'' البصر والبصيرة ..💛! ''
'' ما ضُرب عبدٌ بعقوبة أعظم من ظلمةِ القلب ''
- انا مش فاهم ازاي فيه ناس لسة بتفكر بالطريقة دي ؟ ،ايه التخلف دا ؟ انا كنت فاكر انّي لما ارجع هلاقي رُقي وتمدن عن كدة ،لكن لسة افكاركم وعقولكم واقفة ،بجد ايه دا ؟
'' كنت سامعاه من شباك اوضتي وهو بيتكلم ،اتضايقت لما سمعت كلامه ،بجد هو اللي ازاي لسة كدة ؟ ،قاطع تفكيري صوت خبط عالباب ''
- ادخل
'' دخلِت مريم بنت عمي وقالت ''
= قاعدة لوحدِك بتعملي ايه ؟
- عادي ،ولا حاجة
= طب بقولك ايه ؟ ،تعالي نعملّنا كوبايتين شاي ونطلع نقعد فوق السطح شوية نشم هوا
- بابتسامة : يلا بينا
'' عملنا كوبايتين شاي وأخدناهم وطلعنا السطح وقعدنا نشربهم ،بعد كدة روحت وِقفت عند السور وبصيت تحت ،وشوفت بلال لسة قاعد قدام البيت مع عادل ابن عمي ،وعادل يبقى اخو مريم ..جَت مريم وِقفت جمبي وبصت تشوف انا بابص على ايه ،وبعدين بصتلي وقالت ''
- اما الدكتور بلال دا حكاية ..حاجة تشرف كدة وتِرفع الراس ،شوفتي حد في بلادنا عمل اللي عمله ولا وِصل للي وصلّه ؟
'' بصيتلها وبعدين بصيت قدامي وقولت ''
= الصراحة لأ
- بجد انا فخورة بيه وفخورة انه ابن عمي ،من يومه بلال وهو شاطر ومجتهد ،ماكتفاش انه يبقى دكتور وبس لأ ،دا سافر وعمل ابحاث برا ونِجح وبقا دكتور كبير ومشهور في مصر وبرا مصر ،الناس كلها بتفتخِر بيه
'' ضِحكت بسخرية وسِكت ..
بلال يبقى ابن عمنا انا ومريم ،كلنا عايشين في بيت واحد ،ودي عادات بلدنا ..الاخوات بيعيشوا في بيت واحد ،بلال وحيد ابوه وامه ! ،وامه ماتِت من حوالي عشر سنين ،هو فعلًا زي ما مريم بتقول انه مجتهد وكان متفوق في دراسته ودخل طِب وبعد ماتخرج قرر يسافر برا ويبدأ من هناك مش من هنا ،ورغم اعتراض الكل وقتها بس هو كان واثق في حلمه جدًا وكان عنده خِطة وشايف انه هيقدر يمشي عليها صح وهينجح ! ،وفعلًا نِجح وحقق نجاح برا مصر هايل رغم انه صغير وعمره كله 34 سنة ،بلال درْس لشباب كتير جدًا في انهم يتمسّكوا بأحلامهم وطول ماهما مصدقين انهم هيوصلوا هيوصلوا ،وفي خلال سَبع سنين برا حقق نفسه ،وهو دلوقتي موجود هنا اجازة عشان يشوف اهله وبعدين يرجع تاني ،كل الحاجات دي حلوة ..لكن للأسف الحلو مايكملش ! ..تفكيره غريب ومتخلف ،تفكير تحس انه مستحيل يكون متعلم وبيعرف يفكر ،بيحارب الدين وهو مش واخد باله ،او واخد باله ومش همّه ،مش عارفة اوصفه غير انه مغيّب !
لما كنت تحت وبحُكم ان اوضتي للشارع وفي الأرضي كنت سامعة هو بيقول ايه هو وعادل ،بيتكلموا في قضية الشذوذ ! ،بسبب البنت اللي كانت بتمارس الشذوذ وبتدافع عنه وانتحرِت وبقِت قضية على السوشيال ميديا ،وبما اننا مسلمين ودينّا مابيأمرناش بكدة فطبيعي نحارب الشذوذ دا ،لكن بلال شايف ان دي حرية شخصية وكل واحد حر في اللي بيعمله ،وان الناس مالها تتدخل ليه ماتسيب كل واحد في حاله ،وبقا بيوصفنا بالجهل ،بلال تفكيره ماتغّيرش كتير لما سافر وعاش برا ،من قبل مايسافر وهو تفكيره كدة ..من حوالي تَمن سنين لما كنت في ثانوية عامة ،كان هو في سنة التخرج تقريبًا ..قَعد معايا يكلمني في حِجابي وانا ليه لابساه ؟! ،انا لابسة الحِجاب من وانا في أولى اعدادي ودا كان طلب بابا ،وانا واغلب اللي في سني لِبسناه في الوقت دا فاماكانِتش حاجة غريبة بالنسبالي وخلاص اتعودت عليه ،عشان كدة لما سألني انا لابساه ليه ماكنش عندي كلام اقدر ادافع بيه عن الحجاب ،وماكُنتِش فاهمة برده كويس ''
