اتصال سامي خوفني ، ختيت يدي على قلبي و فتحت الخط ...
من دون مقدمات قال لي تلفونو خلص شحن عشان كدا قافل ، قال لي كدا و على طول قفل الخط! ضميري ما ريحني ، قعدت ألوم في نفسي و قلت معقوله ترفضيهو هو و في النهايه تجي تحبي ولد عمو لا و كمان تتصلي و تسأليهو عنو! انا عارفه قدر شنو الحاجه دي مؤلمه و قاسيه ، سامي دا ربنا يجبر كسرو و يسعدو دنيا و آخره و يا رب يشيلني من بالو عشان يقدر يكمل حياتو عادي ، المهم بعد صلاة العصر كدا و اثناء ما أنا داخله الواتس و بقرا رسايلي القديمه مع صحباتي و ببكي ، عدنان رسل لي و قال لي تلفوني ما كان شاحن ، قلت ليهو ايوه سامي كلمني ....قرا رسالتي بس ما رد عليها! كنت حـ اطلع من الواتس بس رسل لي تاني و قال لي ممكن اسألك سؤال؟
_ ايوه اسأل
= في شي بينك و بين سامي؟
طبعاً اتخلعت! قلت يمكن سامي قال ليهو بحبني! !
_ أكيد لا! مناسبة السؤال شنو ما فاهمه! !
= لا ولا شي
_ استحاله تكون سألتني من دون سبب!
= لا بس حبيت اتأكد
_ عشان شنو؟
قرا الرساله و ما رد عليها ، عرفتو ما عايز يتكلم كتير في الموضوع بس ما أكذب فرحت فرحت شديد لمن عيوني بقت بتلمع ، معناها بغير علي و حب يتأكد اذا في شي بيني و بين سامي 🙈
_ خلاص خلاص خلينا نغير الموضوع
= بكون احسن
_امبارح اتصلت علي ليه؟ تلفوني كان جوه الشنطه ، مكالماتك ما شفتها إلا الصباح
= اتصلت بالغلط
_ ياخي 4 مكالمات بالغلط؟
= عادي بتحصل
_ ما بتحصل إلا عندك! ....ياخ بطل سغاله و قول لي اتصلت علي ليه؟
= زي ما قلت ليك بالغلط
_ عدنان ياااااااخ!!
_قول لي سووورعه
_عايزا اعرف ناااااو ناو
طبعاً سفهني لما يكون ما عايز يجاوب بسفه عادي ، قلت ليهو أسفهني كويس 😔
_على فكره انا زعلت
_ ما حـ اتكلم معاك تاني
_ حـ احظرك
طبعاً الغاظني شديد انو فاتح الدردشه و بقرا رسايلي بس الغتيت ما برد! بالجد زعلت و طلعت من الواتس ، بعد يومين كدا بابا قال انزل اشتغل معاهو في الشركه ، فـ عشان انا حاسه بالملل و في نفس الوقت زعلانه بسبب الفجوه الحصلت بيني و بين صحباتي و بين سامي و البـ سببها بقيت معظم وقتي سرحانه و حاسه إني ما تمام حتى ناس البيت لاحظوا الحاجه دي فـ قررت انزل اشتغل في الشركه و ألهي نفسي شويه ، فعلاً في اليوم البعدو جهزت نفسي و طلعت مع بابا من الصباح ، وصلنا الشركه و مشيت معاهو مكتبو ، قلت ليهو ما عارفه اعمل شنو! ! طلع لي ملفات و قال لي راجعيها لي كلها و اكتبي لي ملاحظاتك ، بعد شويه كدا سمعنا صوت الباب ، بابا قال اتفضل ، جات موظفه داخله ، بابا قال ليها يا داليا دي مها بتي عايزك تكوني معاها و تفهميها طبيعة الشغل ، قالت ليهو حاضر ، بابا قال لي أمشي معاها ، قلت ليهو طيب ، فعلاً مشيت معاها و شلت الملفات معاي، اول شي لفينا الشركه كلها و اتعرفت على الأقسام الفيها و طبيعة الشغل ، بعدها مشيت معاها مكتبها ، يلي هو عباره عن مكتب مفتوح حق موظفين ، قالت لي حسن اليوم ما جا بتقدري تقعدي في مكتبو و تبدي شغل ، اول ما قعدت في جزو من الموظفين البعرفهم و الجو عرس مازن اخوي جوا