فجأه عدنان طلع في وشي لمن خلعني ، بقيت مبحلقه فيهو و قلبي عمل شححح بعدها اشتغل دق دق زي الدلوكه و جاتني رجفه غريبه كدا!!
ما عارفه ليه هو شاميني للدرجه دي! ليه بعاين لي بالحده دي كأني كاتله ليهو زول؟!
اتحرك من جنبي و دخل الحمام و انا خلصت وضو و مشيت ، اول ما جيت داخله كدا سيما قالت لي ما لقيتي الحمامات ولا شنو؟
قلت ليها لا لقيتهم ، قالت لي غريبه مشيت هناك لكن ما لقيتك.....اظنك مشيتي حمامات الرجال 🙆♀️
قلت ليها يمكن ، ما كنت عارفه انكم مقسمين حماماتكم ، قالت لي عادي ما مشكله ، المهم دخلت معاها جوه و طلبت منها تجيب لي مصلايه ، صليت و مشيت ليهم في الهول لقيتهم جايبين الغدا ، هبه قالت لي الناس ديل من قبيل منتظرنك ، قلت ليهم كنتوا تبدوا طوالي ، معليش يا خالتو ، قالت لي لا لا ولا يهمك يا بتي و ذاتو ما إنتظرناك كتير ، المهم قعدت و بدينا أكل و ونسه في نفس الوقت ، إنبسطت شديد من أهل سامي و الله طلعوا ناس طيبين و ظريفين مع إنو دي أول مره اقابلهم فيها بس حسسونا انهم بعرفونا من زمان ، المهم اتغدينا و شربنا الشاي و قلنا ليهم بعد دا نحنا حنمشي ، دخلنا ودعنا أبوهم و طلعنا ، سامي و أمو و اختو قدمونا لحد الباب و امو تشيل و تشكر فينا بعدها ودعتنا و دخلت جوه مع بتها بس سامي كان واقف معانا ، قال لينا حـ أوصلكم ، سماهر قالت ليهو أخو مها حـ يجي يوصلنا ، اتصلتي عليهو يا مها صح؟
قلت ليها لا ما إتصلت ، روان قالت لي يعني نضطر ننتظرك لحد ما تتصلي عليهو و ننتظرو مسافة يجينا! غيتو بتبالغي يا مها! ميامن قالت لي بس عايزا افهم انتِ ليه ما اديتي أخوك خبر قبل ما نطلع؟
قلت ليهم كدي أسكتوا ياخ ، قلت لـ سامي يعني عدنان دا جا و سكن معاكم هنا؟
قال لي لا بس جا عشان أبوي و حيرجع بعد شويه ، إبتسمت و قلت ليهو طيب ممكن خدمه ؟
قال لي شفتي إبتسامتك دي ما بتريحني خالص ، خدمة شنو عليك الله يا مها!
ميامن قالت لي عايزا تعملي شنو يا مصيبه؟
قلت ليهم على كل الأحوال انتوا حتصلوا بيوتكم بغض النظر عن الحـ يوصلكم منو ، قلت ليهو سامي بلييييز لبي لي طلبي دا ، قال لي اها عايزا شنو؟
قلت ليهو ..........الخ
قال لي أمري لله ، غيتو بت لايوقه زي لياقتك دي ما لاقتني يا مها ، قلت ليهو أدخل و اعمل القلتو ليك ، بعد ما دخل إتلفت على سماهر و ميامن و روان و قلت ليهم مثلوا كويس ، ظابط؟
سماهر قالت لي غيتو إنتِ! ميامن قالت لي لو المره دي ضربك كف عديل ما غلطان ، روان قالت لي انتِ متين بتخططي لـ دا كلو؟
