فصليه رحت من بعد نهوه

البارت العاشر

بعد ما بينه حيل انطيح
ونصيح اليشيلونه
هنّه شويه ضلن حيل
اخلصن يا شويونه
ترسنه گلوبنه من الآآآآخ
فقره وماعرفنه انبيع
ونراضي اليزعلونه ...

*******************************
غضب : دخلت للبيت وصعدت فوك جاي ادخل للغرفه وجان اسمع صوت بجي كلش قوي جاي من غرفه زمرد تقربت يمها سمعتها تكول
زمرد : يارب ساعدني يارب ماعندي غيرك اهلي وناسي كلهم تخلو عني ومايردوني بعد اخ يافهد وين رحت وخليتني لوعايش جان اسمك ع الاقل حميتني عفتني وحدي ورحت
غضب : سمعتها تحجي هيج حيل نقهرت يعني هيه تحب فهد يعني انه شلون اخلي عيني عليها شلون احبها لعد همام منين جاب طاري انو هيه بطلت تحب فهد هاي جاي تبجي عليه ومن يومها قررت اغير معاملتي وياها حتى اكدر اكرهه اكدر اقسي عليها وابن عمها اخذ ثاري منه الا اكعده ع الحديده وتاليته ارجعه للسجن خليت ودخلت معصب للغرفه نمت وكعدت ثاني يوم كالعاده عندي شغل بالمحكمه طلعت بدون ماشوف احد لان شويه بعيده عني المحكمه  طلعت وصلت لباب المحكمه وجان يصير اطلاق نار ع الباب مالتها انه رئسا دنكدت وصرت بالارض بس مع ذلك نصابيت برصاصه مااذتني هواي شويه وجان توصلني رساله من رقم مكتوب بيها هالمرا تنبيه الك المرا جايه تنكتل فبتعد عن هاي القضيه ماهتميت خابرت همام الوقت جان ساعه 9 الصبح رد عليه
همام : كاعد اتريك وخابرني غضب رديت كتله هلا خويه شلونك
غضب : انت وين همام
همام : بالبيت كاعد اتريك وهسه شويه واروح للبصره عندي شغل هناك
غضب : همام انه بالمحكمه وصار عليه اطلاق نار لازم تجي
همام : كبل وكفت كتله شنو وخو مابيك شي مامتاذي
غضب : مابيه شي همام مابيه تعال بسرعه سديت الخط ونسيت اكله مايبلغ احد بالموضوع ماريدهم يدرون وينشغل بالهم ورا ساعه وصلي همام انه احس بروحي خدش بسيط يعني مومال اكبر السالفه لان انه حميت نفسي بس اكو ناس تاذت وانه السبب
همام : رحت عليه اركض خويه خومابيك شي
غضب : لا همام وديني للمستشفى نوب خليني ارجع للبيت
همام : صار خويه
غضب :  حت للمستشفى وضمدوني ومثل متوقعت بس خدش بسيط رجعت للبيت تلكتني امي
صبيحه : ولك يمه سوده عليه فدوه رحتلك يابعد روحي خومامبيك شي
غضب : كالت هيج وضلت تبجي اجت عبير هم عيونه مورمه كتلهم شبيكم مابيه شي صفاء اجت حضنتني حبيبي خويه عمري ع عمرك دير بالك ع نفسك شيخ حضنتها وكتلها لاتخافين عليه صفاوي كلشي مابيه جرح بسيط حتى مايحتاج راحه شلت عيني اجت عيني بعينها كالت حمدالله ع سلامتك شيخ كتلها بدون ماباوع عليها الله يسلمج خليت وصعدت فوك بدلت ونزلت ابوي ماموجود سافر للناصريه وهوه شهر ويروح هوه وامي للعمره خليت ونزلت بوجهي للديوان بنزلتي سمعت زمرد تكول لعبير انتي ليش هيج تعامليني انه شعليه شسويتلج دخلت عليها كتلها لج شلون تحجين هيج وي مرتي رادت ترد كبل كتلها ولا حرف اعتذري منها ومرا ثانيه لاتتنسين نفسج انتي هنا فصليه خدامه وبس خليت وطلعت كعدت بالديوان وانه ضايج من روحي بس كلت ميخالف خليني اسوي هيج بس كلت هيه محجت شي انت طول عمرك عادل ماتظلم احد ضليت بين شعورين الشعور بالذنب وشعور بالشي الي ممسويته ابد خليت كملت شغل الديوان والناس يجون من هاللحضه وبديت اتعامل وي زمرد بصوره قاسيه تعدت الايام وانه تعاملي وياها كله نتر ونهر وزمخ لدرجه ضليت اكره روحي بسبب هالشي والمصيبه جاي احبها اكثر واكثر واغار عليها بيوم اجيت لكيتها كاعده وي همام بالمطبخ وتسويله اكل وتسولف ويا وتضحك كتلها بدال ماضحكين كملي شغلج وروحي لغرفتج لو الضاهر عاجبج الوضع باوعتلي بقهر وسكتت محجت
