Part«25»
وصلوا ونزلت رند وهي تبكي حب الطفوله يصير عليه حادث شافت ام محمد
رند : خاله تكفين طمنيني
ام محمد : مدري يابنتي دخلوا العمليات وللان محد طلع يبشرنا
رند : يارب يارب
جلسوا على الكراسي وهم متوترين وجاء نايف للمستشفى
نايف : تاليا شصار ؟
تاليا : مدري الله يستر
نايف : ان شاء الله بيطلعون بخير
تاليا : ان شاء الله
طلع الدكتور وهو يقول : محمد بخير مافيه شي بس كسر بالرجل اما سامي سوينا اللي علينا لكن ادعوله بالمغفره
ام سامي : لا ولدي لا ابي ولدي انت تكذب ولدي ما يتركني لا ولدي ما مات
ام محمد : استهدي بالله يا ام سامي قولي ان لله وإنا اليه راجعون الله يصبرك ويجبر قلبك
طلعوا جثة سامي وركضت ام سامي وهي تضمه : سامي يمه لاتموت ماقدر اعيش بدونك انت ولدي خواتك كيف يعيشون بدونك انت سندهم ياسامي اصحى ياسامي اصحى امش معي نرجع للبيت
طلعوا محمد للغرفه وكتبوله خروج على مسؤوليته
تجمعوا الكل ببيت ابو محمد عشان عزاء سامي وعشان سلامة محمد لكن لما كانوا يسلمون على محمد فجاه اغمى على محمد وطلعت ام محمد تركض ودقوا على الاسعاف
_______
بالمستشفى
الدكتور : طلع معه نزيف داخلي وماعرفنا
ام محمد : ولدي وين ؟
الدكتور : ام محمد انتي مؤمنه بقضاء الله وقدره وانتي مؤمنه ان كل ماعلى الدنيا فاني وهذي حياه ونهايتها كلنا بنموت ام محمد عظم الله اجرك ادعوا له
رند لفت على البنات : بنات شيقول ذا
تاليا : رند يروحي انتي ادعي له
رند : وش ادعي له محمد ما مات محمد مستحيل يتركني تاليا حنا ماحققنا احلامنا وجدان حنا ماتزوجنا زي ماكنا نخطط وش ذا المزح الثقيل بالله مستحيل توه طالع كيف مات ياربييي لا
وجدان : رند حاسه فيك وانا بوفاة أريج ماكنت مصدقه لكن هذ اللي ربي كاتبه وهم راحوا عند اللي ارحم منا مالنا الا الدعاء لهم ونتصدق عنهم والله يرحمهم ويسكنهم فسيح جناته
رند : وش تقولون اقولكم محمد ما ماتت ما ماتت شفيكم ما مات ليه تقولون مات هو مامات
طلعوا جثة محمد بيودونها ثلاجة الموتى وركضت له رند وام محمد
رند : محمد قوم وش ذا المزح محمد قولهم انك ماتوفيت محمد اصحى محمد ليه ماترد قولهم ان هذي مزحه شفيك محمد
ام محمد : لا حول ولا قوة الا بالله ان لله وإنا اليه راجعون
اغمى على رند وحطو لها مغذي بعد ماصحت رند
رند : يوه بنات تحلمت بحلم يخرررع تحلمت ان محمد مات لاسمح الله ههههخ
ناظروا البنات ببعض
رند : شفيكم هذا حلم صح ؟
عبدالمجيد : انتي تمرين بصدمه بعد الخبر وهذا طبيعي
رند : انت شجابك ؟
عبدالمجيد : ماعلينا من وش اللي جابني المهم انو انتي الان تمرين بصدمه بعد الخبر واهدي وادعي ربك وبعد ساعه تقدرين تطلعين
بعد ماطلع
رند : بنات هذا شيبي وبعدين وش صدمه بعد الخبر اكيد محمد ما مات صح
وجدان : رند يروحي انتي محمد توفى الله يرحمه وانتي اصبري والله يجبر قلبك ويصبرك
رند : بنات ممكن تطلعون ؟
تاليا : مستحيل
رند : بنات تكفون اتركوني لحالي
طلعوا البنات ودخل عبدالمجيد