قلت ليها دا اسمو تخطيط لحظي و......سكت لمن سمعت صوت سامي و هو جاي ، سامعاهو من جوه بقول : معليش بس وصلهم عشاني.....عرفتو بتكلم مع عدنان و أصلاً هو دخل جوه عشان يجيبو ، اول ما حسيتهم قربوا من الباب غمزت لـ البنات و بقيت خاته يدي على راسي و عامله فيها بتألم ، اول ما سامي و عدنان جوا طالعين البنات اتلموا فيني و عملوا روحهم ساندني و انا شغاله ليهم واي ما قادره اقيف يا بنات ، راسي لافي شديد ، ما عارفه الحصل لي شنو فجأه كدا ، ميامن قالت لي معناها حـ نضطر نوصلك لحد بيتكم حتى بعدها نرجع بيوتنا ، روان قالت ليها مع إنو ماما حتجوط لو إتأخرت أكتر بس ما بنقدر نخليك كدا ، سماهر قالت ليها فعلاً بس مضطرين ، سامي قال ليهم انا لو ما طلعت لي شغله ضروريه كنت وصلتكم بذات نفسي بس ما مشكله عدنان حيوصل مها و يوصلكم معاها ، قالوا ليهو لا لا ما عايزين نتعبو معانا ، طبعاً بتكلموا و بحمروا لي عشان خليتهم يكذبوا ، قلت ليهو حقيقة يا سامي ما عايزين نتعـ.....قبل ما أتم كلامي عدنان إتحرك على عربيتو بزهج! ركب و قال لينا بضيق تعالوا ، ميامن قالت لي بصوت خافض عمري ما حـ اسامحك على الموقف البايخ دا يا مها ، سماهر قالت لي بالجد يا مها ماف داعي لـ دا كلو ، عايني ليهو بسببك اتضايق كيف! و كمان مجبور يوصلنا! ....قلت ليها هو طبيعي متضايق و بعدين دا كلو لمصلحتو ، متأكده في النهايه كلكم حـ تشكروني ، حتى هو ، روان قالت لي دي آخر مرهـ اشارك معاك في مخطط ، كلهم بصوت واحد قالوا لي بصوت واحد : "و نحنا كمان " ، فجأه كدا عدنان ضرب البوري ، سامي قال لينا امشوا قبل ما يغير رأيو ، المهم مشينا عليهو و انا لسه بمثل اني تعبانه ، ركبت قدام و التلاته ديلك ركبوا ورا و هم متحسسين شديد ، المهم لغاية ما وصلنا افريقيا ماف زول فتح خشمو و عدنان كالعاده صاري وشو ، البنات نزلوا و قالوا ليهو شكراً ليك ، ما رد عليهم طوالي إتحرك ، قلت ليهو لو ما كنت تعبانه شديد ما كنت حـ اتعبك و اخليك توصلني ، طبعاً سفهني سفهة العدو ، شويه كدا مازن أخوي اتصل علي ، عملت التلفون صامت و دخلتو جوه الشنطه ، سكته ساي و قلت الليله لو ما سألني بيتكم وين ما حـ أوريهو ، المهم بعد دقيقتين كدا غير شارعو ، مشى طويل و تاني غيّر الشارع و بقى يكرر في حركتو دي و أنا خشمي ما فتحتو ، بعد اللفلفه الكتيره دي كلها دور العربيه و رجع بـ نفس الشارع الجينا بيهو! ما عرفت انو راجع بيت ناس سامي إلا لمن وصلنا جامعة افريقيا و اتجاوزها!
قلت ليهو دقيقه دقيقه إنت ماشي وين؟
ما رد علي! ....قلت ليهو لو سمحت رد علي بتكلم معاك أنا ماشي بي وين؟
قال لي بزهج من قبيل مالك ما إتكلمتي؟ بيتكم دا انا ساكن معاكم فيهو ولا جاركم عشان أعرفو وين؟
قلت ليهو الموضوع ما خطير كنت تسألني بس 😊
قال لي يعني إلا يسألوك؟
قلت ليهو آي ، عاين لي بغيظ و سكت ، قلت ليهو بيتنا في الطائف ، ما رد علي و واصل سواقه لغاية ما وصلنا بيت ناس سامي ، أنا بالجد اتغظت منو و حركتو وجعتني ، نزل من العربيه و دخل جوه و قفل الباب!
على قدر إعجابي بيهو شميتو ، في نفسي قلت هسي في داعي للموقف دا يا مها!
