الزواج الصفقة

بارت 6

نيار وصل الشريكة دخل بكل وهرتو و قلوب العذروات تهزت معاه كان كلو رجولة و زين كان حلم اي فتاة .. كان يمشي بكل ثقة و شموخ زادت من وهرتو ريحة البارفان متاعو الي عبات الجو و عطرتو والي زادت من دوخة الموظفات متاعو اتجاهل نظراتهم و دخل لبيروه قعد وراه و كلم السوكريتار تجيبلو قهوة فيلتر من غير سكر  و بدا يحضر في روحو للمفاجأة الي محضرها لسيرا 😂 .. كان يغزر للدوسيات قدامو و متحمس للصفقة الجديدة الي قرر انويدخل فيها
نيار " حبي استنى عليا مش قالو الي انت ماضية اتو ترى شكون امضى انا و الا انت" و تبسم ابتسامتو الي كلها استفزاز و ثقة ..
ميريام الي عدات الليلة كلها بكاء بعد ما وصلها شهير لدارهم و زيد اول مرة شهير يتغشش عليها و يقعد ما يسالش عليها و تفمرت كفاه قلها اتو نرتحك مني كانت في فرشها و مخدتها الي تبلت ليلة كاملة 🥺 بدموعها كفاه هانت عليه هي بعد التنازلات الي قدمتها الكل لغات شخصيتها قدامو حبا فيه و هو شو شعمل
ميريام " والله يا شهير كان ما رجعكش للثنية انا مش ميريام "
سيرا وصلت لبيروها كالعادة كان وجها منشرح و فرحانة بعد ما مماتها حكات معاها و حلو قلوب بعضهم و تفاهمو 
دخلت شايخة تتبسم
سيرا" بنجوغ صفيناز تحضرلي قهوتي يعيشك و تخلطهالي للبيرو يعيشك  "
صافيناز " بنجوغ مادام تو دوسويت "  اول مرة ماتخافش منها  و مشات تحضرلها في قهوتها
دخلت سيرا لبيروها و قعدت تشوف في الملفات الي قدامها
صافيناز الي مابطاتش و جابتلها قهوتها
سيرا " مغسي يعيشك "
صافيناز " مادام يعيشك تنساش اليوم عنا الصفقة مع المستثمر الالماني "
سيرا " ااااه والله تفكرت توة انا كنت داخلة بعضي و مشى من بالي ان شاء الله اياز خدمو بالباهي و خذات تلفون تكلم في اياز خوها " الو اياز شعملت في صغقة المستثمر الالماني 
اياز " خدمتو و حضرت الي لازم الكل على اساس شنتناقشو فيه البارح ياخي انت ماروحتش "
سيرا " عندي ثقة فيك خويا ايا تجيب الملف نتناقشو فيه مازالهم ساعة و نبداو الاجتماع "
اياز " ايا هاني جايك "
خرج اياز بكل اناقته و وهرته من بيروه لبيرو اختو صحيح هيالي كبرت الامبراطورية متاع اوغلو لكن اياز زادة رجل أعمال  ناجح و عندو ما يقول في روحو
دق الباب و دخل وين لقا سيراتستنى فيه على احر من الجمر
سيرا : ايازي شعملت الرجال
اياز :شتعرف خوك
سيرا :ماضي خويا ههه و ضحكو الزوز و قعدو يتناقشو في المشروع الجديد مع المستثمر الالماني  و سيرا تحب ديما تربح كيفها كيف اياز قعدت تتناقش مع خوها في الملف الي قدامها و عجبتها خدمة اياز
اياز : ايا شقول سيرا خانم 
سيرا :الحقيقة خدمة برو برشا اياز عجبتني
اياز :ايا باهي فرحت برشا مانيش قدك اما اهوكا نعدي روحي
سيرا " لا والله انت خير مني في برشا حاجات خويا راك يعني نتشاركو في برشا حاجات
اياز :نفدلك معاك سيروش ايا احكي لخوك شنوة احوالك انا متحير عليك برشا الحقيقة
سيرا " ماتخافش اياز اختك كاسحة و ماتتغلبش "
اياز :اختي حساسة برشا و حنينة برشا و مزيامة برشا و نخاف عليها
سيرا "اوووو اياز هذا الكل فيا انا باش تخليني نغتر بروحي "
اياز : و عندك علاش ميسالش كي مرة نفكروك بزينك و عينك
سيرا "ههههه روح اختك انت "
صافيناز دقت الباب و دخلت "مدام المستثمرين وصلو و دخلو قاعة الاجتماع "
سيرا " اااا اوكي اسبقنا صافيناز هاو خالطين عليك"
صافيناز "حاضر مدام "
تلفت سيرا لاياز قوم نمشيو
اياز " يلا " و خرجو الزوز داخلين لقاعة الاجتماعات
وهوما في ثنيتهم لقاعة الاجتماعات تلفون سيرا نوقز ميريام تطلب فيها هزت عليها
سيرا "ميريام عزيزتي .."
