مسحت دموعي و قلت ليهو بقلق شنو؟ شنو يا سامي اتكلم !
أخد نفس و قال لي لو قلت ليك إنو صحباتك ديل منافقات و بتاعات مصالح حتصدقيني؟
قلت ليهو أكيد لا يا سامي ، قال لي بس دي الحقيقه ، قلت ليهو سامي ما......قاطعني و قال لي خليني اكمل كلامي للنهايه بعدها أحكمي ، حـ أبدا ليك من البدايه ، متذكره لمن كنا ياداب برالمه في سنه أولى صح و متذكره اول موقف محرج حصل ليك لمن جيتي الجامعه و المشاكل الواجهتك بعدها لحد السنه التانيه و كلو كان بسبب سماهر و روان صح!
قلت ليهو فعلاً يا سامي بس دا كلو حصل في زمان ، قال لي طيب ما سألتي نفسك ليه هم فجأه كدا جوا صاحبوك بعد ما كانوا معادنك و دايماً بعملوا ليك مشاكل! ....قلت ليهو يا سامي ...قاطعني و قال لي صحبتهم ليك كانت مبنيه على المصلحه و الإستغلال ، شهرتك في الجامعه و محبة الناس ليك هي الخلتهم يقربوا منك ، قالوا في نفسهم بدل ما نعاديها و نعمل ليها مشاكل من دون ما نستفيد أحسن نصاحبها و فعلاً دا العملوهو و قدروا يثبتوا ليك إنهم بنات كويسات و كانوا عاملين فيها صحباتك ، صحبتهم ليك خلتهم يستفيدوا منك قولي لي كيف؟
اولاً كنتِ كانوا تحت مسمى الدين كانوا بشيلوا منك قروش و هم عارفين إنو لمن يرجعوها ليك إنتِ ما حتشيليها منهم ، انتِ بعيداً عن الجامعه بتعرفي ناس كتيره مهمه و ليها مكانتها في المجتمع و ابوك راجل معروف و ناسو كتار ، تاني حاجه في الجامعه معظم الناس بتعرفك و أول ما تقعي في مشكله بتلقي مية يد اتمدت ليك و دا الخلى سماهر و روان و ميامن يصاحبوك ، متذكره قبل سنه لمن روان نست بطاقتها في البيت و المراقب ما خلاها تدخل الإمتحان أول حاجه عملتها جاتك بالشباك و ورتك و إنتِ من دون ما تترددي قلتي للمراقب انك ناسيه قلمك برا فلمن طلعتي مشيتي لـ قريبكم مدير القسم و كلمتيهو و هو طوالي جا و اتفاهم مع المراقب و خلوها تدخل ، اقعدي مع نفسك ساعه بس و اتذكري العملتي ليهم كلو من أول يوم عرفتيهم فيهو لحد اللحظه دي ، تلقائياً حـ تفهمي هم صاحبوك ليه و بعدين يا مها لو ركزتي في تصرفاتهم العاديه دي حتشوفي إنهم انانيات مثلاً زي لمن يرسلوك عشان تتشتري ليهم! بالنسبه ليك دي حاجه عاديه لأنك ما عارفاهم على حقيقتهم لكن انا عشان ما زيك ولا بفكر بطريقتك قادر اشوف حقيقتهم و ألاحظ لأقل تصرفاتهم ، انا ما حصل قلت ليك كلام كعب عنهم و ما حصل لمحت ليك ذاتو لأنك كنتِ مبسوطه بصحبتهم و ما شايفه فيهم ولا عيب ، هسي انا ما عارف ليه هم فجأه كدا اتغيروا عليك!.....جايز يكونوا تعبوا من التمثيل أو كانوا عايزنك توصليهم لحاجه معينه و فشلوا فيها! .....