فجأه كدا سامي جا طالع ، ركب العربيه و قال لي مش كلمتك أنا؟ اصلك ما بتسمعي الكلام ، قلت ليهو بالجد طلع واحد ما عندو لا ذوق لا أخلاق ، قال لي دي حاجه جديده؟
دور العربيه و قال لي طلعتيني كذاب قدامو ، لمن جا راجع و لقاني لسه قاعد شك فيني! والله إلا قلت ليهو في عطل في عربيتي ، طبعاً جا زهجان أداني مفاتيح عربيتو و قال لي وصلها و طبعاً من دون ما اسألو اوصل منو عرفت انو دي إنت الجا راجع بيك ، قلت ليهو ما مشكله الجايات أكتر من الرايحات ، قال لي مها إنتِ مصنوعه من شنو ياخ ؟!
المهم سامي وصلني على مسافه بعيده عن البيت و انا الطلبت منو كدا عشان مازن ما يعمل لي موضوع خاصة إنو من قبيل بتصل علي ، متأكده انهم رجعوا البيت بعد ما كانوا في بيت عمي ، أول ما دخلت البيت لقيت مازن في وشي ، قال لي تلفونك دا جادعاهو وين إنتِ ؟
قلت ليهو اييييك نسيتك عديل يا مازن! معليش تلفوني كان صامت! قال لي كيف يعني نسيتيني؟! قلت ليك لمن تكونوا راجعين اتصلي علي عشان اجيبكم هسي دي حاجه بتتنسي؟
قلت ليهو ما كنت قايلاك جادي يا مازن لأنو دايماً لمن كنت بقول ليك وصلني معاك بتقول لي طريقنا ما واحد! قال لي يعني ما نسيتي صح؟
قلت ليهو لا نسيت كلامك لأني من البدايه ما كنت قايلاك جادي فيهو ، عاين لي بغيظ و دخل جوه! ....ما فاهمه ليه اتضايق كدا عشان ما وصلنا! و اصلاً ليه كان مُصر يوصلنا!؟
المهم بعد يومين من الكلام دا نزلنا جامعه ، طبعاً دي آخر سنه لينا ، ميامن قالت لينا ما مصدقه انو دا آخر سمستر لينا و بعدها حنكون خريجين ، روان قالت ليها احسن ذاتو عشان نتخلص من معط الجامعه دي ، قلت ليها بالعكس ، الحياة بعد الجامعه ممله شديد ، حتحسي بفارغ كبير و مخك حـ يضرب اخماس في اسداس و ما حتعرفي تعملي شنو في الخطوه الجايه ، حتحسي نفسك تايهه كأنو دي النهايه و تاني ماف شي بعدها ، حتحتاجي فتره عشان ترتبي افكارك و تكتشفي مهاراتك و تتذكري إنتِ قريتي شنو و اتخرجتي لشنو😂
سماهر قالت لي كلامك صح ، عشان كدا خلونا نستمتع بالأسابيع الفاضله لينا دي ، قلت ليهم جداً ، خلونا نطلع اليوم ، ميامن قالت لي اوعك تقولي لينا شارع النيل ، قلت ليها لا ما شارع النيل ، رايكم شنو نمشي لـ نوتيلا بار الفي الطائف! قالوا لي تمام ما عندنا مانع ، المهم قمنا و مشينا على القاعه لأنو زمن المحاضره جا ، لمن وصلنا القاعه الباب كان مقفول ، ميامن قالت لي سجمنا اتأخرنا دقيقه عشان كدا استاذ معاذ ما حـ يخلينا ندخل ، ضربت الباب 3 مرات بس ما فتح لينا ، سماهر قالت لي أحسن نرجع بكرامتنا لأنو لو استمرينا نضرب في الباب كدا حـ يفتحو و يسمعنا فارغه و يهينا قدام الدفعه كلها ، روان قالت لي فعلاً يا مها خلينا نمشي ، قلت ليهم ثواني بس ، تاني ضربت الباب ، لمن سمعنا صوت رجلين جايه على الباب ، ديلك كلهم رجعوا لـ ورا و خلونا واقفه براي قدام الباب ، أول ما أستاذ معاذ فتح الباب ، قال لي صدقي كنت عارف إنو دي إنتِ ، قلت ليهو انا بحضر محاضراتك على طول عشان كدا لاحظت غيابي و زي ما بقولوا في الليلة الظلماء يفتقد البدر 😃