سلموا علي و قعدوا اتونسوا معاي شويه كدا و مشوا ، كنت بدعي اني ما أشوف نور دي تاني لأنو شوفتها بتوترني و بتحسسني بإني عاجزه و ما قدرت اعمل حاجه ، المهم اليوم الأول كان صعب علي خاصة انو بابا ضغطني شديد بـ الملفات و كل مره يطلب مني اعمل ، بس مع ذلك انبسطت بالشغل و بتعامل الموظفين الحلو معاي ، قبل ما اطلع مع بابا من الشركه أخدت لنفسي صوره و انا في الكرسي و جنبي كميه من الملفات و نزلتها في الفيس و كتبت عليها هسي انا بقدر على الضغط دا كلو؟ 😭😭
كتبت كدا و طلعت من الفيس و مشيت البيت مع بابا ، طبعاً اول ما وصلت بقيت أحكي لـ ماما عن يومي في الشركه ، قلت ليها بابا عذبني عذاب ، قالت لي أصلو أبوك ما برحم في الشغل قومي ارتاحي شويه مسافة أجهز ليكم الأكل ، قلت ليها طيب ، مشيت غرفتي استحميت و بعدها طلعت و صليت العصر ، شويه كدا جاتني الشغاله و قالت لي بنادوك تحت ، قلت ليها طيب جايه ، طوالي نزلت لقيتهم مجهزين الأكل ، قلت ليهم أخيراً يااااخ كنت حـ أموت من الجوع ، بابا ضحك و قال لي ليه ما فطرت في الشركه؟ قلت ليهو ما فطرت لأنو الملفات الأديتني ليها كانت كتيره ، قال لي حـتى ولو 10 دقايق ما كانت حـ تأثر ، ماما قالت لي بالغتي والله! ....المهم أكلت و بعد خلصت قلت لـ ماما مزن مشت وين اليوم؟
قالت نسيتي ولا شنو مش نزلت ترينق في رويال كير؟ قلت ليها ااااانسيت ، المهم قعدت اتونست و شربت معاهم الشاي بعدها مشيت غرفتي و مسكت تلفوني ، أول ما فتحت الفيس لقيت اشعارات كتيره و كلها كومنتات في الصوره النزلتها قبيل ، عاد الأولاد بحبو الإنبراش زي عيونهم ، انا صفحتي دي من زمان موجوده و دي اول مره عدد اللايكات تكون 400 و الكومنتات اكتر من 200 ؟!! بالجد استغربت!
بديت اقرا في الكومنتات كلها ، واحد كاتب لي بت زي الحرير معقوله تنضغط الإنضغاطه دي كلها! ! و واحد تاني كاتب لي اخيراً شفناك يااااخ و فيهم البسأل مرتبطه ولا لا و و و ، يعني كل الكومنتات كانت انبراشات و جزو منها كان تشجيع ، كنت بقرا و بضحك لحد ما عيني وقعت على تعليق الزول الداخل بـ مجهول ، كان كاتب لي: يعني نعمل ليك شنو؟ اذا ما بتقدري على الشغل دا نحنا ذنبنا شنو ولا بس عايزا تنزلي صورتك عشان الناس تنبرش فيك!
مع إني ما بحب اتجادل مع زول بس الكومنت حقو ضايقني ، قلت ليهو ماف زول رابط في الحساب بتاع ألغي المتابعه عشان ما تضطر تشوف صوري دي كل يوم 😊
ما رد علي تاني ، المهم جريت دخلت الواتس عشان اشوف عدنان مرسل لي ولا لا ، لقيتو ما رسل لي طبعاً من اليوم داك تاني ما رسلت ليهو مع اني مرات بضعف و بقرب ارسل ليهو بس بمنع نفسي و بقول انا الزعلانه منو فـ مفروض هو يحاول يراضيني و يعتذر بس للأسف ما إهتم بي ، نفس البوست النزلتو في الفيس ختيتو في حالتي قلت عشان يشوفها و يسألني بديت شغل متين و كدا ، بعد 5 دقايق ظهر لي انو شاف الحاله ، قلت هسسي حـ يرسل لي ، انتظرتو كدا لمن قلت زهجت بس ما رد علي ، اتغظت غيظ! ما عارفاهو مالو كان كويس معاي و هسي بدا نفسنه! ! غيتو نفسنة الأولاد دي كعبه!