البنات ديل ما كويسات يا مها و ما شبهك خالص ، الطيبه و النقاوه و العطاء و السذاجه الفيك خلوك تكوني معرضه للإستغلال ، بقيت ساكته ساي و انا مستغربه و مصدومه من الكلام القالو سامي!! بس مع ذلك ما صدقت ولا حرف من الكلام القالو ، قلت ليهو إنت فاهم غلط يا سامي ، هم ما كدا والله ، قال لي بضيق تصرفاتهم معاك دي أكبر دليل على كلامي ، ديل بنات نفوسهم وسخانه و هسي علشان خلاص أخدوا كفايتهم منك و علشان حـ نتخرج بدوا يظهروا على حقيقتهم لأنو الأسباب الخلتهم يصاحبوك بدت في الزوال و هم على مشارف التخرج ، بس ممكن لو فكروا لـ بعدين يجوك تاني عشان بعد ما يتخرجوا تساعديهم يلقوا ليهم وظيفه! و بعدها يفكوك عكس الهوا ، صدقيني لو استمريتي بطريقتك دي حـ يفضلوا يستغلوك العمر كلو ، قلت ليهو سامي رجاءً ما تغلط في حقهم و معليش حـ امشي بعد دا ، أول ما وقفت على حيلي و كنت حـ أمشي قال لي حـ تنصدمي شديد لمن تكتشفي حقيقتهم و قريباً حـ تتذكري كلامي دا لأنو العلاقات المبنيه على الكذب و النفاق و الأنانيه ما بتدوم ، افتحي عيونك كويس و شوفي حقيقتهم القبيحه ، إتلفت عليهو و قلت ليهو أنا بالجد مصدومه فيك يا سامي و ابداً ما اتخيلت اني اسمع كلام زي دا منك! يعني الزمن كلو كنت بتهظر معاهم و دايماً طالع و نازل معاهم و في الآخر تجي تبهتهم بالطريقه دي! بالجد سقطت من نظري يا سامي ، قال لي مصلحتك بتهمني يا مها ما عايزهم يزعلوك أكتر بتصرفاتهم دي ، قلت ليهو تاني ما حـ اتكلم معاك إلا لمن تشيل الفكره الغلط دي عنهم.......قلت ليهو كدا و مشيت خليتو و انا بالجد زعلانه منو و ما قادره استوعب انو دا سامي القال عن صحباتي كدا! يعني البشوفو كيف كان بهظر و بضحك معاهم ما بقول انو بتنافق عليهم و من جواهو شايفهم بالطريقه البشعه دي !
المهم بعد ما صليت العشا مشيت قعدت في مكتبة بيتنا ، فتحت رواية أوبال اللسه ما كملتها بس ما قدرت اقرا حاجه ، بالي مشغول بالحاصل بيني و بين صحباتي ، مصدومه شديد انا و حاسه الدنيا دي بقت لي كيف كيف بعد ما سمعت الكلام القالو سامي و بعد ما ناس ميامن خاصموني!
اثناء ما انا قاعده و سرحانه بعيد مازن جا داخل ، لمن لقاني سرحانه قرب يدو لـ عيوني و طقطق لي ، لمن انتبهت قلت ليهو متين جيت! .....قال لي في شنو؟
قلت ليهو لا لا ماف حاجه ، قعد قصادي و قال لي ما علي أنا ، قصدي ما علينا كلنا لأنك لمن تكوني زعلانه أو متضايقه من حاجه بكون واضح عليك ، نحنا متعودين نشوفك مبتسمه و ماليه لينا البيت ضحك و فوضى فـ طبيعي لمن نشوفك ساكته كدا حـ نتأكد انو حاصله عليك حاجه! يلا قولي لي في شنو مش أنا أخوك! ....طبعاً عيوني إتملت دموع لمن هو استغرب فيني! قال لي قولي لي في شنو! .....أخدت نفس و قلت ليهو صحباتي زعلانات مني و رافضين يقولوا لي هم زعلانين مني في شنو يعني فجأه كدا الـ 3 قاطعوني من دون توضيح ، تعبت و انا بحاول اتذكر انا غلطت عليهم في شنو بس أبداً ما متذكره اني زعلاتهم في حاجه ، ما عارفه اعمل شنو هسي و اراضيهم كيف و انا ما عارفه هم عتبانين علي في شنو ، مقاطعتهم لي دي مأزماني شديد و حاسه الدنيا دي مسخت لي و......قاطعني و قال لي أنا عارف ، قلت ليهو بإستغراب شنو!؟
اتنهد و قال لي عشان عارفك بتشيلي هم مضاعف لو حسيتي إنو في زول زعلان منك عشان كدا حـ اقول ليك ، قلت ليهو بإستغراب شديد : السبب شنو و انت عرفت من وين؟
إبتسم و قال لي انا مش قبل كدا قلت ليك إنو البت السمعتيني مره بتكلم معاها ما كانت نور!؟ يلا البت دي وحده من صحباتك ....