قال لي لا بس ماف زول عبيط و عنيد زيك ، قلت ليهو طيب ندخل؟
قال لي زمن المحاضره ضاع! قلت ليهو ما مشكله نحضر الباقي منها ، إتلفت على صحباتي و قلت ليهم ارح و أول ما إتلفت على أستاذ معاذ لقيتو واقف نفس وقفتو! يعني ما زح لينا من الباب عشان ندخل ، قال لي ما فهمتيني يا أستاذه ، المقصود اني ضيعت زمن معاكم و هسي ما عايز أضيعو أكتر و طوالي قفل الباب و دخل ، إتلفت عليهم لقيتهم التلاته بحمروا لي! روان قالت لي هسي في داعي لـ دا؟ قلت ليها المحاضره مهمه و بعدين لازم الإنسان يحاول عشان يصل لـ هدفو ، بالنسبه لي شرف المحاوله افضل من عدم المحاوله حتى لو كانت النتيجه واحده و......سماهر قالت لي خلاص عليك الله ما تمعطينا ، قلت ليها اسكتي اسكتي يا عدوة المنطق ، مشيت الشباك و بقيت أحضر المحاضره بالشباك و استاذ معاذ يعاين لي ساي و كل ما يقول حاجه أنا بتمها ليهو و لو سأل بجاوب حتى لو كانت إجابتي غلط ، المهم لمن المحاضره خلصت و هو جا طالع قال لي المره الجايه بدري سامعه ولا لا؟
قلت ليهو اوكي ، قال لي لو اتأخرتي تاني الشباك دا بقفلو منك ، عاين لـ ناس سماهر كدا و مشى ، ميامن قالت لي هسي بسببك حيكون قال علينا مهملات و ما مهتمين بمحاضرتو ، قلت ليها دي الحقيقه 😂🤣
المهم طلعنا من الجامعه و مشينا نوتيلا بار فرع الطائف ، الساعه تقريباً كانت 10 قعدنا ساعتين هناك بعدها طلعنا ، سماهر قالت لينا في مول قريب من هنا خلونا نمشي ليهو عايزا اشتري كم حاجه ، روان قالت ليها قصدك انفال مول؟ قالت ليها آي ، المهم مشينا معاها أنا و روان بس لأنو ميامن رجعت بيتهم عشان جوهم ضيوف ، المهم بعد ما طلعنا ، مشينا وقفنا جنب الظلط ، طبعاً الشمس كانت سخنه و في زحمه شديده و الحافلات البتجي كلها مليانه! قلت ليهم حـ اتصل على مازن و فعلاً اتصلت عليهو و قلت ليهو يجينا ، قال لي تمام مسافة الطريق ، مشينا لأقرب شجره و قعدنا تحتها ، بعد ربع ساعه كدا سماهر قالت لي اتأخرنا والله ، روان قالت ليها آي و انا بقيت ما قادره أفتح عيوني من شدة النعاس ، قلت ليهم انتظروا شويه ، سماهر مشت على الظلط و قالت لي في حافله جايه يمكن يكونوا فيها مقاعد فاضيه ، روان طوالي مشت ليها و انا من مكاني ما إتحركت ، قلت ليهم احساسي بقول لي إنها مليانه ، فجأه الحافله وقفت ليهم فطوالي نادوني ، لمن مشيت عليهم سماهر جات نازله و قالت لي فيها مقعدين بس و ذاتهم ما جنب بعض عشان نتعصر فيهم الـ 3 ، قلت ليها انتوا بيوتكم بعاد عشان كدا امشوا و انا بنتظر مازن ، روان قالت لي لا لا نمشي كلنا سوا أو نقعد سوا ، في الأثناء دي سايق الحافله كان بضرب لينا في البوري عشان وقفناهو ، قلت ليهم ما حتجيني حاجه اركبوا ياخ و انا مازن حـ يجيني ، سماهر قالت لي لكن.....قلت ليها سماهر وقّفنا الناس اركبوا ياخ و انا ما بتجيني حاجه!
المهم بعد إصرار مني و زهج من سايق الحافله ركبوا و مشوا و أنا رجعت قعدت في مكاني و بقيت منتظره مازن و لمن اتأخر اتصلت عليهو ، قال لي ماشي عليك والله بس الشارع زحمه و قبل شويه حصل حادث!
