نيران فريدة (طموح فتاة )

البارت الحادي والعشرون(عزيزتي لينا )

- فريدة :كنتي بتكلمي مين يا ندي

- ندي بشجاعة :وانتي مالك يا فريدة ......علي العموم واحده صاحبتي

- فريدة :بجد واحده صاحبتك .........طب يارب تطلع واحده صاحبتك فعلا عشان لو اكتشفت أنه حد تاني هنزعل من بعض

- ندي :ملكيش دعوه يا فريدة كل واحد يخليه في حاله .......ثم انك علي أي أساس بتتكلمي معايا اصلا أبويا وأمك هما بس الي ليهم الحق

- فريدة :لا ليا حق طبعا هو مش انا اختك الكبيره والمفروض الحقك قبل ما تجيبي لينا أي مصيبه

- ندي:حلي مصبتك الأول يا فريدة وبعد كدا فكري فيا ......ومتقلقيش انا اعرف مصلحتي اكتر من اي حد

- فريدة :غبيه ......هتكرري نفس غلطه هبه وهدي وفي الآخر ترجعي تقولي ياريت الي جرا ما كان

- ندي :اطلعي بره يا فريدة وملكيش دعوه

# خرجت فريدة من الغرفه وهي تعلم نوايا ندي .....فندي تعتبر أصعب أخواتها في الطبع لا تستمع لنصيحة أي شخص وما تريد فعله تفعله حتي والديها يخافا منها أكثر من فريدة

# ""اتجهت فريدة الي الغرفه التي بها هيدي ونور وجلست بجانب هيدي علي السرير وفي السرير المقابل لهم نور ""

- فريدة :اومال فين البت نوال ويوسف

- نور:راحت تشتري حاجات لأمك وخدت يوسف معاها

- فريدة:النتيجه هتظهر امتا

- نور بغضب :يا شيخه يخربيتي علي يخربيت النتيجه

- فريدة :مالك يا اختي فيكي ايه

- هيدي :ابوكي قالها أنها مش هتروح الجامعه حتي لو جابت مجموع

- فريدة بصدمه :نعم .....قولتي ايه......مين الي مش هتروح الجامعه....""أكملت بصوتا عاليا"" بعد كل التعليم دا وفي الآخر هتقعد في البيت .....هو عايز يعيد نفس الكاره مع نور مش كفايه هبه وهدي علينا

# أسرعت فريدة الي الخارج وهي تبحث عن والدها حتي وجدته أمام التلفاز

- فريدة بكامل صوتها :انا مستحيل اسمح ليك تضيع مستقبلها عايز تضيع حياتها زي ما ضيعت حياة الي قبلها مستحيل مستحييييييل ......أنت مش عايز توديها ليه الجامعه جيب من الآخر ويارب ميطلعش الي في دماغي

- محمد:اهدي يا بت .....وبعدين هي هتكمل الجامعه تعمل بيها ايه مهي في الآخر هتروح علي بيت جوزها .....يبقي تأخذها من قصرها احسن

- فريدة :اه.....قول كدا بقي يعني الي في دماغي طلع صح ......مين هو مين هو الي اتكلم معاك علي نور

# أتت جيهان وندي والجميع علي صوت فريدة العالي

- جيهان :في ايه يا بت وطي صوتك

- فريدة :شوفي جوزك المحترم الي بعد التعليم دا كله عايز يدمر حياة بنته زي الي قبلها .....قال ايه مش عايزها تروح الجامعه وتقعد في البيت تطبخ وتغسل وتطحن زي زمان مش كفايه عليها التعب الي هنا عايزين تتعبوها في المستقبل كمان انتم .....انتم ايه بجد