فصليه رحت من بعد نهوه

البارت الثامن

إنضم جروحنه من الناس
والياذينه ما نحچي
بعد ميصير صرنه كبار
لازم نختل ونبچي
كبرنا بس تفاجئنه اثاري الدنيه عاديه
اكتشفنا الي يعض  انسان
والسعلوه مبريه
اكتشفنا الوحده راحت بال
بس الناس وحشيه
اكتشفنا الليل احلى يصير
اذا شمعتنه مطفيه
اكتشفنا الضلمه متخوف
كلها افكار وهميه
كبرنا وصغرت الدنيه
وگمنا نشوفها شويه
كبرنا وكلشي ماصرنه
اثاري احلام ورديه

  ****************************
غضب : رحت للحمام ورجعت وجان اشوف الشي المستحيل اتخيله ابدا ومايدخل عقلي صار بوجهي همام ولونه مخطوف اجه عليه يركض وكال ولك غضب فهد مات مات الكلمه الي كالها احس فصلتني عن العالم مادري شنو اسوي وشلون اتصرف بهالوضع احس روحي تكسرت احس روحي عجزت ضليت صافن عليه ع ماطلع الدكتور وكال البقاء لله شدو حيلكم هنا انه لتزمت الصمت كبل همام خابر صفاء وبلغها وهوه يبجي ورا ساعتين اجو للمستشفى ابوي وعمامي واخوي واولاده واولاد اختي يعني المستشفى نترست من بين هذول كلهم شفت امي اي وهيه مكسوره ماتكدر حتى تمشي احت تصرخ وتصيح يمه فهد يمه وليدي يومي قبل يومك يبعد امك واهلها ولك يمه كوم اكعد بعدك صغيرون ماشفت شي من حياتك وضلت تلطم وتصرخ الكل بجه عليها كملنه الاجراءات وانه احس شي مني نشال حيلي نصه الاخو مهما يكون يبقه سند يبقه ضهر ننسند عليه وقت الشده شلنا اخوي بتابوت بعد ماجان طوله يهز الكاع من شافته امي وهيه ضلت تطلم ودك ع راسها وجهه خفت عليها لايصير بيها شي طول الطريق وانه دموعي تصب اول مرا دموعي تنزل ع مود شخص بس متوقعت تنزل ع فهد اوليدي وابني انه ربيته اخ يا كسرتك يافهد وصلنه للعماره والناس ملتمه وبدخلتنه للبيت كلها صارت تبجي وتعالت الاصوات بالبجي والصريخ والعياط عيني شافتها واكفه بعيد وعيونها تصب وتبجي بحركه مادري ليش حسيت كلبي نقبض بشوفتها عيوني رئسا دارت ابن عمها سبب موت اخوي وحلفت اخذ بثاره بس بطريقتي خلينه وشلنا وامي زادت بالبجي والبنات همين نفس الشي صفاء فقدت من البجي جانت اقرب وحده اله وكله سوه ماعبالك بينهم سنتين عبالك توئم خلينه وطلعنه ورحت وياهم للنجف انه نزلت ابني بيدي نزلت اخوي بيدي بالحفره ودعيت من الله يحميه بكاعه الي تستر كل مكشوف ضليت ابجي وادعي ونخيت علي يحفضه ويقلل عليه عذاب الكبر خلصنه ورجعنه وانه مكسور كلشي اسمه فرح بداخلي مات مادري احساسي شنو بوقتها وصلنه للبيت والديوان مايندخل من الناس والشيوخ الي اجت تعازي جنت اتمنى يجون بعرسه هسه اجو بفاتحته اخ ياخويه كسرت ضهري ولك فهد ضليت ابجي كبال الناس وكلها تواسيني بعد ماجنت انه اواسي الكل تعدت ثلاث ايام وخلصت الفاتحه وانه ماداخل للبيت حتى انام بالديوان ويجيبون ملابسي للحمام البره كرهت البيت وماريد اشوف امي احس تعاتبني تكلي انت رحت جيبه يمشي جبته محمل بتابوت احس الدنيا صارت سوده بعيني من بعده خلصت الناس وبدو يخفون شوي شوي وابوي متعلعل وحالته الصحيه تراجعت بسبب وفاه اخوي ثاني يوم بعد ماخلصت الفاتحه قفلت الديوان وكلت خليني ادخل دخلت وجان اشوفها اي هيه واكفه تنضف بالمطبخ بس بوقتها حقدت عليها وعلى اهلها وع ابن عمها وانه اراويهم الا اندمهم شافتني وكالت
