لحد ما رجعت البيت موضوع عدنان دا ما فارق بالي ، بالجد زعلت عليهو شديد ، طبعاً ناس البيت استغربوا انا ساكته ليه و سرحانه وين فـ بقوا يسألوني الحاصل شنو ، قلت ليهم إنحكت لي قصه كئيبه عن واحد علشان كدا أنا زعلانه عليهو ، ماما قالت لي إنتِ قلبك رهيف و أي حاجه بتنقال ليك بتأثر عليك ، عشان كدا بقول ليك حاولي ما تتعمقي في أي كلام تسمعيهو أو أي روايه تقريها ، الدنيا دي مليانه مواجع لو قلتي تزعلي على دا و دا و دا بتموتي حسره ساي ، بابا قال لي الإحساس بالناس حاجه كويسه بس إنتِ كمان يا بتي بتبالغي و بتعيشي شعور الشخص المتضرر أكتر منو ، مازن ضحك و قال ليهو خليها عامله فيها قلبها أبيض و سفيره للنوايا الحسنه 😂😂
عاينت ليهو بغيظ و قلت ليهو أحسن من قلبك الزي الحجر دا ، قال لي خلاص خلاص ما تبكي ، قلت ليهو أحسن ليك تسكت مني ، شايفني عايزا أبكي هسي؟
قال لي دقيقه ، طلع منديل و قال لي هاك أمسحي بيهو دموعك ، قلت لـ بابا إتكلم معاهو ياخ ، بابا قال ليهو خلاص يا مازن خليها ، مزن قالت لي عشان تشوفي المساخه و البياخه دي حاره كيف ، حركات مازن الهسي دي نفس حركاتك البتعمليها لينا 😂
المهم قمت منهم مشيت صليت العصر و أخدت لي نومه ما صحيت إلا مع المغرب ، صليتو و مشيت دخلت المطبخ حشيت لي عيشه بالجبنه و رجعت غرفتي أكلتها هناك ، بعد ما خلصتها ، مسكت تلفوني و بقيت أفكر أعمل شنو!
بعد مسافه فتحت تلفوني و دخل جهات الإتصال و إتصلت عليهو ، الخط كان خاشي بس هو ما برد ، بقيت بتصل و بتصل لحدي ما فتح الخط و قال بزهج معاي منو!
صوتو سكتني ، ما عرفت اقول ليهو شنو ، لمن سكاتي طال هو طوالي قفل الخط ، تاني اتصلت و المره دي رد علي طوالي و قال ياخ يا تقول إنت منو يا أحظر الرقم دا و لو دا إنت يا سامي بطل حركاتك دي و....
_عدنان
سكت لمن ذكرت إسمو ، قال لي بنبرة حذر ايوه عدنان منو إنتِ ؟
قلت ليهو ما حتتذكرني ، قال لي تمام عايزا شنو؟
طبعاً سؤالو غاظني بس قلت ما مشكله يا مها إنتِ عارفه كويس هو ماري بشنو ، قلت ليهو اتصلت عشان اقول ليك إنو سامي ولد عمك واقع في ورطه ، قال لي بنبرة شك : بتعرفيهو من وين و ليه ما اتصل علي هو و بعدين انتِ منو ذاتك وريني!
قلت ليهو ماف زمن و طوالي قفلت الخط و انا بقول في نفسي دا شنو دا العملتيهو دا يا غبيه! ورطة شنو الواقع فيها سامي 🤦♀️
طوالي في نفس اللحظه اتصلت على سامي قبل ما عدنان يتصل عليهو ، أول ما سامي فتح الخط قلت ليهو اوعك ترد على إتصالات عدنان ، قال لي كدي قولي بسم الله في شنو؟
طوالي وريتو و قلت ليهو من دون ما افكر قلت إنك في ورطه عشان اقدر اتكلم معاهو و هسي ما عارفه اعمل شنو! قال لي يعني لسه مصره؟
يا مها افهمي ياخ عدنان لا حـ يتغير لا هو عايز يتغير عشان كدا ما تتعبي نفسك ساي ، قلت ليهو ما مشكله عايزا أتعب نفسي ، قال لي طيب على راحتك و على فكره في مكالمه خاشه من عدنان ، قلت ليهو طيب ما ترد خليني لمن أفكر في خطه ، المهم بعد قفلت منو ، بقيت اقول اعمل شنو اعمل شنو! فكري فكري يا مها ، فجأه كدا عدنان إتصل علي ، إبتسمت إبتسامه عريضه بس ما رديت عليهو إلا بعد مسافه ، أول ما فتحت الخط قال لي سامي وين هو و شنو الحاصل عليهو؟
سكته و بقيت افكر اقول ليهو شنو! قال لي بهرشه كدا إتكلمي ياخ!
