فصليه رحت من بعد نهوه

البارت السادس

- بچَاني
وانه الي الچنت
مَا اقبل اتمشِى بمُطر
ويَصير مِي بخدِي
كُد مَا شفت منِك حُزن
مَنا لحد يُوم الدفن
راحَ ابقِه عَايش وحُدي
لو عِندي حَظ چا مَارحت
بس انهَ حَظ مَاعِندي.
********************************
زمرد : بعد ماصاحتلي ماس ونزلت شفت ابوي مدنك راسه كبل رفع راسه وكال
جلال : الصار كله مو بسببج لا انه الي ثقيت بيج ودخلتج جامعه ترحين تحبين وتسوين علاقه الصوج مني مومنج وانه لهذا السبب قررت اوديج فصليه مثل مارادو
زمرد : كاعده استمع وكلبي يوجعني كتله بابا بس
جلال : اشش ولاحرف ماريد اسمع منج اي حجايه الصار كله بسببج وتهور هذاك الحيوان
زمرد : سكتت وانه اشوف ابوي اول مرا يصير عصبي ورجع كلي
جلال : ف سمعي انتي وامج هاي كاعده من باجر تحضرين روحج وترحين فصليه ومن ترحين منا وينتهي كلشي لا بنتي انتي ولا اعرفج
جهاد : بويه انت شتكول هايه اختي تعرف شنو اختي مستحيل ننطيها فصليه بناتنه مدللات شنو يرحن خدم للمعيد (متخلفين) اختي ماتروح خلي هذاك الساقط ينطي اخته مويروح يكتل بولد الناس ويريد احنه ننطي الفدية لا يحلم وباوع بويه اصلا زمرد ناهي عليها الحيوان شلون تروح
جلال : حتروح ومحد راح يكول منهي عليها
غيداء : بس هذا يعتبر استغفال وغش يا ابوعامر وبعدين الناس تدري من نهى عليها جانت ام الولد موجوده
جلال : ليش محد كلالي ليش يعني ها شنو انه هنا رجل كرسي وبعدين انا كلت الي عندي ومحد راح يعارضني
جهاد : بويه فدوه اروحلك خواتي عزيزات وكتلك صح غلطت بس موننطيها خدامه خلينه نروح للمستشفى ونحجي وياهم مستعدين ننطيهم الي يردونه
جلال : تريد تروح هذوليج همه بالمستشفى مالي علاقه بشي وزمرد تروح فصليه
زمرد : اباوع شلون يحجون وجهاد شلون كلبه عليه هسه حسيت الاخوان لبعضهم مهما صارت ضروف قويه واشوف ابوي مصمم اروح خله وكام ومزعوج وانه احس روحي راح تطلع من القهر والبجي انه الجبته لنفسي انه استاهل الي يصير بيه كله خليت وصعدت فوك وانه الحزن موتني وراها بساعتين صعدت امي وكالت
غيداء : شسوي بيج ماتكليلي انتي بنتي ماكدر انطي بيج شسوي بروحي بس فهميني ولج مافكرتي بالي راح يصير من حبيتي وليش ماكتيلي انه جان رشدتج دليتج الطريق الصح بس انه صوجي انه مطيتج انتي واختج ثقه وهسه كومي حضري هدومج باجر ترحين لبيت الناس
زمرد : ضليت ابجي وكتله يمه فدوه اروحلج ماريد اروح الله يخليج مستقبلي كله يضيع يمه فدوه اروحلج ضليت ابجي بعلو صوتي تاذيت الدرجه جبيره وحياتي راح تضيع
تغريد : مابيدي شي يمه شسوي ولج والله كلبي خلصان عليج كومي ورانه روحه للمول بعد ماكو سوك مفتوح خليني اكمل ملابسج الج كومي لا شلعين كلبي