همام : شبيك خويه ترا جاي تسولف الي عن الجامعه والدراسه وحسيت بيها فرحت من شخص حاجاها بصوره زينه
غضب : انت اسكت همام معليك بيها وبعد لتحاجيها
همام : خاف تغار عليها
غضب : مااغار ولاشي خوش هيه مجرد خدامه وبس هنا خليت ورحت لغرفتي هالحجي ساعه 9 بالليل صعدت انام وانا مشتعل نار عليها كاعده وتسولف وتضحك ويمي مسويه روحها تخاف والتهديدات مازالت مستمره وبما انو مااخاف انه ضليت مستمر بالقضيه المهم خليت ونمت بعد تفكير طويل خلصت الخميسات كلهن مالات اخوي وصار يوم الاربعين وتحضرنه نروح للاربعينه نزور نجف ومناك نروح كربلاء بمرور الايام حسيت حتى امي علاقتها زينه وي زمرد وبدت تحبها جهزنا اغراضه ورحنه بسياره جبيره كلها صعدت وكعدت بقت بيه هيه واكفه شويه وصاح الها همام كلها زمرد تعاي يمي كعدي خويه مادري شصار بيه صرت بركان من الغضب بعد ساعات عيني عليها ماشلت منها وهيه كاعده سانده نفسها ع الجامه وامي بس تبجي هيه وصفاء واختي سناء هم وانه ماحركت نضري عنها كلساع ادور وجهيي عليها وصلنه بعد طريق طويل نزلنه للمقبره وكان امس مات اخوي كلها ضلت تبجي وتعالت الاصوات وامي تجيب تراب وتشمر ع راسها بالمناسبه ع اساس شهر يرحون للعمره نوب ابوي اجلها كال ورا الاربعين حتى امك ترد عافيتها شويه بعد ساعه كامله يم القبر من رحنه تقربت زمرد وكعدت تبجي وتحجي بس مسمعت ولا حرف قرت الفاتحه وراحت للسياره رجعت كعدت بس شعوري لا يوصف ادري بروحي اناني ومايصير اسوي هيج هيه حبيبه اخوي وانه ادري راح يصير بيني وبينه حاجز والحاجز هذا اخوي رغم بالفترا الاخيره اشوف نضراتها الي بحزن وخوف وقهر مادري بس كلما اتذكر الموقف الي صار وفشلتها كبال الكل اكره روحي بالزايد اخ يا زمرد شسويتي بيه الموقف هوه جنه كاعدين وعدنه بيت عمي وجابت الجاي وهيه جاي تمشي عثرت فنكلبت الاستكان ع ايدها كبل عطت عليها وثول حتى ثول ماشوفين هيه كبل خلت الصينيه وراحت للمطبخ بدون مترد اكثر شي يعجبني بيها ماترادد اي شخص حتى يهينها واكثر من مرا اشوف عبير تغلط بيها وهيه الغلطانه وماوكفها عند حدها رحنه نزور الامام علي عليه السلام ودخلت لضريحه كتله يا سيدي يامولاي جيتك انطيني اشاره شلون اتصرف فدوه اروحلك خلصت وصليت وطلعت وصلت لباب الخروج مال الصحن الشريف وجان اشوف
زمرد : بعد ماصار الموقف بينه وشافني وانه منها وحاولت اتهرب وماشفته طول اليوم صعدت فوك للغرفه بالليل وتذكرت ايامي وحياتي كلها المرت عليه ضليت ابجي بحركه كتله يارب ساعدني فدوه اروحلك ساعدني ماعندي غيرك ولا الي غيرك تذكرت فهد كتله ليش عفتني وحدي فهد ع الاقل جان اسمك زوجي تحميني من الدنيا ومن شرها يارب ارحمه برحمتك الواسعه وبقيت ابجي ل3 الفجر احس صحتي بدت تتراجع بس محجيت شي ولا فكيت حلكي اكلي قل ودوم عندي دوخه بس اكل برتقاله اتحسن شويه ثاني يوم نزلت الصبح وماشفت الشيخ كلت الحمدالله كملت شغلي وخلصت سوينه الغده ورا الغده خلصت الماعين اجت عيير طبعا الشيخ صعد فوك يرتاح
