احد بيوت الرياض (بيت ماهر ال ماطر)
وقفت نورة مفجوعة من ريام وجواد اللي نازلين من الدرج جري واصواتهم زعزعت البيت من الصراخ : ياااجوواد وشفيكم يمه لا تطيحون بسم الله وشفييه؟
وقفت ريام اللي شدت شعر جواد لجل ما يسبقها : يمه ريان وزوجته وبناته جوو
ناظرتهم نورة بذهول : وكل هالحماس لجل اخوكم وبناته؟
رد جواد على امه : يمه شتقنا لرنين
ابتسمت نورة وقامت معهم وهي تهمس : ما اقول غير الله يخلف عليكم يا وليدي
كملت ريام جري واول ما فتحت الباب شافت رنيم وهي تفتح نقابها ورنين اللي معها شنطة ظهرها وتحاول تساعد ابوها بتنزيل باقي الشنط صرخت ريام تجري وفز ريان يصارخ : شفيك انتي هالقد مشتاقة يعني
ردت ريام اللي ماسكة رنين تبوس فيها وتحضنها : ريان شسوي طيب بناتك واحشيني كثيير وما صدقت جات الاجازة لجل اشوفهم
ناظرها ريان وابتسم بذهول : طيب جاملي شوي قولي وحشتني يا اخوي بعدين رنيم ورنين قاعدين على قلبك الحين مو تاركي
ما كمل ريان كلامه من صراخ رنيم اللي داخل اسوار البيت : يببااااا
دخل جري ومات ضحك من شاف منظر بنته واخوه جواد اللي شايلها يجري فيها لداخل البيت : مافي يبه يا حلوتي حطيت السوني خلني اجلدك شوي قبل تجي رنين تكسر راسي
رجع ريان يكمل تنزيل اغراضهم ودخلت زوجته ورنين اللي مسكت يد ريام توقفها:ريام قلتي للعاملات يجهزون غرفتي؟
هزت ريام راسها بأيه وكملت رنين : ارسلت للبواب عشان اليوم بتجي طلبيتي على بيت جدي لكن مارد ليه؟
ردت ريام وهي تسحب رنين لداخل البيت : غير رقمه ما عليك أنا اكلمه ياخذها تامرين أمر انتي
ابتسمت رنين ودخلت الصالة ولقت جدتها جالسة بجلال صلاتها وجات بتقوم لكن رنين وقفتها : خلك ياامي لا تتحركين اجي لعندك أنا الحين
خلت عبايتها بيدين العاملة وراحت لجدتها اللي تهلي فيها : اهلين يا امي انتي شلون ما أقوم وانتي واختك نورتو البيت من دخلتوا ؟ كيف امي قوليلي ؟
ابتسمت رنين ورنيم من وراها وهم يسلمون على يديها وراسها وجلس ريان اللي مثل الزعل بدون ما يتكلم وناظرته نورة بذهول : شفيك ما تسلم يا ولد
ميل ريان شفته ورد عليها بتمثيل للزعل:تخونيني يمه عشان بناتي سكت على ريام يوم جات تسلم لكن انتي يمه ماهقيتها منك والله !
وجا يقرب منها بينسدح بحضنها سلم على رجولها وجا بيعدل نفسه وما لقى الا ذاك العقال اللي انرمى عليه وفز يبعد عن امه من عرف ان ابوه جا من دوامه : حيي عينه الوالد
ناظره ابوه بطرف عينه وأخذ ريان يد ابوه يسلم عليها ونطق ماهر : هالحركات يا ريان نعرفها من جواد وريام مو منك يا ابو البنات تخليني امد يدي قدامهم شكل البعد خلاك مايع يا ولد