زمرد : وفعلا كومتني واخذتني وانه احس روحي مثل الورقه الي طير وي الهوى وين ماياخذها تروح رحنه وشترتلي هيه وماس هواي اشياء وانه مويمهم ورجعنه وحضرت ملابسي ماس وكملت نمت من البجي ماحسيت ع روحي غير امي كعدتني وكالت
غيداء : يلا كومي ابوج متانيج يوديج الهم كومي يلا
زمرد : كمت وانه كلي امل انو المريت بيه حلم واكعد منه بس هيهات هيهات كلشي صار مكتوب بس مكتوب من ورا غلطه ارتكبناها ماعرفنه بوقتها نتصرف عدل بيها بدلت ولبست ملابس عريضه وفوكهن عبايه راس امي شترتها ملابسي صارت ثلاث جنط وحده صغيره بيها مستلزماتي اخذت حتى كتبي كلت يجي يوم واحتاجهن وحلمي احققه خليت ونزلت ودعت بيتنه وغرفتي ودعت ابوي بعيوني لان ماراضي عليه ودعت ماس ومحسن وحتى عامر موجود هوه ياخذني وي ابوي جهاد لاول مرا اشوفه مكسور هيج كسره اجه حضني وكلي تهون بس يطيب ترجعين يمنه لاتبجين وخليج قويه زمردي اوكي كتله تمام حضنته وبسته وكتله سامحني الصار موبيدي
جهاد: بعد المشكله رحت للمستشفى وصلت يمهم لكيت بس اخو موجود اسمه همام حجيت ويا وحاولت وهوه كبالي خابر اخو شيخ غضب وماقبل كله نفس الحجي يا تجي فصليه يا يحرك البصره ع راسنه وهنا حسيت روحي عاجز مادري شسوي وكله من هذا الحيوان الي حطم حياه اختي بسبب طيشه وغيرته وتهوره الزايد حيوان طلعت وانه اسب واشتم بيه ولو اشوفه اكسر راسه وحتى لو ياخذونها فصليه ماراح يطلع الحيوان لان سبق ومسويلهم خربطه ومتعارك وي فهد رجعت للبيت وكلت الامي وهيه راحت واخذو زمرد ورجعو وانه اشوف بوجه اختي القهر والحزن ثاني يوم كعدت ماشتهينه ناكل اي شي ولا حتى نشرب ودعتنه وانه احسها قطعه من روحي تبقى اختي وبعدين هيه مغلطت ولا شي وانه سالت ورا المشكله بالجامعه والكل تحلف باخلاقها لذلك سامحتها اجه اخوي عامر وابوي ياخذونها حضنتها وكالت سامحني الصار موبيدي كتلها عيون اخوج انشالله فترا وترجعين والا اطيح حظ اكرم والله ماخليه يرتاح رجعت حضنتها وراحت للبيت الشيخ كنعان وراها بست ساعات رجع ابوي وصل لباب البيت وجان ....
زمرد : خليت وصعدت وي ابوي ورحت للعماره وطول الطريق عيوني مابطلت بجي وكلشي صار مر كبالي مرور الكرام وصلت للبيت ورا ثلث ساعات وجانو واكفين كلهم بالباب ابوي نزل نزلت مدنكه رحت وكفت ورا ابوي لان بهاللحضه حسيته اماني وسندي
جلال : شيخ هاي بنتي عزيزتي احلفك بستر بناتك دير بالك عليها وتحميها من كل شر
شيخ كنعان: بعيوني ابو عامر لاتخاف امانتك محفوظه
جلال: ماتقصر صحت عليها كتلها تروح كبل بجت وكالت