ميريام وهي تبكي " سيرا 😭😭 وينك "
سيرا "ميريام شبيك عزيزتي ماتفجعنيش "
ميريام " شهير هأه‍أه .."
سيرا "شبيه زادة شصارلو تفجعنيش تقليش عمل اكسيدون ماو مهبول "
ميريام " لا اللطف اما قلي باش نرتحك مني مالبارح وصلني لتوة مطفيني "
سيرا " وووه فجعتني ميريام تلقاه منرفز ياخي جديد جاك "
ميريام "اي افكتيفمون مش جديد يتنرفز و عمرو ماقعد ساعة مايكلمنيش حتى كي نتعاركو انا المرة هذي قلي باش نرتحك مني  "
سيرا " ميريام عزيزتي عندي اجتماع توة مهم برشا نكمل و نكلمك نتقابلو باهي "
ميريام " باهي هاني نستنى فيك امان تبطاش عليا ماعندي حد غيرك
سيرا " باهي حبي تهنى " علقت التلفون و دخلت مدنكسة راسها في التلفون تقرى في الايمايلات لي وصلتها و قعدت في بلاصتها من غير ما ترى حتى شكون الموجودين ..
و اول مابدى  المدير العام للشركة الالمانية يحكي هزت راسها منتبهة و كانت الصدمة 😳 نيار بشحمو و لحمو قدامها و على فمو ابتسامة متاع استفزاز   غمزها باش يفيقها من ذهولها و فمها الي محلول طاقة باش تستفسر على حضوره فاش قاعد يعمل في شركتها و الاجابة جاتها
الشريك الالماني : عسلامة مرحبا بيكم الكل يسعدنا نكونوا شريك معاكم في تونس الحقيقة أوغلو شريكة كبيرة اسمها سابقها و المديرين الي قايمين عليها عندهم خبرة و نجاح كبير يسعدنا التعامل معاها و الاستفادة كيف ما ديمير زادة شريكة كبيرة و عندها وزنها و موسيو نيار ديمير سبقلنا و تعاملنا معاه في امريكا وهذا لي خلانا نتصلو بيه حبيت نعمل مقارنة بين المشروع لي تقدمو الزوز في اطار التنافس و الي اكثر جودة و منفعة اكيد باش يكون شريكنا "
سيرا " اولا مرحبا بيك في تونسي و في دار اوغلو موسيو   كريستوف  اما انا بصفتي القايمة بأعمال اوغلو نرفض بتاتا الدخول في مقارنة او منافسة بينا و بين اي شريكة مهما كان اسمها يظهرلي اسمنا معروف و صمعتنا سابقتنا هذي اول مرة نتحط في مقارنة و بصراحة هذا يسيء لأوغلو مايضيفلهاش
كريستوف " مدام سيرا ...
نيار الي كان محافظ على هدؤه و ابسامته المستفزة الي ما فارقتش وجهو  و الي زادت من توتر سيرا " اذا عندك ثقة في مشروعك مدام سيرا اوغلو و باسم شركتك نتصور ماعندكش مشكلة تدخل في منافسة انت متأكدة من الفوز بيها الا اذا عندك شك في خدمتك هذيكة حكاية اخرى تخاف شكون يجي يغلبك "
اياز الي كان يعرف نيار من ايامات الفاك صحيح ماكانش بيناتهم علاقة قوية كانت علاقتنم سطحية  لا اكثر " بالطبيعة ناثقوا في شريكتنا و في خدمتنا و في اوغلو و متأكدين من الفوز "
سيرا عينيها تقدح نار مالغش لي سببهولها نيار قاعد يتحدى فيها عيني عينك في شركتها في محلها واخو راحتو كاينو في دارو و يتحدى فيها بكل جرأة ماتنجمش تنسحب باش تظهرلو الي هي خايفة منو و تعطيه الفرصة انو يربح التحدي
سيرا " بالطبيعة عندي كل الثقة في اوغلو "
كريستوف " مالة موافقة اننا نعرضو البرنامج متاع ديمير مع اوغلو و نحطوهم في مقارنة "
سيرا "موافقة ، و غزرت لنيار غزرة تحدي و ثقة "
بدا الاجتماع و بدا اياز يشرح في وجهة نظره و رؤية للمشروع و سيرا كانت منبهرة بطريقة اقناعه و الافكار الي طرحها و حتى المستثمرين الالمان كانو معجبين بافكاره سيرا كانت فرحانة و فخورة هذا الكل تحت ابتسامة نيار المستفزة الي هو بيده ما ينجمش ينكر اعجابه بطريقة تفكير اياز "