زمرد : البقاء في حياتك شيخ
غضب : مارديت عليها وصعدت فوك وانه كاره روحي بعد مجنت اتمنى اباوع لعيونها هسه صرت ماشتهي اباوع بوجهه احساس متناقض خسرت اخوي بسبب طيش شخص ساقط خليت ونمت وعبير كاعده تواسيني ماقصرت وياي كعدت ثاني يوم الصبح تمنيت المرينه بيه حلم وهسه انزل اشوف فهد واتشاقه ويا واضحك بيدي وديتك للبصره انه بيدي لو ادري هيج مكعدك يمي هنا ولا صار هذا كله الي صار والي جره مجاي استوعب فكره موته ولا كادر اتقبلها احس بكلبي صار خدش جبير كمت من مكاني ونزلت جوه هم لكيتها بالمطبخ محضره الريوك وابوي كاعد وامي همين عمت عيني عليها عيونها صايره دم من البجي وابوي مو احسن منها يعني كعدت اكل شويه وابوي حجه وكال
شيخ كنعان: بويه اخوك وخلص العزاء مالته وراح الدار حقه وهاي حكمه الله وقضاءه وقدره ومايصير نعترض عليها هوه جان امانه وراح لراعيها وانتي يا ام بارق قوي نفسج فهد صح عزيز علينه بس رب العالمين اعز وهوه شاء وقدر ياخذ روحه ويومه وصل الحمدالله ع كل حال
غضب : الحمدالله كول بويه بس كلبي نغزني من حجه هذا الحجي بس لا يصير الي براسي
شيخ كنعان: البنيه هنا فصليه وجانت المفروض تروح لاخوك الله يرحمه هيه واكفه هنا هسه وكبالها محد غيرك يستحق ياخذها ع مايصير سنه ورجعها الاهلها وكلشي يفض اخوك يومه وصل مهما كان السبب والحمدالله ع كل حال شتكول بويه
غضب : اباوع عليها واباوع ع ابوي كتله بويه شتحجي انه متزوج مايصير اخذها وهيه تصير حبيبه اخوي الله يرحمه حبيبه ابني اصلا مو اخوي هذا شلون تقنعها هيج
شيخ كنعان: ابني الولد مات لا تخليني افقد اعصابي واخوك همام مايريد يتزوج ورفض وماعندي غيرك انت لوتريد ازوجها لابن عمك احجي وانتي صبيحه احجيلج شي
صبيحه : بكيفكم انه معليه بهايه انه كوه متحمله وجودها بالبيت شتردون اسوي يعني ويايرت تنطيها لابن اخوك شيخ ونخلص منها
غضب : سمعته كال ابن عمي ينطيها اله مادري شصار بداخلي بركان ونفجر عبالك مادري شنو سببه كتله بويه وهيه اصلا منهي عليها
شيخ كنعان: السالفه هاي سهله ومايرادلها شي ابد هسه كلي موافق لولا
غضب : صفنت وحجيت بدون وعي لان ماريد تطلع من بيتنه هذا شلون اخذ بثاري وهيه بعيده كتله هاي هيه بويه الي تريده يصير انشالله
شيخ كنعان: عاشت ايدك وليدي وعفيه عليه ماخيبت ضني
غضب: بس بويه نطيني مهله اربع ايام خمسه ع مااخلص عندي شغله مهمه اسويها
شيخ كنعان: الي شوفه بويه انه كايم للديوان
غضب : خله وراح ابوي وامي كالت
صبيحه : يعني تاليتك تاخذ هاي كتاله اخوك
