العهد

السادس

السادس

كاعدة اغسل اماعين
وطبت فاطمة علينه
سلمت
وباوعت الي صفح بطرف عينها
جن ما عاجبها وكالت الامي

ليش خية ليش البت تشغلينها
ليش ما مصوبنتها
وينها وين غسل الماعين

يا فاطمة شني خية چااا غير كبرت وتعاوني
انه هم تعبانة
منا الطبخ منا التنور
منا الشغل والزغار
اقلها تعاوني بلي تكدر علي

وليش ما كاصتلها ثواب جديدة ومبدلة الها

ياااااا تعالي شوفي الثواب الجابهن ابوها
هية وخواتها واخوتها
بس لازكتلي بهذن المجردمات
احجي اعلم ماكو فايدة تكلي ارتاح بيهن

لا تزعلين مني انه من محبتي الكم احجي
اريدنها مرتاحة ومدللة

چااا اكثر من هيج دلال يفاطمة
حتى من الدلال اخوتها اخترعو وصارو مهموشين

هاذ كريم ما ياكل عشة اي شي
اله معلاك
وابوه يحط بيده ويكله روح اكل
اكله اخترع الصبي ويتبطر عالنعمة
يكلي خل ياكلون المن تعبان انه

خلهم يجاسمية بخيركم يشبعون
خافن باجر تدور وينحرمون
مثلي انه واخوي ظلينه مهب ريح
للعمام  والخوال
وتالي شوفت عينج خية
اااااخ ااااااخ

وهسة شني صار وياا صباح
رجع مثل گبل لو بعدة

اهون خية اهون
هاااه شوي حجايه بسالفه
يطلب يأمر
وانه خد وعين وياه
الما ربج يفرجها

ماترحين تشوفين خالج جاسم
فاطمة خالج مريض كلش

شنهو يوجعة

ظهرة كلش موزين وجعان
انه صدك زعلت علي من يوم عملتهم ويه حسن
وبطلت اروح الهم
وشكد جاني وحبني من راسي وصالحني
بس انه ابد
كتله عملتك وي حسن عملة جبيرة
وماكدر اغلط بحقك وانته اخوي الجبير
جااا انته للوادم والناس كلهة تشهدلك بوكفاتك وزيناتك
وكعداتك وحلك للمشاكل والطلايب
وتجي يم حسن هالمكرود وتخبط صافيها
ليش الولد ما بي قصور
كافي خيرة شرة
وكاعد بيناتنه وماراد منكم شي
حب بنيتك وطلبها منك
تكسر ظهرة تخلي يخرب وي عمامة
ونوب تكسر روحة وتطلكة من مريته
حتى الله ما يرضه بي الظلم
ونته الخير الدين
وتعرف الحلال والحرام ليش يخوي ظلمته
وهوة طول عمرة طوع امرك
وهوة يفاطمة جنه حاس على غلطة
بس من سمعت بي مريض
ماطاني كلبي ورحت ليه اشوفه
كلش تعبان يفاطمة خالج

الله يشافي ويعافي
لا ماروحن بعدة كلبي ما طاب جرحة على اخوي المظلوم
وصباح هم حلفني يمين ماطب على خوالي
هاي بس عليج يخليني ادخل
يكلي جاسمية تختلف
وانه هالله يالله توة وجهة افترج علي
اروح اغضبه وانه مابيه بعد كافي الي بيه
اكلج ما اجالج بعد حسن

اي
اجة من اخذ فليسات الظامهن عدي
ويكول لكيت خوش كاع جبيرة بس اعوز فوك هذن العدج
كتله انه اداينك من فلوس ابو فخريه
استرخصت منه والرجال ما كال لا
كلي اطي شكد ما يعوز
عاد اخذهن وراح
وبعد ما دريت خذاها الكاع يو بعدة