انخلعت و قلت ليهو بسرعه : اتضارب ليهو مع كم نفر كدا حاولوا يسرقوا تلفونو ، قال لي قولي بس هو وين؟
قلت ليهو هسي رجع البيت لأنو المشكله إتـ......قاطعني و قال لي بضيق بس قولي لي هو وين؟
قلت ليهو في البيت ، قصدي مشى بيتهم و......طوالي قفل الخط في وشي ، برضو قلت ما مشكله مش براي قبلت التحدي دا!
أول ما قفل مني إتصلت على سامي بس ما رد علي ، كررت الإتصال أكتر من مرهـ بس برضو ما رد علي ، دخلت القروب حقنا و حكيت للبنات الحصل ، اتريقوا علي كويس و قالوا لي الشلاقه ليك شنو 🤣🤣
قلت ليهم المشكله إنو سامي ما برد على تلفونو ، عايزا افهّمو يقول شنو ، قالوا لي حاولي تاني لغاية ما نشوف الفارغه بتاعتك دي نهايتها شنو ، قلت ليهم دي ما فارغه و بكرا حتشوفوا و تقتنعوا ، واثقه في نفسي أنا و متأكده إني حـ أقدر أغيرو 😌💅
بعد ساعه من اتصالاتي المتكرره على سامي إتصل علي هو ، لمن فتح الخط قلت ليهو جادع تلفونك دا وين إنت انا من قبيل بتصل عليك عشان اقول ليك..
_ عشان تقولي لي انك قلتي لـ عدنان إني اتضاربت مع كم نفر كدا حاولوا يسرقوا تلفوني صح؟
قلت ليهو عدنان قال ليك كدا؟ بس ما يكون عرف إني كذبت عليهو؟
قال لي ما عرف أنا إتداركت الموقف عشان ما أطلعك كذابه قدامو ، جاني في البيت و خلعني و خلع ناس البيت لمن قال انو في بت اتصلت عليهو و قالت ليهو اني واقع في ورطه و سألني عن الحصل لي و اذا فتحت بلاغ ولا لا و و و ، في البدايه راسي كبس بس في ثواني فهمت إنو انتِ ورا الكلام دا فإضطريت أواصل في كذبتك و ألفت ليهم كلام خارم بارم ، قلت ليهو اه الحمدلله إفتكرتو كشفني ، سامي ضحك و قال لي غيتو تاني ما تعملي لي وجع راس معاك ، و لو فهمتي انو عدنان مستحيل يتغير بكون أحسن ، قلت ليهو انت أصبر بس و الأيام بيناتنا ...
المهم بعد أسبوع كدا قلت لـ سامي تعالوا شارع النيل عازماكم هناك ، قال لي إنتِ ما عندك مكان تاني غير شارع النيل دا ؟ قلت ليهو ياخ انا جايباك لهدف ، قال لي أعوذ بالله من أهدافك ، عايزا مني شنو كمان؟
قلت ليهو اتصرف ، بأي طريقه خلي ولد عمك يجي معاك ، قال لي عدنان ما حيجي ، قلت ليهو حاول معاهو ، قال لي انا بعرفو كويس يا مها ، قلت ليهو حاول معاهو ، قال لي اخخ انا منك! .....قفل مني و رجع لي بعد ربع ساعه و قال لي زي ما قلت ليك قال ما حيجي ، قلت ليهو طيب قول ليهو......قاطعني و قال لي مها ما تخليك عنيده كدا! ما فهمتي الكلام القلتو ليك؟
قلت ليهو فهمتو ، بس أطلب منو يوصلك و خلي الباقي علي ، اتنهد و قال لي إنتِ عديمة موضوع ، قلت ليهو المهم تخليهو يوصلك ، بعد ما قفلت من سامي رسلت للبنات و قلت ليهم عازماكم في شارع النيل و حكيت ليهم الكلام الحصل بيني و بين سامي ، قالوا لي نفس كلام سامي ، إني ما عندي موضوع و و و بس ما إشتغلت بيهم لأني واثقه من نفسي....