غضب : يمه خلص سكتي رحمه لربج متطلع ريوك طلع سم عليه كمت حتى اطلع اجت عيني بعينها لكيتها دمع وعيونها تصب احس بيها مكسوره وهيه لابسه اسود اباوع عليها الاسود زايدها جمال استغفرت وطلعت سريع من البيت وانه عصبي كلش الرسايل جاي تزيد عليه توجهت للبصره وبوجهي لمركز الشرطه كتلهم اريد اقابل المسول انه المحامي غضب ال وادي
كلها كالت تفضل استاذ فتت عليه وكتله اريد اشوف المتهم اكرم الي اجه قبل سبوع هنا
كال تامر وتدلل خليت وكمت ويا رحت لغرفه المواجهه ودخلت عليه لكيته كاعد ولا عبالك مسوي شي ابد بس وجهه مبين مضيفينه خوش ضيافه حسب توجيهاتي الهم طبعا وعندي نفوذ وسلطه كلش قويه بحياتي ماصرت ظالم بس هالمره الا اصير شخص ظالم كتله انت هسه تشيل النهوة عن بنت عمك
اكرم : بعد ماخذوني لمركز الشرطه وسجنوني وانه كل يوم يمر اتحلف بيهم اكثر واذا عايش هالعار هم ارجع اكتله وكل يوم ع ضرب وتحقيق بس ماياخذون مني حرف واحد وانه رجال اتحمل الكتل واتحمل الضرب كله تعدت الايام وصار ع وجودي سبوع بس جسمي كله تعود ع الضرب والاهانه وبطل ضربه وكل اهانه حقدي وكرهي يزيد عليهم خصوصا بعد ماابوي كال اخذو زمرد فصليه وهيه نهوتي وصلت لمرحله ماهتم لكميه الضرب الي جاي تصير وياي وبيوم كاعد واجو عليه كالو عندك زياره كعدوني وجان يدخل عليه هذا العار الاسمه غضب كبل بدون مقدمات كلي هسه ترفع النهوه من بنت عمك كتله تحلم اشيل النهوه وزمرد الي
غضب : غصبا عليك شيلها فهمت موبرضاتك والله اخيسك بالسجون وماتكدر تطلع بعد وبالحالتين ماشوفها وبالاول والتالي هيه بيتي اعتبرها خدامه كلش سهله هالسالفه
اكرم : انه اطلع اطلع صدكني والمحامي جاي يشتغل ع القضيه وراح يثبت للمحكمه انكم اخذتو فصل يا اما انه انسجن وترجعون زمرد لبيت ابوها
غضب : هه تحلم اكرم انه الكاض القضيه مالت اخوي انت حقك متعرفني منو انه  وشلون اكدر افرها عليك فشيل النهوة احسن الك وراح اخليك تفكر كم يوم تمام خليت وكمت وطلعت للمحكمه عندي شغل وبعدين توجهت للبيت وصلت تقريبا ساعه 8 بالليل دخلت من المطبخ لكيتها هيه ياربي استغفر الله ماريد اشوفها بعد ردت افوت كالت مساء الخير شيخ بس الشيخ كال اذا يجي بلغي احنه طالعين للنجف وراح نبقه يومين وعبير راحت الاهلها كتلها شلون يعني بس انه وياج بالبيت هسه كالت اي شيخ تريد اصبلك عشه كتلها مشكوره خليت وصعدت فوك كتلها شويه ونازل تمام صعدت فوك خابرت ابوي
شيخ كنعان: هلا بويه هلا شلونك
غضب : الله يساعدك يبه شني رايح للنجف
شيخ كنعان: اي والله ع مود امك اريد كلبها يبرد انشالله الاربعاء راجعين انت وهمام حضرو للخميسيه
غضب : وشلون عايفين زمرد وحدها بالبيت
شيخ كنعان: كلت المرتك وماقبلت الا تروح الاهلها وبعدين من طلعنه همام موجود بالبيت
غضب : مصار شي بويه ترجعون بالسلامه انشالله كعدت احجي وي روحي هسه وقتها ماتكلولي وقتها عايفينها وحدها بالبيت بدلت وكملت ونزلت كعدت بالهول مالتنه شغلت التلفزيون وكعدت اباوع اخبار شوي وجان اسمع صرخه بالمطبخ رحت وجان اشوف