اتحرقت حرقه ما عاديه و همي كلو بقى كيف اخليهو يركز معاي و يرسل لي ، طوالي عملت استثناء لكل الناس في الإستوري ما عدا هو و بقيت انزل كلام عن الحب و كدا إحساس اني عايشه قصة حب مع واحد و كلو عشان عدنان يسألني بس ولا اشتغل بي مع انو بشوف حالاتي!
استمريت على الحال دا اسبوع ، في يوم لمن كنت في الشركه بابا قال لي بعد ساعه حيكون عندي اجتماع مهم مع وفد امريكي و قطري عايزك تمسكي لي الموضوع دا و تهتمي بترتيبات استقبالهم من اول ما يصلوا لغاية ما يطلعوا و اتأكدي لي انو غرفة الإجتماعات جاهزه و شوفي لي الموظفين المفروض يحضرو الإجتماع اذا مكتملين و و و ...الخ قلت ليهو حاضر يا بابا ، فعلاً عملت الترتيبات المطلوبه و اتأكدت من كل حاجه ، بعد ساعه كدا قالوا الوفد وصل ، بابا صلح بدلتو و قال لي حـ اطلع استقبلهم قلت ليهو أمشي معاك؟
قال لي ايوه تعالي ، المهم طلعنا نحنا الإتنين و معانا نفرين شركاء بابا في الشركه ، طبعاً اول ما طلعنا للوفد عيني وقعت على عدنان! بابا سلم عليهم كلهم و لمن جا دوري برضو سلمت عليهم كلهم و لمن وصلت عدنان حسيت برجفه و اتوترت شديد ، مديت ليهو يدي من دون ما أعاين ليهو ، سلم علي عادي و ذاتو ما أدى زول إحساس اننا بنعرف بعض حتى انا حسسني كأنو ما بعرفني! !
المهم دخلناهم غرفه مخصصه للضيوف و ضيفناهم أحسن ضيافه بعدها كلهم مشوا و دخلوا غرفة الإجتماعات ما عدا بابا و عدنان كانوا بتكلموا ما عارفه بقولوا في شنو بس لمن قربت منهم شويه سمعت بابا قال ليهو ان شاء الله ما حـ نديهم فرصه فينا و الصفقه دي أكيد حتكون من نصيبنا ، عدنان قال ليهو بإذن الله بس زي ما قلت ليك يا عم الوفد الأمريكي دا ما ساهل و بدققوا في أصغر التفاصيل فـ ان شاء الله مشروعكم يكون مقنع بالنسبه ليهم ، بابا قال ليهو إن شاء الله بنقنعهم ، المهم هم مشوا و انا رجعت مكتب بابا و قعدت فيهو ، بعد ساعتين الإجتماع خلص و بابا جا داخل ، قلت ليهو هااا الصفقه كانت كيف؟
قال لي قالوا محتاجين زمن يدرسوا فيهو المشروع من كل النواحي ، الأمريكان ديل ما بقتنعوا بسهوله و مستحيل يوقعوا على حاجه من أول إجتماع ، قلت ليهو هسي مشوا هم؟
قال لي آي مشوا ، طبعاً لمن قال كدا قلبي إنفطر و زعلت شديد ، فجأه كدا سمعت بابا بقول ايوه دخليهو ، طبعاً كان بتكلم مع السكرتيره شويه كدا الباب ضرب ، بابا قال اتفضل يا عدنان ، قلبي عمل شحححح لمن هو جا داخل ، بابا قال ليهو كويس انك ما مشيت معاهم .. عايز اتناقش معاك في كم حاجه كدا ، عدنان قال ليهو جداً المهم قعد و بابا طلب لينا قهوه كلنا و بدوا هم الإتنين يتناقشوا و انا بس ساكته ساي و بعاين ليهم ، طبعاً عشان بابا موجود ما قدرت أعاين لـ عدنان كويس ، شويه كدا السكرتيره اتصل على بابا فـ طوالي استأذن مننا و قال هسي حـ أرجع ، قال لـ عدنان لو اتأخرت قول باقي كلامك لـ مها هي تقريباً فاهمه علينا من قبيل بنقول في شنو ، صح يا مها؟
هزيت ليهو راسي بمعنى ايوه ، بعد ما طلع عم الصمت هو بقى يشوف في الملفات القدامو و انا بس بعاين ليهو و بقول دا مالو كمان!