عبير : ماتشتغلين عدل انتي
زمرد : مارديت عليها اجت جرتني من طرف دشداشتي
عبير : ماتسمعين هي اشتغلي عدل لا اعرف شلون اتصرف وياج
زمرد : رديت عليها وانه اشوف ردي مابيه شي وكلش مودب كتلها انتي ليش هيج وياي ليش هيج تعامليني انه شنو مسويتلج ماشوف الا الشيخ دخل وكال شلون تحجين هيج وي مرتي واعتذري منها اجيت ارد كلي اش انتي هنا مكانج فصليه خدامه وبس خله وطلع وانه احس النار شتعلت بصدري شعل ضليت مقهوره تعدت الايام وانه عيني ماخليها بعينه بس هوه بكل فرصه يتونس باذيتي مادري شنو السبب منا وحسيت نفسي بديت اتعود عليه وعلى شوفته مادري شنو السبب رغم اضوج من اسلوبه وياي بس احب اشوفه اسمع صوته افرح من يجي اضوج من يتقرب من الاسمها عبير كل هالشعور ماعرف شنو مصدره وشنو تاليته اجاهلت شعوري الى يوم اجو بيت عمه وديت الجاي الهم جان اعثر وتنجفي وحده من الاستكاين واصلا طاحت ع ايدي حتركت كلها كالت الله الله بس هوه كال ثول حتى ثول ماتشوفين عميه بوقتها ردت الكاع تنشك وتبلعني من الفشله والقهر رحت للمطبخ وانه دموعي ع خدي وقهري يزيد يوم عن يوم احس روحي راح اموت اجت صفاء
صفاء : حبيبتي زوزه لاتضوجين ترا اخوي مضغوط هالفترا
زمرد : عادي صفاء مايهم ماانه فصليه وخدامه صار الليل واجو قرايب الشيخ بس همه مجانو موجودين اجت وحده تعودله كالت انتي زمرد كتلها اي كالت ياحرام شوف الجمال لعد ليش بالسلف يكولون الشيخ مابيه خير مكدر ياخذها لان موبنيه مطيه روحها لاخو قبل لايموت كالت هيج وانه فتحت عيوني ع وسعهن اجيت ارد واحت صفاء
صفاء : شهالحجي فاطمه ليش هيج تكولين ع زمرد شفتي من البنيه بعدين منو ناشر هالحجي
فاطمه : والله يا حبيبتي مادري شوفي منو ناشر هالخبر
صفاء : اذا تكرر هالحجي اوصله للشيخ وهوه يتصرف شنو ماكو حشيمه ماكو احترام ولاتقدير طاح حضكم
زمرد : خلت وراحت وصفاء كالت لاتضوجين عمري والله يغارن منج وانه شاكه بوحده بس هالمرا اذا طلعت هيه الا اطيح حضها ومااسكت الها سكتت وماحجيت كلت شنو هالناس الي عدها شرف الناس سهل ورخيص هيج لهدرجه ويحجون ع ميت ويتهمونه بشي مصاير كملت شغلي لليل يلا نفسيتي نعدلت شويه صعدت فوك وتقريبا ساعه 1 ونص نزلت اشرب ماي جان اسمع صوت الشيخه بالهول وهيه مختنكه رحت عليها كتله شيخه شيخه شبيج احجي
صبيحه : يمه فدوه اروحلج جيبي البخاخ فجئه تعبت