كريستوف " حلو برشا موسيو نيار تنجم تعطينا البرنامج متاعك "
نيار " بالطبيعة اكيد قبل كل شيء حبيت نهني اياز بالبرنامج متاعو الحقيقة هايل اما نتصور فيه بعض النقايص و توة نبدالكم "
طريقة كلامو المستفزة و الغرور لي عندو  نرفزو سيرا الي الدم غلا في عروقها كان تلقى تنڨز عليه تخنقز و هذا كان ظاهر من عروقها المشدودة و عينيها الي يشعلو نار
و بدا نيار يفسر في رؤيته للمشروع و البرنامج متاعه الحقيقة كان ملم اكثر من مشروع اياز و هذا الي زاد نرفز سيرا اكثر و عرفت الي هو باش يربح و هذا لي خلاها تحس في روحها تحب تنڨز عليه تقتلو علاش يحب يدخل في خدمتها
كريستوف " يعطيك الصحة موسيو نيار الحقيقة البرامج الزوز عجبونا و حيرتونا في الاختيار  لهذا قررنا ناخذوهم الزوز كشركلء يعني المشروعين يكملو بعضهم
سيرا " مستحيل نتشارك معاه "
اياز " سيرا علاش "
نيار " انا ماهنديش مانع اذا المشروعين الزوز فيهم فايدة مجتمعين "
سيرا تغزرلو مستغربة و تتساءل فين يحب يوصل شنوة الهدف متاعه "
اياز الي يرى في ملامح سيرا و نرفزتها يعرفها ترفض الخسارة و يعرف الي هي باش ترفض الفكرة لازم يقنعها هذي فرصته "سيرا تجي لحظة دقيقة سامحونا لحظات  و نرجعولكم
خرج اياز و ستنى سيرا تخلط عليه
اياز دخل لبيروه الي كان بجنب قاعة الاجتماعات كان يستنى في سيرا الي يرى فيها خارجة اول مادخلت لبيروه سكر الباب وراها
اياز " سيرا يعيش اختي نععرف الي انت منرفزة خاطر تحب تربح وحدك و ممكن لو خدمتو انت كنت تربح اماهذي فرصتي آمان ماتضيعهاش نحب نعمل اسمي انا زادة "
سيرا " اباز انت ناجح و مشروعك هايل و كيف ماقال كريستوف الزوز يكملو بعضهم كنت نجم نخدمو انا و نفس النتيجة انا مانحبش نشارك نيار "
اياز " علاش تعرفو انت قبل صارت بيناتكم حاجة "
سيرا " لا مانعرفوش جوست مانحبش ندخل شريك تعرفني كفاه نخمم "
اياز " انا لي نعرف صحيح اما نيار مش خايب نعرفو قرى معايا في امريكا صحيح ماكانتش بيناتنا علاقة قوية اما الي نعرفو الي هو ناجح و عندو كفاءة كبيرة و باش يربحنا "  
سيرا حست الي هي باش تظهر الي مسالة شخصية خلاتها نرفض و أمام اصرار اياز لقات روحها تقبل الشراكة مع نيار .

سيرا " اذا انت مصر و عاجبك المشروع انا مانجم كان نوافق خويا "
اياز الي وجهو ضحك و طار بالفرحة " يعيشو سيروش "و عنقها و دار بيها
سيرا " ههههه مهبول يظي لا يرانا حد يقول ملا فروخ"
اياز "عاد شبيه فرختي "
سيرا ههههه"شكون انا و الا انت هههه
اياز :" ايا تلم ضحكت معاك شوية تحليت خوك انا راجل الدار
سيرا "يعيشو باهي سيدي خويا راجل الدار " و خرجو الزوز راجعين لقاعة الاجتماعات ..
إياز " احنا موافين نعملو الشراكة مع ديمير "
كريستوف "هايل برشا متاكد الي برشا نجاحات تستنى فينا "
نيار " مبروك علينا مالة الشراكة اياز  عنا مديدة ما تقابلتاش "
اياز " صحيح نيار اما هاوكا ولينا شركاء مبروك "
نيار " يعيشو صاحبي مبروك علينا الزوز "
وقعدو يتناقشو في التفاصيل و الاولويات الي باش يركزو عليها ..
كريستوف :توة يا جماعة بعد ماصححنا على المشروع ولينا بصفة قانونية و رسمية شركاء  و قام مع الفريق الي مصاحبو خارج وقت وصل للباب "اياز تجي معايا حاجتي بيك "
اياز " بالطبيعة و خرج مع كريستوف ..