زمرد : كاعدين نسولف انه وصفاء شوي واتصل التلفون ردت وجان كبل تصرخ فههههههد هنا عرفت انو خلاص فهد مات وبعد ماله اي وجود بالحياه مادري شنو احساسي بوقتها بس فعلا بجيت من كلبي وبحركه ع حضي راحت وضلت تصرخ وتعالت الاصوات مال البجي كلهم لتمو وراحو للبصره يجيبون فهد ماجنت رايدته يموت بس الله وارادته جانت اقوى والحمدالله والشكر كلمن ويومه راحو ورجعو وصفاء مابطلت بجي ودك ولطم ع اخوها وانه وياها لبست اسود ونزلت وانه عيوني مابطلت بجي ابجي ع حضي لو ابجي ع موت فهد الي حياتي بعده ضاعت ومادري شنو مصيري هسه فعلا اثبتو انو انه فصليه لا اكثر ولا اقل جابو التابوت بعد مرور اربع ساعات وتعالت اصوات البجي والصريخ الي بالبيت دخلو والكل يبجي اكثر شخص متاثر الشيخه وصفاء جاي ابجي وعيوني مورمه من الدموع ابجي ع حضي وع شباب فهد الي راح بسبب تهور شخص ساقط ابن شوارع حتى وان كان ابن عمي اجت عيني بعين الشيخ غضب وشفت بعينه الحزن والقوه والحقد حيل نقهرت عليهم بلشت الفاتحه وعبير شاده وياي شده ع كلشي وكلشي طاح براسي ماعين وتنضيف وصب وتعزيل يعني يوميه بالليل ارجع للغرفه هلكانه من التعب اكعد ابجي واذكره واترحمله مهما يكون يبقى شخص حبيته وعزيته الغريبه ماحس باي الم بداخلي مجرد حزن ع ايام راحت ومضت وكل يوم بعد مارجع اسال نفسي هل ياترى حبيتيه يا زمرد لومجرد اعجاب عبالج حب فراح بيني وبينه هواي مواقف وزاد وملح وبهالايام الشيخ مايجي للبيت ملابسه وكلشي يروحله للديوان الله يعينهم ويصبرهم اما الشيخه ماتبطل بجي ليل ونهار حتى عيونها راح يعمن وحقها هذا ابنها مو سهله تفقده بلمح البصر اخير يوم بالفاتحه جاي اغسل اجت وكفت فوك راسي عبير وتحاجيني
عبير : غسلي عدل ام المصايب كله منج وبسببج لومانتي ماصار كل هذا بسببج راح الولد لج الله ينتقم منج ومن هاللحضه انتي هنا خدامه وبس ومالج اي تسميه ثانيه ابد نهضمت حيل من كلامها بس سكتت خلصت الفاتحه وراحو الناس وبالليل واكفه بالمطبخ وجان يدخل شيخ باوع عليه وراح بدون اي كلام ردت اعازيه باخو بس مالحكت سكتت وكملت شغلي وراها نضفت  البيت كله ورتبته ل3 الصبح يلا خلصت صعدت بدلت وتمددت نمت ب6كعدت سويت ريوك كعد الشيخ كنعان والشيخه هم صبيتلهم جاي شويه وجان ينزل الشيخ غضب كعدت وحجه الشيخ كنعان حجي مستحيل جنت اتوقعه وسمعت رده شلون يكول ماريدها تصير زوجتي خلي همام ياخذها حسيت بوقتها انه مثل الطوبه واحد يشمرها ع الثاني وحجي الشيخه حيل اذاني كل هذا وانه بس دموعي تصب خله وكام بعد ماوافق يتزوجني سنه ويعوفني لان الصار كله قضاء وقدر كله انطيني مهله خمس ايام ع مانخلص سالفه النهوه خله وكام الشيخ وراه كام غضب من طلع باوع عليه خليت عيني بعينه وانه من لبدايه ماخاف من شي وعيوني بعين المقابل طول ما انه ممسويه شي خطا بس بوقتها باوعت بحزن واسى وقهر باوع عليه وطلع كبل كملت شغل البيت اشياء خفيفه بس هواي اجو نسوان يعازون بالشيخه وانه مابين كهوه وجاي كهوه وجاي نهد حيلي صبينه غده وخلصو العصر كالو