فتحت خشمي مترين و انا بحاول استوعب في البقولو! قلت ليهو وحده من صحباتي ؟منو دي و من متين و ليه انا ما عرفت الحاجه دي!
قال لي ما كنت عايز زول يعرف حاجه لحد ما أموري تظبط و افتح الموضوع مع الوالد و الوالده بس للأسف حصل خلاف بيني و بينها استمر شهر و حاجه كنت فيهو بحاول اتفاهم معاها و أوضح ليها انو ماف شي بيني و بين نور و إنها فاهمه غلط!
وقفت على حيلي و قلت ليهو دقيقه دقيقه خليني استوعب شويه ، بقيت ماشه و جايه في الغرفه و انا مستغربه ، وقفت و قلت ليهو افهم من كلامك انك على علاقه مع وحده من صحباتي و من زمان كمان! و صحبتي دي بتعرف نور و تقريباً هي عارفه انو نور شغاله معاك في نفس الشركه و بتحاول تتقرب منك!
قال لي بالضبط كدا ، قلت ليهو دي منو يا مازن؟
قال لي خليها هي تحكي ليك عشان تنهوا الزعل الحاصل بيناتكم دا ، طبعاً هي ذاتها متضايقه بسبب الخلاف البينكم ، هي كانت مفتكره اني حكيت ليك عنها و وريتك بـ البينا فلمن انتِ حكيتي ليهم عن نور هي زعلت لأنها قايلك عارفه بالبيني و بينها و مع ذلك عايزا تعرسي لي وحده غيرها! يعني من يوم ما انتِ جبتي ليها سيرة نور و هي مخاصماني و ما أدتني فرصه اتكلم معاها إلا اليوم و هسي دي جيتي منها ، بالجلاله قدرت اتكلم معاها و اشرح و ابرر ليها و في النهايه أكدت ليها انك ما كنتِ عارفه و اني ما عندي حاجه لـ نور و ذاتي ما عشمتها فيني ....
بقيت ساكته ساي و انا حاسه بالغرابه! معقوله دا كلو حاصل و انا ما كنت جايبه ليهو خبر! انا و صحباتي ما متعودين ندس حاجه من بعض! فـ ليه هي ما حكت لي! لو كانت جات و حكت لي بالبينها و بين مازن أخوي ما كانت حتحصل الجوطه دي كلها! الما قادره افهمو ليه هم دسوا مننا الموضوع دا! يعني لا مازن فتح خشمو لا هي فتحت خشمها! دقيقه أساساً هي منو؟ ؟!
قلت ليهو ما قلت لي يا مازن دي منو؟
عاين لـ تلفونو و قال لي قالت هسي اتصلت عليك بس انتِ ما بتردي ، تلفونك وينو؟
قلت ليهو في غرفتي و طوالي جريت جري على الغرفه ، لمن دخلتها لقيت تلفوني بـ رن ، بإستعجال مشيت عليهو و أول ما مسكتو و شفت إسم المتصل لقيتها سماهر! !
