الظابط واليتيمة

البارت 1

اول شي راح اعرفكم بنفسي اني مينا عمري ١٩ عشت وكبرت بالميتم عمري مشفت والدي او والدتي او احد من اهلي بس المرية الي كانت مسؤولة عني كالتلي انو كرايبي من اهل امي جابوني واني عمري سنة

وجان وياية صورة لهلي وكلادة ذهب مكتوب اسمي بيها
حاليا اني طالبة خامس علمي بالثانوية شاطرة واحب المدرسة احسها متنفس الي
خلي اوصفلكم شكلي

اني الشي المميز بية عيوني عسلية وارموشي كثيفة وجهي مدور وعندي خدود شعري بيرمن وطويل لنص ظهري وطولي ١٥٩ ووزني ٤٨ كلش ناعمة مو بذاك الجمال هواية بنات بالميتم احلى كل الي بالميتم  صديقاتي واحبهن
 
5:00 am
- نور نور اكعدي كافي نوم ورانة شغل ومدرسة كافي نوم
- اوه مينا عوفيني انام تعبانة
شلت الغطى من عليها وفززها الهوى البارد
- كعدت كافي
كل يومية بهيج وقت نكعد عمود انسوي ريوك لكل الايتام والمسوؤلين طبعا المسؤولين ياخذون الزين واحنا الي يبقى مرات الكبار مياكلون ويضلون جوعانين عمود الصغار ياكلون
-يلى بنات ( صحت عليهن) اني وكم بنية بنفس عمري حتى نبدي)
بدن البنات يشغلون النار ويسوون الاكل
٦:٠٠ ص
خلصنا وصبينا الاكل الكل كعد عددنا تقريبا ١٠٠ بنية بالميتم تتراوح اعمارنا ما عدنا عمر محدد الي بعمري ٣ بنات بس
بدلنا ملابسنا وطلعنا للمدرسة ضلينا اني ونور وسارة نسولف ونضحك لحد ما وصلنا للمدرسة
وبدت الدروس وخلصنا وبلغونا انو بقى على الامتحانات شهر بس
رجعنا للميتم
-مينا مينا
-ها سارة
-المديرة اتريدج
-ليش ما عرفتي
-لا
رحت ودكيت الباب
-ادخلي
-السلام عليكم
-اتفضلي مينا اريدج بموضوع انتي جبيرة واني اعرف انو انتي عقلج جبير وتفتهمين احنا بعد ما عدنا امكانية نتحمل تكاليفكم راح انطلع كل البنات الي من عمر (١٦فما فوق)
-ها
-مثل مسمعتي راح انطيكم عناوين اهلكم  او ادزكم على معامل تشتغلون بيها وتبدون حياتكم   حتى الاصغر منكم ياخذ فرصتة هنا
-بس
-بدون بس ما اريد اي مناقشة
- بقى شهر على المدرسة وانخلص
- افتهمتج انتوا راح تبقون ٣ اشهر وراها اطلعون واريدج اتبغلين البنات بهذا الحجي تمام ؟
- امرج
طلعت واني عقلي واكف ما اعرف شلون راح اتصرف وشنو راح اسوي اهلي راح يتقبلون ؟ راح الكاهم ؟ الي اعرفة انهم سافروا وعافوني هنا
نمت وكلبي مملي هموم
كملت الدراسة ونجحت ونجحن البنات واجة اليوم الي اطلع من الميتم
صعدنا بسيارة جبيرة وويانة المديرة وودت كل وحدة لهلها على العناوين كلهم اتصلت بيهم قبل وردوا وقبلوا بالبنات واكو لا وودتهم للمعمل اما اني محد رد على التلفون لهذا ودتني للبيت وعافتني دكيت الباب
- منوو
-اني مينا
-منو انتي
كلتلهم اني منو
-احنا مؤجرين يجوز انتي بت اهل البيت هذا مو رقمهم اتريدين ادكين عليهم ؟
- يا ريت دكيت مرة مرتين
- الو نعم ابو امجد شرايد
-ا ا اني مينا مينا محمد
-شنو انتي مو بالميتم شطلعج هربتي؟؟
-لا الميتم بعد ما عندة افلوس وطلعونا اريدكم انتو اهلي مالي غيركم
- شوفي اني ما اعرف وحدة اسمها مينا روحي شوفي حياتج ماشي وسدة ابوجهي
ظليت ابجي وشافتني ام امجد فهمتها السالفة كالت
- شنو رايج تشتغلين عندي بس بدون فلوس اتنظفين وتتطبخين وتعيشين هنا وتاكلين هنا ابلاش
مجان عندي حل ثاني وظليت عدهم
بقيت سنة كاملة بس بهاي السنة تعبت كلش جان تعاملهم اسوء من الميتم عدهم ابنية تكرهني اكثر من ابليس اتسويلي مشاكل وتتهمني اتهامات وجنت اما اتعاقب بالاكل او انضرب وكملت السنة هيج ضعفت كلش وجسمي كلة اعظام
١٢:٣٠م
اسمع عيطة ام امجد رحت ركض عليها
شفتها ادك وتلطم
-شكو خالة شبيج
-ولج انبكت انباك الذهب وظلت ادك وتلطم
اجة ابو امجد وامجد وسلمى على عيطتها وفهموا السالفة
-يجوز مينا باكتهن لان محد جان بالبيت بس هي جانت هنا ( كالت سلمى وهي اتباوع علية)
كلهم باوعوا علية
- لا والله ما بكت شي كلشي مسويت
كامت ام امجد وبدت تضربني واتجر شعري
- طلعيهن حرامية طلعيهن ابو امجد دك على الشرطة دك عليهم بسرعة
واني ظليت ابجي وما اعرف شسوي واتوسل بيهم واكللهم والله مو اني
اجتي الشرطة وضباط وحجوا وية ابو امجد وشفتهم يباوعولي
وفجاءة اجاني واحد طويل كلش مكدرت اركز بي لان شعري مغطي وجهي نزل لطولي وبعدين وكف وكاللهم
- لبسوها عباة واخذوها للمركز

*******************
خلص البارت.

رواية جديدو وتجنن واحداثهه ناار.

اذا اكو تفاعل اكمل.