رند : شتبي؟ ابي اقعد لحالي
عبدالمجيد : واذا قلت اني ماني طالع وتاركك بهالحاله
رند : بكيفك اقعد مالي خلق اتجادل معك
عبدالمجيد : قولي وش مضايقك فضفضي لي
رند : بصفتك ايش ؟ شتبي مني
عبدالمجيد : بصفتي دكتورك ومعليك سرك ببير
رند : انا عشت حياتي وانا احب محمد لكن صارت مشكله وفصخ الخطبه تضايقت شوي لكن عادي كنت اتمنى له السعاده ولما عرفت عن الحادث هنا حسيت اني فقدت جُزء مني فقدت قلبي ولما قالوا انه توفى ماصدقتهم محمد مستحيل يتركني محمد يحبني وانا احبه توفى وخلاني ليه ماخذني معه ؟
عبدالمجيد: شوفي يارند ممكن خيره انه فصخ الخطبه قبل تملكون وتصيرين ارمله ووفاته شي كاتبه ربي وراح يصير وكلنا بنتوفى ومحد راح يقعد وبتتلاقون بالجنه ان شاء الله وادعي له وتصدقي عنه
___________________________
تاليا : بنات كسرت خاطري مهي مصدقه
وجدان : مالومها شي يوجع والله
ريم : الله يصبرها ويجبر قلبها
تاليا : امشوا نروح ل ام محمد بنات
وجدان : دقايق بس جاني اتصال روحوا وجايتكم
تاليا : تمام
___
عمر : سلام
وجدان: وعليكم السلام
عمر : شفيه صوتك شصار ؟
وجدان : محمد توفى الله يرحمه ورند منهاره وتذكرت وفاة أريج وقعدت ابكي
عمر : الله يرحمه ويصبرها جوجو شقلت انا مو قلت لاعاد تبكين عليهم مو زين تبكين عليهم هذا يضرهم ماينفعهم وهم راحوا عند ربي اللي ارحم مني ومنك عليهم وادعي لهم وبعدين مع البكي مو قلت نبطل نبكي على ايشي وعلى اي سبب ؟
وجدان : عموري ماقدر انا بكايه لازم ابكي مقدر
عمر : حاولي تقللين بكي
وجدان : ان شاء الله بحاول كم عندي عموري ؟
عمر : واحد طبعاً
وجدان : ومحظوظة فيه
عمر : وهو محظوظ فيك
__________
راحوا البنات عند ام محمد ولما سكرت وجدان لحقتهم وراحت ام محمد تشوف محمد لاخر مره بعد ماغسلوه وجت رند شافته وراحوا يصلون صلاة الميت ويدفنونه
مرت ايام العزاء
______________
تاليا : رندي وش تسوين ؟
رند : قاعده اكتب
تاليا : اممم ماشاء الله
وجدان: وش تكتبين
رند : غشى ليل الفراق عيون من مل الحياه ومات
بعد ماغبت عنه انكسر قلبه من غيابك
عليك الوقت ياخذني لزمان من مضى مافات
على اللي أذنب يحبك ولين اليوم ما تابك
حبيب النظره الاولى خذ سنين الوداع وهات
دقايق من لقاك ارجوك لاتحرمني...... عتباك
فقدتك واحتريت احبك اللي من عمر ماجات
وانا راضي لو اني اجرع الضيقه من .....عتباك
دخيلك جاوب أسألتي تعبت اعاتبك بسكات
يجيب الوقت طاريك امانه ليه ماجابك ؟
حييت بداخلي روح تبدد فكرة الاموات
انا للحين اتحرى تجيني من ورى بابك
تاليا : الله يصبرك يروحي ويرحمه ويغفرله
وجدان : شرايك نروح نتمشى واحتمال يجي مطر امشي
رند : روحو انتو انا بقعد بغرفتي
وجدان : واذا قلت مراح اطلع بدونك بتجين ؟
رند : جويج مالي خلق بالله
وجدان : بتمشين ولا اقعد
رند : وجدان شفيك مابي
وجدان : اقول قومي ترا اعلم امي مناير
رند : يالله طيب طالعه بس لاتعلمين امي تعطيني محاضره الحين
وجدان : ايه يالله امشي
