دخل محمد البيت وقلع الشبشب بسرعة وجرى عالسرير من تعب الورشة ولسة هيمسي عالفرشة تقوم أم محمد راقعة بالصوت
يلااهويييييييي
أمحمااااااااااااااد
يعيني محمد ملحقش يمسي عالفرشة ولا الفرشة لحقت تمسي عليه طلع محمد زي الأهبل يجري على أمه يشوف في إيه
إيه يا أما حد مات
وليك عين تتكلم
فيه إيه يا أما أنا لسة جاي لحقت أنيل حاجة
إزاي يا مدهول على عينك تنسى تعدل فردة الشبشب متعرفش إن دا حرام
هرش محمد في دماغه زي النسناس وخرج قملة سألها
هل قلبة الشبشب حرام
القملة معرفتش ترد فهزت برقبتها .
بص لأمه وبرق وقرر يخاطر بحياته ويسألها
أما هو قلبة الشبشب حرام ليه
يا ريته ما سأل صرخت أم محمد بصوتها الجهوري
أعباااااااااااااااااس
ساب أبو محمد الفرشة وخرج لأم محمد يرد عليها بصوته الحمش
في إيه يا ولية هو الواحد مش هيعرف ينام في البيت دا
ردت أم محمد تعالى يا أخويا شوف ابنك نيلة النيلة
هببت إيه يا سبع البرومبة هلاقيها منك ولا من أمك
ردت أم محمد
نسى يقلب الشبشب لا وكمان بيجادلني ويسأل حرام قلبته ليه عايز يدخلنا جهنم ونولع في البيت
رفع أبو محمد إيده ولسة هينزل طاخ على وش محمد بس طلع محمد على بعد ٢ متر من عباس اتعصب عباس وراح قايل لمحمد
وكمان بتمسك إيدي تصدها برا يا كلب
واتقفل الباب في وش محمد وهو مش فاهم حاجة نزل محمد مشى شوية وراح لعمته في آخر الشارع وحكالها إلي حصل فطبطبت عليه وقالتله
حبيب عمتو يا ناس قلب عمتو أنت تفضل في بيت عمتك معزز مكهرب يوه قصدي مكرم لحد ما نشوفلك صاحب أو حد من أهلك يجي يلمك يوه قصدي ياخدك ياخدك
سألها محمد أومال متعرفيش أعمتو قلبت الشبشب على وشه حرام ليه
إلا أعرف هي فيه حاجة في الدنيا تتوه عن عمتك يا واد هو أنا أمك الموكوسة
عشان يا قلب عمتك الشبشب وشه بيبقى في السما فالملايكة بتزعل تقوم متدخلش البيت فيتقطع رزقك
رد محمد بتريقة على كلام عمته
الله يعني الملايكة مقموصة من قلبت شباشب الوطن العربي وساكتة عن قلبت شباشب الأجانب لو قلبت الشبشب بتجيب الفقر أومال هما الفلوس على قلبهم كدا ليه
