တနည်းနည်းဖြင့် မိတ်ဆွေတချို့ကို ဆုံးရှုံးရတတ်ခြင်းသည် ဘဝရဲ့တကွေ့၌ လူတိုင်းကြုံတွေ့ရတတ်သည့် လောကဓံပေတည်း။ ဂျူနီယာသည် ယခုမူ ထိုလောကဓံရဲ့အရသာကို လက်ဖက်ရည်ထဲထည့်ဖျော်ကာ လွမ်းလွမ်းဆွေးဆွေးသောက်နေမိလေသည်။ သူထိုင်နေသော စားပွဲဝိုင်း၏ဘေးပတ်လည်တွင်မူကား လက်ဖက်ရည်ဆိုင်၏သရုပ်သဏ္ဍာန်ရှိသည့်အတိုင်း လက်ဖက်ရည်သောက်ရင်း စကားစမြည်ပြောသူပြော၊ ဝိုင်းဖွဲ့၍ ဖုန်းဂိမ်းဆော့သူများဆော့၊ တီဗွီဖန်သားပြင်ပေါ်က အားကစားပွဲ ကြည့်သူကကြည့်ဖြင့် အရင်ပုံမှန်နေ့ရက်တွေနဲ့ ဘာမှ မခြားသလိုပါပဲ။ ဗန်ဒါပင်အိုကြီးရဲ့အောက်၊ သစ်သားခေါက်ကုလားထိုင်လေးပေါ်မီပြီး ဆေးလိပ်ကြီးဖွာတတ်သော ဆိုင်ပိုင်ရှင်အညာသားကြီးကိုကား အားလုံးသတိရမိတန်ကောင်းပါရဲ့။
" ဒီညမှာ ကိုအရှည်ကြီးသာရှိနေသေးရင် သူ့မျက်နှာမှာအပြုံးတွေဝေနေမှာပဲ။ ဟိုအရင်ကဆို ဂျူနီယာစာမေးပွဲသွားဖြေပြီဆိုလေ ဆိုင်မှာဆွမ်းခံလာကြွတဲ့ကိုရင်လေးတွေကို ဆွမ်းလှူပြီးတဲ့အပြင် လက်ဖက်ရည်နဲ့မုန့်ကိုပါကပ်ပြီး ဂျူနီယာစာမေးပွဲဖြေနိုင်ပါစေ ဆုတောင်းတတ်တာပဲ။ "
ပန်းသည်ကိုမြ၏ ပြန်ပြောင်းပြောပြနေပုံကို နားထောင်ရင်း မုန့်ဖတ်ထုပ်သည်အဖိုးမှာ စိတ်ထိခိုက်ကြေကွဲလာ၏။ အဖိုးသည် ဂျူနီယာ့အား သနားဂရုဏာသက်သောမျက်ဝန်းမှုန်မှုန်တို့ဖြင့် ကြည့်နေလေသည်။ သူတို့အဖို့ ကိုအရှည်ကြီးရဲ့ကွက်လပ်နေရာဘေးတွင် ထိုင်နေသော ဂျူနီယာ့ကိုမြင်ရလေ မရှိတော့သည့်ကိုအရှည်ကြီးအား သတိရမိလေ ဖြစ်နေကြရှာ၏။
" ကိုအရှည်ကြီးပိုင်ခဲ့တဲ့ ဒီဆိုင်လေးလည်း တခြားသူလက်ထဲရောက်တော့မှာပဲ။ အရာရာဟာ ဘာမှမမြဲခြင်းပါပဲလေ။ ဂျူနီယာ ကိုအရှည်ကြီးမရှိမှတော့ နောင်ဆိုဒီဆိုင်လေးကို မင်း ဘယ်လာချင်တော့မှာလဲ ဟုတ်တယ်မလား "
ကိုမြက မေးသည်။
" ဒီဆိုင်လေးမှာ အရင်လူတွေမရှိတော့မှတော့ ကျွန်တော်လည်း ဆက်ရှိနေဖို့အကြောင်းမရှိတော့ဘူးပေါ့။ "
ထိုအဖြေကို ဂျူနီယာသည် အဖျော်ဆရာကိုလှမ်းကြည့်ရင်းမှ ပြန်ဖြေလိုက်ခြင်းဖြစ်သည်။ ဟုတ်ပါသည်။ အဖျော်ဆရာဆိုတာကလည်း ကိုအရှည်ကြီးရဲ့ ဆွေမျိုးရင်းလိုဖြစ်နေသည့်သူတစ်ဦး။ ကိုအရှည်ကြီးမရှိတော့သည့်နောက် သူလည်း ထွက်သွားတော့မည်ဟုဆုံးဖြတ်လိုက်ပုံရပါသည်။ နယ်ကိုပြန်ကာ သူ့ကိုယ်ပိုင်လက်ဖက်ရည်ဆိုင်လေး ဖွင့်မယ်လို့တော့ ပြော၏။
DU LIEST GERADE
ဂျူနီယာ ( completed )
Romantikဂျူနီယာသည် သာမာန်ခပ်အေးအေးနဲ့ ဘာမှမထူးခြားတဲ့ လူငယ်လေးတစ်ဦးပါပဲ။ သူ့ဘဝထဲ အလှည့်အပြောင်းတချို့ဖြစ်လာတဲ့အခါမှာ ထိုအပြောင်းအလဲတွေထဲ ချစ်ခြင်းမေတ္တာတွေပါဝင်လာပါတယ်။ ထိုအခါမှာ ဂျူနီယာ သူ့ရဲ့နုငယ်ဖြူစင်သေးတဲ့ နှလုံးသားလေးနဲ့ ဘယ်လိုတုံ့ပြန်မှုတွေဖြစ်လာလေမ...
