#بارت_2
وصلت للدار في يدها الغربال ..مدتو لأمها و لصقت في مرت خوها تقلب فيها مرة تخزر للحنة مرة للحرقوس..
-صحة صحة مااحلاها حنتها و حرقوسك..
-يعيش خيتي العاقبة ليك و نشوفوك احلى عروسة...
تفكرت برهان بلعت ريقها و طبست راسها...قداش كانت عندها أحلام بنتها معاه حلمة حلمة ..من ليلة عرسهم حتى للصغار الي باش يجيبوهم لوين يكبروا و يعزعزوا و فلخر طلع كلام الليل مدهون بالزبدة هبطها بحبل و جبدها بجدادة (الجداد هو الخيط الي يستعملوه فالنسيج) عيشها حلمة وردية و فاقت على كابوس ...عام و نص معرس و يتمعشق معاها و يمني فيها بالعرس و هي كالبهلولة فرحانة و مصدقة في وقت الي مرتو حبلت و جابت صغير هو كان يعشم فيها ..نهار الي فاح الخبر فالدشرة قريب تهبل سكرت على روحها شهر لا خرجة و لا دخلة دازة كان عالبكاء ...ما رجعت فيها الروح كان ما وقفتلها أمها و خففت عليها الي صار...فيقتها من سهوتها سيرين كيف نخزتها...
-سيرين اش قلت ياخي.
هزت حاجبها ...
-عطوفة شبيها أختي أحكيلي شنوى مقلقك؟؟
-لا ما تحط شي في بالك مابيا شي (تصنعت الضحكة و كملت تحكي بتفرفيشها متاع العادة) اسمع مدام امي مشت تغربل أحكيلي ...اش عاملة انت و حاتم؟؟ مشيخك بالرومانسية كيما المسلسلات و الا يدخل فرندس..
اطرشقت بالضحك لين ماعادش فيها...
-يهلكك ربي منين ليك هالشي ..
-اسكت بربي عليا يرحم التلفزة و الفايسبوك يعلموا الي ما يتعلمش...هات احكيلي عالأجواء خليني نكسب خبرة. ..
-وخيتي انت هاك وقيلا خبرة أكثر مني انا اختك نعجة والله خوك ساعات يتنرفز قد ما هو يقلي كلام حلو انا نسمع يا نضحك يا وجهي يحمار يا نبلع لساني...
ضربت فخذها بيدها...
-يا شومك ما تقليش سبهلالى انت يلزمني نعلمك شوي مسكين وخي محروم ...
قرصتها باش توطي صوتها...
-سكر فمك لا تسمعنا أمك يا سخطة...ماهوش محروم هاو كل ليلة مبدع بحالتي مشكلتي انا مزالت ما تعودتش عليه ...
-يا ناري على روحي عامين مخطوبين ترنديف و تمعشيق و فلخر تقلي مازالت ما تعودتش عليه؟!
-مش كيف علاقتنا قبل كانت حدها حد كلام حب و لا كان طارت بوسة و الا تعنيقة مسروقة أما وخيتي العرس طلع شي اخر تحس روحك ديما حاشمة حتى باش تجي تقول كلمة باهية لسانك يكيكس و ما تنجمش تنطق حرف..
-عاد هاكم تقول معرسين عرس تقليدي مش عن حب...
-اتوا نشوفك انت كيف تعرس...
قربتلها أكثر لين لصقتها ...
-ايه و الشي بنين و الا هكاكة و برا؟؟