زمرد : رحت كبل جبته الها ونطيته الها وجبت الها ماي شربت كتلها شلونج هسه انشالله زينه الشيخ جان بالناصرية ما موجود سندتها كتله خلي اوديج للحجرة شيخه كامت وياي ونيمته وكالت الله يرضه عليج بنيتي كتلها ماسويت شي شيخه واجبي هذا خليت وصعدت فوك نزلت لصبح اسوي ريوك كعدت الشيخه كتله ترتين جاي كالت اي يمه صبيلي صراحه تفاجئت من ردها كل مرا تحجي بنتر المهم كلت الله يهديهم عليه شريد انه بعد خلص اليوم عادي وغضب ماشفته بعد بالايام الي جاي تمر جاي اشوف روحي اتعلق بيه واحب شوفته احب اسمع صوته ضحكته بالبيت صار الليل ودخل همام همام كلش حباب وحتى اسلوبه حلو يختلف عن لباقين اجه كلي زوزه بلا زحمه تسويلي بيضه اريد اكل كتله صار بديت اسوي وبده يسال ع اهلي والجامعه ضليت اجاوب وانه مبتسمه ضحكت بضحكتي دخل الشيخ كال بدال مضحكين خلصي شغلج وصعدي فوك لاتتنسين روحج خليت وطلعت بعد ماخليت الاكل لهمام وصعدت فوك وانه فايره كلت يجي يوم واوكفه عند حده واذا شيخ شنو يصير يعني يطبه طوب طلعت برا اغسل لبست برموده سوده وطلعت بطلعتي سمعت خطواته وانه ركضت للغرفة حتى مايشوفني مالي خلكه دخلت تعدت الايام والاسابيع وتصرفات عبير حيل تضوج وحيل مكروهه تحاول تكرهني بروحي اما الشيخ ضلت عيني دوره بكل مكان يدخل بيه ومن اشوفه اصفن عليه بس نضرتي كلها قهر وحزن ومادري شنو اسمي هالشعور او هالتصرفات الي جاي اقوم بيها واحس روحي مفضوحه لدرجه اجت عبير وكال
عبير : باعي لج اذا شفتج مرا ثانيه تباوعين لشيخي افكس عيونج فتهمتي موعبالج ماحس عليج لا عيني اعرفج كلش زين شنو انتي ومن يا مله فتهمتي لو تردين تخطفينه مني حتى تاخذين كلشي
زمرد : صفنت عليها ومارديت كملت شغلي اليوم اخير خميس لفهد وخالتي سكت الكاع العطشانه من دموعها وتحجي بحركه وانه بالمطخ. لليل جاي اسوي جاي ع الطباخ جان اجي عبير ودفعتني ع الطباخ رئسا ايدي سندت روحي بالقوري ونسيت هوه حار كالت اسفه مادري وخرت ايدي شفته حيل حمرا وتلسعني ضليت ابجي شافني همام كال شبيج زمرد كتله ايدي حتركت كال صدك جذب ماشوفين كومي خلي مرهم حروق ولفيها وهسه تبرد وصيحي وحده تصب الجاي للزلم وهمين صعدي نامي وحضري ملابسج ورانه طريق سويت مثل ماكال وصعدت نمت فوك بعد ماجهزت اغراضي واخيرا راح اروح ازور العتبات المقدسه حيل محتاحه اشكي همي للامام وخصوصا الامام علي صار الصبح ونزلت لابسه عبايه وضامه ايدي جواها ماريد احد يشوف صعدت بالسياره وجان ماكو مكان وبالجذب غضب ممخلي الي مكان صاحلي همام كال تعاي يمي ورحت يمه كعدت وعيني ع الطريق لان كتله انه يم الجامه ضل يضحك وصعدت يم الجامع طول الطريق احس عينه عليه ماهتميت لان وصلت مرحله كرهت روحي اشوفه يسمع اهانات عبير واسكت وصلنه بعد طريق طويل وصارت المقبره تعلا بصوت البجي والصريخ الى ان كامو تقدمت يمه وسلمت عليه كتله فهد شسويت انت بيه ليش ضلمتني ليش رحت وكفت كبال ابن عمي وتدري بيه شراني حطمتني بس انه مسامحتك ادري بيك سويت هيج ع مود حبك الي بس اريد اكلك شي بدون ماتزعل انه الي طلعت ماحبك وجان مجرد اعجاب وهسه متاكده من مشاعري تجاه اخوك الشيخ اخوك شفته قبل لا اعرفك وماجنت ادري بيه هوه راح يصير قدري بس من شفته بيتكم عرفت بيه هوه قدري ومانكر شعوري تجاهه انت الوحيد الي راح اكلك بيه اي انه احب الشيخ بس هوه مايحبني ولا يريدني انه بعينه فصليه وبس لا اكثر ولا اقل ضليت ابجي وقريت الفاتحه وكمت شفت الشيخ يباوع عليه تجاهلته وصعدت بمكاني وراها وصلنه للحضرة وهنا دخلت وبجيت بكل