سلام عليكم
كيفكم شخباركم عساكم طيبين؟
كمية سواليف عندي لا تعد ولا تحصى
وان شاء الله ماطفشون مني
امس صارت ملحجه في المدرسه والملحجه ذي ماتطلع الا بوقت الفسحه
انا مرات اذا بفكر بشي اقوم لا شعورياً اطلع في وحده قدامي ومااشيل عيني عنها لين انتبه اني
قليلة ادب شوي مع ان تفكيري بعيد أشد البعد عن بنت الناس
وطبعا لاتخلو عن النظرات والتشميقه ورفعت الحواجب السيوف
تحسسني اني ميته عليها دزي امها على قولت دويد
المهم في وحده لحجيه اسمها حنان كنت احبها ايام المتوسط بس كرهتها بعد ذي الحركه
كنت اتمشى في الساحه مع صديقاتي وقاعده افكر في اختبار الفيزياء شايله همه بما ان الاستاذه كانت جديده علينا
كانت حنان ذي قدام تسولف مع البنات وصديقاتي وقفوا يسولفون على بنت شافوها
المهم جلست اناظرها وتفكيري كله على الاختبار
وهي انتبهت لي وربي كاني لعنة ابوها قامت تناظرني من فوق لتحت بعدها اعطتني ذيك التشميقه وراحت
ومن بعدها صارت تطلع في وجهي دايم حرفيا صرت افكر انها محسبتني مستقصده واشيل هم
وانا ماني داريه عنها ام حواجب سيوف
احس اني ارتحت، خلونا منها ذي الخكريه
امس رحت المستشفى بخلع ضرسي له سنه هو ثأير علي
دايم يجيب لي الخراج وكل مارحت المستوصف قالو مانقدر نسوي شي ذحين لانه ملتهب ويعطوني مضادات طعمها كأنها حليب فانيلا مخمج
المهم ربي قدرني اروح للمستشفى يمدحونه ناس كثير
ورحت له انا وماما واختي رفيف
اتوقع اختي كانت تبي بس خلع وتنظيف
ماكنت منتبه لها
لما كنا ننتظر قعدنا نسولف انا وماما عن مستقبلي الميت
قلت لها تختار تخصص يرضيكم ويرضيني قامت تسدحلي تخصصات كلها مردها اصير معلمه وانا مابي
قمت قلت القانون ايش فيه عشان تحرموني منه؟
قامت قالت اول شي القاضي الي هو الشيخ رجال وفي عسكري رجال والي موكلك على البلا رجال والي انتي ضده رجال كلهم رجاجيل زينه القعده معهم؟
قلت لا بس العسكري في كثير بنات صارو عساكر واكيد بتكون بنت معي والي موكلني بختار بنت اما الشيخ والي ضدي هذولي بكون محترمه معهم ولا اسوي حركات كيني ميني
قالت انتي ماراح تسوين ادري بس هم الي يبون يسون ترا ياريتاج الدنيا ماهي زي زمان بخير ذحين الدنيا مافيها خير