راح نروح للنجف لان الشيخه تريد تزور ابنها وصفاء طول هالفترا بس مكتأبة  لاتحجي ولا تبدي اي رده فعل بدونها وحشه عبير كالت اروح الاهلي من خلصو وطلعو شيخ كال بويه من يجي الشيخ غضب كليله راحو للزياره تمام وعبير عند اهلها وياج همام اي شي تحتاجيه كتله صار شيخ مثل متريد طلعو بعد ماحضنت صفاء وكتلها شدي حيلج هيج تاذينه وياج حبيبتي هزت راسها وراحت ضليت كاعده وحدي شويه واجه همام وهوه مدنك ميباوع عليه اصلا كال انه طالع خويه ديري بالج ع مايجي غضب كتله صار وراه بساعه دخل شيخ راد يصعد بلغته بحجي الشيخ وكتله خله وراح وانه كملت العشه بس المن هوه كال ماريد شويه واسمعه ينزل كعدت جاي اكصص الي تفاحه حتى اكلها  طبعا شهيتي شبه نقطعت من اجيت لليوم عشر ايام بس احس نزلت عشر كيلوات ركضه وشغل وعدم اكل المهم جاي اكصص اخذتني صفنتي لايامي وي فهد بالجامعه رغم هيه قليله وحتى مكاعدين هواي وي بعض لعد شلون جان يكول احبج هسه صحيت ع روحي ماحسيت غير جرحت ايدي رئسا صرت ماشوف غير الشيخ واكف فوك راسي وكال
غضب : شبيج ماشوفين ثوله انتي تعاي كعدي هنا
زمرد : بس ابجي من الالم لان مبين جرح عميق لان ايدي حيل اذتني والدم ماجاي يوكف
غضب : كتلها ثوله ماتفتهمين اشوفها تبجي من الالم خليت الها معقم وشديت ايدها كتلها اذا ماوكف الدم اخذج للمستشفى تمام ومرا ثانيه نتبهي وبطلي بجي فهمتي لولا
زمرد : هزيت راسي خله وراح كلت بكلبي ثول شبيه هذا بس يصيح فوك ما يكول خطيه نكصت ايدها ضليت ابجي ع حضي المصخم حتى التفاحه ما اكلتها خليت وصعدت نمت كعدت ثاني يوم من الصبح جهزت الريوك جاي اطلع وصار بوجهي همام
همام : اصعب شعور بحياتي صار من كلي الدكتور خبر وفاه فهد احس حيلي راح اخوي هذا ابني محد ربا غيرنه انه وغضب ف اكثر ثنين تاذو احنه خلصت الفاتحه وابوي كلي اتزوج زمرد وانه ماريد اتزوج اصلا شوف غضب وفعلا حسب مكال ابوي غضب قبل بس راد فترا لان عنده شغله ادري بيه خله راسه براس اكرم بس خلي يستاهل هالمرا مراح اوكفه ابد ابوي كال اريد اروح للزياره واخذ امي وراح وانه العصر طلعت واجيت للبيت لكيت غضب سلمت عليه وكعدت كال شبيك كتله تعبان شويه والصار موقليل ستوه مات اخونه
غضب : كاعد بالهول وبالي يمها خاف متاذيه بعدها دخل عليه همام وشكله تعبان بس حقه يعني كتله ابوي يكول نحضر للخميسيه
همام : انشالله
غضب : رئسا دمعت عيونه
همام : شويت تعقد ع زمرد
غضب : صراحه لومابالي اخذ ثار ابوي فلا افكر اصلا اتزوجها وهسه هيه فوك نشكت ايدها مدري شصار بيها
همام : وهسه شلونها ترا مبينه هاديه وحبابه حتى صوتها ماينسمع بس تدري لحد هسه مشايف شكلها
غضب : احسلك لتشوف وبعدين لتحكم ع الناس بالبدايه ستوها حيصير الها عشر ايام عدنه
همام : لاتصير هيج قاسي هسه هذاك الساقط انه وياك ننهي حياته بس هيه شنو ذنبها
غضب : رحتله وخوش طلعو مضيفينه ضيافه هه ابتسمت بستهزاء بس بعده مشايف شي كتله يشيل النهوة وكم يوم وارجع اخذ موافقته
