المهم دخلت المطبخ و عملت لي شاي ، ماما جات و قالت لي كبي لـ مازن دا معاك ، قلت ليها طيب لكن خايفاهو يجوط فيني تاني ، يعني ما كفايه علي السرقه الحصلت لي و الرعب الدخل فيني!؟ قالت لي امشي ليهو ساي ما بسألك تاني ، شلت ليهو كباية شاي ، لمن مشيت ليهو في غرفتو لقيتو بتكلم بتلفونو و لسه كان متضايق كان بقول اسمعيني بس و خليني أوضح ليكِ ، شكلها قفلت في وشو الخط عشان كدا اتضايق زياده ، قلت أكيد دي البت الإسمها نور ديك الإتصلت عليهو قبل كدا و انا فتحت الخط ، دخلت ليهو تووووش و قلت ليهو دي منو دي الزعلت مزوني أخوي و حبيب قلبي!؟
قال لي تاني ما تتسمعي لمكالماتي و بطلي حركاتك دي ما ناقص أنا ، قلت ليهو ناقص ولا زايد و لا ضرب هههييي ، عاين لي بزهج و قال لي مها انا ما رايق هسي عليك الله خليني في حالي ، قلت ليهو طيب بس جبت ليك الشاي دا ، شالو مني و بقى يشربو و انا بسأل نفسي مازن مالو و شنو هو الخلاف البينو و بين البت الإسمها نور ديك!؟
قلت ليهو مازن! قال لي مالك؟
قلت ليهو زعلان من نور حبيبتك ولا شنو؟ ....لمن قلت ليهو كدا انشرق بالشاي و قال لي نور شنو عليك الله و حبيبة شنو! ياخ البت اللصقه دي انا عديل ما بطيقها! قلت ليهو حرام عليك يا مازن مالا البت! بس ما تكون غاشيها و بتلعب بيها؟
قال لي لا غاشيها لا بلعب بيها انا بالجد ما عندي ليها حاجه و هي عارفه الحاجه دي بس مع ذلك مُصره تتقرب مني! بت عبيطه و لايوقه ، قلت ليهو كدي قول لي عيبها شنو؟
قال لي خفيفه زي شاي البكى و بتاعة أولاد و كل يوم في الشركه بشوفها مع واحد و كمان ماديه و بتتلصق في الموظفين و بتصاحبهم عشان يعزموها لـ الجبنات و المطاعم و طبعاً كوني ولد المدير أكيد حتفكر تتقرب مني! قلت ليهو ما تظلمها يا مازن يمكن فهمتها غلط ، حاول تنظر ليها من زاويه تانيه! قال لي البت دي كعبه من كل الزوايه و الحاجه دي بعرفها أنا ما إنتِ ، بت لاصقه في الأولاد و كل يوم طالعه و نازله مع واحد دي أسوي بيها شنو؟ نحنا الأولاد كرهتنا في الدنيا دي البت الحياتها كلها عباره عن أولاد ، بتقرفنا و بتنفرنا منها ، قلت ليهو ما عارفه اقول ليك شنو لكن كدي حاول تغير نظرتك ليها ، قال لي انتِ وحده على نياتك و ما بتقدري تعرفي الناس على حقيقتهم لا من أول نظره لا من خلال تصرفاتهم و تحليلك لـكلامهم ، قلت ليهو بعرف والله عشان كدا بقول ليك البت دي إنت ظالمها ، قال لي على أي أساس بتقولي كدا؟
