواليد1987
واخت وحده اسمها شهد1990
اخي واختي عايشين بسويسرا متزوجين وعايشين حياتهم هناك
ايسر عنده ولد واحد محمد اسمه
وشهد عدها بنت اسمها غزل وولد اسمه ادم
احنه من سكنه بغداد منطقه الجادريه
اني مواليد 1997
طالبه كليه مرحله ثانيه
قسم هندسه حاسبات
في احدى كليات بغداد الاهليه
مواصفاتي طولي
165
وزني 60
بشرتي بيضه شعري اسود متوسط الطول
اما باقي ملامح وجهي اشبه البنت الي بصوره غلاف القصه
اهم شغله عندي هي الاعتناء بنفسي مراكز تجميل على طول اناقتي اهم شي
عدساتي بس من انام انزعهن
اني البنت الصغيره الاهلي والوحيده الي عايشه وياهم
بابا وماما مدللني لابعد الحدود مايوم رفضولي طلب او سمعت كلمه لا منهم دراستي مومهمه اهم شي عندي الونسه وحده طايشه لابعد الحدود واحس الدنيه كولها مالكتها بسبب دلال اهلي اليه لهذا الكل يشوفني مغروره حته صديقات ماعندي فقط حبيبي وائل وياي بالجامعه
رغم الدلال هذا بس مااحس بطعم العائله ودفوها
ولا لكيت الشخص الي ينصحني ويوعيني الصح من الخطأ
بابا على طول ملتهي بدوامه وماما كذالك وقتها بين المستشفى ولعياده وكل 3 ايام خفر بالمستشفى تبقه
وبابا كذالك مرات يبقه ايام ميجي للبيت
اما الي عايشين ويانه بالبيت
هي خاله سهير امراءه 50 سنه. عمرها
غير متزوجه كانت تشتغل سكرتيره بعياده ماما ولان ماعدها احد واخوانها ميريدوها قررت ماما تجيبها تعيش ويانه. وتكون طباختنه. بسبب نفسيتها الطيبه بالطبخ
والمساعده الشغاله البنكلاديشيه ميشا
اختصاصه تنضيف وترتيب البيت فقط
والسايق الخاص مالتي العم عمر بابا مخلي خاص اليه فقط يوصلني للجامعه ويرجعني وبلاضافه الى طلعاتي الخاصه
حالياً في سنه 2017 شهر ال11
بدايه مرحله دراسيه المرحله الثانيه
طلب عمو عمر من بابا اجازه بسبب عمليه خاصه بي وتدهور حالته الصحيه
بابا نطاه شهرين اجازه
وقرر يجيبلي سايق مؤقت واهم شي يكون ثقه لان بابا حيل يخاف عليه  ومستحيل يامن بأي شخص

مصطفى
مرحبا
اسمي مصطفى مواليد 1988
من سكنه محافضه بابل
ابن عشاير عمي الجبير شيخ عشيره معروف
وكذالك والدي شيخ
عائلتي متكونه من 6 ولد فقط ماعندي اخوات
احمد
محمد
حسن
اني
علي
سجاد
اخواني كلهم مزوجين اني الوحيد الي ممزوج وضغوطات عليه من والدي حته يخطبلي بنت عمي الشيخ