#
متكي تحت التوتة تقلب يمين تقلب يسار فادد متيقر ڨبڨب التاي لين كرشو ولات برميل رمى عينو لفوق فما عرف توت قريب منو جبدو و نزل ينتش فيه و يرمي كملو زاد هز راسو لقى العرف لاخر قريب عاود نفس العملية مع خروج أمو شافاتو ينتش في ورق التوتة هزت اكتافها و هدت عليه ...مسها في واحد من أولادها و توتها لا رمت عليه مخدة ...عيط
-اوووو أحاجة شبيك تدز هكا فجعتني
-ندز؟فز يعطك لفع يجيك يلز هكا التوتة يا عايق اش دنتلك نسلتها اااه اوڨف ماليوم ڨعدة تحتها مضمض..
تقعد و تربع ...
-حرام عليك ميمتي حسستني التوتة اغلى مني..
-هلا مشي أغلى منك يا رخيص يا هامل يا بطال يا ضايع....
شنف شفايفو و حرك راسو و ميل يدو ..
-اررررررا عاااد هاي جتها الحالة اش يسلكها..
مدت حكة السكر و جت تتلبزو بيها...
-سمعتك يا واطي توا ما تحشمش على روحك نهار الكل مطيش كالعطن لا خدمة لا ڨدمة ..
عاود تمد على ظهرو و حط مرفقو تحت راسو مكالي بيه روحو و علق رجل فوق رجل...
-هاني نخدم يما وخيتي ما عجبتكش خدمتي ؟ و بيناتنا مالقيت شي يرضيني نحب حاجة اوريجين..
ميلت راسها ...
-اشبح اسيدي يحب الوريجين ولد الحلوف يتدلل على ڨفة الشهايد الي عندو و هو ماخذ السيسيان بالسيف ...
-ايما يقولو سيزيام مش سيسيان اي وشبيه راو شكون و شكون يوخذها بالك مسيبة هي ..
-انا هي الي تنتسيب عليك توا و نسلخ جلدك اذهب وهف يلمك شوف خوك ربي عاطيه كل شي بكمالو هداية و عقولية و انت فاسد و هامل و خامج اتبع كان فالهمال شفتش ولد خالتك هانو صبح ضارب ڨاورية و يخدم لباس عليه
عاود تربع و حك راسو..
-اي والله فكرتيني يما زعمة كنتك ما توخذنيش لأمها هاي قريب تجي برحمة ابيك أحكي معاها...
المرة ماعادش عندها وين يدور الريح تقعدتلو و هبطت عليه تضرب و تعض و هو يتوحوح ما سيب روحو منها كان بطلوع الروح...شادد كتفو يتوحوح.
-اب اب ايما سنة لا و عضعضتيني ...
-اهامل ارخيص اندادك الا ما يجي ابيك نمكنو فيك يهججك مالدار ..
مزالت تعاير و تعارك و كشاكشها طالعة روح ولدها عماد ...عرضو خوه فالباب يسمع في حس امو عرفها لاحمة بينها و بين خوه...
-شنوة جنيد كالعادة مرمداتك يماا...
-لولا الطاف ربي قريب تنحلي لحمة ...
