طوالي إتلفت على مصدر الصوت! !!!
عماد!
قال لي بضيق في عداوه بيني و بينك؟
وقفت على حيلي و قلت ليهو عماد اقعد خليني اشرح ليك ، قال لي بصوت عالي ما عايز اسمع منك أي حاجه لأنك وحده منافقه و بتاعة حركات! كنتِ ماشه معاي كويس و بتشجعيني عشان امشي اصارح سماهر و أول ما عرفتي انو اخوك عايزها طوالي جيتيني عشان تبعديني عن طريق سماهر و الساحه تفضى لأخوك و ما بعيده تكوني من بدري عارفه اخوك عايزها بس قلتي كدي ألعب بمشاعرو شويه عشان بعدين كسرتو تكون أعظم!...للسبب دا ما كنتِ بتجيبي سيرتي لـ سماهر و ذاتك ما حاولتي ولا مره تلفتي نظرها لي رغم انك عارفه هي بالنسبه لي شنو من زمان ، قلبي اتكسر مرتين مره لمن عرفت انها بتحب غيري و المره التانيه لمن عرفت انو غيري دا أخوك و بكدا عملتك الوسخه وضحت لي ، انتِ وحده أنانيه ، بتعملي نفسك بريئه و انو ماف زول واصل درجتك في الطيبه و المحنه ، عملت ليك شنو أنا؟ عندك مشكله شخصيه معاي! قولي ما تسكتي لأنو عملتك دي عملت زول عندو غبينه و ضغينه و... و....
عيوني إتملت دموع و المشكله إنو ما ناوي يسمعني ، بقيت ببكي و بقول ليهو أديني فرصه بس عشان افهمك الحصل يا عماد أنا ما.....قاطعني و قال لي بنبره عاليه خلت كل الموجودين ينتبهوا لينا : إنتِ ما شنو؟ ما منافقه ولا ما كذابه ولا ما أنانيه ولا ما وحده بـ وشين! أنا بالجد مصدوم فيك و ما كنت قايلك كدا! !مصنوعه من شنو انتِ! يعني كنتِ كاتله حيلك ساي و عامله نفسك مسكينه ،، لا و شنو دايماً بتقولي عايز انشر السعاده في كل مكان بتواجد فيهو! و شنو ما بعرف بس الحقيقه الإنتِ ما عارفاها انك وين ما مشيت بتعملي مشاكل و غير التعاسه و الحزن ما بتنشري حاجه! ما عارف منو الأداك الحق و فهمك انو سعادة العالم دا بين يديك و إنتِ البتقرري منو يكون مع منو أو منو مناسب لـ منو ! اطلعي من الدور الغبي الإنتِ متغمصاهو دا لأنك غير الوجع و حرقة القلب ما بتعملي حاجه و....
_ في شنو؟
الإتنين عاينا لـ عدنان بس ماف زول رد عليهو ، لمن شافني ببكي كرر السؤال تاني و قال لي ممكن اعرف الحاصل شنو؟
برضو ماف زول اتكلم و انا واصلت في بكاي ، آخر حاجه قالها لي عماد هي : انا عمري ما حـ اسامحك على عملتك دي ، ما إتوقعتك كدا أبداً! انتِ آخر انسانه اتوقعتها تطلع بالشكل دا! .....قال كلامو دا و طوالي اتحرك من جنبي ، بقيت انادي عليهو عشان يسمعني بس ما رد علي ، واصل مشيهو لحد ما طلع من الكافتيريا ، قعدت و ختيت يديني على وشي و بكيت كويس ، بعد مسافه كدا عدنان قال لي دا مش نفسو الكنتِ معاهو في شارع النيل! لمن كنتوا بتتجارروا في الشنطه!