زمرد : حسيت هاي نهايتي اخير شي الي خلص بعد ماشوف اهلي ولا ناسي ولا ديرتي حسيت كلشي خلص بسبب غلطه بوقتها حقدت ع شكو رجال بالدنيا وحتى فهد حسيته طلع من حياتي الاذيه الي صارت كلها بسبب طشية وهمجيته عباله الحب هيج من يوكف ويكول احبها ولمن لابن عمي انه شايفه الي يحب يضحي لحبيبه يخاف عليه من الهوى وفعلا حسيته طلع من كلبي نهائي كرهت حتى روحي من ابوي كال يلا بويه روحي احس روحي طلعت دنكت ع رجله وكتله الله يخليك بابا اخذني لاتخليني هنا فدوه اروحلك والله ماسويت شي خطا ليش انه اتعاقب وكضيت ايده ضليت ابوس بيها كتله الله يخليك بويه فدوه اروحلك اخذني وياك كام سحب رجله وراح وضليت اباوع ع السياره الي مابقى منها اي اثر بس التراب اجه الشيخ وكلي
شيخ كنعان: كومي بويه دخلي جوه وصاح ع مادري منو كال شيل جنطها وخليهن بغرفه فهد وكلهم هاي اوامر شيخ
زمرد : كمت وانه احس روحي رايحه دخلت جوه وشافتني وحده بنيه شكلها حيل حلو وصغيره بالعمر كالت هلو حبيبتي فوتي عيني دخلت جوه وانه ماحجيت ولا حرف
صفاء : حبيبتي تعاي سلمي ع امي
زمرد : هزيت راسي ودخلت شفت المرا بس جان وجهه حيل حلو وبيه حزن مرسوم رسم
صفاء : يمه هاي الفصليه
زمرد : كالت هيج احس سجين ودخلت بكلبي من الالم بس كلت عليمن هوه انه فصليه شنو بعد
صبيحه : اخذيها ماريد اشوف وجهه الصار كله بسببها هيه هاي الاخوج كلب الدنيا ياخذها تطلع مخطوبه وابن عمها ناهي عليها اخذيها
صفاء : يمه البنيه شعليها بعدين شلج بهالحجي الشيخ غضب موكلج تعاملوها زين لولا
صبيحه : كتلج خلي تولي من كدامي وخليها بغرفه المخزن ماتستاهل اصلا تنام بغرفه كره عيني فهد يمه وينك يبعد روحي وهلي
زمرد : حقها تحجي هيج ومافكيت حلكي بشي وناس هواي كاعدين ستحيت ارفع عيني وانه اسمعهم بكولون هاي الفصليه شهالبهذله شهالتراب الي بملابسها ضطريت اسكت لان انه السبب بالي صار كله استاهل اخذتني البنيه وكالت
صفاء : معليج بكلام امي انه امشي ع حجي الشيخ غضب كال تنامين بغرفه فهد وامي ترا طيبه وكلبها ابيض لاتضوجين منها وتدرين ابنها والصغير بين الحياه والموت
زمرد: اباوع عليها ايه من الجمال والحمار الجوه عيونها زايدها شعرها اسود طويل نفس شعري تقريبا بس انه بيه شكار جاي نصعد وجان تنزل وحده
عبير : ها شرفت الفصليه
صفاء : عبير احترمي واحجي عدل
عبير : ماعوزي بس الزعاطيط يعلون صوتهم عليه وبعدين شبيج حترك دمج قابل مجذبه صدك فصليه وخدامه هنا خلي تدعي مايصير بفهد شي
ولا نشوفها نجوم الضهر ام الزلم هايه
صفاء : انه اخلي اخوي يتصرف وياج مارد عليج
عبير : طيري انتي واخوج لوبيه خير جان كدرنه نخلف حتى لونص طفل امداج
صفاء : لاحول ولا قوه الا بالله خليت وصعد امشي حبيبتي امشي
زمرد : صعدت وانه روحي طالعه وبعدين شنو هاي اللسان ليش هيج ومبين حياتي راح تصير جحيم مبين من بدايتي هيج نهايتي شلون راح تصير كسرت الصمت وحجت
صفاء : حبيبتي شبيج انتي خرسه
زمرد : كتلها لا
صفاء : صلاوات من حجيتي شنو اسمج
زمرد : اسمي زمرد وعمري 19 سنه
صفاء : حبيبتي اعتبريني اختج الجبيره انه صفاء وعمري 23 سنه ارتاحي هسه وبعدين يصير خير
