تـَرفه بنتَ الّ زايـد

٧

..

كانت ترفه قاعده وعندها ام سليمه المداويه وهي تداوي لها يدها الي ماعاد فيها حيل تنجبر..

ام سليمه:"لا حول الا بالله هذا تعيب الروح ورا ماهربتي ولا احتمتي يوم سوا فيك كذا!"

ترفه:"وش اقول يا عمه ام سليمه كبر الجمل وقوته بس هنا"

ام سليمه:"خلي قطعة القماش ولا تنزلينها لين انا اقولك نزليها والله يعين"

قامت ام سليمه وهي تلم عفشها الا وهذا فضلان داخل عليها وفزت ترفه بس ام سليمه وقفت قدامها مو مخليته يمد يده عليها..

فضلان:"ام سليمه ازحفي ولا تدخلين!"

ام سليمه:"وش بتسوي بها بعد!!...خاف ربك يالمجرم ولله لو ترفع يدك عليها اني لا اقول لشيخ الجماعه عنك!"

فضلان:"شيخ الجماعه هو الي قالي اكسر رجلينها عشان ماتروح!"

ام سليمه:"وشهوا!!..فضلان ابعد اشـ.."

سكتت ام سليمه يوم دخل عثمان عند عمه وهو يناضر بترفه وحالها

عثمان:"عمي!..فيه رجال جاي مع سعد من ديرة الشيخ ذياب وقلطهم شيخ الديره!"

فضلان:"خليني ادري ان لك سالفه بهذي!"

طلع فضلان وترفه ادركت ان هذي هي فرصتها الاخيره اذا  ما خاطرت ما بتقدر تعيش..

..

شيخ ديرة ام البراقع:"حي الله اخو الشيخ ذياب سالم و ولد ديرتي سعد"

سالم:"ياشيخ انا جيتك طالبك طلبه ومابيك تردني!"

شيخ ديرة ام البراقع:"انطق واعتبره صاير"

سالم:"جزاك الله خير..انا هنا باخذ امانتي من بنت ديرتكم ترفه بنت الزايد رحمة الله عليه"

شيخ ديرة ام البراقع:"من هي ولله ياخوك الديره كبيره ماعرفتها"

سعد:"انا ولد عمها ياشيخ وقد قلت لك عنها"

شيخ ديرة ام البراقع:"اي عرفتها!..هي عند عمها فضلان الي حسبت ابوها بس بقنعه انه يخليك تهرجها وتاخذ امانتك"

سالم:"جزاك الله خير"

شيخ ديرة ام البراقع:"بس قبل ذا دام اننا تصالحنا ابيك تعشى وخذ امانتك بعدها"

سالم:"ابشر"

رد سالم على الشيخ والتفت على سعد وهم متفقين بطريقهم..