دقيقه و انا بعاين في إسمها لمن الخط فصل و تاني رجعت إتصلت ، فتحت الخط و سكته فـ طوالي هي بقت تشيل و تعتذر مني ، قالت لي فهمتك غلط ، افتكرت انك عارفه بـ البيني و بين مازن لأنو قبل كدا قال لي انو حـ يكلمك ، عشان كدا زعلت و لمن سمعتك بتتكلمي مع عماد و بتشجعيهو عشان يصارحني قلت معناها انتِ عايزا تلصقي عماد فيني عشان تزحيني من طريق أخوك و تجيبي ليهو نور العاجباك ، بالجد أنا آسفه يا مها و شديد كمان و حقك علي ، قلت ليها ولا يهمك......قالت لي من صوتك واضح إنك لسه زعلانه مني ، قلت ليها لا ما كدا ، قالت لي طيب ليه حاسه بزعل في نبرة صوتك!
قلت ليها كنتِ عارفه إنو عماد بحبك صح؟
قالت لي أبداً والله ما عرفت إلا في الفتره الأخيره لمن بقى يحاول يتقرب مني ، يوم وصلني الجامعه كان بلمح لي و لمن جيت راجعه عشان اقول ليهو نسيت تلفوني في عربيتك و سمعتك بتشجعيهو عشان يعترف لي اتأكدت إنو بحبني ، بس انا ما بحبو يا مها و ما عايزاهو يتعشم فيني عشان كدا فصلتو و لي يومين ما برد عليهو لمن يتصل ، اتنهدت و قلت ليها دي شنو الجوطه الحاصله دي ما قادره افهم حاجه أنا ، قالت لي صراحة يا مها دا كلو بسببك إنتِ ، الفهمتو انك كنتِ بتدعمي عماد و بتشجعيهو عشان يعترف لي من دون ما ترجعي لي و تعرفي الفي حياتي منو ، و دا برضو واحد من الأسباب الزعلتني منك ، قلت ليها نحنا ما متعودين ندس حاجه من بعض و لأنك ما حصل جبتي لي سيرة مازن أخوي أو غيرو فكيف كنت حـ اعرف انو في زول في حياتك؟ قالت لي دا برضو ما بديك الحق في انك تقرري عن الناس و تحددي منو البناسبهم و منو لا ، دا أبداً ما مجال اختصاصك يا مها ، ما تزعلي من كلامي بس كان لازم انك تفهمي النقطه دي ، و زي ما انتِ الشربكتي عماد فيني ياريت تتفاهمي معاهو و توريهو الحاصل ، و آسفه مره تانيه على الحصل بيناتنا و اعتذاري دا نيابة عننا الـتلاته لأنو ميامن و روان كمان زعلوا معاي منك لمن حكيت ليهم....
قفلت منها و انا شايله هم كيف أواجه عماد و اقول ليهو انو البت البتحبها أخوي برضو طلع بحبها عشان كدا خليها و شيلها من بالك! !
مسحت وشي بيديني و قلت دي مصيبة شنو دي! اعمل شنو أنا هسي!؟
فجأه كدا مازن ضرب لي الباب ، قلت ليهو أدخل ، جا داخل عاين لي مسافه كدا و قال لي ها الحصل شنو؟ الأمور رجعت طبيعيه بينك و بين سماهر؟
هزيت ليهو راسي بـ معنى ايوه ، قال لي طيب ليه ملامح وشك بتقول عكس كدا ؟.....اااا عرفت ليه أكيد مصدومه صح؟ لأنك ما بتفوتي حاجه و روح المحقق كونان دايماً مسيطره عليك بس مع ذلك ما قدرتي تلاحظي لـ البيني و بين سماهر 😂
بالغصب إبتسمت و قلت ليهو آي عشان كدا ، بس سؤال متين بدا الموضوع دا؟
قال لي متذكره في سنه تانيه لمن جيت عشان أدفع ليك الرسوم! بالصدفه شفتها هناك برضها كانت عايزا تدفع ، الوقت داك لسه ما كنتوا صحبات ، و عشان حظي حلو في نفس السنه بقيتوا صحبات و ما عرفت كدا إلا لمن جبتيها معاك البيت و من هناك بدا الموضوع ، ما كنت ناوي زول يعرف لحد ما أجهز نفسي و أبقى زول عرس و هي كذلك ....فجأه تلفونو رن ، لمن عاينت ليهو ابتسم و قال لي دي ما سماهر ، الإتصال من الشركه لازم أمشي ، فعلاً طلع و مشى ، قعدت في الكرسي و حسيت الغرفه لافه بي ، حسب كلام مازن هو على علاقه بـ سماهر من سنه تانيه! بس سماهر كانت بتقول لينا انها حبت ولد أهلها الإسمو مراد و في الأخر خذلها و قصتها معاهو ليها حكاية السنتين كدا! يعني بعد ما عرفت مازن أخوي بـ سنه! !....افهم شنو أنا هسي من الكلام دا كلو! !!...لا لا أكيد في سوء تفاهم!
