السـفينة

الفصل الثاني عشر

'' قبل عامٍ .
تسمرت وَرد وهى ترى مؤمن أمامها ،مرت سنواتٍ كثيرة ..كيف وجدها ؟ ،ولِمَ بحث عنها ؟ ،أم هذه صدفة ؟ ..أمّا مؤمن لم يُصدق عينيه ،لا يُصدق انه يراها الآن ،لا يعلم ماذا يقول ،لم يضع بالحسبان هذه اللحظة ،لم يُجهز كلامه لها ،نظر مؤمن للطفل الذي يمسك يديها ،علِم أنه بالتأكيد ولدِها ،اقترب مؤمن من الطفل ثم انحنى أمامه وسأله بابتسامة ..''

- اسمك إيه ؟
= سليم
- اسمك حلو أوي ،وانا مؤمن

'' بادله الطفل الابتسام ،ثم نظر مؤمن لوَرد ،واختفت ابتسامته تدريجيًا وحل محلها الحزن ،وقف أمامها وقال ''

- ازيك ياوَرد ؟

'' لم تُجب ،فقط تنظر إليه بغضب والدموع بعينيها ،ابتلع مؤمن غصةً في حلقه ثم قال ''

- أنا ..أنا عِرفت إجابة السؤال

'' نظرت إليه باستغراب شديد ،أي سؤال ؟ ،فقال ''

- عِرفت هقول ايه لربنا ،وِصلت للإجابة

'' تذكرت ورد ،أغمضت عينيها ونزلت دموعها ،ثم ابتسمت بسخرية ،فتحت عينيها ونظرت لطفلها وقالت له ''

= يلا ياسليم

'' وأخذته ورحلت من أمامه ،لكن مؤمن وقف أمامها فأوقفها عن الحراك ''

- استني ،انا دوّرت عليكِ كتير وماصدقت لقيتِك ،لازم نتكلم
= فات معاده ،عدت سنين كتير أوي ..اسمعك ليه بعد مابقيت شخص غريب انا ماعرفوش
- ودا كويس ،كويس انّي بقيت غريب ،كان عاجبِك مؤمن بتاع زمان ؟

'' كانت تنظر إليه والدموع تنهمر من عينيها دون أن تنطق ،فقال ''

- ساكتة ليه ؟ ،ردي عليا
= ...
- أنا عارف انك موجوعة مني ،أنا مش جاي ابرر ..أنا ،أنا
= ماعندكش حاجة تقولها ،بس جه سؤالي على بالَك فجأة فافتكرتني ،قولت تدوّر عليا تعرف احوالي ،أنا كويسة وبخير
- لأ مش كدة
= خلاص خلّيها كدة ،عشان وجودك دلوقتي وأي كلمة هتقولها وأي مبرر هتقوله مالوش لازمة ،انتهى خلاص ..مش هنعيده تاني
- ليه ماليش مبرر ؟ ،عشان أنا كنت عيّل وقتها عندي ٢٣ سنة ؟ ،عشان متعوّد طول عمري على العِز والفلوس ؟ ،عشان فجأة اترميت في الموالِد وفجأة كل حاجة اتغيرت وعِشت في فقر عمري ماتخيّلت نفسي اعيش فيه ؟
= وانا كمان كنت صغيرة وماكمّلتِش ٢٠ سنة ،عِشت طول عمري في الموالِد ،واتعرض عليا عيشة الاغنيا وكله كان على يدّك ،أنا كمان كان نفسي اخلص من الفقر بأي طريقة ،بس تبقى بالحلال ،إنتَ أخدتها من قاصِرها ،بِعتني وبِعت عيشة الحلال معايا ،قولتلك مش هينفع نتجوز وانتَ بتشتغل في الحرام ،ومشيت ..مابصتش وراك ولو مرة واحدة ،ماشوفتكش حتى صدفة ،كإني كنت حِمل عليك خِلصت منه بكلمة مني
- أنا ...
= مقاطعةً : عارف انا قعدت قد ايه مستنياك ؟ ،عارف بصيت على الطريق اللي انتَ مشيت منه كام مرة مستنياك ترجع ؟ ،أنا كمان كنت صغيرة ،بس حبي ليك ماكنش صغير ،اليوم كان بيعدي عليا بسنة ودول مش سنة ولّا اتنين ،دول سنين كتير أوي خدِت عمري كله ،عشان انا غبية ،غبية انّي قعدت مستنياك