همام : تمام يلا انه صاعد انام
غضب : تصبح ع اخوي صعد همام وانه هم صعدت نمت
همام : صعدت لغرفتي ودخلت كعدت ع الفراش تذكرت فهد وسوالفه من يفتح الباب قوي ويكعد يداهر بيه لو كلساع جايب صوره بنيه حتى اتزوج ابتسمت وبنفس الوقت تذكر البنيه الي شفته قبل شهور كلت وين صارت هسه بلكي من انزل للبصره تجمعنه صدفه ثانيه خليت ونمت كعدت ثاني يوم الصبح نزلت جوه اريد اشرب جاي واطلع جاي ادخل للمطبخ وجاي تصير بوجهي زمرد باوعتلها وكتلها شكلج موغريب عليه كالت شنو مافهمت كتلها شايفج مادري وين كالت وانه هم وضحكت كتلها يلا خلي اتريك كعدت اتريك وجان يجي غضب
غضب ؛ نزلت الصبح واسمع همام يكول الزمرد مادري وين شايفج هيه كالت وانه هم المهم خليت ونزلت دخلت عليه صبحت كتله صباح الخير
همام : صباح النور خويه
غضب : صباح العافيه بسرعه خلص ورانه شغل كومه
همام : صار اكلك صدك هاي زمرد مادري وين شايفها شكلها موغريب
غضب : يجوز شفتها بالمحكمه بيوم جلستي تتذكر
همام : ماتذكر ياجلسه قصدك
غضب : لك من رحت وياي جلسه طلاك طه
همام : صفنت وكتله ها اي تذكرت المهم خلينه نكوم ضلت السالفه بالي معقوله زمرد اخت هذيج البنيه لان انه اتذكر بالسوك هم اكو بنيه وي هاي البنيه تشبه زمرد المهم طلعت الموضوع من بالي ورحنه كملنه تجيهزات الديوان لليل رجعت صعدت نمت كبل .
غضب : بعد ماطلعنه وانه بالي يم الاسمه اكرم ياترى راح يقبل يسقط النهوه لولا المهم كملنه شغل ورجعت المغرب للبيت قبل همام دخلت من الباب الخلفي توجهت المطبخ وجان اشوف زمرد واكفه بالمطبخ وفاله شعرها اخ شهالشعر الحلو هذا طويل كلش ومائل للشكار حيل حلو تحمحمت كبل لتفتت هيه ارتبكت ماعرفت شسوي اخذت الحجاب كبل ولفته كالت
زمرد : بعد مااجه همام بوجهي كلي انه شايفج مادري وين وصراحه اول مرا اشوفه من اجه لليوم هم حسيت مادري وين شايفته كتله وانه هم خليت ودخلت لغرفتي خلصو ريوك طلعت برا لكيتهم راحين كمت غسلت الماعين واكلت جبن شوي ونضفت البيت وسويت غده مرتاحه من الاسمها عبير المهم محد اجه وباقيه وحدي بالبيت حتى اذا موت محد يدري بيه كعدت وتذكرت حياتي بيت اهلي لساني جان شطوله هسه الي يضربني مارد عليه المهم للمغرب كمت صليت وكلت هل افتح شعري شوي تعبت وانه شادته واكفه ومطيه ضهري للباب شويه وجان اسمع حمحمه فزيت ودرت لكيته شيخ غضب عزا شكد عيب ضليت ماعرف شسوي جريت الشال كبل وكتله اسفه شيخ ماقصدي بس لان محد بالبيت
غضب : عادي ماصار شي عكدت حاجبي ورحت للهول كعدت خرب شصار بعقلي ليش هيج تخربطت من شفت حالتها اف ياربي ساعدني طلعها من عقلي اذا بقت بيه يمكن حتى ثار اخوي مااخذه شويه واجت
زمرد : رحت عليه كتله شيخ تريد عشه
غضب ؛ حاولت اكون عصبي بكلامي كتلها لا بصوت جهوري خشن ماريد متعشي انه صاعد انام وانت هم روحي لغرفتج خلت وراحت وانه قفلت البيبان وصعدت لان حيل تعبان ثاني يوم كعدت الصبح لكيت همام
همام : صباح الخير