مسكت تلفوني و بقيت أعاين فيهو و أضحك ساي ، برضو ما اشتغل بي ، تاني عملت نفسي بسجل في ريكورد ، قلت فيهو : اف منك يوووخ هسي دي حاجه بتزعل؟ مفروض أنا أزعل منك ما إنت!
بعدها ضحكت عشان عدنان يقول انو الشخص السجلت ليهو ريكورد دا رد علي و كتب لي كلام بسطني ، تاني عملت نفسي بسجل ريكورد و قلت فيهو: خلاص ما زعلانه منك ، بالجد ما زعلانه يوووخ انا عارفه انو زعلي ما بهون عليك و حقيقة انا ما بقدر ازعل منك فتره طويله ، انت ما عارف قدر شنو انا كنت مخنوقه لمن بطلنا نتكلم مع بعض ما حـ اقدر أوصف ليك قدر شنو سكوتك بموتني ، ايوه انا عارفه نفسي زعلتك و ليك حق تزعل من تصرفاتي بس ما مهما يحصل بيناتنا ما تخلينا نبعد عن بعد أكتر من ساعتين ....لمن قلت كدا رفع عينو و لقاني بعاين ليهو و أصلاً انا من بديت كلام بعاين ليهو لأني قاصداهو و هسي لمن رفع راسو و لمحني بعاين ليهو طوالي شلت عيوني عنو و عملت رايحه ، تاني بديت اسجل ريكود و اتكلم بـ رومانسيه و كلام غيتو استغفر الله بس ، اصلاً دا كلو بسبب عدنان هو الوصلني للمرحله دي و برودو دا غايظني ، فجأه كدا قاطعني اثناء ما انا بتكلم مع الشخص الوهمي و قال لي ابوك شكلو حـ يتأخر عشان كدا حـ اشرح ليك فكرتي و ملاحظاتي و كل النقاط البهتم بيها الوفد الأمريكي ، مشيت قعدت في الكرسي الجنبو طبعاً ما جيت جنبو كدا لفحتني ريحة عطرو ، من دون ما يعاين لي بدا يتكلم ، في نهاية كلامو قال لي لو حـ تنسي الكلام دا أو حاسه نفسك ما حـ تقدري تصيغيهو للوالد بطريقه كويسه خليني ألخصو ليك ، طبعاً عشان انا عايزاهو يقعد فتره طويله قلت ليهو لخصو لي و أول ما بدا يكتب أنا سرحت فيهو و اتمنيتو ما يوقف كتابه ، اول ما خلص للمره التانيه رفع راسو و لقاني بعاين ليهو ، قال لي دا الملخص ، عاين لـ ساعتو يدو و قال لي حـ أمشي بعد دا و طوالي طلع و مشى و انا ما باقي لي إلا البكاء 💔
في نفس اليوم دا بليل ما قدرت أمنع نفسي فـ طوالي رسلت ليهو عدنان كيفك؟
بعد مسافه قال لي تمام! تمام و بس! !
ما عرفت اقول ليهو شنو لأنو واضح انو ما عايز يتكلم معاي! ما عارفه الغيرو شنو فجأه كدا! !