زمرد : تمام خلت وطلعت وانه عيوني تتلفت بالمكان حتى البيت مالحكت اشوفه بس شفت غرفته وشلون حلوه اخ ياقدري شكاتبلي بعد الله يكومك بالسلامه وترجع وتخلصني من همي بس اريد اكلك سامحني بعد ماكدر احبك الصار بيه كله بسببك خليت وتمددت ونمت ماحسيت ع روحي غير لمن صوت بالباب كعدي مسعده كعدي نايمه للضهر ماتستحين فزيت من الخراعه باوعت الساعه ب 6 الصبح فتحت الباب لكيتها نفسها البنيه كتلها تفضلي
عبير : اتفضل ليش الضاهر بيت ابوج يلا امشي كبالي الناس راح تبدي تجي
زمرد : ماحاجيتها مبينه تريد تسوي مشاكل وانه مابيه حيل بعد خليت ونزلت بعد ماغسلت وصليت نزلت للمطبخ سويت الريوك انه وغسلت الماعين وصبيته وكعدو يتريكون ب8 كعدت صفاء
صفاء : صباح الحب ع عيونج لحلوات
زمرد : صباح الخير حبيبتي
صفاء : شوكاعده من الصبح
زمرد : هذيج واشرت ع البنيه كتلها اجت كعدتي ساعه 6 خليت ونزلت وخلصت شغلي وهسه راح ابلش انضف
عبير : خير تتبسبسن من الصبح
صفاء : عبير كضي لسانج احسلج مومن البدايه بلشتي وي البنيه
عبير : والله مجايبينها نخدمها جايه تخدمنه هيه
صفاء : جاي احجي وامي ردت
صبيحه : كلام عبير صح وخلي تبلش تنضف مجايه ترتاح هنا هيه
زمرد : بدون اي كلمه اخذت اداوات التنضيف بعد ما دلتني عليها مرا تشتغل عدهم اسمها فضه كالت خاله هناك بالمخزن رحت عليهن واخذتهن وانه جاي اطلع نضربت رجلي رغم المي بس ماحسيت بالضربه الي اجت برجلي رحت وبديت انظف طبعي بطيء بس شغلي حيل نظيف ومحد يعلق وراي اجت عبير
عبير : اي خاتون نبقى للضهر بس بالاستقبال وباقي البيت
زمرد : كتلها حاظر حاولت اسرع اسرع بديت اشتغل سريع وكملت لبيت نوب صبو غده فضه طبخته خلصو غده غسلت الماعين كلها ونظفت المطبخ للعصر كالو راح يجي الشيخ غضب الي لحد هسه ماشايفته فهد مسولفلي عليه بس عمره مادز صوره لاخوانه المهم بدينه نحظر العشه وراحت فضه تخبز لان عدهم فصل مال عشاير حسب ماسولفتلي صفاء همه شيوخ كبار بمحافظه العماره كمل العشه وهمين خلصو وانه مشايفه الشيخ ولا شيخ ابوهم مالتقيت بيه طول اليوم بالديوان ولحد هسه مماكله شي احس روحي ما اشتهي العسل اجت صفاء
صفاء : حبيبتي تعشيتي
زمرد : ماشتهي
صفاء : شبيج زمرد تردين تموتين من امس بلا اكل والله يعلم بيت اهلج ماكله لولا
زمرد : عادي متعوده اذا ع احساس الجوع ينحمل بس احساس الظلم شلون ينحمل
صفاء : الله يساعدج الي كعده وياج تسولفيلي كلشي عن حياتج
زمرد : صار خليت وصعدت فوك غسلت وبدلت وصليت وتمددت ونمت الساعه 8 بالليل وكالعاده اجت الست من 6 الصبح كعدتني خليت ونزلت مالي خلك مشاكل غسلت وبدلت ونزلت جوه دخلت للمطبخ جاي اسوي الجاي وخليت البيض والبتيتة ع النار وسمعت صوت وراي كال ....