ما رديت عليهو لأني كنت غرقانه في دوامة بكى و عتاب لنفسي ، فجأة كدا قام و مشى مني ، قايلاهو طلع برا الكافتيريا بس بعد شويه جا راجع و جاب لي معاهو مويه ، مدا لي كرستاله و معاها مناديل ، مسكتهم منو ، طلعت منديل و مسحت بيهو دموعي بعدها شربت من المويه و هديت شويه ، بقينا الإتنين قاعدين و ساكتين ساي و هو تاني ما سألني عن الحصل بيني و بين عماد ، عارفه انو الموضوع ما بهمو بس انا كـ طبيعتي لمن تكون في حاجه مضايقاني و واجعاني بحتاج أشاركها مع زول خاصة لمن أكون في حالة بكى ، من دون مقدمات قلت ليهو : هو فهمني غلط ، انا ما لي علاقه بالحصل دا كلو و أصلاً ما كنت عارفه بالشي البين أخوي و صحبتي ، قال لي يعني دا ما حبيبك؟
قلت ليهو لا ، واصلت كلامي و قلت ليهو ، هو بحب صحبتي و انا عارفه الحاجه دي و لمن قرر ياخد خطوه لقدام جا شاورني و انا شجعتو عشان يمشي و يعترف ليها ، فعلاً هو مشى ليها لكن ما اعترف و فضل انو يتقرب منها أولاً لحد ما براها تحس بيهو أو كان منتظرها تحبو من تلقاء نفسها ، انا والله ما كنت عارفه انو اخوي بحبها برضو و هي كذلك! لمن عرفت جيت كلمتو بس ما قلت ليهو انو اخوي هو البحبها! و هسي عرف و افتكر إني كنت بلعب بمشاعرو و اتهمني اني زحيتو من طريق صحبتي عشان أخوي!
بعد مسافه قال لي الموضوع بسيط و واضح إنو ما ليك علاقه و بعدين هو ليه يلومك إنتِ عميان من صحبتك دي! ليه ما مشى لامها! لأنو عارفها ما عندها ليهو حاجه و براهو كان معشم نفسو و لو إنتِ بالجد زي ما قال عنك ما كنتِ حـ تشجعيهو عشان يمشي و يعترف لـ صحبتك! هو غبي ساي و عايز ليهو شماعه بس عشان يعلق فيها خيبتو فـ لقاك إنتِ و جا إتفشى فيك!
قلت ليهو بالجد قلبي واجعني عليهو ، ما يستاهل الحصل ليهو ، انا أكتر وحده عارفه قدر شنو هو بحب سماهر و ميت عليها!
قال لي صحبتك عارفه ؟
قلت ليهو عارفه شنو ؟
قال لي حيكون شنو مثلاً؟
قلت ليهو آي عارفه و طلبت مني اصارحو بالحقيقه دي ، قال لي و ليه تطلب منك إنتِ! مفروض هي تتكلم معاهو و تفهمو انو قسمتهم ما مع بعض طبعاً دا من باب الذوق و لو شايفه انو ماف داعي تتكلم معاهو و ما مديه اهميه لمشاعرو ما مفروض تطلب منك تصارحيهو بدلها!
قلت ليهو أكيد ما شافتها حاجه هينه كونها تقيف قدامو و تقول ليهو ما عايزاك لأني بحب غيرك!
عاين لي مسافه و سكت ، شويه كدا تلفوني رن ، المتصله كانت ماما ، ردت عليها و قلت ليها جايه يا ماما ، قالت لي وين إنتِ؟قلت ليها حـ اجيييي يلااا بااااي بااااي ، قفلت الخط و قلت ليهو حـ أمشي بعد دا ، هز لي راسو بس أول ما اتحركت و طلعت من الكافتيريا جا لاحقني ! قال لي يا إنتِ! لمن إتلفت عليهو قال لي حـ أوصلك و من دون ما ينتظر رد مني ركب عربيتو و ضرب لي بوري! طبعاً انا كنت منططه عيوني و بحاول استوعب في البحصل دا! !عدنان بذات نفسو عايز يوصلني! من تلقاء نفسو كدا! !
والله لحد ما ركبت معاهو و انا مستغربه فيهو و بعاين ليهو ساي! لمن لقى نظراتي ليهو طالة قال لي في جريده معلقه على جبيني!
قلت ليهو لا بس صراحة ما إتوقعتك تقول لي في يوم خليني أوصلك!
قال لي بس انا ما قلت ليك خليني أوصلك!.....قلت ليهو اقسم بالله قلت لي كدا ، عاين لي كدا و سكت ، قلت ليهو لو ما قلت لي كدا شنو البخليني اركب في عربيتك و شنو البخليك تكون سايقها و انا راكبه معاك! !
