الظابط واليتيمة

البارت 2

الفصل الثاني

اني وليد عمري ٢٧ سنة ضابط ملازم اول مواصفاتي طويل طولي ١٩٠سم واتمرن كلش هواية لهذا جسمي ضخم عندي اخوة اثنين اصغر مني طلاب واحد طالب جامعي (ايمن) والثاني طالب اعدادية( زين) واخت وحدة طالبة متوسطة (ريهام) والدي ووالدتي الله يطول بعمرهم ناس محافظين وكلشي يمشي بقانون
- سيدي اكو بلاغ على سرقة بمنطقة *****
- بلغ الدوريات تتحرك للموقع
- حاضر سيدي
واتوجهنا للموقع حسب البلاغ الي اجانة طبيت وصلنا وجان صوت العياط عالي والجيران ملتمين على الباب فرقنا الناس وحاصرنا الموقع وطبينا للبيت شفت مرة جبيرة تضرب وتكفش ابنية صغيرة كلش تطلع اعدادية متوسطة وداير ومدايرها ولد وبنية ورجال يكللولها عوفيها متسوة ومن شافوني فلتتها واجتني تركض

- هاي الحرامية اخذوها باكت ذهبي كلة فوك ما وكناها ولميناها من الشارع

- دقيقة حجية اهدئي حتى افتهم الموضوع
اجة ابو البيت عرفني بنفسة وفهمني السالفة جان كل ميحجي اباوع على البنية حجمها وشكلها ميطلع منها هيج شي ممقتنع
- العائلة كلها تكعد وتتفضل هنا لان راح نبدي التفتيش

ابدوا التفتيش بالبيت وبغرفتها

- امرك سيدي

بدوا التفتيش كل البيت

- سيدي هاي الغرفة مقفولة

-هاي غرفتي

-منو انت

- اني امجد من اهل البيت

-افتح الغرفة

-لا سيدي مابيها شي قابل ابني يبوكني (ام امجد )

-حتى لو لازم انفتش

- شنو اتشك بابني سيدي دنكلك بس هي جانت بالبيت انت ليش مراضي تاخذها وتعذبوها حتى تعترف

- ملكينا شي بالغرفة ولا اي دليل يثبت هي الباكت

-بس هي جانت بالبيت يا دليل اتريدة
التفتت عليها وانتبهت على ملابسها لابسة دشداشة خفيفة وهاي اذا راحت للمركز هيج تصير بلوة

رحت الها ووكفت يمها صحت بصوت عالي جيبولي عباة

اني كل الي يصير ما اسمعة جنت مصدومة كلش ليش اتمهموني شنو الي قصرت بي وبس ابجي بصوت ناصي

اختنكت ليش يا ربي شنو الي سويتة حتى اتعاقب هيج محسيت غير واحد قريب من عندي وسمعت صوتة عالي يكول جيبولي عباة انتبهت على ملابسي ورحت ركض للغرفة لبست عباتي الاسلامية وطلعت اجتي ام امجد تركض علية

- ها حتى ملابسي اتبوكيها متستاهلين احد يسترج انتي انتي اصلا بنت حرام جان اخذوج اهلج لو بنت حلال

انصدمت بالي كالتة وحسيت روحي نملة بين كل هلعسكر كالت هيج ظليت ساكتة وظلت اتجرجر بالعباية وفجاءة راحت رفعت راسي شفت نفس الضابط لازم ايدها

- المتهم برئ حتى تثبت الادانة ولحد هسة ملكينا دليل لا تعامليها كانها المجرمة
-شو ادافعلها ها اتريدها

- اتسدين حلكج لا اتصرف بطريقتي وياج ( بكل علو صوتة) اخذوها للمركز بسرعة

اخذوني واني ميتة خوف كلبجوني بالحديد واذت ايدي كلش وصعدوني بسيارة وقفلوها حطيت راسي على الشباك وضليت اباوع  على الشوارع خاف بعد ما اشوفها وانسجن بعد ما اشوف الشمس واذا جان عندي امل اهلي يرجعون وياخذوني ورة هلمصيبة محد راح ياخذني وراح اضل خدامة

- انزلي بسرعة

سمعت صوت والباب انفتحت نزلت وشعري مغطي وجهي ودخلت واني مكلبجة والعالم اتباوعلي بنظرة مستحقرة ابدي اصيح واكول ما بكت والله ما بكت

دخلوني غرفة وكعدت على كرسي ومقابيلي ميز ساعة ساعتين

بهل وقت فكرت انو لازم اصير قوية واثبت برائتي للكل عدلت ملابسي وبديت ارتب شعري طلع وجهي وكعدت كعدة كلها ثقة وبهل اثناء دخل علية ضابط ويا لاب توب