بتذكر اليوم داك كلو قضيتو تفكير لدرجة إني حسيت عقلي حـ يطق من كترة التفكير و الإستفهامات!
في اليوم البعدو إتصلت على عماد و قلت ليهو ضروري نتقابل ، قال لي انا ذاتي عايز أشوفك عشان اوريك الحاصل معاي ، قلت ليهو تمام ،، فعلاً مشيت ولاقيتو في مطعم في الطائف ، ما كنت عارفه ابدا ليهو الموضوع كيف ، سبقني و قال لي ياريت لو سمعت كلامك و صارحتها من البدايه أحسن من اللف و الدوران دا كلو هي تقريباً افتكرت اني ناوي ألعب بيها و فهمت اني بحاول اقرب منها عشان استغلها عشان كدا بقت ما بترد علي لمن اتصل أو ارسل ليها ، المشكله انها ما بتقرا رسايلي ، في آخر رساله اعترفت ليها و عديل قلت ليها جاييك بالباب بس للأسف ما شافت رسالتي ، عشان كدا عايزك تمشي ليها و تقولي ليها اني عايزها و شاريها و ياريت تخليها ترجع و تستقبل مكالماتي ، هي ما عارفه قدر شنو انا ميت عليها و منتظر متين تبقى حلالي و نعيش تحت سقف واحد ، انا سماهر دي مهمها حاولت أوصفها و اقول ليك قدر شنو انا بحبها ما حـ أقدر ، مستعد اعمل أي شي عشان أخليها سعيده ، حـ اكرس عمري كلو عشان بس اشوفها مبسوطه ، انا لو علي هسي امشي لأبوها و لو علي العرس يتم الجمعه الجايه دي ، ياخ كل دقيقه بتمر علي من دونها بحسها سنه ، كفايه علي منتظرها من زمان و ما قادر أصبر أكتر من كدا.......بقيت بس بعاين ليهو و للمعه الفي عيونو و هو بتكلم عن سماهر ، غلبني أكسر قلبو و اقول ليهو سماهر ما عندها حاجه ليك ، لمن شافني ساكته و من قعدت ما على بعضي قال لي صحي انتِ جبتيني عشان تقولي لي شنو؟
الكلام غلبني و بالجلاله كنت ماسه دموعي ، قلق و قال لي في شنو يا مها؟ سماهر كويسه؟ حاصل عليها حاجه يعني؟ عليك الله قولي لي ما تسكتي و تخوفيني عليها! مالا سماهر!
هنا بالجد ما قدرت أمسك دموعي ، قلبي وجعني شديد عليهو و ضميري ما ريحني لأنو حسيت إني السبب في دا كلو ، لمن شافني ببكي خلاص قلبو وقف و افتكر انو في حاجه حصلت على سماهر ، فقد أعصابو و قال لي بضيق اتكلمي ياخ مالا سماهر!