ختيت تلفوني على جنب و قعدت أبكي ، عملت شنو انا عشان اي زول اعرفو يكون معاي كويس و بعدها يتغير علي! ....مالي انا عيبي شنو؟
لو غلطت مع حد منهم مفروض يوريني غلطي و يقول لي عشان انتِ عملت كدا انا أخدت موقف و زعلت بس كونهم كلهم كدا يتغيروا و من دون سبب واضح بالنسبه لي معناها المشكله فيني أنا 💔
ليلي داك شلتو بكى و بقيت اتذكر فيهم واحد واحد ، سماهر ، ميامن ، روان ، سامي ، عدنان للأسف من دون ما يفهموني شي اتغيروا علي 💔
من اليوم داك خلاص بديت أفقد ثقه في نفسي ، قلت معناها العيب مني انا عشان كدا الناس دي نفرت مني ، شدة ما نفسيتي تعبت و ثقتي بقت تقل حتى في اللبس بقيت بقيف قدام المرايه مسافه و انا بفكر اللبس دا جاي معاي ولا لا مع انو زمان كنت بشوف اي حاجه فيني حلوه و اني انا البخلي الملابس حلوه بس كانت عندي ثقه كبيره في نفسي بس هسي بدت تتلاشى 💔
أنا ما بحب العلاقات البتنتهي على الساكت كدا ، لمن علاقتي صحباتي بدت تدهور و شفت منهم تصرفات معاي ما حلوه جبتهم ة حبيت اتأكد منهم و اعرف هم فهمهم شنو و اذا في سوء تفاهم و كلو عشان ما اظلمهم و هسي لمن خلاص صدقت حقيقتهم و عرفت هم شنو وقفت منهم و هم ذاتهم من اليوم الجبتهم و حكيت ليهم الإتقال عنهم ما اتكلموا معاي تاني ، ياخ يوم عرس اخوي ما سلموا علي و عملتوا نفسهم ما شايفني ، بس هسي ما عدنان الوضع مختلف لأني ما عارفه انا بالنسبه ليهو شنو ، ايوه صح انا بحبو بس دا ما معناهو انو بحبني ، اصلاً انا وحده شوم و ماف زول بحبني و كلهم كانوا مستغلني و في نفس الوقت ما بطيقوني 💔
عدت فترة بتاعة شهر كدا حذفت فيها حسابي من الفيس و الواتس ، حتى المكالمات خصصتها بحيث انو بس اهلي هم البقدروا يتصلوا علي ، كنت مواصله شغلي في الشركه بس ما حاسه بطعم الحياة دي ، يوم لمن رجعت البيت مع بابا لقينا ماما بتتكلم بالتلفون و هي مبسوطه ، بعد ما خلصت قالت لينا دا مازن قالوا جايين السودان بكرا ، بابا قال ليها كلمني ربنا يوصلهم بالسلامه ، خبر جية مازن فرحني ، اشتقت ليهو شديد و حاسه إنو لي سنوات منو ، متأكده انو لو كان موجود كان حس علي و جا يسألني الحاصل عليك شنو ، كان حـ يطبطب علي و يطلعني يفسحني من دون ما يعرف انا مالي ، يعني حتى لو ما حكيت ليهو ما بزعل مني و بكون مُصر انو يراضيني ....
تاني يوم ماما جابت فكرة اننا نمشي نستقبلهم في المطار و فعلاً مشينا كلنا بعربية بابا و استقبلناهم هناك ، ياخ انا لمن شفتو حضنتو و بكيت جنس بكى في الدنيا دي! ضحك و قال لي دا كلو شوق؟
ماما قالت ليهو والله من مشيت و هي حالتها بطاله ، ضماني عليهو شديد و قال لي هسسسس خلاص انا جيت ، بعدها فكيتو و سلمت على سماهر ، لمن وصلنا البيت هم طوالي مشوا شقتهم ، ارتاحوا شويه و جونا نازل و قعدوا يتونسوا معانا ، شويه كدا مازن طلع فوق و جا نازل و هو معاهو شنطتين ، طبعاً انا من شفت الشنط عرفت انو جايب لينا هدايا لأنو دي عادتو كل ما يسافر بجيب لينا هدايا ، المهم طلعهم كلهم و كل واحد أداهو 3 هدايا أما انا جاب لي 4 مزن طوالي دقت جرس و قالت ليهو لييييه العنصريه دي يا مازن انا ما اختك! ما اختك يا مزوووني؟
ضحك و قال ليها أختي لكن إنتِ ما أصغر وحده و بعدين انتِ ما فقديني زيها عايني ليها بقت كيف عشان انا سافرت ، مزن قالت ليهو هييي هييي ما تكذب عليك أمورها تمام و كمان نزلت شغل مع بابا و المخليها تعبانه و مرهقه دا الشغل ما شوقها ليك 😂
قال ليها مووووتي كي ، قالت ليهو توووف عليك تاني كدي قول لي تعالي غسلي لي ملابسي ولا أكويها لي ، عاين لـ سماهر و قال ليها بعد دا انا مستغني عن خدماتك ، المهم اثناء ما نحنا بنشوف في الهدايا كدا فجأه مزن صرخت و قالت واااااي ما بصدق! طبعاً كلنا إتلفتنا عليها بخلعه! شالت فستان جميل كدا ما كنت منتبه ليهو و قالت ليهو واااي يا مازن الفستان دا نادر شديد و غالي و الماركه بتاعتو عالميه وووبعلي رهيب رهيب ، قال ليها والله! قالت ليهو والله جد ، دا لمنو؟
قال ليها لـ مهـ.....
