زمرد في قلبي
الكاتبة :ZobaM_M
*
********
أمير
كعدت الصبح رتبت اموري وجهزت نفسي ونزلت لجوه لگيتهم كاعدين صبحت عليهم و كعدت تريكنه ودخلت بالموضوع مباشرتاً .
امير : ماطولكم كاعدين اريد اكلكم شغله .
حجيه رازقيه: كول يمه خير .
امير : نويت اخطب .
الحجيه : كلوووش واخيراً رح اشوفك عريس كلي اكو وحده بالك لو اشوفلك اني على معرفتي .
عمي قصي : بالمبارك اموري والله يوم الهنه يوم الي نشوفك عريس .
امير : مشكور عمي ، درت على بيبيتي، لا بيبي اني اختاريت البنيه وبعد بس اريدكم تمشون وياي اخطب .
الحجيه : مني البنيه ومنين اهله نعرفه لا .
امير : يي تعرفوه كلش زين لمياء بت عمي حسين ، كتلهم لمياء حسيتهم سكتو منصدمين وراحت لهفتهم .
بيبي : ها زين ولو جنت مخليه بالي وحده الك بس دامك انت رايد بت حسين بكيفك بعد ، حاجيت ابوك لو بعدك.
امير : لا بعدني هسه اريد اطلع اروح لأبوي بعدين لعمي قاسم انطيهم خبر .
عمي قصي : شوكت ناوي على الخطبه ؟
امير : اليوم العصر .
عمي : شلون اليوم العصر ولك شتلحك وانته بعدك ماكايل لأحد .
امير : ميخالف عمي سهله عليه تتسهل واني مستعجل اريد اخلص اموري بسرعه.
عمي : والله ما ادري دروح هسه خبر ابوك وعمك شوفهم شيكولون والله كريم .
امير : يي ان شاء الله ، يله اني رايح في امان الله .
***
رحت لأبوي بالمحل مالته ماردت احاجي كدام سميحه حاجيته وكتله هم كال ليش مستعجل ومن هذا الحجي بس قنعته وكال هاهي مادامك مقتنع بكيفك ، الكل مستغرب ليش هيج اريد الف الموضوع بسرعه بسرعه مايدرون صارلي سنتين متلوع ومتاني والله لو عليه اله اسوي العرس السبوع الجاي بس غير امتحانات دره محاصرتني .
خلصت من ابوي وكتله يخابر على عمي يكلهم جاييكم العصر وطلعت لبيت عمي قاسم.
*************
زمن
كعدت الصبح درت وجهي على زمزم لكيته كاعده بس بعدهي بفراشه مانازله .
زمن : زمزم صباح الخير .
زمزم : صباح النور.
زمن : شلونج الي.... ، ماخلتني اكمل كلامي وشالت الغطه وكامت طبكته وخلته على الجربايه.
زمزم : كومي ننزل هسه امي تصيحنه.
عافتني ونزلت ضليت كاعده اباوع على الباب اليوم وضعه ابد مو تمام.
نزلنه جوه جان ابوي وامي كاعدين على الريوك تريكنه وخلصنه كمنه نشيل ماعين نعزل زمزم دتشيل ماعون بعدهي ماواصله للمغسله وكع منه ونكسر وهي بسرعه دنكت شالت الكزاز بيده ونجرحت ، رحت يمه اخذت اديه غسلتهن بالماي .
زمن : زمزم عوفي الشغل اليوم صعدي ارتاحي معليج بالباقي اني اخلصه . هزتلي راسه وراحت صعدت بدون كلام اصلا عبالك مو بوعيه.
كملت شغل وتعزيل البيت ندك الباب سمعت صوت احد اجانه ، اجتي امي يمي بالمطبخ.
ام زمزم : زمن مامه حضري ضيافه ابن عمج امير هنا طلعي كليجه ام الجوز والتمر هو يحبهن وعصير ،شهكت ولتفتت عليه اميرر! شيسوي هنا؟
ام زمزم : شنو شيسوي هنا يا امي جاي يشوف ابوج اكيد عده شغله ويا، دارت وجه بالمطبخ وين زمزم لعد ، صيحيه ختجي تحضر الغده خاف يبقه على الغده هنا .
أنت تقرأ
زمرد في قلبي
Romantikما أصعب أن تحبّ شخصاً ويأتي القدر بكلّ سهولة ويفرق بينكما. ما أصعب أن ترى كل أحلامك تتحطم أمام عينك. ما أصعب أن تفقد شخصاً كان هو كل أملك. ما أصعب أن تتمنّى الموت من شدّة ما تشعر به من ألم. لكن الاصعب هو ان يعود بعد ان فقدت روحك جزءًا منها ZobaM_M
