(وجـمــعـنـا خـذلانـهـم)

البارت الثامن عشر 18 والاخير

#وجـمـعنـا_خـذلانـهـم

#بقلم_بتول_حسين

#البارت_الثامن_عشر_18_والاخير

--------------------------***--------------------

الحب أفضل من الغضب، والأمل أفضل من الخوف، والتفاؤل أفضل من اليأس؛ لذلك علينا أن نكون محبين، آملين ومتفائلين

--------------------------***--------------------

مسلم : من اجتي يقين الصبح وچانت اول وجه اشوفة اتمنيت كل ايامي الباقية هيج اتصبح بعيونها الحلوة احساس مينوصف من شفتها تعزل بلبيت وتنظف

تمنيت تضل وياي وماتروح ومن حددت يوم العرس احس نفسي اسعد واحد بلدنيه وصار عندي واهس لكل شي

اريدها يمي بأسرع وقت غير هيج ما اريد اريدها اطلعني من العزلة العشتها بعد طيف وترجعلي بنتي لحضني وتعيش وياي بنفس البيت

صحيح هيه ويا بيت عمي وقريبة عليه بس احسها كلش بعيدة عني وما اگدر اخذها لان ما ادبرها اداريها وحدي ودوامي بلمحكمة من الصبح لل 2 او 3 يله ينتهي

بعد مخلصنا كل شي بلبيت ماحبيت ادخل للغرفة نمت بلصالة الظهر ماگعدت غير من ضلم الدنية اتصلت على يقين حتى اروح لبيتهم احس اشتاقيتلها كلش

بس گالت تعبانه تريد تنام عذرتها لأن اليوم كلش تعبت ،، اتصلت على اصدقائي وصادف نازلين من الدوام عزمتهم على العشه تعشينا وطلعنا للكوفي وگتلهم على زواجي وعزمتهم فرحولي كلش

ضلو ينصحوني اغير تفكيري واخفف شك واحاول اتغير وارتب حياتي ،، رجعت الساعة 12 للبيت بس ماگدرت انام

ضليت افكر واتذكر زواجي الاول من طيف وشكد چنت فرحان وشلون دللتها وحبيتها وماقصرت وياها ابد صرت اتذكر من اشوف الجهاز بأيدها واني الغبي مصدگها والجهاز گبال عيوني بي كل قذارتها

بعد هاي الافكار كلها حسيت نفسي رجعت لنقطة الصفر رغم برودة الجو دخلت للحمام سبحت بمي بارد حتى اصحة من تفكيري واحاول انسه كل شي صار وياي وابدي حياة جديدة ويا يقين بس اني مامكتوبلي غير القهر

بعد مسبحت وطلعت ضليت گاعد بلصالة اخذت جهازي اتصفح حتى ابعد عني هاي الافكار وللاسف شفت يقين فاتحة بلوقت الغلط وصرت اشك بيها وارجع افكر هم اصير غبي مثل من چنت ثاق بطيف وتخوني گبال عيوني

حسيت فقدت عقلي وصرت مثل المخبل ماعرف شنو اتصرف وتهورت وخربت كل شي رحت لبيتها بعد واخذت الجهاز وصرت ادور وافتش بجهازها ومن شفت ماكو شي صحيت

بس بعد شنو صحيت بعد مخربت كل شي صارت تلوم وتعاتب بأمها وتبتسم بأستهزاء كل كلمة طلعت منها احسها سهم واخترقت صدري وجرحت گلبي

حاولت اصيطر على دموعي وما اضعف

يقين : هاي حلقتك كل شي انتهى بينا ماريد اشوفك ولا اسمع صوتك باجر تجيب الشيخ يطلگنا وتاخذ كل فلس خسرتة وتطلع من حياتي