مابيه من حيل من حسره من قهر بجيت بكل جوارحي وشعوري كتله يا علي اجيتك مهمومه انصرني يا علي فدوه اروح الك انصرني مقهوره ومهضومه وهسه بعتبار يتيمه وانت ابو اليتامى ياعلي انطيني اشاره وحده خليني اتاكد الي بداخلي صح لو مجرد وهم حبي لغضب صح لو وهم كضيت راسي شويه حسيت بدوخه عركت كلش طلعت ضربني الهوى البارت وجانت احلا نسمه تفوت لكلبي والرئتيني خلصت صلا وزياره زادت عندي الدوخه طلعت برا وانه احس عيوني تغوش جاي امشي وجان صار بوجهي الشيخ
غضب : طلعت وجان اشوف بوجهي زمرد تقربت عليه لان شفتها كاضه راسها وتمشي وجهه اصفر مخطوف تقربت عليها كتلها زمرد شبيج
زمرد : كلي شبيج وراها مادري شنو صار الا لمن فتحت عيوني وجان اشوف ..
غضب : كتلها شبيج ماردت ماشوفها الا كالت غضب واغمى عليها وطاحت بحضني جسمي كله نتفض من صارت بين اديه وسمعت اسمي لاول مرا بحلكها كل مرا تكلي شيخ فشلتها بسرعه ورحت للفندق الي حاجزينه سابقا ودخلتها للغرفه جست حرارتها شوي مرتفعه خابرت ع ابوي وكتله كال خليك يمها وراها بخمس دقايق فلشت التلفون تلفش عبير رديت كتلها شبيج تلحين عليه
عبير : شنو عايفني وكاعد يم هاي الساقطه
غضب : عبييرررر احترمي نفسج الساقطه التحجين عليها هيه مرتي حالها من حالج سدي حلكج احسن الج
عبير : هسه صارت حالها من حالج قبل يومين خدامه
غضب : اي غيرت راي كمت سديت الخط واصلا ماتدري انه بياغرفه نايم تقربت عليها وضليت اخلي الها كمادات بماي بار وهيه من بروده الماي كضت ايدي حسيت جسمي نتفض وكهرباء تسللت الي اخ يا زمرد باوعت عليها وجهه يجنن عن قريب شفايفها تخبل صار عندي فضول اضوكهن وكلت خل استغل لفرصه دنكت عليها وبستها بكل حب ولهفه وكمت عنها وانه احس روحي دخت ضليت مستمر بلكمادات وكلساع اتعوذ الشيطان حتى لا يوزني اسوي شي خطا خليت ونمت بصفها بعد ماتاكدت منها حرارتها نزلت نمت بتعب لان طريق وانه مانايم امس بمرضها وطيحتها نسيت كلشي صار بيني وبينها كلشي طار احس روحي مويمي بغير عالم صحيح انه حبيتها من اول نضره بس هنا تاكدت من روحي انو مو بس احبها لا اعشقها وقربي منها حيل يضعفني نمت وفزيت ع حركه باوعت لكيتها زمرد وهيه تحاول تسحب روحها مني كتلها مناويه تهدين كال
زمرد : كعدت جان اشوف روحي بحضن غضب حيل ستحيت بس بنفس الوقت قبل لا تحرك صفنت بوجهه شفت ملامحها شكد حلوه سماره وعيونه وخشمه ولحيته كلشي بيه حلو ومميز مبين عليه العصبيه حتى وهوه نايم حاولت اسحب روحي منه لان كلبي احسه مثل الطبله صار كبل كعد كال ماناويه تهدين كتله اسفه شيخ موقصدي بس شنو صار
غضب : ضحكت عليها كتلها ماصار شي بس انتي كتيلي تعال نام يمي انه اخاف وحدي شفت ع ملامحها الدهشه
زمرد : كتله انه بس بصدمه
غضب : اي انتي
زمرد : لا شيخ مسويت هيج اخير شي اتذكره بالحضره مستحيل اكلك هالحجي
غضب : عصبني كلامها كتلها ليش مستحيل يعني الضاهر موبعينج لاتنسين انتي مرتي ومن حقي اسوي كلشي وياج المهم ماصار شي لاتخافين رئسا كمت كتلها خمس دقايق والكاج جاهزه وها امس حرارتج ارتفعت وانتي بالصحن مال الامام فجبتج هنا خليت وطلعت
