فصلية الشيخ ذياب

البارت التاسع عشر

الساعة 5 العصر
'' '' '' '' '' '' '' '' '' ''

كاظم : هلة بحبيبة ابوها

خلود : بابااااا

كاظم : اشتاقينالج بابا

خلود بدموع : اني هم والله

كاظم : سولفيلي اخبارج، مرتاحة لو لا

خلود : الحمدلله بخير الشيخ ممقصر

كاظم : وزوجاته؟!

خلود : زينين وياية

كاظم : الله يسعدج بنتي ويسهل أمورج

خلود والكل : آمين

سميرة : يلا تعالو نتعلل

سوت امي جاي َكعك وكعدنة ناكل ونسولف
وصارت الكعدة تجنن
شوية واجه محمد وسلمت عليه وجايب وياه الجهال
بوستهم وحضنتهم حيل جنت مشتاقتلهم
وجانت كعدة من العمر

ب 7 راح محمد وكال راح نبقى نورة عدنة لحد ما اروح للكوت

اتعشينة وكملنة وكعدة ورة العشة على التلفزيون
نسولف ونضحك ورجعنة مثل ايام قبل عائلة وحدة وحلوة

ميعاد : خلود حبابة سولفيلي على الكوت، صح الناس هناك بس ريف

خلود : لا بلعكس اصلاً البيوت هناك تجنن
مثل مالات بغداد وبيت الشيخ بي بستان
صغير حيل حلو وبي ورود

ميعاد : عدهم حيوانات مو؟!

خلود: اي عدهم بس مو بالبستان الي بلبيت

ميعاد : لعد وين

خلود : بالبستان الجبير برة البيت شوية بعيد

ميعاد : الله شوكت اروح هناك

خلود : وعد مني اذا بابا قبل والشيخ يقبل
اخذج كم يوم يمنة

بابا نزع نضاراته الي يقرأ بيهم الكتب

كاظم : لا بابا خاف هناك تصير حزازيات

خلود : والله ما اعرف بعد

ميعاد : لا بابا حباب خلي اروح

كاظم : بعدين بابا مو هسة

ميعاد بزعل : باباااا

كاظم : كلت لا عيب

زعلت وراحت ورحت وراهة بلكوة قنعتهة
خطية جانت حيل حابة تروح هناك

( بقيت تقريبا ٣ ايام عند اهلي واجاني الشيخ
الصبح الساعة ٧ هو وشيخة بدور
طبعاً اتفاجأت بيهة وبوستني)

نورة بهمس : هاي جاية تشم اخبار بدال امهة
هههههههههه

خلود: عزا العزاج فضحتينة

( دخلت بدور وامي رحبت بيهة وباوستهة
البنية حيل حبابة ابد مشفت منهة شي مو حلو)

دخل الشيخ للاستقبال هو وابوية

كعدنة بلصالة وجان اخويه احمد نايم

بقينة نسولف وامي سألتهة عن امهة وشيخة كريمة
وهي صوتهة كوة ينسمع واختي نورة فضحتني بضحكهة، حتى عيب من البنية عبالهة عليهة نضحك
بس جانت حيل هادئة ومؤدبة، امي حيل حبتهة

( كعد احمد من النوم واباوعله صار وجهة
احمر من الخجل
وبدور صارت خدودهة طماطة
معرف احمد شنو يكول
كال هلو وراح بسرعة)

واني ونورة خربانين ضحك عليهم
شلون هية تباوعلة بطرف عينهة وهو
نسى حتى الكلام

( سمعت ابوية دز احمد يكوللنة نجهز نفسنة)

دخل احمد

احمد : ااااا يوم، خلود

سميرة : ها يوم

احمد : بس هاي يعني

خلود بضحكة : ها حمودي عيوني كول

احمد : اااالشيخ يكول يلة

خلود : جايين عيوني

باوعت لبدور الخدود حمر صارت وتباوع بخجل

صح البنية صغير بس شكلهة اكبر من عمرها
ورغم هي وميعاد نفس العمر بس مبينة اكبر منهة
يمكن لأن بيئتهم تختلف عن بغداد
واصلاً جسمهة اضخم مني، يعني مبينة
بنية شابة مو عمرها ١٢ سنة
وهي حيل حلوة والعيون مكحلة تخبل

{أمي ونورة حملوني اشكال وانواع الحلويات والمعجنات، وامي طبختلي كم طبخة كالت خاف تجوعين وتستحين تاكلين كدامهم }

بلباب
'' '' '' ''
شيخ ذياب : ها يابة ما عدكم حاجة بعد

بدور : لا ما عدنة

طلعنة وودعوني ورحنة

بلطريق
'' '' '' '' ''
خلود : صباح الخير شيخ

شيخ ذياب : هلة صباح النور

خلود بصوت ناصي : اشتاقيتلك

اتجاهلني وحجة وية بدور

شيخ ذياب : ها بوية شبعتي من بغداد

بدور بأبتسامة : تجنن بوية

وطول الطريق الشيخ مباوع بوجهي ابد
كلبي بقى يوجعني، ليش هيج الشيخ يعاملني
قبل ٣ ايام جنة عبالك طيور حب
ليش اليوم متغير علية
بقيت اكل بنفسي من القهر
اني عبالي من اغيب يرجعلي مشتاقلي ومشتاق
لسوالفي وضحكاتي، تالي خاب آملي

كلت اسأل بدور بلكي اعرف

خلود بصوت ناصي : اكول بدور

بدور : آمري شيخة

خلود : أمج وشيخة كريمة شلونهم

بدور : على الله بخير

خلود : اكولج بدور

بدور : آمري شيخة

خلود : شبي الشيخ ضايج

بدور : ضايج عبن امي زعلانة

خلود : هااا خطية، ليش؟!

-----------------
للحكاية بقية
مع تحياتي الكاتبة
(* حور العين *)