(وجـمــعـنـا خـذلانـهـم)

البارت الثالث عشر 13

#وجـمـعنـا_خـذلانـهـم

#بقلم_بتول_حسين

#البارت_الثالث_عشر_13

--------------------------***--------------------

"وحقيقة الإنسان ليست بما يُظهِرُه لك،
بل بما يفعله لأجلك.."

--------------------------***--------------------

مسلم : بعد ماشفتها بهذاك المنظر بلمحكمة كلش اعصابي تلفت واستحقرت اهلها وزوجها كلش شلون هيج تاركيها تفتر بلمحكمة وبين الجنود والضباط بلمركز ومكلبچة

بس من اخذتها لمكتبي وافتهمت منها الموضوع كسرت گلبي كلش ماعرف ليش احس اضعف كلش گدام عيونها مهما حاولت اسيطر على نفسي اخسر وما اگدر

قررت اساعدها واطيح حظه هذا جهاد يتقاوة على نسوان وقررت اخذ حقها ،، تركتها بلمكتب ووصيت صديقي الواگف بلباب يراقبها خاف واحد يدخل للمكتب ورحت حچي كل شي لضابط التحقيق وكتب من يمه اقوالها وگال بس توقع ومن رحت للمركز اخلص باقي الشغل

هناك شفت اهلها وخطيه امها كسرت خاطري ملهوفه ادور على يقين اخذتها حچيت وياها وتفاهمنا ونقلت التسجيلات من جهاز يقين لان چان عد امها واخذت رقمها ليقين حفظته يمي

بكل مره يقين ترفض مساعدتي اتمسك اكثر بقراري حتى اساعدها نفسها عزيزة كلش رغم هيه بدون سند ،، هواي صرفت فلوس على معارفي حتى يساعدوني

ماتحملت راسلتها وتعمدت اعرف حسابها على الفيس حتى اذا ساعدتها وانتهى كل شي اضل اطمن عليها من بعيد بعد محجيت ويا جهاد ورجعنا راحت لبيتها وعرفت عنوانها

وبنفس اليوم جهاد سحب الشكوه وراسلتني هيه على الفيس وگتلها سحب الشكوه ضل بس موظوع الطلاق

حاولت احچي وياها هواي بس هيه تغلس ماترد وتصدني ،، ومن افكر اگول اني ليش اتقرب منها اذا اني مو گد هذا الشي اني ما اگدر اتحمل فكرة زوجة بحياتي وصرت ما اثق بأي بشر راح اظلمها وياي

وهيه مستحيل توافق بيه بعد تجربة زواجها الفاشلة واني تصرفت غلط وياها واخذت فكره عني غلط مثل ما اني بلبداية اخذت فكره غلط عنها

وچنت اضن المجمعات ألها من زوجها جهاد وطلعن مجمعات اهلها ،، احس نفسي ضايع وماعرف شنو اتصرف اريدها وبنفس الوقت ما اريدها

--------------------------***--------------------

يقين : بعد مخلصت من مشگلة معرض سيارات جهاد بديت ارتب وضعي حتى افتح المجمعات زوجة اخوية من باعت البيت انطتني نص الفلوس للمجمع وضل عدها نص واني عندي فلوس من شغل المجمع

وبعت ذهبي وامي عدها مبلغ وذهبها وجمعتهن ما اخذت من زوجة اخوية غير مبلغ بسيط وماردت اجيب بضاعة ويرجع جهاد يحرگ المجمع

وصيت بضاعة من تركيا ومن وصلت اتصلت بجنه واخوها حتى يرجعون ويانه للشغل وزوجة اخوية ويانا رتبنا المجمعات