طبعاً ما رد علي!
و تاني انا ما اتكلمت طول الطريق على غير عادتي لأنو بالجد كلام عماد واجعني ، المهم عدنان وصلني البيت ، لمن نزلت قلت ليهو اتفضل معاي البيت ، رفع القزاز و مشى! غيتو استغربت فيهو و قلت كائن متناقد خلاص! !
المهم عدت فترة البحوث و المناقشات و بعد تلات أسابيع كان التخريج في نادي الضباط ، بعد يوم من التخريج وصلتني هديه و رساله من مجهول فيها تهنيه بمناسبة التخرج بس ما عرفتها من منو!!
المهم بعد اسبوع كانت خطبة ميامن و أمين ، بالجد يعني خطبتهم كانت بسيطه و جميله و مرتبه! و هم الإتنين كانوا حلوين شديد! صورتهم كم صوره مع بعض و لمن رجعت البيت نزلت الصوره في الفيس و كتبت عليها: وووسععع واااااسيييع ، اليوم كانت خطوبة أجمل ثنائي 😭😭💜💜 ألف مبروووك الخطوبه و ربنا يتم ليكم على خير و يهنيكم ببعض 💜😭😭😭😭
بعد ربع ساعه كدا ما شاء الله البوست عمل لايكات و كومنتات كتيره و معظم البنات انبرشوا في أمين 😂
معظم الناس الفي الكومنتات دي انا بعرفها إلا واحد بس كل مره بعلق على بوستاتي و بحسسني كأنو بعرفني!
كان كاتب لي : "عقبالك " طبعاً هو خاشي بإسم " زول مجهول "
رديت على الناس البعرفها كلها إلا هو!
المهم في نفس اليوم دا زي الساعه 10 كدا ميامن إتصلت علي ، اول ما فتحت الخط قالت لي بنبره عاليه سرعه احذفي الصوره النزلتيها في صفحتك دي ، أخدتي اذن منو إنتِ عشان تنشريها! ليه بتتصرفي من عندك في حاجات الناس؟ هل انا قلت ليك نزليها في صفحتك ولا أمين قال ليك نزليها ! أصلك لو ما حشرتي نفسك في أي حاجه ما بترتاحي!
قلت ليها ميامن قولي بسم الله! في شنو يعني ما فاهمه ما إنتِ عادي كنتِ بتنزلي صورك في السوشيال ميديا! للسبب دا انا ما رجعت ليك و ما اخدت اذنك عشان انزل صورتك إنتِ و أمين! قالت لي حتى ولو كنت بنزل صور ناس بيتنا كلها في الميديا دا ما سبب يخليك تنزلي صورتنا من غير إذنا هسسسي دي هسي تمشي تحذفيها فاهمه ولا لا؟
قلت ليها طيب ، قفلت الخط الخط في وشي!....رغم اني زعلت بس قلت معاها حق ، دخلت الفيس حذفت الصوره ،، كنت حـ أبكي بسبب الطريقه الإتكلمت بيها معاي بس مسكت نفسي ،، بعد مسافه كدا مزن قالت لي يا بت ليه حذفتي صورة ميامن و خطيبها الفي الفيس! كلمت صحبتي عن خطبتهم و قلت ليها مها منزله صورتهم في الفيس دقيقه اتاقيك في البوست فلمن دخلت صفحتك ما لقيتو! !
قلت ليها بصوت محشرج كدا: حذفتها لأنو ميامن ما حبت صورهم تنتشر ، عاينت لي شديد كدا و قالت لي مالو صوتك زي العايزا تبكي! !
قلت ليها ولا شي! جات قعدت جنبي و قالت لي بالجد في شنو؟ ؟
طوالي قعدت أبكي ليها ، انخلعت و قالت لي بسم الله في شنو يا مها مالك؟
طبعاً انا من النوع اللو عايز تعرف منو الحقيقه تعال ليهو و هو ببكي ، انا لمن ببكي ببكي بإستسلام و طوالي بقول المضايقني ، قلت ليها ميامن اتضايقت شديد و للسبب دا شاكلتني بسبب الصوره عشان نزلتها من دون ما أستأذنها!