غضب : كاعد من الصبح
همام : مانمت اصلا
غضب : شبيك
همام : مادري ارق ع قهر ع حزن المهم الله يرحم فهد
غضب : من كال اسمه وانه عيوني صارت بالطول من العصبيه خليت وكمت نزلت ماموجوده زمرد كلت وين راحت لمهم صحت همام
همام : نعم خويه
غضب : تعال سوي جاي انه ماعرف
همام : جايك جايك
غضب : اجه وسوه جاي وكال انه طالع اكمل تحضيرات باجر كتله تمام شوي ونزلت تفرك بعيونها وحجابها شبه طايح واكو خصل ع وجهه نازله زايدتها جمال اول مرا انتبه الها من قريب اجت وهيه مدنكه بعد ما انتبهت لوجودي احلا شي بيها خجوله ومودبه وكلش محترمه المهم كالت اسفه شيخ هسه اسوي الريوك كتلها بس جاي راح اشرب كالت صار فتحت الكاونتر ورادت من فوك حليب شفتها واكفه ع اطراف اصابيعها ماتلوح تقربت عليها وصرت قريب عليها لدرجه ماجنت متوقعها رفعت ايدي ونطيتها علبه الحليب ارتبكت وكالت شكرا شيخ خليت وخرت عنها كبل كتلها انه طالع حتى الجاي ماريده تمام ولاتفتحين الباب الاحد وباعي بالكاميرات اذا احد دك الباب كالت تمام خلص اليوم ورجعت لكيت اهلي جايين سلمت عليهم صعدت فوك فتحت الباب جان اللكه عبير كاعده كتلها ليش اجيتي جان بقيتي بعد عند اهلج
عبير : اسفه شيخ والله نفسيتي تعبت فاتحه وحزن بعدين هذا بيت اهلي بعد شارعين انت حتى ماتصلت عليه ولا شفتني وين
غضب: كتلها طلعتي من دون مشورتي وماخذيتي رايي ممجبور اتصل بيج خليت غسلت ونمت كعدت ثاني يوم بوجهي للديوان وماشفتها لان بعدها مكاعدة طلعت برا وبين شغل والناس الي اجت واليوم فوك الخميسيه ابوي كال لازم نستقبل المشاكل ونحلها وجان عندي فصل وحليته انه طبيعي احل اكبر مشكله بالعقل لذلك اختاريت الحقوق ومن طلعت الاول رادوني اصير معيد بالجامعه بس مارضيت لان ابوي اهم عندي وشغل الحقوق احلا صار العصر وبدت الناس تجي والوقت مشه بسرعه من الخبصه وهمام وياي وبارق واولاده واولاد سناء هم ولد العم ماقصرو صار وقت العشه وصبوا العشه وخلصت الخميسيه وجانت اول خميس الاخوي بعد ماخلصت قهري وانه طول الكعده اتوعد اخذ بثاره بس بالعقل راحو الكل وبقينه بالديوان انه وابوي وهمام
شيخ كنعان: بويه شصار على البنيه
غضب : بويه كتلك كم يوم بس اخلص البيدي وتدلل
شيخ كنعان: يعني ماغيرت رايك
غضب : لا بويه ماغيرته
شيخ كنعان: عفيه عليك وترا دير بالك عليها تراها مالها ذنب وهذا ابن عمه واحد هتلي وسرسري
غضب : انشالله بويه يلا انه اروح انام وراي شغل الصبح
شيخ كنعان: وانه هم كايم
غضب : دخلت للبيت شفت امي كاعده وتبجي كتلها يمه كافي والله جاي تعذبينه بكبره
صبيحه : شسوي يمه اخوك شاب وراح بعز شبابه وبعده مشايف من حياته شي
غضب : هذا امر الله يمه شنسوي
صبيحه : اخ يا وليدي ياحبيبي يا صغيرون سوده بوجهي يبعد وجهي وعافيتي ريتني انه بمكانك
غضب : ضلت تنعي وتبجي شويه وجه ابوي كلها كافي يمرا وامشي يلا خلي نام خلو وراحو الساعه جانت ب 11 ونص بالليل خليت وصعدت نمت وانه بالي بيوم السبت شراح يكول شراح يسوي شراح يحجي كعدت ثاني يوم احس نفس الروتين وماشفت زمرد همين عجيب شعجب مكاعده مو عوايدها