قلت ليهو انت وين هسي؟
قال لي في شارع الجبل ، قلت ليهو شنو؟ ايييك الوداك الحته البعيده ديك شنو؟
قال لي كنت في رحله مع اصحابي للخزان ، قلت ليهو ما تقولي لي انك خليت اصحابك و جاي من اقصى جنوب الخرطوم عشان ترجعني البيت!
قال لي دا الحاصل ، قلت ليهو كذاب يا مازن قول الحقيقه! قال لي بالجد دي الحقيقه! .....قلت ليهو غيتو حيرتني معاك يا أخوي، ضحك و قال لي الزول اصلو ما يعمل فيك حسنه؟ قلت ليهو فجأه كدا؟ .....المهم اسمعني ، حـ امشي اقيف في الظلط و لو جات عربيه حـ اركب و اتصل عليك لأنو شكلك حـ تتأخر ، قال لي لا لا بجيكم يا زوله!
المهم قفلت منو و بقيت مبهوره فيهو! اجي مازن دا مالو! معقوله خلى رحلتو و اصحابو و قاطع المسافه دي كلها من اقصى جنوب الخرطوم عشان يجي يوصلني البيت! ....سبحان الله! كنت بحنسو تحانيس عشان يوصلني للبيت أو اي مكان تاني!
اها اثناء ما انا قاعده تحت الشجره الضلها وارف و بارد اشوف ليك عربية عدنان جايه من بعيد ، قلبي عمل شحححح و حسيت برعشه في جسمي ، قلت يا محاسن الصدف و يا حلاوة حظي البخليني اشوفو في كل مكان بمشي ليهو ، إبتسمت ابتسامه عريضه و قلبي فرهد ، شلت شنطتي و بإستعجال مشيت على الظلط ، قلت في نفسي متأكده انو حـ يشوفني لأني الوحيده الواقفه جنب الظلط و الشارع ذاتو شبه خالي من الناس عدا سايقين العربات ، فجأة تلفوني رن ، لقيتو مازن ، قلت دا ما وقتو مع ذلك كنت حـ أرد بس عربية عدنان جات قريبه مني ، إبتسمت و رفعت ليهو يدي ، شافني بس اتجاوزني و مشى!
ما بنكر اني اتضايقت من حركتو دي بس مع ذلك ختيت ليهو العذر و قلت معليش يا مها إنتِ عارفاهو مالو ، مازن اتصل علي تاني قبل ما أرد كدا فجأه جا بتاع موتر و خطف مني التلفون و التاني جرا الشنطه بس أبيت افكها ليهو ، بقيت أصرخ و اضرب الحرامي في يدو ، لمن التاني ساق الموتر بسرعه عاليه أنا جيت واقعه و فكيت ليهم الشنطه و بكدا سرقو الشنطه و التلفون ، بقيت قاعده على الأرض و ببكي ، جوني كم نفر من الناس الشافوا الحصل و قالوا لي ربنا يعوضك و الجاتك في مالك سامحتك ، ما رديت عليهم و واصلت في بكاي ، تلفوني دا عندي فيهو حاجات مهمه غير صوري و فيديوهاتي المحتفظه بيها من زمان ، واحد قال لي البكي ما برجع الإنسرق قومي يا بتي كفاك ، اثناء ما هو بتكلم معاي كدا و انا ببكي فجأه ظهرت عربية عدنان! نزل و جا قال ليهم في شنو ؟
قالوا ليهو تلفونها و شنطتها إتسرقوا ، قال ليهم ذاتا غبيه لو ما كدا ما كان حـ تقيف جنب الظلط و هي شايله تلفونها ، الراجل قال ليهو الحمدلله انها جات في الشنطه و التلفون بس لأنو 9 طويله ديل عادي يقتلوك و يقلعوا حقك منك المهم قومي يا بتي الله يرضى عليك ، وقفت على حيلي و انا ببكي ، عمو طلع قروش و مداهم لي قال لي أوصلي بيهم بيتكم ، ما إتوقعت خالص انو عدنان يقول ليهم حـ اوصلها معاي ، الراجل قال ليهو تكون ما قصرت يا ولدي و ربنا يكتر من أمثالك ، المهم الناس فاتت و عدنان ركب و قال لي منتظره شنو؟