قلت ليهو من صوتها كان واضح انها بت ظريفه و كيوته و مهتمه بيك ، قال لي لا ياخ دا كلو عرفتيهو من صوتها بس! قلت ليهو آي ، خلص الشاي حقو و مدا لي الكبايه و قال لي أطلعي و اقفلي معاك الباب ، قلت ليهو بتطردني يا مازن؟ قال لي آي لأنو الكلام معاك بجيب وجع راس ، قلت ليهو ماااااشي يا مازن ، شلت الكبايه و الصينيه و طلعت من غرفتو و انا بقول في نفسي لازم ألاقي نور دي ، مشيت المطبخ شربت شاي و انا بفكر ألاقي البت دي كيف! .....طق اتذكرت انو مازن قال انو يمكن عشان هو ولد المدير هي عايزا تقرب منو و دا معناهو انو نور شغاله في شركة بابا! اذاً لازم أمشي الشركه و اسأل عنها ، المهم بعد أسبوع من الكلام دا نزلنا جامعه بعد اجازة العيد الما عرفنا ليها طعم ، اول ما جيت الجامعه شاكلت صحباتي عشان ما فكروا يجوا البيت و يعرفوا أنا مختفيه ليه ، سماهر قالت لي إتصلنا عليك لكن تلفونك مغلق ، قلت ليهم لو مهتمين كنتوا عرفتوا إني اتعرضت للسرقه ، بصوت واحد قالوا لي شنو؟ متين الكلام دا؟ طوالي حكيت ليهم الحصل معاي ، روان قالت لي واي ما بصدق معقوله عدنان وصلك !! قلت ليها ما ركزتي إلا مع توصيلة عدنان لي! سماهر قالت لي رب ضارة نافعه 😂اها حصل العايزاهو ، المهم علقنا على الموضوع ، شويه كدا سمعنا الناس جايطه و بتقول انو النتيجه معلقه في البورد ، قلت ليهم الليله عاد فضيحتنا فضيحة السواد ، روان قالت لي براك حـ تنفضحي لأنو الجامعه كلها بتعرفك ، قلت ليها خلونا ننطلق و نشوف فضيحتنا ، قصدي نتيجتنا ، المهم مشينا و شفنا النتيجه و الحمدلله كلنا كنا ناجحين ، ميامن قالت لينا بالمناسبه دي عازماكم بوش في كافتيريا قريبه من هنا ، قلنا ليها جداً ، مشينا الكافتيريا و طبعاً كـ عادتهم برسلوني أنا ، مشيت للولد مصعب بتاع البوش ، لمن شافني قال لي الليله الجابك لينا شنو يا بتاعة البيرغر؟
ضحكت و قلت ليهو حابه أغير شويه ، قال لي التغيير حلو ، طبعاً الناس كانت زحمه و كلها منتظره صحن بوش خاصة الأولاد ، قلت لو وقفت كدا لـ بكرا ما حـ آخد الطلب ، دخلت لـ مصعب و قلت ليها حـ اظبط بوشي براي ، قال لي يا زوله كان صبرتي مالك؟ 😂
قلت ليهو بري ما بصبر و طوالي بديت افت في العيش ، كبيت الفول الكان مُطعم جاهز و عملت باقي المكونات و كترت الشطه و الجبنه ، طبعاً الأولاد كانوا بعاينوا لي ساي و بعلقوا ، لمن شلت الصحن و جيت ماره بجنبهم قعدوا يقولوا لي معلمه والله و شنو ما بعرف المهم رفعوا لي معنوياتي و حسسوني بالعظمه ، مشيت على البنات و بصوت عالي قلت ليهم البووووش وصلللل ، بصوت واحد قالوا اخيييراً و بقوا يضربوا على التربيزه و يصفقوا و أنا ماشه عليهم و بغني ساي لغاية ما وصلتهم ختيت الصحن و قعدت و انا إبتسامتي للضرس الأخير و ناس الكافتيريا كلهم يعاينوا لينا ، جزو كان بضحك و غنى معانا و جزو عاين لينا ببياخه كدا لكن نحنا ما شغالين بزول و الفي راسنا بنعملوا ، اها أول ما دخلت اللقمه في خشمي لمحت ليك سامي رافع تلفونو و واضح إنو كان بصور فيني و ميت بالضحك!
