مالك يا ابني فيك ايه
_مفيش محسود
مالك يا بنتي وشك مصفر ليه
_ محسودة
يعني منتيش مهملة اكلك
_تؤ تؤ محسودة
وضوافرك مكسرة كدا ليه
_مقولت محسودة
يعني مش انتي الي بتاكليهم
_لا محسودة
ومال عنيكي وارمة ليه
_اصلي محسودة
يعني مش من الأنيميا والسهر لوقت متأخر وكتر البكى
_محسووووووووووودة
اللمبة اتحرقت
_اصل طنط تفيدة كانت عندنا امبارح وعينها وحشة
يعني مش عيب منتج ولا سوء تصنيع ولا فترة صلاحية انتهت ولا الكهربا شدت فجاة
_حسد
البلوزة انقطعت
_عشان بنت عم عتريس شافتني بيها وقالتلي انها حلوة
طيب ما هي حلوة
_لا بس هي حقودة وحسدتني
يعني انتي متخنتيش ومتحركتيش فيها بعنف فاتقطعت
_لاااااااع محسوووووودة
☆وهنا خلصت الحدوتة☆
♤ محسودة محسودة محسودة ♤
ناس حاطة الحسد والسحر في دماغها بشكل مبالغ وبتبص لأي ضرر او اذى
او ابتلاء في حياتها لازم يكون سببه الأساسي الحسد او السحر
هو اه السحر والحسد موجودين ومذكورين في القرءان بس دا مش معناه نبالغ في التفكير اوي فيهم ونربط كل حاجة في حياتنا بيهم
السحر والحسد ما هما إلا وسيلة لوقوع القدر يعني ببساطة لو ربنا قدر لحد انه يمرض اما هيتحسد فيمرض او هيخالط شخص مريض فيمرض او هيلمس مكان فيه المرض فيمرض
او لو واحدة رزقها تتجوز في سن ٣٠ هتتحسد او يتسحرلها فميتقدملهاش حد الا في ال٣٠ او هتفضل ترفض كل العرسان لحد ما ييجي واحد وهي في ٣٠ وتقبله
مهما حصل القدر هيقع
ومن وسائل وقوع القدر السحر والحسد فبدل ما نربط مشاكل حياتنا بالسحر والحسد الاصح نقول دا قدرنا ورزقنا ونصيبنا دا ابتلاء ولازم نصبر عليه وندعي ربنا كتير يفك كربنا لازم وحتما ولابد نقوي إيمانا بربنا والقدر وليس السحر والحسد لو كان لازم نؤمن بالسحر والحسد بشدة كان ربنا ضمهم لاركان الإيمان
الإيمان يكون بالله وملائكته وكتبه ورسله واليوم الاخر والايمان بالقدر خيره وشره حلوه ومره
اخيرا في ناس عايشة حياتها عشان كل ما تسأل على حالها ترجع في وشك محسوووووووووووود كانها هتغنيهالك وغالبا لما بتقول في وشك كدا بتبقى فاكرة انها بتخزي العين وبتلقح عليك ،فلو الكائنات دي في حياتك تلاشاها على قد ما تقدر عشان هما مصدر الحسد والسحر والعين المصيبة الي على وجه الأرض
وعلى رأي المثل حسدوا الأعمى على عيونه الملونة 😑