مشيت ركبت معاهو و أنا لسه موجوعه على تلفوني و محتويات شنطتي ، بقيت كل ما دموعي تنزل بمسحها ، فجأه قال لي الوحده براها تعّرض نفسها للسرقه و الخطر و بعدين تقعد تتباكى ، دا غباء و بلاده منك كونك تقيفي في الظلط و إنتِ ماسكه تلفونك ، قلت ليهو بإنفعال ما بلومك أكيد ما حتحس بي ، ما أنا بس ما حتحس بكل الناس الحوليك لأنك مغرور و متعجرف و شايف روحك ، طبعاً قلت ليهو كدا لأنو كلامو غاظني ، لمن سكت و ما رد علي قلت معناها كلامي جرحو و أثر عليهو ياخ انا ما متعوده اتعامل كدا مع الناس ، مسحت دموعي و قلت ليهو معليش ما قصدي اقول ليك كدا ، ما رد علي واصل سواقه عادي ، استعجلت و قلت ليهو بيتنا في الطائف في ()جنب () وصفت ليهو سريع عشان ما تحصل نفس قصة المره الفاتت لمن سكته و ما وصفت ليهو البيت و في الآخر رجع بي بيت ناس سامي ، طبعاً لحدي ما وصلني البيت ما اتكلم معاي عكسي انا الكنت بتكلم و بقول ليهو قدر شنو تلفوني و المحتويات الكانت فيهو و الفي شنطتي غاليه علي ، رغم مساختو و بياختو و رغم انو كان محسسني انو أطرش لسه كنت بتباكى و بشكي ليهو و هو اطرش بس مع عارفه ليه كنت مرتاحه جنبو و إتمنيت إنو المسافه تطول ، المهم لمن وصلني البيت ، قلت ليهو شكراً ليك ، كـ عادتو ما قال حاجه و أول ما نزلت اتحرك طوالي ، وقفت في مكاني و بقيت اعاين لـ عربيتو المشت بعيد عني ، فجأه كدا ابتسمت في عز زعلي على السرقه الحصلت لي ، قلت دي خطوه كويسه كونو وصلني البيت! معناها عدنان قابل للتغير و متأكده تغيرو حيكون على يدي أنا 💜🥀
أول ما دخلت البيت لقيتهم جايطين و كل واحد ماسك تلفونو و مقلق ، أول ما ماما شافتني جات جاريه علي و قالت لي مشيتي وين انتِ و تلفونك وين مازن اتصل عليك كتير بس قال تلفونك مغلق و نحنا ذاتنا اتصلنا عليك و برضو تلفونك مغلق و بعدين مالك عامله كدا في شنو يا بتي مالك ؟
بابا و مزن جوا علي و بابا كان بتكلم مع مازن قال ليهو جات يا مازن تعال البيت ، بعد ما قفل منو قال لي الحاصل شنو؟
رميت نفسي في حضنو و حكيت ليهم الحصل ، ماما قالت لي ووووبعلي و انتِ لشنو تتقالعي معاهم في الشنطه! يا بتي وقت جات في الشنطه بس كان تخليها ليهم ، بابا قال لي تاني ما تمشي براك و انا قبل كدا نبهتك ، قلت ليهو ما مشيت براي يا بابا ، مزن قالت لي كان تركبي مع صحباتك و تضايقوا في الكراسي لغاية ما تصلوا لأنو الدنيا بقت ما أمان ، ماما قالت ليها عشان هي غبيه و غير كدا ما بتسمع الكلام ، انا مية مره قلت ليها لو حصل شنو داك خليك مع الناس و ما تمشي براك أو تقعدي براك لكن هي ما بتسمع مني و......بابا قاطعها و قال ليها خلاص كفايه خلوها تدخل ترتاح ، دخلت جوه و انا لسه مخلوعه ، المهم مازن لمن جا برضو جا و قال لي كنتِ تخلي صحباتك يقعدوا معاك أو تمشي معاهم و افضل كان تنتظروني و و و غيتو جاط شديد و انا حسيت انو اصلاً متضايق من حاجه و عايز يتفشى فيني ، جاط فيني أكتر من ماما و بابا! يعني الموضوع ما مستاهل الجوطه دي كلها بس ما عرفتو مالو!
يتبع.......