قمت مخلوعه و قلت ليهو والله ما أخليك يا سامي ، قال لي التيك توك راجيك و طوالي قام من مكانو و طلع من الكافتيريا و أنا بإستعجال مشيت وراهو ، بقى يستعجل في مشيهو و انا بحاول اوصلو ، طبعاً هو ما حـ يقدر يجري عشان ما يلفت نظر الناس بس انا ما عندي شغله طوالي جريت عليهو و لمن وصلتو مسكت منو التلفون و بقيت اقول ليهو والله ما أخليهو ، قال لي المشكله وين ما الناس كلها شافتك ، قلت ليهو عارفاك حتعمل تعديل على الفيديو أو الصور دي و تطلعني بمنظر بايخ ، ضحك و قال لي يا زوله فكي لي تلفوني ، بقيت اقول ليهو ابيييت ابيييت لو ما حذفتو ما بخليك ، قال لي خليك من دا تلفونك مغلق مالو؟ قلت ليهو ما عارفه و سرعه احذف الصورتو دا! قال لي جادي معاك أنا وينو تلفونك؟ قلت ليهو اتسرق مني و على طول حكيت ليهو 😂
قال لي عدنان ما كلمني ، قلت ليهو الغريب شنو ما هو دايماً ما بكلمك بحاجه! قال لي فعلاً ، فجأه كدا خطفت منو التلفون و قبل ما يستوعب الحصل زحيت منو بعيد و حذفت الفيديو لمن وصلني لقاني ضغطت على حذف و الفيديو إتحذف ، قال لي ما مشكله الجايات أكتر من الرايحات و دا ما آخر بوش 😂
قلت ليهو وااااي لا ذكرتني البوش و جري على الكافتيريا ، الكلبات لقيتهم اكلوا تلات ارباع الصحن ، قلت ليهم يخسسسي عليكم يا خاينات ، قالوا لي كنا جعانين و عشان عارفين قصصك إنتِ و سامي ما بتخلص قررنا ناكل و نسد جوعنا ، قلت ليهم كلاب زعلتوني بالجد ، قعدت و اكلت الباقي بعدها ميامن قالت لي ميييهو ، قلت ليها مااااام أبيييت عديل ، قالت لي انا ما صحبتك يا ميهو ؟
قلت ليها و انا ما صحبتك؟ دايماً في كل مره بترسلوني أنا ، قالت لي حبيب القوم خادمهم 😶 قلت ليها بالله! سماهر قالت لي امشي يا مها بتاع الكاشير بعرفك و حـ يمشيك بسرعه ، هاك أنا عايزا بارد ، روان مدت لي قروشها و قالت لي و انا عايزا فراوله باللبن ، ميامن قالت لي و أنا عايزاها ساده ، قلت ليهم أمري لله ، شلت منهم القروش و مشيت لـ عوض بتاع الكاشير ، فعلاً كان زحمه شديد ، من بعيد رفعت ليهو يدي و سلمت عليهو بخشمي ، أشري لي عشان أجيهو بالشباك التاني لمن مشيت ليهو وريتو أنا عايزا شنو ، أداني الماركات و مشيت اشتريت لنفسي و للبنات ، لمن جيت راجعه لقيت سامي قاعد معاهم ، قال لي يا حليلك رسلوك! قلت ليهو عاد كما مشيت انا و اشتريت ليهم من مكانهم ما بتحركوا ، قال لي بستغلوك بأبشع طريقه ، قلت ليهو فعلاً ، ميامن قالت ليهو دا ما إستغلال و ذاتو ما فيها حاجه يا سامي ليه حاساك متحسس! قلت ليها يا بت مالك كمان إنتِ التانيه! دا مجرد هظار ساي ما تاخدوا المواضيع على محمل الجد! سماهر قالت آي يا جماعه دا هظار و بعدين ما فرقت منو الحـ يمشي و يشتري لينا معاهو كلنا واحد والله ، المهم اخدنا قعدتنا و عرفنا إنو المحاضره إتلغت ، المهم قلت ليهم انا حـ امشي بعد دا ، سامي قال لي وين وين؟