صفاء : صباح الخير خويه
غضب : صباح النور بعد اخوج كاعده من الصبح
صفاء : اي خطيه زمرد متكدر تكعد
غضب : ليش شبيها سلامتها
صفاء : والله ياخويه ماتستاهل خوش بنيه ومؤدبه ماشفنه منها شي من اجت لحد هسه
غضب : كلبي خمشني عليها كتلها احجي شبيها
صفاء : والله ياخويه امس جاي تغسل بالمطبخ وزلكت طاحت ع ضهرها وحيل تاذت حتى خفت عليها كلت خاف نكسرت
غضب : هيه كالت هيج وانه عيوني شتعلن نار بس مابينت كتلها وهسه شلونها شلون صارت شبيها خو ما متاذيه
صفاء: هسه عفتها نايمه كالت ماكدر اكوم ياذيني ضهري
غضب : خلي تحضر روحها وانتي هم ناخذها للدكتور اليوم جمعه صبح يكعدون
صفاء : صار خويه
غضب : خلت وراحت شويه ونزلت مبدله وسانده زمرد عليها وانه اشوفها كوه تمشي احس روحي راح تطلع بشوفتها هيج خلينه ورحنه للدكتور واخذلها اشعه طلع عدها رض بسيط ونطاها علاج وكلها لاتتحركين هواي واكلي زين عندج ضعف مبين من شفايفج وعيونج كلت بداخلي هذا شبيه وشلون انتبه ع شفايفها اكيد جان يباوع عليها شويه تنرفزت وراها رجعنه للبيت ودخلتها صفاء امي كاعده كال
صبيحه : خير شبيها من صباحيات ماخذيها. للدكتور
غضب : يمه شبيج وانتي صفاء روحي صعديها فوك راحو وانه كتلها يمه لاتخلونها تشتغل الدكتور كال يراد راحه انه طالع طلعت وخلصت وقتي كله بره حتى غده ما تغديت رجعت بالليل كلش لفيت راسي ونمت وثاني يوم من ال 5 كعدت بدلت ونزلت مرات احس روحي مامتزوج نسيت عندي مرا اصلا نص حياتها عندً اهلها بوجهي للبصرة اول ماوصلت رحت للمركز وطلبت اشوفه وفعلا رحت للغرفه انتضره يجي
اكرم : بعد ماراح فكرت بكلامه هواي كلش هواي وكلت لازم الكه حل اطلع منا بيه ماريد ابقى ضليت احوس تعدت يومين وانه افكر بخطه حتى اطلع منا فكرت وفكرت شويه وبتسمت وكلت اي هاي خوش سالفه ورا ثلاث ايام اجه الجندي وكال الشيخ غضب اجه عندك زياره ابتسمت كلت اي واخيرا انه جنت منتضره يجي رحت وفتت عليه لكيته كاعد كبل كام وكلي بسرعه خلصني شنو فكرت ضحكت كتله لالا اكعد خلي نتفاهم وبلا صياح
غضب : اجه صاحب الراهي هوه وشكله مفكر وماخد قرار اقرا الشخص من عيونه كتله بسرعه كول كال لالا خلي نتفاهم ولاتصيح تمام نرفزني بكلامه كلش بدي اكوم اكسر سنونه هسه كتله كول بسرعه باوع عليه بنضره وجان يكول ..........

ياترى شنو الي راح يطلبه اكرم من شيخ غضب تابعوا البارت الجاي .......

....................///////////

لاتنسون تابعوني على الفيسبوك روايات زينب عقيل الموسوي

https://www.facebook.com/profile.php?id=100087899666498&mibextid=LQQJ4d

وايضا قناتي على التيليجرام
@zainabakeel9

ورابط الواتباد للي ماضايفني يضيفني

https://www.wattpad.com/user/zainabakeel_almusawi

الى هنا انتهى البارت اتمنى ينال اعجابكم

الكاتبه زينب عقيل الموسوي