قالت لي شنو؟ ؟شاكلتك عشان نزلتي صورتها هي و خطيبها! !لا مدياني إحساس انو صورها دي قاعده تشاركها مع أسرتها بس ما هداك ليهو الفيس مليان بصورها بقت على الصوره دي! ولا عشان فيها خطيبه! عليك الله شوف البت الوهميه دي!
طبعاً مزن دي لسانها متبري منها و ما عندها اتنين تلاته و خالص ما بتجامل زول عكسي أنا ، قالت لي تلفونك وينو؟
قلت ليها عايزا بيهو شنو؟ قالت لي عايزا اتصل بالوهميه دي و اقول ليها خلي الخاتم يقعد كويس في اصبعك بعديها اتوهمني ، قلت ليها شنو! !! انتِ مجنونه؟ لا طبعاً ما حـ اديك التلفون و لو شلتيهو ما حـ تعرفي تفتحيهو و بعدين دي صحبتي و برانا بنحل مشاكلنا ، قالت لي حيييا انا منك! آي اقعدي اتمسكني ليهم كدا و خليهم ياكلوا لحمتك نيه! شفتي عشان لقتك مسكينه و هبله و غبيه عشان كدا شاكلتك مع انو الموضوع ما مستاهل عادي كان تقول ليك يا مها احذفي الصوره و خلاص ، قلت ليها ذاتو ما كان أحكي ليك ، قالت لي ذاتو ما كان اسألك لأنك بترفعي الضغط ، قالت لي كدا و اتحركت من جنبي و أول ما وصلت الباب قالت لي ما أنسى ماما قالت ليك بكرا تمشي معاي السوق عشان نجيب كم حاجه كدا للعرس ، قلت ليها يعني خلاص قالوا ما عايزين خطوبه؟
قالت لي آي مازن مُصر انو يكون عقد طوالي ، قلت ليها طيب ، بعد ما طلعت مني ، دخلت الواتس و مشيت لـ محادثتي مع عماد لقيتو لسه حاظرني ، طبعاً في نفس اليوم الجا و شاكلني فيهو رسلت ليهو رسايل و ريكوردات بشرح ليهو فيهم الحصل ، ما عارفاهو سمع الريكورات و قرا الرسايل ولا لا ، بس حظرني من كل المواقع ، المهم لمن دخلت قروبي مع البنات لقيتهم فايرين و الرسايل بتطاقش ساي ، كانوا بتكلموا عن تجهيزات العرس ، في وسط دا كلو فجأه روان ردت على رساله لـ ميامن لمن رجعت لتاريخ الرساله لقيتو قبل اسبوع ، طبعاً انا بقيت ما بدخل الواتس طوالي و القروب دا مره بعد مره يعني فجأه كدا لقيت نفسي ببعد عن صحباتي ، المهم ميامن كانت كاتبه: سامي دا مستهبل ساي و ما عندو سبب يخليهو يشمنا غير نفسياتو دي!
روان ردت و قالت ليها : اتذكري كويس يا ميامن ، انا عارفه هو بكرهنا ليه! ...نسيتوا ولا شنو؟ ؟
قريت الرسايل البعدها ، ميامن قالت ليها شنو ما اتذكرت؟ و سماهر برضو عندها رسالتين بتسأل فيهم روان: نتذكر شنو؟ ؟
صراحة انا ذاتي حبيت اعرف! !
نزلت تحت و لقيت روان كاتبه:
سامي دا بحب منو؟
سماهر : اهااااا
ميامن. : عشاااان كدا ، ياداب اتذكرت! !
باقي رسايلهم كانت عاديه بتكلموا فيها عن العرس و صراحة انا الشمار حرقني! !
رجعت فوق و رديت على الرساله الليها اسبوع دي و قلت ليهم : بحب منو و مشكلتو شنو معاكم عملتوا ليهو شنو إنتوا؟ ؟؟
بقيت منتظراهم عشان يردوا لي و انا مستغربه شديد و بسأل نفسي مشكلة سامي معاهم شنو و دا علاقتو شنو بـ البحبها سامي! !!
بعد ربع ساعه كدا ، روان دخلت و قالت لي يعني نهااااي نهااااي ما كنتِ حاسه إنو سامي بحبك؟ !!!
يتبع......