_ دا حقي أنا حلو صح؟
طبعاً دي سماهر القالت كدا مازن قال ليها لا لا يا سماهر دا ما حقك حقاتك انتِ جوه في شنطتك ، قالت ليهو لما اشتريناهم سألتني اذا عجبني أو لا ، قال ليها اااأسف أسف انا سألتك عن رأيك فـ الفستان بس كنت جايبو لـ مها ، حسيت ملامح وشها اتغيرت و زي الزعلت كدا ، قلت ليهو خلاص خليهو ليهو اصلاً انا دولابي مليان فساتين ، قال لي لا دا جبتو مخصوص ليك ، مزن قالت لي عايني لو ما عايزاهو أدوني ليهو الفستان دا خطف قلبي رهيب ياخ 😭 مازن قال ليها على فكره الحاجات الجبتها ليك ما هينه! حتى العطور و الساعه و شنطة اليد كانت من أماكن مشهوره في ميلانو ، قالت ليهو ميلانو دي مدينة الموضه ذاتها 🍃🥀
المهم اليوم دا قضيناهو ونسه ، بقيت كل ما اسكت مازن يقول لي ساكته مالك بقول ليهو لا لا ماف حاجه غيتو نظراتو لي وترتني بقيت بتكلم بالغصب عشان هو ما يقعد يقول لي الحاصل عليك شنو....
لمن الساعه 11 جات و كل زول مشى غرفتو انا أول ما دخلت غرفتي اتغطيت و غمضت عيوني لأني متأكده انو مازن حـ يجيني و فعلاً جا داخل و بقى ينادي علي لمن لقاني مغمضه عيوني افتكر إني نمت فـ طلع طوالي و قفل الباب ، بعدها فتحت عيوني و طوالي إتملت بالدموع 💔
الإكتشفتو اني لمن بحب زول بديهو كل مجهودي و طاقتي و كل وقتي و بحبو بكل جواري و بكل إفراط ، انا بحب بطريقه مختلفه و ، بطريقه متميزه بـ التعمق و بدرجة كبيره من الإفراط ، اذا حبيتك معناها مستعده اضحي عشانك و أوهبك حياتي ، مستعده اسيب كل حاجه في يدي و اجي اقيف معاك و أواسيك لمن يحصل ليك مكروه ، مستعده اقعد معاك يوم كامل عشان بس اخفف عنك و اشجعك و احاول ألون ليك الحياة و عشان اقول ليك انا هنا متى ما احتجتني و متى ما حسيت انك عايز ركن أمان و طمأنينه انا هنا ، مستعده اخسر راحتي و صحتي عشان انت تكون مرتاحه مستعده اعمل اي شي في الدنيا دي يخليك تكون مبسوط مقابل دا كلو انا ما عايزا شي غير إني ما أندم على اختياري ، ما عايز مخدتي تتبلل بالدموع و اقعد اقول ما استاهلوا العملتو عشانهم ، ما عرفت اختار عشان كدا اتخذلت، عايزا ناس تحسسني انو لو وهبتهم روحي عديل ما خساره فيهم 😴💔
يتبع.......
