فقت الصباح كيما كل يوم غزرت للوقت لقيتها 6:30 متع الصباح فقت عملت دوش صحصحت بيه و لبست دبشي و مشيت لبيت لين :لييييين قوم هيا معاش وقت .
غطات راسها و قتلي : أمان دارين 10دقايق أكهو و نقوم
-مدخلنيش فيك تو نمشي نعيط لبراء هو يعرف يقومك
فاقت تجري للدوش :موش لازم براء هاني قمت
-ههههههههه باهي كمل حضر روحك و انزل نفطرو
-باااااهيييي يا ربييي ليلك جمعة و أنتي في الدار و أنا نقرى ياخي معنديش الحق نرتاح كيفك
-هههه تو كي تمرض كيفي ترتاح هيا ازرب روحك
-والله عادي نعملها تو نمرض و نشد الفراش
-ههههه
ضحكت عليها و خرجت مشيت لبيتي حضررت ساكي و عملت مايكب خفيف و خرجت . حبط الدروج :صباح الخير الناس الكل
-صباح النور صافا تو
-لاباس بابا
براء: دارين تي وين لين؟ديما روطار تحبو نوخر على خدمتي
لين:هاني هنا راني.صح ليكم وقت نغيب تقطعوني و تريشوني كيما تحبو
براء: ههههه ماك تلز روحك كان فقت بكري كي الناس الكل رانا ماحكيناش عليك.
أنا:ههه صحيح......هيا توا معش بكري.
وقفنا الكل و مشينا ركبنا كرهبت براء كي العادة أنا من قدام و لين من تالي ً.......و مشينا.........
كي وصلنا لليساي لاحظت لبنات لكل تخزر لبراء زايد زين خويا وحدوا تبسمت بالشوي..........لين مشات لصحباتها و أنا مشيت مع براء لبيرو القيم باش يصحح عليا بحكم كنت غايبة. دخل صحح و خرج
براء: دارين كي تحس روحك مش مليحا كلمني أوكي
- عيشو ليخاف على أختو هو...... باهي ماتقلقش روحك..... باي
-باي
مشيت لصحباتي سلمت عليهم: بونجور صافا لبنات
ميار:صافا!!!!موش لازم أحنا نسألوك أبرك توا....لين قلتلنا خذيت ڨريب قوي
أنا:هههه تي تاخذو على لين انتم ماتعرفوش لي هيا تكبر لحكاية ديما نسيت وقت ضيعت الڨلوس متاعها
لوجين:ههههه عنك الحق
إيمان:شبيكم تحليتو في لحدث هيا نمشيو نقرو على رواحنا
ضحكت و قلت:هههه القراية تكلمت...أما عند الحق كان مايقبلناش لبروف براء ترسيلو يرجع
لجين:هههههه أما خوك قنبلة متع زين ماجاش قبل لليساي لبنات لكل تحكي عليه
ميار:صحيح....أما ماتشبهوش بعضكم جملة
-هاني أنا ولين نشبهوا بعضنا يزي........يا إيمااااااانننن ستني
لحقنا نجريو وراها خاطر طلعت و خلاتنا أما مسكينا الطفلة من جرايرنا ديما تدخل روطار طلعنا للكلاس. (أنا و لين موش في نفس الكلاس و كل وحدة في كلاس)
تعدى النهار نورمال روحت أنا و لين لدار بدلت دبشي....تعشيت و بعد مشيت لبيت إلين باش نسهروا مع بعضنا الليلة دوري باش نمشيلها . و أنا ماشية سمعت صوت أمي تحكي:وقتاش مش تصارح دارين و لين بالحقيقة
-ماني باش نقول حتى شيء لحتى حد خبيت الحكاية 17سنة كاملة و مش نزيد نخبي منحبش نخسر بناتي من حبش نخسر بناتي من جراير أرسلان المالكي
تفاجئت بكلامو وخرت لتالي دارت في مخي برشا أسئلة.....شكونو أرسلان المالكي هاذا؟ و علاش باش يخسرنا في جرتو؟ و شنيا الحكاية من أصلوا
أمي:أما لبنات من حقهم يعرفوا لحكاية مكملتش تكلمت خاطر عملت حس.... ياخي مشيت نجري لبيت لين باش مايشوفونيش
لين:شبيك تجري هكا صارت حاج
...........-
-دارين نكلم فيك راني
-أه...آ..لا مفما شي جيست تفجعت من روتيلا و أنا جاية
-ههههه هاذا الكل خاطر روتيلا .....إجا اقعد......
مشيت قعدت بحذاها و بدينا نحكيو سرحت مانيش معاها شنوة إلي بابا و أمي مخبينو عليا و زعما براء يعرف شنيا لحكايا
________________________________________
أعطوني رايكم في أول حلقة مانيش باش نحكي عالتفاعل خاطر هاذي أول رواية ما نيش متأملة منها برشا تفاعلات
أما ليلي قراها يعطيني رايو و توقوعاتو
-زعما شني الحاجة لمخبينها عايلة دارين و لين ؟
-زعما هالسر مش يبدليلهوم حياتهم؟
هاذا الكل نشوفوه في الحلقات الجاية