زمرد : نقهرت من رد عليه بس الاهم كال انتي مرتي جهزت روحي بخمس دقايق وطلعت من الغرفه صار بوجهي هوه وعبير وهيه كاضه ايده وتبتسم خليت ونزلت وانه كلبي مفحم من القهر الي شفته يعني شنو لاطشه بيه منا ناس عيب وهوه شيخ الشرفيات يبيعهن بس عليه
همام : شبيج تدردمين بوحدجً
زمرد : كمزتني همام شبيك
همام : حمدالله على سلامتج كالو مريضه
زمرد : اي يكول الشيخ جنت مصخنه
همام : وبعدج تدردمين الصخونه ماثره عليج
صفاء / صباح الخير حبيبتي شلون صرتي
زمرد : زينه حبي الحمدالله جاي احجي وشفت غضب كيل خزرني مانطيته اهتمام وايدي تحركني رحت ع همام كتله همام ايدي تحركني
همام : امشي اخذج اكو صيدليه هنا قبل لانطلع
غضب : وين رايح
همام : زمرد واحنه بالبيت حتركت ايدها وهسه تكول تاذيني
غضب : انه اخذها كلي تمام كتلها امشي ومرا ثانيه طلبين مني انه مو همام انه رجلج ماردت عليه اموت منها من تسوي روحها ماشوفني وادري بيها ضايجه بداخلي شي بس انكره اكول يمكن خطا مو صح خليت ومشيت كض ايدها ابو الصيدليه ردت اركعه بوكس ع وجهه شلون يكض ايدها وانه لحد هسه مالامس منها شي بدل الضماد وكال اي ماي مايوصل يمها طلعنه كتلها مرا ثانيه انتبهي ولاصيرين ثوله فهمتي
زمرد : مارديت عليه لان بس يغلط خلينه وصلنه للفندق الشيخ كنعان كال
شيخ كنعان: بويه خلينه نرجع للعماره صارت طلابه جبيره ومانكدر ناجلها خلي زياره كربلاء غير مرا وانشالله الله يتقبل
غضب : صار بويه تدلل رجعنه للعماره وصلنه الضهر والطلابه جانت بالليل وماكدرنه نفضها تاجلت ع ثاني يوم وراحو وانه دخلت شفتها تغسل كتلها انتي ماتفهمين موكتلج الماي ممنوع
زمرد : رجعنه وصارت الكعده وكالعاده عبير شردت وانه كعدت اغسل فات غضب كال موكتلج الماي ممنوع كتله عبير كالت غسليهم وايدج مابيها شي سكت ماحجه كلت بداخلي طبعا هاي عبير انه شكو كلي خدامه خلصت وصعدت فوك الكل بالبيت زين وياي الا غضب وعبير صعدت تمددت ونمت ثاني يوم كعدت نفس الروتين واحجي وي روحي اخ يازمرد يمته ترجعين الحياتج يم اهلج وجامعتج مستقبلج الي ضيعتي بوهم
غضب : نزلت الصبح وسمعت حجيها ضجت تريد تخلص مني يعني كتلها الضاهر ندمانه كبل كمزت
زمرد : ااا شيخ صباح الخير اسفه جنت احجي وي روحي
غضب : ماهتميت للحجته طلعت وانه عصبي شويه وبدت الناس تجي وبعد عرايك وطلايب فكت المشكله وحليناها ماكدر احجي بيها واسولفها لانها حيات ناس ومعلينه بيهم للعصر وصلتني رساله من رقم مجهول بس هالمرا القريته خلاني افك عيوني ع وسعهن وجان........ يتبع

ياريت تزيدون نسبه التصويت ع البارت واكون ممنونه يعني التصويت كلش قليل والمشاهدات عاليه ترى اخلي النشر كل يومين نوب اريد تفاعل حبايبي

..................//////////////

لاتنسون تابعوني على الفيسبوك روايات زينب عقيل الموسوي

https://www.facebook.com/profile.php?id=100087899666498&mibextid=LQQJ4d

وايضا قناتي على التيليجرام
@zainabakeel9

ورابط الواتباد للي ماضايفني يضيفني

https://www.wattpad.com/user/zainabakeel_almusawi

الى هنا انتهى البارت اتمنى ينال اعجابكم

الكاتبه زينب عقيل الموسوي