مسحت دموعي و شربت من المويه الجنبي و قلت ليهو سماهر كويسه ، قال لي طيب في شنو؟
في نفسي قلت خلاص خليهو يعرف ، قلت ليهو عارفه الكلام الحـ اقول ما حـ يعجبك و حـ يكسرك لكن لازم تعرف احسن ما تفضل معلق كدا و مقدماً انا آسفه شديد يا عماد لأني السبب في دا كلو ، انا العشمتك و انا الدعمتك و شجعتك عشان تعترف لـ سماهر.... هو فهم انا عايزا اقول شنو ، قال لي بصوت مكسور سماهر بتحب واحد تاني؟
هزيت ليهو راسي بـ معنى أيوه ، سكت ساي و عيونو إتملت دموع ، شال نفسو و مشى من قدامي ، انا والله قلبي وجعني و بقى لي شين و حسيت بالذنب .....اتنهدت و اخدت نفس عميق و قلت كان لازم يعرف ربنا يسامحني بس و يجبر بخاطرو ، كنت منزله راسي و بمسح في دموعي ، أول ما مسكت شنطتي و وقفت على حيلي و رفعت راسي عيني وقعت عليهو! !!....قلبي عمل شححح و حسيت برعشه سرت في جسمي ، اتجمدت في مكاني و بقيت بس بعاين ليهو عشان اتأكد إنو دا هو بالجد! زي ما كنت بعاين ليهو هو ذاتو كان بعاين لي و رغم دا ما قدرت اشيل عيوني عنو!.....دقات قلبي زادت كأنها بتنادي عليهو ، بقيت اقول في نفسي معقوله! !عدنان! ....جا متين هو ، حسب علمي هو ما جاي تاني! ....وقفتي و نظراتي لـ عدنان لفتت انظار الناس ، فجأه هو قام من مكانو و جا علي و مع كل خطوه منو دقات قلبي بتزيد ، حسيت نفسي في حلم جميل ، حاوطتني السكينه من كل الإتجاهات و فجأه حسيت بنسيم بارد نساني كل الناس الحوليني و كل تركيزي بقى عليهو هو لمن خلاص وصلني حسيت قلبي دا شويه كدا و حيقع مني ، لمن بقى قريب مني عيونو بقت عباره عن لمعه ، إبتسمت و قلت ليهو عدنان انت.......طوالي اتجاوزني و مشى على باب المطعم و طلع! ...حسيت بوخزه في قلبي و كل الناس كانت بتتفرج علي ، لمن طلعت من المطعم لقيتو واقف جنب عربيتو و كالعاده لابس نظارتو ، ما عاينت ليهو مده طويله لأني عارفه انو ما شغال بي و انا البراي مشيت عليهو و عملت فيها مصلحه نفسيه ، من مكاني داك مشيت على الظلط و بقيت واقفه هناك منتظره المواصلات ، وقفت قريب الـ 10 دقايق و كل الحافلات البتجي مليانه ، كنت مره مره برفع عيني و بعاين ليهو ، فيهو حاجه زي السحر كدا بتجذبني ليهو ، بقيت اتخيل انو جا و وقف قصادي و قال لي خليني أوصلك ، بالجد إتمنيت الحاجه دي تحصل بس للأسف ما حصلت ، جات حافله شبه فاضيه ركبت فيها و طول الطريق كنت بفكر فيهو و ما مصدقه إنو رجع السودان و كان واقف قدامي ، لمن وصلت البيت ، أول ما دخلت لقيت الأسره الكريمه مجتمعه ، سلمت عليهم و قلت ليهم لمه في الحرم ان شاء الله ، بابا قال لي آمين يارب ، طبعاً من شفت مازن بتبسم و هو متردد تلقائياً عرفت هو قال أو عايز يقول شنو ، مزن قالت ليهو اها يا مازن قول لينا جمعتنا لشنو؟
