#بارت_
جابت كاس تاي وحطتو قدامو مزالت ماخذة في خاطرها جات خارجة عيطلها تلفتتلو نص تلفيتة..
-فايزة شبيك هازة عليا خشمك...
-لا هازة لا حاطة مدامني الكلمة الي نڨولها ما تعجبش و حتى في أولادي ماعنديش حق نعطي رايي ...
شاورلها باش تقعد...
-باهي اراحي اقعدي خلينا نتحدثوا..
مانجمتش تعفس،كلامو جت قعدت و باقي مدورة وجهها...
-توا فهميني علاش تكرهي بنت سالم ..
-انا ماقلتش ما نكرههاش اما الحق متاع ربي ماهيش متاع دار طفلة ياسر دلولة و باباها حللها عيونها فوڨ اللازم نسيت اش يتحدثوا عليها العباد ...و انا خايفة على ولدي
-الي حكيتيه ما يجيش هاو انا سامية مدللها و خليتها قرت و كيف حبت تخرج لبرا وحدها بعثتها و قلت بنتي بألف راجل .. وكان جينا نسمعوا كلام الناس حد ما يعيش مرتاح و انت حكمتي على شطر الكاس الفارغ ...
-تقارن في سامية بيها سامية راي عڨل و ثڨل و مخها يوزن بلاد و ماعندهاش الزايد و الناقص ...
حرك راسو كلام مرتو ساعات يغششوا و يخليه يخرج عن طوعو...
-اتقي الله يا مراة راو الكلام في عرض الولايا من اكبر الكبائر و كيف ما انت تحكي على بنات الناس يحكوا على بنتك ...
وقفت تعفس...
-هاني ضميتو فمي و انت اعمل الي تحب غير ان شاء الله ما يجيش نهار و تندم ...
فالباب عرضتها بنتها....كلمتها ما جاوبتش تعدت لبوها قعدت بحذاه...
-شبيها يما ابابا...
-أمك تحب كل شي على كيفها ...البارح قلت لخوك عماد خطبتلو عواطف بنت عمك سالم و هي تقلبت عليا تقول قتلتلها باباها ...
تبسمتلو ...-وعلاش تقلبت؟؟..
-هاي قالتلك الطفلة ماهيش متاع دار و هاك الحديث متاع النساء...انت سامية بنيتي قوليلي غلطت في قراري؟؟ الطفلة بالحق ما تستاهلش خوك..
شدتلو يدو...
-بابا انا اعفيني ما نجمش نحكي عليها كلمة عيب لمجرد كلام سمعتو من عند العباد و مدام عماد قبل بيها اكيد قابلو صواب و هو ماهوش صغير باش انت تفرض عليه حاجة بالسيف مش هذا كلامك؟؟
ماهوش غالط وقت يرفع راسو و يقول اولادي هوما فخري في كل مرة ما يخيبولوش ظنو و ديما كلامهم في نطاق الاحترام و اجوبتهم تكون حاضرة...
-برا بنتي يسترك فالدنيا و الاخرى و يطيب خاطرك و يفرحني بيك...
باستلو راسو...
-مدام انت راضي عليا حمدالله ماطالبة شي...بابا انا باش نعلم الصغار القرآن و شاورت عماد يعطيني دارو وهو وافق..كان عرسو قريب خليني نشوف بلاصة أخرى نعرفو هو ما يقولش لا حتى بعد العرس اما انا ما نحبش ..