قلت ليهو متفقه مع بابا انو نمشي سوا عشان يشتري لي تلفون ، المهم مشيت لـ بابا في الشركه و غير قصة التلفون أنا جايه عشان اشوف نور ، طول الأسبوع الفات كنت بخطط اجي الشركه عشان اشوفها بس عشان ما عندي جامعه كسلت و قضيتها كلها أفلام و سهر ، المهم لمن وصلت الشركه اتصلت على بابا و كلمتو اني جيت ، قال لي انا هسي في إجتماع خشي و إنتظريني ، المهم دخلت الشركه ولاحظت انو في موظفين جداد ، سلمت على الناس البعرفهم و مشيت قعدت في الإنتظار ، اول ما قعدت كدا طوالي عدنان خطر على بالي و بقيت أتذكر فيهو و في ملامح وشو لمن يكون صاري و لمن يلبس النظاره و يطلعها حتى مشيتو فيها هيبه كدا و سبحان الله حتى سكاتو جذاب و كل حاجه فيهو بتلفت النظر ، شويه كدا مازن جا ماري بجنبي ، لمن شافني قال لي جايه عشان التلفون مش؟
قلت ليهو أكيد انا لي أسبوع بحنس فيكم عشان تشتروا لي واحد جديد و انتوا شابكني تمام تمام ، يعني حاجتي دي إلا اقيف عليها حتى تتنفذ ، قال لي اليوم كنت ماشي اجيب ليك تلفون ، قلت ليهو كذب كويس ، قال لي والله جد ، المهم تعالي اقعدي في مكتبي ، قلت ليهو اممم عايزا أشوف نور ، قال نور شنو! !!ليه حاسس انك جايه بس عشان تشوفيها؟
قلت ليهو بليييز وريني ليها كدي خليني أشوفها بس ، قال لي لا ، قلت ليهو تمام حـ امشي اسأل عنها براي و لمن ألقاها حـ اقول ليها جيتك عشان مازن اخوي طلب مني أجي و اشوفك و اتعرف عليك و حـ ألمح ليها انك معجب بيها و عايز تخطي معاها خطوه لـ قدام ، قال لي انتِ إختي ولا عدوتي؟
قلت ليهو الخيار عندك ، قال لي شوفي هي من ناحية الجمال جميله بس دا ما بهمني لأنو في حاجات أهم من الجمال ما لقيتهم فيها و بعدين يا زوله انا حر مالك إنتِ عامله قومه و قعده للموضوع و جايه تشوفيها و محسساني إنها البت الوحيده في العالم دا! قلت ليهو مازن خليني أشوفها!
وصف لي مكانها و مشى ، على طول مشيت ليها و زي ما قال لي مازن البت جميله و ناعمه كدا زي الحرير ، مشيت وقفت قدامها و قلت ليها كيفك و مديت ليها يدي ، عاينت لي بإستغراب كدا و سلمت علي بطرف أصابعها ، بس انا ما من النوع البحكم على الشخص من اول نظره أو من أول موقف و يمكن سلمت علي كدا لأنها ما بتعرفني و لأني فجأه كدا جيت و وقفت قصادها في الآخر كلنا ما واحد و أي زول بفكر بطريقتو و على الأساس دا بتصرف و عشان يمكن هي حذره في تعاملها مع الغرباء سلمت علي كدا ، المهم أول ما قلت ليها أنا أخت مازن البت إنخلعت و ارتبكت و اتجهجت و قالت لي معليش بالجد و سلمت علي تاني ببشاشه كدا و فضلتني في مكتبها حق الموظفين ، قالت لي انتظري هنا مشت ما تمت دقيقه لقيتها جايبه لي مويه و عصير ، قلت ليها ما كان تتعبي نفسك ، قالت لي أبداً والله ماف تعب و آسفه شديد لأني سلمت عليك كدا بس انا بكون حذره في تعاملي مع الناس و بخاف اكون ساذجه زياده عن اللزوم ، قلت ليها عادي عادي ما زعلت منك ، المهم بقيت آخد و أدي معاها في الكلام و حكيت ليها اني جايه هنا لـ بابا و بعدها بدينا نتكلم في حاجات هايفه كدا لحد ما بابا اتصل علي و قال لي خلصت إجتماع وين انتِ؟ طلعت برا أنا ، قلت ليهو هسي بجيك ، قفلت منو و قلتها حـ اضطر أمشي و شكراً شديد للقعده اللطيفه دي و معليش عطلتك عن شغلك ، قالت لي لا لا ما عطلتيني ولا حاجه و بعدين انا المفروض أشكرك على لطافتك و كلامك المعسول ، قلت ليها طيب ممكن تديني رقمك؟ قالت لي حاضر و طوالي أدتني رقمها ، و عشان ما تقول مازن حكى لي عنها أو كدا قلت ليها طبعاً لمن جيت قبيل كنت عايزا اسأل عن مكتب مازن اخوي لأني طولت ما جيت الشركه و ما شاء الله شكلها اتغير فـ لمن لقيتك قدامي قعدت معاك و نسيت مازن ذاتو 😂
قالت لي خلاص متى ما جيتي تعاليني قلت ليها حاضر ، المهم طلعت من الشركه و انا متكيفه شديد من البت دي والله قعده وحده بس خلتني أحبها ، ما عارفه ليه مازن شاميها كدا و بتكلم عنها كلام ما حلو! انا على قناعه انو نحنا لو شلنا كل الكلام الإتقال لينا عن زول و ختيناها على جنب و نظرنا ليهو بنظره تانيه بعيد عن الكلام الإتقال عنو حـ نلقى في اختلاف كبير بين الشفناهو منو و بين الإنقال عنو عشان كدا الأفضل انو الزول ما يخلي كلام الناس عن شخص يأثر على نظرتو للشخص دا .....المهم لمن طلعت برا و مشيت لبابا و سلمت عليهو قال لي قعدتك كتير صح؟
قلت ليها أبداً كنت مستمتعه ، المهم ركبت معاهو و مشينا اشترينا لي تلفون ، بعدها رجعنا البيت ، اول ما دخلت غرفتي ركبت الشرايح و شغلت التلفون ، طلعت دفتري الشلت منو ارقام صحباتي امبارح ، اول شي رسلت لـ سماهر و خليتها تضيفني في القروبات كلها بعدها عملت ليهم معط بتلفوني الجديد ، في نهاية ونستنا قلت ليهم أدوني رقم سامي ، لمن ادوني ليهو برضو عملت نفس القصه و معطتو بتلفوني الجديد ، قال لي الحاله جابوا ليك تلفون بس يعني لو كانوا اشتروا ليك عربيه كنتِ حـ تعملي شنو؟ 😂
قلت ليهو المهم يا سامي ما أنسى أديني رقم عدنان ، قال لي لسه ما ناويه تخلي عدم الموضوع دا؟
قلت ليهو اي ما ناويه اخليهو ، قال لي غصب عنك حتخليهو! ....طبعاً استغربت من كلامو ، قلت ليهو كيف يعني غصب عني!
قال لي لأنو عدنان راجع قطر بعد يومين......لمن قال لي كدا حسيت بوخزه في قلبي! ما عارفه ليه زعلت للدرجه دي ، قلت ليهو برضو أديني رقمو ، قال لي إنتِ عنيده كدا ليه بس فهميني! قلت ليهو سامي بلييييز أديني رقمو ، رسل لي رقم عدنان و طلع من الدردشه طوالي ، سجلت رقم عدنان عندي و كان نفسي اتصل عليهو بس حـ اقول ليهو شنو!