عاين لي و إبتسم و رجع عاين لـ ماما و بابا و قال ليهم بإذن الله ، انا ناوي اعرس و أكمل نص ديني ، أبوي قال ليهو كويس والله بس انت قدر المسؤوليه دي؟ حاسي نفسك خلاص جاهز؟ ما قصدي مادياً! ....مازن قال ليهو ايوه جاهز يا أبوي و ان شاء الله حـ أكون قدر المسؤوليه دي ، طبعاً ماما كانت ساكته ساي لأنها عايزا ليهو نور و اصلاً من اليوم الإتناقشت فيهو مع بابا بقت ما بتتكلم معانا كتير رغم اننا حاولنا بكل الطرق نراضيها ، بابا قال ليهو كان كدا أبشر يا ولدي و نحنا معاك ، مزن قالت ليهو ياااا سلاااام ياخ اها العروس منو؟
عاين لي و قال ليهم مها بتعرفها كويس اسألوها عنها ، طبعاً كلهم عاينوا لي ، أصلاً انا مزاجي ما كان رايق و الزعل باين علي ، بابا قال لي إنتِ كويسه؟
قلت ليهو مصدعه بس ، مزن قالت لي عشان طلعتي في الشمس السخنه دي ، قلت ليها فعلاً عشان كدا حـ اطلع فوق و ارتاح شويه ، بإستعجال مشيت من جنبهم ، لمن وصلت غرفتي دخلت إستحميت و جيت طالعه ، إتمددت على السرير و بقيت أعاين للسقف ، بعد 5 دقايق تقريباً تلفوني رن ، رفعتو و شفت المتصل ، كانت نور قلت معناها عرفت انو مازن ناوي يعرس ، اترددت قبل ما افتح الخط بس في الآخر فتحتو ، الغريبه انها اتكلمت معاي عادي و سألتني عن امتحاناتي جات كيف و ليه اختفيت بعد ما خلصت امتحانات و بقيت ما بتصل عليها و و و ، طبعاً انا طوالي مخي بقى يجمعي و اتذكرت! !....قلت ليها نور....إنتِ بتعرفي سماهر؟
سكتت مسافه بعدها قالت لي آي بعرفها لكن خليني أوضح ليك ، قلت ليها ليه كذبتي علي و لمحتي لي بإنو في شي بينك و بين مازن أخوي! انا كرهتي في الدنيا دي الكذب و النفاق ، عارفه انو بسببك حصل نقاش بيني و بين أخوي و بينو و بين ماما! بس الغلط غلطي أنا ، مازن حذرني منك و عديل قال لي انو ما عندو حاجه ليك و براك لاصقه فيهو بس انا ما صدقتو و قلت انو هو فاهمك غلط و اتقربت منك عشان اعرف حقيقتك و اثبت ليهو انك بت كويسه حتى كلمت بيك ماما و عزمتك في بيتنا و عرفتك على أهلي و خليت ماما تعجب بيك و للأسف خدعتيني انا ذاتي و خليتيني اشوفك بالطريقه الإنتِ عايزاني اشوفك بيها ، قالت لي اسمعيني يا مها ، انا.....قاطعتها و قلت ليها ما عايزا اسمع كذب أكتر من كدا كفايه الحصل ، قالت لي خليك عادله و اسمعي من الطرفين ، قلت ليها سمعت منك أكتر من مره و هسي ما عندي شي اقولو ليك و ما عايزا اسمع منك حاجه ، كنت حـ اقفل الخط بس هي قالت ليك اديني فرصه واحده بس خلينا نتلاقى و انا حـ اقول ليك الحقيقه كلها ، أديني آخر فرصه بس و بعدها لو ما عايزا تتواصلي معاي ماف مشكله ، بعد مسافه قلت ليها فرصه وحده بس ، قالت ايوه وحده خلينا نتلاقى في ()قلت ليها تمام و قفلت منها و انا بسأل نفسي دي عايزا تقول شنو تاني بعد ما خلاص عرفت اني اكتشفت حقيقتها! عايزا تكذب و تقول لي شنو تاني! ؟عموماً حـ أريح ضميري و اسمعها مره وحده بس
يتبع......
