في مدينة دمياط الجديدة , كانت الشمس ساطعة في هذا الشتاء ونشرت الدفء في المكان وأتى هواء منعش منبعث من البحر والأجواء هادئة ,كانت المدارس ممتلئة والشوارع تكاد تكون خالية ودقت ساعة الجامعة وبدأ طلاب الجامعات في الخروج من الكليات وخرجت جومانا مع صديقاتها ووقفت تتحدث معهم كالعادة وهى تقول: أنا تعبت جدا النهاردة كل المحاضرات ثقيلة.
أمل : أيوه يوم الثلاثاء دائما يوم طويل ومليان أنا مش هآجى بكرة.
لازم تيجى لأننا ها نتدرب على أغانى الحفلة.
أوف أنا نسيت خالص.
نظرت جومانا لصديقتها ولاء وقالت: إنتى ليه لسه هنا؟ مش قلتى أن مازن هايمر عليكى وتخرجو سواء؟
أيوه بس إتأخر كان المفروض أن يبقى في إنتظارى هاحاسبه لما ييجى.
ليه تخرجو في نصف الأسبوع ؟
ولاء :لأننا بنروح لبيت جدى يوم الخميس وده يوم مقدس للعائلة.
ضحكت الفتيات وقالت جومانا: أيوه فعلا , كل الآباء يقدسو نظامهم ومعتقداتهم.
أمل : وأنتى جومى ؟؟ إيه هى مقدسات والدك؟
أوووه كثيرة جدا , الحفاظ على المواعيد ,الطاعة لكل اللى بيقوله الأب وعدم الاعتراض أبدا لأنه عارف مصلحتك أكثر من أي حد.
ولاء: ييه كلهم نفس الطريقة بس أنا زهقت بجد مللت , إمتى أتجوز بقى وأبقى حرة؟
ضحكت جومانا وهى تقول: تبقى هابلة لو إعتقدتى إن الجواز حرية اكثر من بيت اهلك ,الزوج بيتحكم أكثر .
لكن مازن بيحبنى جدا ومش هايفرض سيطرته على.
أمل: سيبيها تحلم يا جومى ,ياللا بينا نتقابل بكرة.
إبتعدت جومانا مع أمل التي قالت: جميل الحب قوى بين مازن وولاء.
أيوه جميل.
أتمنى أجرب الحب بس لسه مقابلتش أي شاب مناسب لحد دلوقتى. تفتكرى إنى ممكن أقع في الحب في يوم من الأيام؟
يمكن تقعي في الحب من عارف؟
وأنتى يا جومى عمرك مافكرتى في الحب؟
في بعض الأحيان بأفكر, بأبقى عايزة أعرف ها يكون شعورى إيه لو حبيت؟ بس دلوقتى لازم أركز على دراستى ومستقبلى الفني.
سجلتى إسمك في مسابقة الجامعة؟
طبعا, بابا حريص أنى أقدم فيها , عنده أمل إنى أفوز .
طبعا هاتفوزي جومانا صوتك رائع.
فيه أصوات كثيرة جميلة.
لازم يكون عندك ثقة في نفسك .
كانو وصلو لبيت أمل فقالت: تعالى إقعدى معيا شوية.