بعد شويه كدا مزن جات و قالت لي تعالي الغدا ، مشيت اتغديت و انا واضح علي انو في شي شغال بالي لدرجة انو اهلي اكتر من مره سألوني في شنو! مالك إنتِ الليله! غيرت الموضوع و قلت ليهم ما وريتكم ، النتيجه طلعت و كالعاده يا بابا بتك رافعه راسك ، قال لي اصلاً كنت واثق فيك ، ماما قالت لي المعدل كم؟
قلت ليها 3 انبسطت شديد لمن قلت ليها كدا و جات باستني و قالت لي بكرا حـ تلقي هديتك قدامك ، مزن قالت ليهم اي دلعوعها كويس ، ماما قالت ليها انتِ ذاتك لمن كنتِ بتنجحي كنا بنجيب ليك هدايا هسي الزعل لشنو؟ عاينت لـ مزن و طلعت ليها لساني و قلت ليها ياااا حسوووده موتي كي ، قالت لـ ماما اتكلمي معاها هسي لو لمستها ليكم تعترضوا ، بقيت اضحك عليها عشان اغيظها فـ طوالي قامت و خلت الأكل ، ماما قالت لي إنتِ كمان ما تبقي عبيطه للدرجه دي!
في نفسي قلت بالجد انا بالغت ، طوالي قمت و قلت ليهم ماشه اعتذر منها ، بابا ابتسم و قال لي اي امشي ليها ، اول شي شلت صحن و جري مشيت بيهو على غرفتها ، دخلت تووووش و قلت ليها مووووزن الجميييله ، عاينت لي بغيظ كدا و لفت وشها مني ، ختيت الصحن و نطيت ليها في السرير و حضنتها و بقيت اقول ليها معليش انا آسفه شديد ما كان قصدي أزعلك ، قالت لي خلاص زحي مني كتمتي لي النفس ، قلت ليها لسه زعلانه؟
ما ردت علي ، لمن ضميتها شديد قالت لي خلاص خلاص ما زعلانه والله كنت بستهبل عشان تجوا تحنسوني قلت ليها أصلاً انا عارفه عشان كدا جيتك ، نزلت جبت الصحن و جيت ليها و قلت ليها كملي أكلك ، قالت لي كدا كدا كنت حـ اكملو بطني ما ليها علاقه 😂
قعدت اتكلمت معاها شويه كدا بعدها مشيت غرفتي ، المهم في صباح اليوم التاني لمن مشيت الجامعه بقيت ماسكه سيرة عدنان و كل دقيقتين اقول ليهم انو عدنان مسافر بعد يومين ، يعني بعد بكرا ، سماهر قالت لي ما ملاحظه يا مها انك من قبيل ماسكه سيرتو؟ ميامن قالت لي بس ما تكوني حبيتيهو! قلت ليها احبو شنو انا زعلانه عشان مخططي حـ يفشل ، قالت لي احسن ذاتو عشان تشوفي ليك موضوع غيرو ، باقي اليوم كلو قضيتو تفكير فيهو ، سألت سامي عدنان مسافر ليه قال لي أمور شغلو جايطه شديد و حالياً عندو صفقه ماشي يوقعها قلت ليهو دا معناهو انو ما حـ يطول هناك أسبوع بالكتير! قال لي لا هو قال عايز يستقر هناك ، بالجد في اللحظه دي قلبي وجعني ، قلت ليهو طيب و أمو؟
قال لي أمو مالا؟ قاعده معززه مكرمه مع أهلها و متى ما حبت تشوفو حتمشي ليهو......لحد هنا كانت نهاية كلامي مع سامي ، ليلي داك قضيتو كلو سرحان و تفكير و النوم غلبني! قلت يا مها بسم الله انتِ مالك!؟ يعني ليه زعلانه عشان هو حـ يسافر! ....اي انا معجبه بشخصيتو لكن ما قايله انو حكاية سفرتو دي حتوجعني للدرجه دي ، من دون ما أفكر أكتر رسلت ليهو رسالة SMS محتواها :
"اتركها تأتي كما أرادها الله ، لعلها تأتي كما تمناها قلبك "🥀💜
رسلت الرساله دي و بقيت متوتره و بقول في نفسي ما كان ترسليها يا مها و تاني ارجع و اقول لا اصلاً هو ما حيعرف إنو دي انا ، غيتو دي اول مره اتوتر بسبب حاجه عملتها و ما اقدر احدد هل كان أعملها ولا لا ، ظهر لي انو استلم الرساله ، بقيت قاعده على اعصابي و منتظره منو رد بغض النظر عن محتوى الرد ، اها مرت ساعه و اتنين و هو ما رد علي ، انتظرتو كدا لحد ما نمت ، صباح اليوم البعدو أول ما صحيت مسكت تلفوني و أبداً ما اتفاجأت لمن ما لقيت رد ، قلت دا عدنان يا مها نسيتي؟!
