شظايا أنثى

الفصل العاشر

-"هتفضلي قاعدة على الحال ده كده كتير؟"

أطلقت فتحية هذه العبارة أمام نورا التي كانت تجلس على السرير وتبكي بحرقة فهي لم تتوقف عن البكاء منذ مغادرة مروان ووالدته في مساء اليوم السابق.

صاحت فتحية بغضب من ابنتها التي لا تتوقف عن البكاء وكل ذلك من أجل شاب يريد استغلالها:

-"بطلي عياط بقى يا غبية ، ده مش بيحبك وبيرسم عليكِ عشان يتجوزك ببلاش ومن غير ما يتعب في حاجة وده السبب اللي خلاه يتقدملك أنتِ بالذات ومفكر أن إحنا هنوافق لأن سنك كبر ولحد دلوقتي أنتِ متجوزتيش".

رفعت نورا وجهها ونظرت إلى والدتها وهي تصرخ بقهر:

-"مروان بيحبني وأنا كمان بحبه ولو هو عايز يستغلني زي ما أنتِ بتقولي مكانش عمل ليا حظر على الواتس بعد ما مشي من عندنا امبارح وده لأنه حس بالإهانة لما أنتِ قعدتي تبيعي وتشتري فيه وأصلا هو كان قالي أننا مش هنفضل ساكنين كتير في نفس الشقة مع أمه وأن ده وضع مؤقت لحد ما ظروفه تتحسن وبعد كده هيجيب شقة في منطقة كويسة وهنقعد فيها".

زفرت فتحية ثم هتفت بعصبية شديدة شعر بها الجيران بسبب صوتها الجهوري:

-''أه يا معدومة الكرامة ، يعني مموتة نفسك من العياط على واحد عملك حظر لمجرد أن إحنا طلبنا منه يجيب شبكة معقولة ويكون عنده شقة كويسة ينفع تسكني فيها معاه!!"

استكملت فتحية حديثها بعدما جلست أمام نورا:

-"أه يا مرارتي اللي هتتفقع من الغيظ ، بنتي اللي عيشت وكبرتها وربيتها على أنها تبقى ناصحة ومتخليش حد يكسر عينها عاملة مناحة على مروان اللي عايزها تبقى خدامة لأمه العقربة".

خرجت فتحية من الغرفة وهي تضرب كفيها ببعضهما فهي لا تزال غير قادرة على استيعاب حقيقة أن مروان قد سيطر على ابنتها لهذه الدرجة التي تجعلها لا تصدق أنه يستغلها ولا يحبها.

انتظرت نورا خروج والدتها ثم أمسكت هاتفها وفتحت تطبيق الواتس آب حتى ترى إذا كان مروان قد رفع الحظر ولكنها وجدت أنه لا يزال يحظر رقمها فنهضت وتوجهت نحو الخزانة وأخرجت شريحة أخرى من جيب أحد المعاطف المعلقة ثم وضعت هذه الشريحة في هاتفها وأرسلت رسالة إلى مروان كتبت له بها:

-"أنا أسفة على كل حاجة حصلت امبارح ، أنت عارف أنا بحبك قد إيه وموافقة أتجوزك حتى لو مش هنلاقي مكان نقعد فيه بس والنبي فك الحظر ومتتخلاش عني وأي حاجة أنت عايزها أنا هعملها".

أرسلت نورا الرسالة وهي تتمنى أن يستجيب لها مروان ولم تكن تعلم أنه ابتسم بسخرية بعدما قرأ الرسالة وهمس بشماتة:

-"ولسة يا بهاء أنا هجيب مناخيرك الأرض ودلوقتي جه الوقت اللي هاخد فيه حق ضحى منك، هدفعك تمن روح أختي اللي راحت مني وهي عندها لسة 17 سنة بسببك أنت وأصحابك القذرين وزي ما أنا خسرت ضحى أنت كمان هتخسر نورا بس الفرق أنها هتكون عايشة بس هخليها تتمنى الموت مليون مرة".