لما كنا صغار
الفصل التاني❤️
اشرقت الشمس ف نهضت تتوضأ وبدأت في الصلاة ثم خرجت لتأتي بفطور بسيط لها وشقيقتها وعادت لتجدها استيقظت
سارة بنعاس : صباح الخير يا سوسو صاحية بدري ليه كدا
سلمي : خلاص اتعودت اصحي بدري قولت اخرج اجيبلنا ساندوتشين فول وجبت جرنال هشوف الشغل فيه يمكن القي حاجة تناسبني
سارة : ان شاء الله هتلاقي شغل احسن من الي كنتي فيه
جلست سلمي تقضم شطيرة الفول وتقلب في االوظائف المتواجدة في الجريدة حتى عثرت علي عنوان لفت انتباهها ف انتفضت بأمل
سارة : مالك وقفتي كدا ليه
سلمي : في شركة طالبة موظفين في جميع المجالات شكلها لسه هتفتح
سارة : وانتي بتفكري تروحي تقدمي؟
سلمي : هروح طبعا دي فرصة
سارة بتردد : بس هتشتغلي ايه ف الشركة يا سلمي انتي يعني
صمتت بخجل لتكمل سلمي عنها
سلمي بحزن : مش مكملة تعليمي عارفه يا ساره بس هجرب حظي اشتغل اي حاجة ان شالله ف الامن بس اشتغل
ساره بحماس : ايه رأيك ادور علي شغل انا كمان واحاول اوفق بين شغلي وكليتي
هتفت سلمي بحزم : اوعي تفكري في الكلام دة تاني فكري في كليتك ودراستك دة اهم حاجة
ثم احتضنت وجهها بحنان ام
سلمي : مش عايزاكي تعاني زيي عايزاكي احسن واحدة في الدنيا ولو عايزة تشيلي عني شوية اتجدعني واطلعي من الاوائل في الكلية وانا هبقي مبسوطة اوي
ابتسمت لها سارة فا سلمي ليست شقيقتها فقط هي أمها وصديقتها وكل ما لها
__________________________________________
وصل الي مطار القاهرة ليجد احدهم في استقباله اوصله الي الشركة التي لم تُفتتح بعد لتقابله دارين ابنة عمران شريكة
دارين : حمدلله علي سلامتك يا خالد بيه
خالد : الله يسلمك يا انسة دارين ها ايه اخبار الشغل
دارين بإبتسامة وهي تشير للمكان حولها : زي ما حضرتك شايف كدا كل حاجه تمام من الاسبوع الجاي هنبدأ شغل
شعر بالحماس في نبرتها فأبتسم
خالد : من البداية كدا ياريت نشيل الألقاب لاني حاسس انها تقيله اوي واحنا هنبقي طول اليوم مع بعض
دارين ضاحكة : انا بقول كدا برضو
سارو سويا لتعرفه دارين علي الشركة بجدية وعمليه
وعلم انها أشرفت علي كل شئ فيبدو ان والدها كان علي حق عندما اخبره ان دارين عملها اولي اولوياتها في حين ان شقيقته ايضا علي حق فا دارين مختلفه كليا عن شقيقتها المدلله.
__________________________________________
عادت للمنزل بسعاده بعد ان تم قبولها في العمل لتجد ساره نائمة بتكاسل علي الفراش فا جلست توقظها
سلمي : سارو يلا قومي ياكسلانة حد ينام لحد الضهر كدا
ساره بنعاس : سيبيني ياسلمي انام الجامعة هتبدأ بكره وهصحي من بدري
سلمي ضاحكة : اه واكتر حاجة تكرهها ساره هي الصحيان بدري
ثم عادت تهتف بها : طب قومي يلا بقي عشان عايزاكي في مشوار
ساره : مشوار ايه ياسلمي دلوقتي
سلمي : لو مقومتيش هاخد الفلوس الي معايا دي وانزل اشتريلي انا بيهم لبس
انتفضت ساره مستيقظة
ساره : لبس فلوس هي فين وجبتيها منين
سلمي ضاحكة علي هيئتها : مش مهم تعرفي المهم اني جبت فلوس وهننزل نشتريلك كام طقم كدا للجامعه عشان انا ميرضنيش ان اختي حبيبتي الصغننه تروح اول يوم جامعه بلبس قديم
نظرت ساره لها بقوه ثم ادركت فا وضعت كفها علي فمها
ساره : انتي بعتي حلقك
تحسست سلمي اذنها
سلمي : اه هو اصلا قدم اوي وموضته بقت قديمه فا قولت ابيعه
ساره بحزن : سلمي انتي بتعملي كل دة عشاني وناسية نفسك
سلمي بحنان : امال اعمل عشان مين ياعبيطة هو انا ليا غيرك
احتضنتها ساره بقوه وعيون دامعه
ساره : انا بحبك اوي يا سلمي انتي احسن اخت في الدنيا كلها ربنا ميحرمنيش منك
ثم ابتعدت تمسح عينيها
ساره : صحيح عملتي ايه في الشغل؟
سلمي : اتقابلت الحمد لله
ساره : بجد وهتشتغلي ايه بقي في الشركة
سلمي بارتباك : ااا هشتغل في في في الارشيف يعني شغلانه علي قدي كدا
ساره بسعاده : الله ياسوسو اهي احسن من شغلانه الجرسونه بكتييير علي الاقل بيكونو قاعدين علي مكاتب وكدا والله شكلها هتحلو فعلا
ثم سارت تدندن وهي ذاهبه للمرحاض فاغمضت سلمي عينيها تتمني ان لا تنكشف كذبتها.
أنت تقرأ
لما كنا صغار
Romansتدور احداث الرواية عن فتاة وفتى كانوا اصدقاء مقربين في الصغر حتى هاجر الفتى خارج البلاد وابتعدوا لتتبدل احوالهم ويعود الشاب بعد عشرون عاماً باحثاً عن صديقته الصغيرة ليتفاجئ بحالها الذي تبدل كثيرا عن قبل..