المهم جهزت نفسي و استأذنت من ناس البيت و طلعت ، مشيت بالمواصلات و وصلت قبليهم ، و طوالي إتصلت على عماد كان بدرس في جامعتنا بس إتخرج قبل سنتين بس لسه متواصل معاي ، بعد ما قفلت منو انتظرتو دقيقتين لقيتو قدامي ، بعد ما سلم علي قلت ليهو كنت متأكده إنك حتكون هنا ، قال لي شارع النيل مكاني المفضل ، اها يا مستر بين عايزا تعملي أي نوع من أنواع المصايب؟
ضحكت و قلت ليهو هي ما مصيبه كل العايزاهو منك إنك تتشاكل معاي و تحاول تقلع مني التلفون ، ضحك ضحكه طويله كدا بعدها قال لي ما دا الطبيعي حقنا نحنا دايماً بنتشاكل و انا دايماً بحاول اقلع منك تلفونك عشان احذف صور الذله الماسكاها لي ، قلت ليهو ركز معاي يا عماد ، عايزاك..........الخ ، بعد ما خلصت كلامي قال لي ما فهمت عايزا تعملي كدا ليه؟
قلت ليهو أف منك ياخ ضروري تعرف كل حاجه يعني؟
قال لي بس ما يكون عايزا توقعيهو في شباكك و تخليهو يحبك؟
قلت ليهو بري إنت عارف إني ما زولة حب ، تاني ضحك و قال لي عشان كدا سألتك و بعدين إنتِ متين بقيتي بت مع البنات عشان تحبي!؟😂
ضربتو في يدو و قلت ليهو اصلك حيوان خلاص ، قال لي ما تتحسسي يا مستر بين ، قلت ليهو المهم يا عماد بلييييز ساعدني و ضروري الخطه دي تنجح ، قال لي أورط نفسي يعني؟ اها لو زولك دا مسكني و داني القسم أو وقع فيني ضرب كسر عضامي كلها اقول يا منو؟
قلت ليهو قول يا مها ، حـ اوديك المستشفى و كل يوم حـ اجيب ليك عمود مليان محشي و فراخ و كمان مديدة حلبه ، قال لي للأسف العرض غير مغري 😂
قلت ليهو امممم رايك شنو ألمعك قدام سماهر و أطبل ليك! عاين لي مسافه و قال لي ماف حاجه بتروح عليك ، قلت ليهو أكيد! قال لي حتقولي ليها شنو؟
قلت ليهو حـ أمدحك قدامها و اطبل ليك و ما فيك أسويهو فيك عشان تُعجب بيك زي ما إنت معجب بيها ،، قال لي اتفقنا يا زولتي ، اها عيدي لي الكلام تاني ، قلتي أعمل شنو ؟ ؟ قلت ليهو..........الخ
بعد ربع ساعه كدا لمحت عربيه جايه من بعيد ، ما كنت متأكده اذا دي عربية عدنان أو لا بس قلت احسن اعمل حسابي و أقوم من هنا و فعلاً قمت من مكانا المتعودين نجي نقعد فيهو ، مشيت بعيد شويه و بقيت أراقب في العربيه و اول ما شفت سامي اتأكدت انو دي عربية عدنان ، طوالي اتصلت على عماد و قلت ليهو وين انت تعال ، قال لي أصلاً انا قريب منك و حالياً شايفك ، لمن إتلفت وراي لقيتو جاي علي ، لمن وصلني قال لي مع أنو ما عارف الهدف من الحيحصل دا كلو شنو بس المقابل بيستحق المخاطره ، ضحكت و قلت ليهو ما حـ اقصر منك و بكرا حـ أخلي سماهر تركز معاك و تنتبه لوجودك ، قال لي طيب من زمان مالك يا فقر ، قلت ليهو كل حاجه في وقتها حلوه ، عدنان أول ما نزل سامي دور عربيتو عشان يرجع ، قلت لـ عما بإستعجال يلا يلا العربيه جايه بيجاي ، طوالي لزاني لكن بقوه لمن قربت أقع بالجد ، قلت ليهو ما كدا يا حيوان ، جرا مني الشنطه بقوه! و بقيت أجرها منو و انا بتلفت ساي و شايفه انو عربية عدنان قربت علينا ، انا و عماد بقينا نتجارر في الشنطه و بنحاول نخفي ضحكتنا ، قال لي إنتِ ممثله فاشله ، ما تضحكي ياخ ، قلت ليهو انت ذاتك بتضحك ، قال لي زولك وصل حـ ألزك بس خليك ماسكه في الشنطه لأني حـ أكون ماسكها معاك عشان ما تقعي ، قلت ليهو طيب لكن براحه ، أول ما هو لازاني كدا انا الغبيه إنخلعت و فكيت الشنطه و مع رجعتي لـ ورا عتر لي حجر و من هناك جيت واقعه على الأرض في نفس الطريق الجايه بيهو عربية عدنان
يتبع......
