اني بقيت ساكته ماعلقت ولا انطيت رأيي بأي شي رحت للمطبخ لكيت الكيكه محروگه شلتها وذبيتها هي والقالب عفتها وطبيت لغرفتي واني كلش ضايجه مااعرف شنو السبب بس ضايجه حيل .
....بهاي الأثناء صافنه وجان يرن موبايلي شفته رقم غريب مافتحت خط سكت ورجع اتصل هم مافتحت خط وره شويه وصلتني رساله من نفس الرقم فتحتها وقريتها وچانت من بابا يگول ..
..(شلونج بابا سالي مشتاقلج هواي صارلج شكم سنه مقاطعتني ومتجين لبيتي معقوله گلبج هيج اسود على ابوج دزيت عمج مهند لبيت امج وگال طردوني وميقبلون يحجون وياي ردت اوصلج رساله بيده اذا تحبين تشوفين ابوج رح ادزلج العنوان وتعاي بأي وقت لان اني شلت بغير بيت صارلي ٣ اشهر ومشتاقلج والله يابنتي )
....سالي....قريت الرساله وره شويه دزلي رساله ثانيه مكتوب بيها العنوان شايل بمنطقه أطراف بغداد
مدري ليش من قريت رسالته مارف گلبي عليه ولا حسيت بلهفه بنفس الوقت ماارتاحيت احس اكو شي مو طبيعي بابا لو يريدني يتصل بأمي ويحجي وياي ليش هالمره دز مهند
بقيت صافنه وافكر بعدين نفضت الأفكار من راسي وحذفت الرساله والعنوان والرقم گلت مااروح ولا اريد اوصل لهناك بعد مالي خلگ مشاكل البيه مكفيني موناقصه اني .
...طفيت موبايلي وعفته على الجربايه رحت اجيب كلاص مي احطه يم راسي لان الجهال يكعدون بالليل يردون مي جبت مي من المطبخ وأخذت رؤى من امي لكيتها نايمه بحضنها شلتها وطبيت لغرفتي اول ماطبيت شفت متيم كاعد على الجربايه وبإيده الموبايل ويباوع بي ويحجي انتبهت عليه فاتح كامره ويه غمار ويحجي وياه بسرعه حطيت رؤى بفراشها ووخرت من يم متيم خفت لا غمار يشوفني بالكامره وصلت للباب وجان يصيحني متيم وگال ..
...متيم ...ماما هذه بابا يحجي وياي تعاي شوفي ..
...سالي...انداريت عليه ردت أأشرله بيدي حتى يسكت وجان اسمع غمار يحجي وياه وگال .
...غمار....يله بابا اني اروح ديربالك على نفسك وعلى اختك وصير سبع انت رجال خوش ..
...متيم....اي بابا رجال .. بس شوكت تجي اني مشتاقلك ..
...غمار....كم يوم واجي اني بمكان بعيد مااكدر هسه اجيكم ديربالك على اختك بغيابي خوش .
..متيم...اي بابا ..
....سالي....نهى الاتصال وعاف الموبايل وراح لفراشه متيم سديت باب الغرفه مالتي وطبيت للغرفه ماادري ليش انقهرت من سمعت الحجي مال غمار ويه متيم وصاه على رؤى وسلم عليه وماجاب طاريي ابد اصلا من سمع بيه اجيت بسرعه نهى الاتصال وراح ليش هيج شنو معقوله هوه الزعلان مني ..
...مددت بفراشي وگمت ابجي واني مدري شبيه من يوم الي طرحت الجنين ولحد الآن صايره حساسه حيل أقل شي ونزلت دموعي مااعرف هوه الموقف صدك يقهر لو اني صدك حساسه ..
أنت تقرأ
رهان مقبوضه
Romanceقصه حقيقيه ... سالي طالبة ماجستير في علم النفس والدها يعاني من مرض القلب تتعرف على دكتور جراح اختصاص قلب وشرايين وتطلب منه يعالج ابوها وبالمقابل تنفذ اي طلب يطلبه غير الفلوس لان حالتها متسمح تدفع تكاليف العمليه .. .... الدكتور يوافق يعالج والدها ويط...
