الظابط واليتيمة

البارت 7

هد ايدي وضل ساكت دقيقة اثنين بس فترة وبعدين
- دليني بيت اهلج عمود اوصلج الهم
ضليت ساكتة وافكر شنو اكول الة وين يوديني
- شبيج شنو متعرفين ادلين اذا متعرفين انطيني رقم اهلج واتصلج عليهم
- ما عندي
- ما حافظة الرقم ؟
- لا ما عندي اهل
- شلون يعني فهميني
- اصبر علية وراح اسولفلك قصتي
سولفتلة كلشي عني وهو جان بين الساكت وبين المنصدم ورة ما  كملت ابتسمت ابوجهة مردت ابين ضعيفة فجاءة هو حط ايدة على راسي وبدة يمسح علي غمضت عيوني وحسيت بشعور مينوصف امان راحة احد يحس بيج ويحاول يخفف عنج

حجتلي قصتها انصدمت من ابتسمت شنو من قوة عدها ابنية مو طبيعية الي بمكانهة يبجون ويدمرون ويطلعون عن الطريق بس اني اعرف گلبها محروك حبيت اخفف عليها ضليت امسح على راسها هاي الحركة امي اتسويها الي من اوكع ابمشكلة او اجيها مهموم واعرف شكد اتريح شفتها غمضت عينها مثل ما اني اسوي وعرفت هي ارتاحت ورة شوية وخرت ايدي

- عندي حل الج
- شنو الحل
- تجين تشتغلين ابيتي اني عندي امي وابوي واخوتي ال٣ ثنين ولد وبنية وحدة صغيرة بالعمر واهلي كبار بالعمر اريدج تشتغلين كم شغلة بالبيت وتحرصين على ادوية اهلي وراحتهم والج راتب خاص وعندج اجازة هم واذا اتحبين انسوي عقد عمود تضمنين حقوقج

- انت متاكد من الي اتكولة

- قابل دا العب

- لا العفو بس

- بدون بس اي شي اتريدي كليلي
- شكدر اكول الله يطول بعمرك ويرزقك ويستر عليك يا رب

- يمة يمة هاي الدعوة الزينة هههه باعي هسة راح نرجع للمركز لان عندي شغل اضلين يمي ساكتة اكمل شغلي واخذج للبيت تمام ؟ مو اتسوين وكاحة

- ههههههههه لا ما اسوي ( وحطيت ايدي على حلكي)
نزلنا من السيارة وطبينا للمركز هو كدامي ديمشي واني صافنة على العسكر والمجرمين وناس اشكالهم اتخوف وفجاءة وانصدمت بشي ووكفت لزمت راسي باوعت فوك لكيت وليد يباوعلي

- وين عقلج

- اسفة

- لتباوعين عليهم وغطي راسج بشعرج لتخلين وجهج يبين

- امرك

وصلنا لمكتبة وطبينا هو كعد وكام جابلي كرسي بعيد حطة عن مكتبة واشرلي اكعد هنا كعدت وهو يشتغل ملفات ويتصل بل لاسلكي ىينطي اوامر شكلة كلش رجولي شوارب ثخينة وشعر مصفف وايدة جبيرة وطويل كلش اتخيلت لو يضربني راشدي واحد يجوز اخرب هههههههه كمت اضحك على تفكيري مليت وتعبت من الكعدة

- مينا

- نعم

- تعاي هاج

- شنو هلكتاب

- اقري تتونسين ابدال الكعدة اعرف مليتي
- ماشي
اخذتة منة وبديت اكلب بي وبديت اقرة من البداية الكتاب ساعة امل منة وساعة ياخذني لغير عالم كلش حلو وحبيت اكمل كام شوية شوية يصيبني الفضول الة بداية كلش مملة بس بعدين كلشي بي حلو فجاءة حسيت شي جبير قريب علية رفعت راسي وجه وليد بوجهي اني شهكت وردت اوكع من الكرسي بس لزمني وما وكعت

- اسم الله اسف فززتج بس صالج هواية هادئة عبالي نمتي

- لا بس الرواية تجنن
- عجبتج
- اي حيل يا الله احلى شي بيها انو هي مجهولة ما واضحة القصة ومرات تجهل الشي الي دتقرا واتحس انو هذا الكاتب شديحجي
- وصفج بالضبط مينا انتي وين واصلة بالدراسة

- اني  اوف الدراسة خلصت بي خامس علمي  وكعدت وراها
- اممم تمام يلى امشي لان خلصت شغلي
- صدك
- اي
- عادي اخذ الرواية وياية
- اخذيها الج اني قاريهة مليون مرة
- صدك مليون مرة
- ههههههه مو لهل درجة
- عبالي
رحنا وصعدنا بسيارتة وهم غطيت وجهي من مشينا بالمركز
فجاءة وكفت السيارة يم محل ورد نزل وليد ورجع ويا بوكيهين صعد بالسيارة التفت علية وانطاني بوكي بي وردة وحدة لونها ازرق باوعت على الوردة وباوعت علي بصدمة
بدة يحرك السيارة
- تعرفين الوردة الزرقة ادل على شنو
- لا
- ادل على الامل الحرية والحياة الجديدة  اني اريدج تنسين الماضي وتبدين حياة جديدة تتعرفين على اهلي وراح اتشوفيهم ناس طيبين كلش
- والوردة الحمرة
- هم اتريديها ؟؟!
- لا لا على شنو ادل
- على الحب
اكيد لحبيبتة اي نيالها عدها هيج رجال صدك رجال مو مثلي عمري كلة راح اكضي خدامة بدون مستقبل بدون احلام اوف شدا احجي الحمدلله على كل حال
- وين رحتي يلى وصلنا خلي ننزل
- امرك

**********************
خلص البارت.