المهم بعد يوم مشيت الجامعه و انا ما على بعضي ، ما حصل طلعت من البيت أو دخلت الجامعه من دون ما أكون مبتسمه ، بس شكلها سفرة عدنان دي مسخت علي كل شي ، بس السؤال انا زعلانه ليه؟
طبعاً لمن وصلت الجامعه أول ما شفت سامي مشيت ليهو و كنت حـ اسألو عن عدنان بس سكته لأني لاحظت اني بقيت افكر فيهو كتير و دايماً ماسكه سيرتو ، سامي قال لي انتِ اليوم ما على بعضك ، قلت ليهو مصدعه بس ، عاينت لساعة يدي و قلت لـ سامي زمن المحاضره جا و فات انت جيت متأخر زيي ولا شنو؟
قال لي آي عشان مشيت وصلت عدنان للمطار و جيت راجع ، قلت ليهو ايوااا 💔
المهم مر أسبوع على سفر عدنان ، رغم انو سفرتو دي زعلتني بس انا من الناس الما بزعلوا على حاجه لفتره اطول ، الضحك و الهظار ديل كأنهم هوايات بالنسبه لي حتى لو في ذرة زعل جواي ما بخليها تبان علي فتره طويله أو تأثر في حياتي ، طول الأسبوع دا كنت برسل رسايل SMS لعدنان ، بسألو فيها عن حالو ، رغم انو ما حصل رد علي بس بحس نفسي مرتاحه لمن أرسل ليهو ، طبعاً هو ما عارف انو دي انا البرسل ليهو ، يعني لو تلفوني القديم داك كان معاي و رسلت ليهو بيهو يمكن كان حيعرفني لأني حصل اتصلت عليهو لمن كذبت و قلت ليهو سامي واقع في ورطه ، يوم و انا بتكلم مع البنات في القروب فجأه كدا رسلت ليهم صورة نور طبعاً انا و هي بقينا متواصلين من اليوم المشيت فيهو للشركه و طبعاً ما كلمت مازن ، قلت ليهم رايكم شنو في البت دي؟
كلهم بالإجماع قالوا إنها جميله ، سماهر قالت لي البت العسل دي منو؟
قلت دي وحده شغاله في شركة بابا ، روان قالت لي اعملوا حسابكم ما تشلب أبوكم من أمكم ، ضحكت و كتبت ليها لا لا ما بتحصل ، ميامن قالت لي يعني هي صحبتك ولا بتبقى ليكم؟
قلت ليها لا ما بتبقى لينا ، دي زميلة مازن اخوي و البت دي ميته عليهو بس هو فاهمها غلط و انا عايزا اشيل الفهم الغلط دا من راسو و أثبت ليهو انو البت دي كويسه، هسي لي اسبوع متواصله معاها و ما شفت منها شي شين ، حبيتها شديد و متمنيه انها تكون من نصيب أخوي ، يوم حـ اعزمها بيتنا و أخلي ماما و مزن يتعرفوا عليها ، روان قالت لي طيب مازن اخوك موقفو شنو هو؟
قلت ليها هو فاهمها غلط بس متأكده انو عندو حاجه ليها لو ما كدا ما كانوا حيتصلوا على بعض ، ميامن قالت لي النصيحه البت سُكره ما تضيعوها ، قلت ليها أصلاً 🥀
المهم في اليوم البعدو بعد ما طلعت من الجامعه نور اتصلت علي و قالت لي عازماك في مطعم () قلت ليها طيب ، فعلاً مشيت لاقيتها هناك و اخدنا قعدتنا مع بعض ، فجأه كدا جاني صوت بقول يا مها! اختفيتي وين يا بت!
يتبع........
